EXPLAINERS

Madalas ay ang bride ang pinakahuling hinihintay na dumating sa kasal at ang kaniyang entrance ang isa sa pinakainaabangan ng mga bisita. Pero ang bride na ito sa Florida, paniguradong grand entrance talaga ang ginawa dahil na-late na nga ito sa mismo niyang kasal, pinahinto pa ng pulis dahil sa humaharurot nitong sasakyan papunta sa venue.

Kung nakahabol sa kasal ang bride, eto.

Sa isang video na in-upload ng Port St. Lucie Police Department, makikita ang isang sasakyan na pinahinto sa gilid ng Crosstown Expressway sa Florida dahil sa bilis ng takbo nito na umabot ng 105 miles per hour.

Kasunod nito ay ang paglapit ng pulis sa sasakyan kung saan makikita ang mga pasahero nito na isang babae at isang lalaki na kapwa bihis na bihis para sa isang okasyon.

Pagkalapit ay tinanong ng pulis ang mga pasahero ng, “whose wedding is it?” na siya namang sinagot ng bride na nakaupo sa passenger’s seat.

Panandalian pang nagtanong ang otoridad sa babae at doon napag-alaman na late na pala ito sa sarili nitong kasal.

2:30 PM nagsimula ang kasal ng babae pero makikita sa body cam footage ng pulis na 2:42 na ng hapon nang pahintuin ang mga ito sa gilid ng expressway.

Sa huli, hinayaan din ng understanding na pulis na makaalis at makahabol sa kasal ang bride pero nagbilin ito sa nagmamaneho ng sasakyan, na isa pala sa mga guests, na magkakaroon ito ng mandatory court appearance at binigyan ng petsa kung kailan ito pupunta sa korte.

Samantala, ayon sa The Denson Firm sa Florida, ang pagmamaneho ng higit 50 miles per hour o paglagpas sa speed limit ng mga highway sa nasabing lugar ay maaaring magresulta sa felony.

Kung ikaw ang bride, papayag ka rin ba na magkaaberya at ma-late ka sa kasal na matagal mong pinaghandaan?

Sa bagong generation ngayon, labanan na ng uniqueness at haba ng pangalan ng mga ipinapanganak na baby. Dahil dito, nacha-challenge ang mga bata sa pagsulat ng mga sarili nilang pangalan. Katulad ng bata sa kwento na ito na umiiyak pa habang sinusubukang isulat nang buo ang kaniyang pangalan!

Kung matagumpay itong naisulat ng bata, alamin.

Sa isang video na kinuhanan sa loob ng bahay ng pamilya Dano, makikita ang 4-year-old na si Victoria Merielle na umiiyak habang tinuturuan ng kaniyang daddy na magsulat.

Ang reklamo ni Merielle, masyado raw kasing mahaba ang pangalan niya!

Pero kagaya ng iba, hango pala sa pangalan ng kaniyang parents na sina Victor at Mariel ang kaniyang pangalan.

Ayon kay Victor, ang madalas daw na isulat ng kaniyang anak sa school ay ang first name nito na Victoria, pero ang pagsusulat sa second name nito na merielle, tila isang malaking challenge para sa bata lalo na at nag-aaral pa lang itong magsulat.

Dahil dito, nag-advice raw ang teacher ni Merielle na sanayin ang writing skills ng bata, kung kaya naman gumawa ng writing material ang kaniyang mommy kung saan kakailanganing mag-trace ni Merielle ng letters.

Samantala, improving naman na ang pagsusulat ni Merielle, pero hindi nga lang daw talaga nito maiwasang magreklamo sa tuwing nagpa-practice.

Para kay victor, naniniwala siya na kapag tuluyan nang nasanay at natuto si Merielle sa pagsusulat ay maa-appreciate rin nito ang kaniyang pangalan.

Soon enough, makakapagsulat din nang diretso si baby Merielle nang hindi na nahihirapan at umiiyak.

Sa mga may anak na pre-school diyan, pwede niyo bang i-share ang nakakatuwang kwento kapag tinuturuan niyo sa pag-aaral ang mga chikiting niyo?

Sa dami ng gastusin at patuloy na tumataas na bilihin, sapat paano pa nga ba nakakasabay ang sinasahod ng mga manggagawang Pilipino, lalo na ‘yung mga umaasa na lang sa kanilang mga pension? Kung kaya naman hinimok ng isang mambabatas ang gobyerno na taasan ang buwanang natatanggap ng mga monthly pensioners.

Kung magkano ang isinusulong na pension hike, eto.

Nanawagan sa Department of Budget (DBM) ang Chairperson ng House Committee on Senior Citizens na si Rodolfo Ordanes na pagkalooban ng karagdagang isanlibong piso ang buwanang Social Security System (SSS) pension na natatanggap ng mga retiree.

Hinihimok ni Ordanes ang Department of Finance at DBM na magbigay ng direct subsidy sa SSS na aabutin ng 43.2 billion pesos para sa 1,000 peso pension increase.

Ito ay dahil hindi na raw nakakasabay o hindi na sapat sa kasalukuyang panahon ang inimplementang 1,000 peso hike mula sa Social Security Act of 2018.

Higit pa na nangangailangan ang mga pensioner ng karagdagang pension dahil sa pagbagsak ng purchasing power ng Philippine peso noong 2019 at mas nagmahal na ang presyo ng mga bilihin ngayon.

Samantala, sinabi ni Ordanes na mahigit 3.6 million ang bilang ng mga SSS pensioner na nangangailangan ng mas mataas na halaga ng pension.

Sa mga pensioners diyan, ano ang opinyon niyo? Nakakasabay pa ba sa mga pang araw-araw na gastusin ang pension na natatanggap niyo?

Tunay nga naman na malaking perwisyo ang mga sirang kalsada sa pang araw-araw na buhay ng mga Pilipino, lalo na sa mga pumapasok sa trabaho. Maigi nga kaya na i-adapt natin ang construction ng mga kalsada sa ibang bansa para sa pang matagalang kalidad nito?

Kung ano ang posibleng solusyon sa problema ng mga motorista, eto.

Sira-sira, lubak-lubak, at palaging ginagawa ang mga kalsada.

‘yan ang reklamo ng mga motorista at commuters dahil bukod sa masamang epekto nito sa maintenance ng mga sasakyan at ng mga motor, nagdudulot din ng matinding traffic ang road construction dahil kung minsan, kinakailangan pang humanap ng mga drayber sa ibang ruta.

Pero alam niyo ba na hindi ito problema sa United Arab Emirates (UAE)? Sa uae kasi, hindi basta-bastang ibinubuhos lang ang semento kapag gumagawa ng kalsada. Sa halip, gumagamit sila ng geocell technology.

Gawa ito sa plastik na hugis honeycomb at nagsisilbing pundasyon sa ilalim ng lupa.

Inilalatag ito bago ibuhos ang semento para kapag tapos nang gawin ang kalsada, stable na ito at mabubuhat ang anumang bigat ng mga sasakyan.

Kung gagamitin ito sa pilipinas, mababawasan ba ang mga insidente ng pagkasira ng mga kalsada?

Matatandaan ang naging mainit na usapin nitong february nang bumagsak ang Cabagan-Sta. Maria Bridge sa Isabela, Cagayan Valley. Ito rin ang kaparehas na buwan na opisyal na binuksan ang tulay matapos makumpleto ang construction nito na inabot ng lagpas sampung taon at pinondohan ng 1.225 billion pesos.

Bukod pa riyan ay umapela rin ang mga residente dahil sa mga lubak na daan sa Maharlika Highway sa Pagbilao, Quezon na siyang tututukan na ng Department of Public Works and Highways (DPWH) Region IV-A at ng pamahalaan ng nasabing probinsya.

Samantala, nito ring February ay sinimulan na ang rehabilitasyon ng Southbound Lane ng Roxas Boulevard at inaasahang matatapos ngayong november.

Ikaw, sa palagay mo ba ay dapat na ring gamitin sa pilipinas ang geocell technology para sa mas mahabang buhay ng mga kalsada?

Kung minsan ay hindi talaga maiiwasan ang mangutang lalo na kung mayroong mga pangyayari na hindi inaasahan. Bukod sa mga bangko, kabilang ang mga ahensya ng gobyerno sa nilalapitan ng mga tao katulad ng Pag-IBIG Fund na mag-iimplementa ng mga pagbabago sa kanilang sistema.

Makakatulong nga ba sa mga Pilipino ang mga pagbabago na ito? Alamin.

Kamakailan lang ay nagdala ng magandang balita ang Home Development Mutual Fund o Pag-Ibig Fund dahil sa mga pagbabago na iimplementahan ng ahensya.

Ayon sa pag-ibig, tataas na ang maaaring hiraming pera o loan ng mga members nito mula sa 80% na ngayon ay magiging 90% na para bigyan ng kasiguraduhan ang mga members na mayroon silang mas madaling malalapitan sa oras ng pangangailangan.

Applicable ang increase na ito sa multi-purpose loan at short-term loan programs katulad ng Health and Education Loan Program (HELPS) at calamity loan.

Bukod pa riyan, makakakuha na rin daw ng mas malaking loan ang mga members na magco-contribute ng mas malaking halaga sa kanilang regular savings account.

Kasabay ng mas mataas na cash loan limit, mas padadaliin pa ng Pag-Ibig Fund para sa mga members ang pag-avail ng loan dahil mula sa 24-month requirement, magiging qualified na ang mga members kahit na 12 months pa lang silang nakakapaghulog ng contribution.

Target din ng ahensya na higitan ang 3.2 million Filipinos na napagkalooban ng cash loan na umabot sa 70.3 billion pesos nitong nakaraang taon at gawing 95.3 billion pesos para maabot ang 3.6 million members ngayong taon.

Ikaw, magandang balita ba para sa’yo ang mga enhancement na ito?

Alam naman nating lahat na kritiko ang mga Pilipino pagdating sa politika. Pero ano nga ba ang opinyon ngayon ng taumbayan pagdating sa mga lider ng bansa? Negative o positive?

Kung ano ang say ng mga Pilipino, eto.

Inilabas na ng Octa Research ang resulta ng isinagawa nilang Tugon ng Masa (TNM) survey mula April 2-5 kung saan makikita ang trust ratings ng top government officials ng bansa.

Pinangungunahan ito ni President Ferdinand Marcos Jr. Na nakakuha ng pinakamataas na trust rating na 60% at 59% na performance satisfaction rating.

Sumunod dito ay si Vice President Sara Duterte na nakakuha ng 58% trust rating at 56% performance satisfaction rating, 55 at 53 percent naman kay Senate of the Philippine President Chiz Escudero, habang 54 at 55 percent ang nakuha ni House of Representatives Speaker Martin Romualdez, at 5% kay Chief Justice Alexander Gesmundo.

Ayon sa Octa Research, tuluy-tuloy ang ibinibigay na suporta at tiwala ng karamihan sa mga adult Filipinos kay PBBM.

Sinabi naman ng pangulo sa isang pahayag na maganda na malaman niya ang resulta ng survey dahil patuloy itong nagbibigay sa kaniya ng inspirasyon dahil patunay ito na nagkakaroon ng magandang progreso ang bansa.

Dagdag pa ni Palace Press Officer Atty. Claire Castro, anuman ang resulta ng survey, patuloy pa ring magsusumikap ang presidente sa pagkilos at pagpapabuti sa kalagayan ng bansa para sa mga Pilipino.

Samantala, isinagawa ang survey sa 1,200 respondents edad 18 pataas mula sa Metro Manila, Balance Luzon, Visayas, at Mindanao.

Ikaw, anong opinyon mo sa resulta ng bagong survey na ito?

Pagkatapos ng high school, desisyon ng estudyante o di naman kaya ay nakadepende sa kanilang resources kung ipagpapatuloy pa nila ang pag-aaral ng kolehiyo o mag-aapply agad ng trabaho. Pero anuman ang magiging desisyon nila, nakakaalarma pa rin ang inilabas na datos ng Philippine Statistics Authority na mayroong mga nakapagtapos ng high school na hindi nakakabasa. Sa kasamaang palad, halos labinsiyam na milyon silang lahat.

Ang buong detalye, eto.

Sa ginanap na Senate Education Panel Hearing nitong April 30, ini-report ni Committee Head Sen. Sherwin Gatchalian ang datos mula sa Philippine Statistics Authority (PSA) na mayroong 18.96 million na graduate ng junior at senior high school nitong nakaraang taon na maikukunsiderang functionally illiterate o hindi nakakabasa at hindi nakakaunawa ng simpleng istorya.

Kabaliktaran naman ito ng mga taong functionally literate na idinefine ng PSA bilang mga taong marunong magbasa, magsulat, magbilang, at makaintindi, na kinabibilangan ng tanging 79% na mga senior high school graduates noong 2024 ayon kay Assistant National Statistician Adrian Cerezo.

Nangunguna sa mga probinsyang may mataas na kaso ng funtional illiteracy ang Tawi-Tawi, Davao Occidental, at Zamboanga Del Sur na mayroong 67, 53, at 49 percent.

Taliwas ang naging resulta ng datos sa “basic goal” ng edukasyon na siguraduhing ang bawat estudyante ay matututong magbasa, magsulat, magbilang, at makaunawa.

Pero ayon kay Department of Education (DEPED) Secretary Sonny Angara, sisiguraduhin nila na sa pamamagitan ng mas pinalakas na mga hakbang, matututo ang mga estudyante na maging critical thinkers at hindi masasanay sa pagme-memorize lang.

Samantala, magsisimula ngayong bakasyon ang mga programa mula sa DEPED na Bawat Bata Makababasa Program (BBMP) at Literacy Remediation Program (LRP), at Learning Camp.

Sa mga magulang na nagpapaaral diyan, papayag ba kayo mauwi sa kaparehas na sitwasyon ang binabayaran niyong tuition?

Sa papalapit na eleksyon, tila nagiging mas kritikal na ang mga Pilipino pagdating sa pagpili ng iboboto. Napatunayan yan sa isinagawang survey kamakailan lang kung saan lumalabas na ang mga botante, sabik nang masolusyunan ang hirap sa paghahanap ng trabaho sa bansa at ang pagkakaroon ng kasiguraduhan na mayroon pang maihahaing pagkain sa hapag kinabukasan.

Kung ano ang detalye ng survey, eto.

Nito lamang April 11-14, isinagawa ng social weather stations (SWS) sa 1,800 respondents ang isang survey na kinumisyon ng Stratbase Group na nagresulta sa mataas na bilang na 93% ang mga Pilipinong nagsabing iboboto nila ang mga kandidato na gagawing prayoridad ang pagpapalawak ng job opportunities at pagpapaunlad ng agrikultura at food security sa bansa.

Pumangatlo naman sa listahan ang pagpapalakas ng health care system sa bansa na nakakuha ng 91% mula sa mga botante.

Ayon sa sws, ito ang mga pangunahing ikinababahala ng mga Pilipino simula pa noong January.

Sumunod sa ika-apat at ika-limang pwesto ang pangangalaga sa karapatan ng mga manggagawa at OFW, at pagpapababa ng kaso ng poverty at hunger na nakakuha ng 88 at 87 percent.

Sinabi naman ni Stratbase President Dindo Manhit na hindi na nakakapagtakang prayoridad ng mga Pilipino ang mga nasabing problema sa kabila ng lumalalang inflation sa bansa.

Nagpaalala rin si Manhit sa mga bontante na maging mapanuri pagdating sa plataporma at mga nagawa na ng mga kandidato.

Patunay ang mga numero na ito na ang bawat Pilipino ay may kaniya-kaniyang references at suliranin na kinakaharap araw-araw. Ang pagkakapareho lang ng mga ito ay ang masidhing kagustuhan na makakita ng pagbabago, progreso, at magkaroon ng kasiguraduhan na ang kanilang mga hinaing ay maririnig.

Ikaw, botante ka na ba? Kung oo, ano ang platapormang hinahanap mo para iboto ang isang kandidato?

Para sa mga dog lover, kinukunsidera nila ang mga alaga nilang aso bilang stress reliever, but at the same time, nagca-cause rin ang mga ito ng stress — in a good way! Katulad ng aso sa kwento na ito na nagdala ng good vibes sa mga netizen dahil sa kaniyang kapilyuhan!

Ang buong kwento ng malokong aso na ito, eto.

Sa isang video, makikita ang fur parent na si Robert Solis na naglalakad papunta sa kanilang kapitbahay.

Pagkalapit sa mga nakatambay na kapitabahay, walang anu-ano niyang binitbit ang alaga niyang aso na si Jaero na nakikitambay din sa mga ito!

Pero ang pagsundo ni robert kay Jaero, gabi-gabi niya raw pala talagang ginagawa kahit na binigyan niya na ito ng 7:30 PM na curfew!

Pero ang makulit na aso, hindi alintana ang kaniyang curfew at hindi sinasadyang nilalaba ito dahil sa sobrang libang sa mga kapitbahay na naging mga kaibigan na nito.

Pero kahit na gaano pa kakulit si Jaero, walang kapantay ang pagmamahal ni Robert dito at masaya siya na pati ang mga kapitbahay nila ay giliw na giliw sa friendly dog.

Ikaw, gugustuhin mo rin ba na maging palakaibigan ang aso mo pero mahilig tumambay?

Boring graduation clothes no more. Mapapa-sana all ka na lang talaga dahil sa isang unibersidad sa Japan, pinapayagan ang mga graduates na magsuot ng kahit anumang gustuhin nila sa araw ng pagmartsa.

Kung ano ang sinuot ng mga estudyante, eto.

Tuxedos, dresses, filipiniana, barong, o di naman kaya ay school uniform ang kadalasang graduation attire ng mga estudyante at mahigpit ding ipinagbabawal ang pagsuway dito.

Pero sa mga unibersidad sa Japan katulad ng Kyoto University, Kanazawa College of Art, at Kyoto City University, binibigyang laya ang mga estudyante na isuot anuman ang gustuhin nila sa araw ng graduation.

Katulad dito sa pilipinas, suits at dresses din ang sinusuot ng mga Japanese graduates o di naman kaya ang kanilang traditional clothing na hakama kimono.

Pero matapos pahintulutan at i-anunsyo ang pag-adapt ng Kyoto University sa pagsusuot ng unusual graduation attires, nagkaniya-kaniyang diskarte na ang mga estudyante sa pag-iisip kung paano gagawing creative ang kanilang graduation outfit.

Pagdating sa araw ng graduation, makikita sa isang social media post ang mga estudyante sa auditorium na tila cosplay event ang dadaluhan at hindi graduation.

Makulay kasi ang suot ng mga ito at ang ilan sa kanila ay piniling magsuot ng costume ng mga cartoon at movie characters.

Sa mahigit isang libong replies ng nasabing post, nagkaniya-kaniyang pili ang mga netizen ng paborito nilang costume habang ang iba naman ay nag-share kung gaano kahigpit sa school nila pagdating sa graduation attire at hiniling na sana ay i-implement din ito sa kanila.

Samantala, ang pagpapahintulot sa mga estudyante na maging creative sa kanilang garduation attires ay isa palang tradisyon at bago pa ito i-adapt ng Kyoto University ay nauna na ang Tokyo University.

Ikaw, sawa ka na ba sa nakasanayan mo? Gugustuhin mo rin ba na i-adapt ito ng mga eskwelahan dito sa pilipinas?