EXPLAINERS

Isa sa pinakamasakit na pangyayari sa buhay ng isang tao ay ang mawalan ng mga magulang, kung kaya kadalasan ay all-out ang mga anak para sa pagbibigay respeto sa kanilang mga magulang hanggang sa maihatid ito sa kanilang huling hantungan. Pero ang lalaking ito sa japan, tila tinipid pa ang kaniyang ama at hindi man lang binigyan ng maayos na burol at libing.

Ang buong detalye ng ginawa ng lalaki, eto.

Nag-alala ang mga kapitbahay ng 56-anyos na si Nobuhiko Suzuki nang isang linggo nitong hindi binuksan ang kaniyang chinese restaurant sa Tokyo, Japan.

Dahil dito ay agad na inabisuhan ng mga ito ang mga pulis para kumustahin ang lalaki.

Pero sa halip na makumusta ang lagay ng nasabing lalaki, isang nakagigimbal na balita ang nadiskubre ng otoridad at yan ay ang mga nakatagong kalansay ng tatay nito sa isang cabinet.

Ayon mismo kay Suzuki, natagpuan niya na lang isang araw na wala nang buhay ang kaniyang noo’y 86-anyos na tatay noong January 2023.

Inamin niya rin mismo na ang dahilan para itago niya ang bangkay ng kaniyang tatay ay dahil sa malaking gagastusin kapag ipinalibing ito.

Dahil ayon sa survey ng isang local funeral service provider, aabutin ng 1.3 million yen o halos limandaang libong piso ang average funeral sa Japan.

Samantala, inaresto na si Suzuki at sumailalim sa imbestigasyon dahil sa umano’y pagnanakaw nito sa pension ng kaniyang tatay.

Ikaw, anong masasabi mo sa masalimuot na sinapit ng tatay na ito sa mga huling sandali niya sa mundo?

Isang Filipino photographer ang na-miss ang opportunity na personal na maparangalan sa ikalawang pagkakataon sa isang international awarding ceremony nang dahil sa denied na visa

Kung ano ang buong kwento, eto.

Nakatanggap ng imbitasyon ang Filipino photojournalist na si Noel Celis na dumalo sa World Press Photo (WPP) sa amsterdam para tanggapin ang Golden Eye Award na napanalunan ng kaniyang entry na “Four Storms, 12 Days.”

Ipinapakita sa mga litrato ang naging karanasan ng mga Pilipino nang sunud-sunod na hagupitin ang bansa ng bagyong Marce, Nika, Ofel, At Pepito, bago nagtapos ang 2024.

Pero hindi naka-attend si Celis sa nasabing awarding.

Ibinahagi niya sa kaniyang social media account na na-deny ang kaniyang visa dahil wala itong naipakitang mga dokumento na magpapatunay na isa siyang empleyado dahil freelance work ang mga kasalukuyan niyang tinatanggap.

Dahil dito, pinaghinalaan ang photographer na baka mag-TNT o “tago nang tago” ito sa Amsterdam, o ‘yung pagtatrabaho sa ibang bansa nang walang mga legal na dokumento.

Pero nilinaw ni Celis sa kaniyang post na hindi siya nag-apply ng tourist visa, sa halip ay imbitado siya at isa pa ngang awardee.

Sumali si Celis sa WPP para ipakita sa buong mundo ang isa sa mga suliranin na kinakaharap ng mga Pilipino. Dagdag niya pa, makita lang daw ng mas malaking audience ang mga litrato ay isa nang accomplishment para sa kaniya.

Samantala, hindi ito ang unang beses na nakatanggap ng award si Celis mula sa WPP dahil noong 2017 ay nanalo ng 3rd prize ang kaniyang entry na “The Philippines’ Most Overcrowded Jail.”

Sa muling pagkapanalo niya ngayong taon, napabilang si Celis 42 regional winners na napili ng jury mula sa 3,778 photographers na lumahok mula sa 141 mga bansa.

Gayunman, sinabi ng award-winning photographer na ipapadala na lang ng WPP ang kaniyang panibagong karangalan.

Ikaw, anong masasabi mo sa nakapanghihinayang na naranasan ng photographer?

Sa mga kalalakihan diyan, normal naman na matakot kay misis, pero tama ba na mag-imbento ka ng krimen at magpanggap na biktima para lang pagtakpan ang kasalanan mo? Ganyan ang ginawa ng isang lalaki na ginastos pala sa ibang bagay ang perang bigay ni misis na pambayad ng kuryente.

Kung ano ang kinahinatnan ng lalaki, eto.

Tila isang biktima na nag-report sa Island Garden City of Samal (IGACOS) City Police ang hindi pinangalanang lalaki na na-holdap umano siya sa Brgy. San Agustin, Samal Island.

Nalimas umano ng mga armadong lalaki ang dala-dala niyang sampung libong piso na ibinigay ng kaniyang misis para ipambayad sa kuryente.

Pero nagsimulang magduda ang mga pulis dahil paiba-iba ang naging statements ng lalaki sa mga katanungan nila.

Bagamat sinubukan pang makalusot ng lalaki, sa huli ay umamin din ito na wala talagang naganap na panghoholdap dahil ang totoo, itinaya niya lang sa Small Town Lottery (STL) ang perang pambayad sana ng kuryente.

Nagawa lang umano ng lalaki na magsinungaling dahil sa takot niya sa kaniyang misis.

Samantala, nagbigay ng paalala si IGACOS City Police Chief, Lt. Col. Hamlet Lerios na hindi maloloko ang mga pulis pagdating sa mga kaparehas na insidente dahil sanay ang mga ito sa pagsasagawa ng mga imbesitgasyon.

Dahil sa ginawang pagsisinungaling ng lalaki ay napatawan ito ng kaso sa ilalim ng Presidential Decree 90 o ang pagpapakalat ng maling impormasyon.

Sa mga mister diyan, hanggang saan aabot ang pagdadahilan mo, wag lang mabisto ni misis ang kasalanan mo?

Ika nga nila, high school life ang pinakamasaya at pinaka-memorable na stage sa buhay ng isang tao at dapat sinusulit ang bawat sandali nito. Kung kaya ang circle of friends na ito sa Cabuyao, Laguna, binonggahan ang kanilang presentation sa parents ng isa nilang kaibigan para makasama ito sa fieldtrip.

Napapayag nga ba nila ang mga magulang? Alamin.

Sa isang video na nag-viral sa social media, makikita ang isang grupo ng magkakaibigan na suot-suot pa ang kanilang school uniforms na tila nagpe-present sa harapan ng mga magulang ng kaibigan nila na si Ethan Kalaw.

Gabi na nang kuhanan ang video, pero ang energy ng mga estudyante, mas mataas pa sa sikat ng araw! Paano ba naman kasi, performance level ang pagpapaalam ng mga ito para lang payagan si Ethan na sumama sa kanilang fieldtrip na tinawag na Lakbay 2025.

Nagsilbing tila isang emcee ang isa sa mga estudyante habang ang iba pa naming kasama ay may kaniya-kaniyang participation sa pamamagitan ng paglalatag ng mga detalye tungkol sa Lakbay 2025.

Sinabi nila na sa pangasinan gaganapin ang kanilang fieldtrip na magsisilbi ring spiritual activity. Bukod pa riyan, grade 10 na rin daw sila at ‘’yon na ang pinakahuling beses na magkakasama-sama sila sa fieldtrip at simula pa noong grade 8 ay hindi nakakasama si Ethan.

Nangako pa ang mga ito sa mga magulang ni Ethan na iuuwi nila ito nang buhay, masaya, at buo.

In the end, matagumpay nilang napapayag ang nanay ni Ethan matapos siguruhin na kumpleto ang magkakaibigan sa Lakbay 2025.

Ikaw, ano ang pinaka-memorable na kwentong fieldtrip mo?

Sa video na ito, mapapatunayan na si Bantay ay talaga ngang alertong nagbabantay sa kaniyang mga amo at to the rescue nang biglaang malagay sa alanganin ang buhay ng mga ito.

Ang buong kwento ng kabayanihan ng aso, eto.

Alas dos ng madaling araw nang pasukin ng tatlong lalaking kawatan ang isang farmhouse sa Gujarat, India na pag-aari ng farmer at supplier na si Amit Theba.

Inatake umano ng isa sa mga suspek si amit, pero nang matagumpay siyang makatakas mula rito ay agad niyang nilapitan ang alaga nilang aso na si Johnny.

Mapapanood sa isang CCTV footage kung paano tinanggal ni Amit ang pagkakatali kay Johnny, habang makikita naman ang isa sa mga kawatan na sinubukan pang pumalag mula rito.

Pero nang tuluyang makawala si Johnny, wala nang nagawa ang mga kawatan kundi tumakbo na lang papatakas.

Sa kabutihang palad ay walang napahamak sa pamilya ni Amit at ligtas na nakalabas ang mga ito para i-report sa Tankara Police Station ang insidente na posibleng personal na hidwaan ang dahilan.

Mabuti na lang at agad na na-pick up ng german shepherd na si Johnny ang signal na mayroong masasamang loob sa kanilang teritoryo at tila handang-handa na sumugod sa mga ito.

Dahil sa nag-viral na video ay inulan ng papuri mula sa netizen ang katapangan at matagaumpay na pagtatanggol ng aso sa kaniyang mga amo at itinuturing pa na local hero ngayon.

Samantala, ginamit naman ang CCTV footage para tukuyin ang mga nanghimasok sa farmhouse.

Ikaw, ite-train mo rin ba ang alaga mong aso katulad ni Johnny na maging alerto sa panganib?

Kakayanin ba ng pasensya mo na hintayin ang pension na makukuha mo mula sa ilang taong pagtatrabaho o paiiralin mo ang pagiging mainipin at gagawa na lang ng hindi maganda para sa easy money? Ganyan ang nangyari sa isang japanese man na sa isang iglap ay nawalan ng malaking halaga ng retirement package matapos mangupit.

Kung ano ang buong kwento ng lalaki, eto.

Sa tulong ng dashcam ng isang bus, nadiskubre ng Kyoto Municipal Transportation Bureau ang ginawang pangungupit ng isang driver sa pamsahe na ibinayad ng mga pasahero na nagkakahalagang 1,150 yen o $7.

Ngunit nang komprotahin ang driver ay itinanggi pa rin nito ang paratang at nagsampa ng kaso laban sa Kyoto City.

Dahil sa ginawang pagnanakaw ng pamasahe ay natanggal ang lalaki sa trabaho at ang pinakamasaklap sa lahat ay hindi na rin nito matatanggap pa ang kaniyang pension na nagkakahalaga ng 12 million yen o $84,000 mula sa 29 na taon niyang pagtatrabaho.

Pansamantalang pumanig sa lalaki ang ruling ng korte dahil sobra-sobra raw ang ipinataw rito na parusa.

Pero nang ilabas ang final verdict ng Korte Suprema, pinanigan nito ang Kyoto City at binigyang diin na maaaring masira ang tiwala ng publiko sa serbisyo na ibinibigay ng bus operators dahil sa ginawa ng nasabing driver.

Samantala, bukod sa pagnanakaw ay nadiskubre na makailang beses itong gumamit ng e-cigarette habang nasa duty, bagamat walang mga sakay na pasahero.

Ikaw, ipagpapalit mo ba ang pinaghirapan mong pension para sa panandaliang maliit na halaga ng pera?

Kaniya-kaniya talaga ng paraan ang mga tao makatakas lang sa pagkakasala na ginagawa nila. Katulad ng lalaking ito sa thailand na bigla na lang nilunok ang bitbit niyang droga nang habulin ito ng mga pulis sa kalsada.

Kung ano ang kinahinatnan ng lalaki, eto.

Isang gabi habang rumoronda sa isang kalsada sa Thailand si Police Sergeant Major Paphawin Damuang ng Bang Phli Police kasama ang kaniyang kapwa pulis, napukaw daw ang pansin nila ng isang kahina-hinalang sedan na nakaparada sa gilid ng kalsada.

Habang papalapit daw sila sa nasabing sasakyan ay bigla na lang itong humarurot paalis, dahilan para habulin nila ito.

Pero ang sedan, naipit sa traffic! Kung kaya lumabas ang driver nito at nagtatakbo papalayo habang mayroong bitbit na plastic na naglalaman ng 100 piraso ng methamphetamine pills na isang uri ng iligal na droga.

Pinilipit pa raw ng mga pulis ang lalaki na iluwa ang plastic, pero nginuya niya pa ito at tuluyang nilunok!

Dahil dito ay nagkombulsyon ang lalaki at bigla na lang nawalan ng malay.

Habang hinihintay ang ambulansya ay binigyan ng first aid ang lalaki, at nang dalhin ito sa ospital ay doon na-recover ang nilunok nitong plastic kung saan nadurog ang mga nasabing illegal na droga.

Samantala, nang maka-recover ang lalaki mula sa pag-aagaw-buhay ay mahaharap naman ito sa patung-patong na kaso na dadagdag sa apat na dati niyang mga kaso na may kinalaman din sa droga.

Ikaw, paano ka tumatakas sa mga kasalanan mo kapag nagkakabistuhan na?

Kung ang ibang estudyante ay naluluha o naiiyak pa sa graduation dahil sa posibilidad na magkakahiwalay na sila ng kanilang mga kaklase o kaibigan na ilang taon nilang nakasama, ibahin niyo ang estudyante na ito dahil nagmamartsa pa lang, umiiyak na agad. Hindi dahil sa mga kaklase niya, kundi dahil sa tatay niya na bigla na lang sumulpot sa tabi niya habang nagmamartsa.

Ang kwento ng estudyante, eto.

Isa sa mga nag-viral na video sa ginanap na graduation ang umantig sa puso ng mga netizen online dahil sa napaka-genuine na reaksyon ng isang junior high school completer nang bigla na lang sumulpot ang kaniyang tatay.

Sa video, makikita ang estudyanteng lalaki na katabi ang kaniyang nanay habang nakapila at naghihintay sa pagkakataon na siya naman ang magmartsa.

Pero sa kalagitnaan ng paglalakad, laking gulat ng estudyante nang biglaan na lang may umakbay sa kaniya at nang tingnan niya kung sino ito, napahinto ang estudyante sa pagmamartsa at hindi naiwasang maging emosyonal nang makita ang kaniyang tatay.

Tuluyan nang napaiyak ang estudyante habang nakayakap sa kaniyang tatay habang pinanonood sila ng ibang attendees na naantig din sa nasaksihang surpresa.

Marami ang naantig at nagpaabot ng pagbati sa comment section ng video pero may iilan din na nalungkot nang ibahagi nila ang kanilang mga kwento nang maranasan nilang grumaduate nang hindi kasama ang kanilang magulang.

Ikaw, pwede mo bang i-share ang kwentong graduation mo?

Ang pangarap ng isang young couple na magpakasal, muntik nang hindi matupad dahil sa isang trahedya na tumapos sa kanilang buhay. Pero dahil sa kanilang supportive families, kahit paano ay nabasbasan ang kanilang pagsasama hanggang sa kabilang buhay.

Ang buong kwento, eto.

Aksidenteng nagtapos ang buhay ng magkasintahang sina Bernard de Mesa Jr., 22-anyos, at Mikaela Parel, 20-anyos, matapos sumemplang ang sinakyan nilang motorsiklo habang binabaybay ang isang kalsada sa Brgy. Pilar Sta Maria Pangasinan.

Sa kasamaang palad, nangyari ito sa mismong kaarawan ni Bernard at bago pa mag-apat na taon ang kanilang relasyon.

Hindi tipikal ang naging libing ng young couple na ito dahil ang kanilang supportive families, ipinakasal ang dalawa sa mismong libing bago pa ihatid ang mga ito sa kanilang huling hantungan.

Ito ay dahil ang mismong pamilya nila Bernard at Mikaela ay nasaksihan kung paano nagmahalan ang dalawa kung kaya tinupad nila ang pangarap ng mga ito na maikasal sa isa’t isa.

Ngunit ang ginawang seremonya para sa pag-iisang dibdib ng dalawa, hindi raw kinikilala ng simbahan dahil ayon kay Rev. Fr. Bayani Flores, kinakailangan ang consent ng magkasintahan bago sila ikasal.

Ngunit ayon sa nanay ni Bernard na si Janice, alam nila na gusto rin naman ng magkasintahan na maikasal at naniniwala sila na si Mikaela at Bernard ang itinadhana para sa isa’t isa.

Ikaw, anong masasabi mo sa nakapanghihinayang na future sana ng dalawa nang magkasama?