EXPLAINERS

Mayroong mga babae na pangarap talaga ang magkaroon ng sariling anak, katulad ng babaeng ito mula sa England. Ang problema, ipinanganak ito na walang matris. Pero ang kaniyang pangarap, malapit nang maisakatuparan nang mag-volunteer ang kaniyang best friend na maging surrogate mom ng kaniyang baby.

Ang kwento ng mag-bff na ito, eto.

Nagsimula sa isang biro ang sinabi ni Daisy Hope sa kaniyang best friend na si Georgia Barrington na balang araw, siya ang magdadala ng anak nito para sa kaniyang BFF.

Si Georgia kasi, ipinanganak na walang matris, at nadiskubre niya na lang ito nang ma-diagnose siya ng Mayer Rokitansky Kuster Hauser Syndrome sa edad na 15-anyos.

Nang malaman ito ni Georgia, pakiramdam daw niya ay end of the world na, lalo na at pangarap niya pa namang magkaroon ng anak.

Pero ang best friend niyang si Daisy, pinanghawakan ang binitawan nitong mga salita noong sila ay mga dalaga pa at ngayon, dinadala na nga nito ang first baby ni Georgia sa pamamagitan ng surrogacy.

Hindi naging madali ang proseso ng pagbubuntis ni Daisy para kay georgia dahil hindi naging matagumpay ang una nilang attempt.

Pero nitong february lang, matapos mag-implant ng embryo na binubuo ng egg cells at sperm cells ni Georgia at ng kaniyang kasintahan na si William, nadiskubre nila na naging matagumpay ang kanilang second attempt at dinadala na ngayon ni Daisy ang baby para sa kaniyang bestie.

Samantala, inaasahang manganganak na si Daisy ngayong darting na october at ang magpapaanak sa kaniya ay walang iba kundi ang best friend niyang si Georgia na isang midwife.

Sa mga may long-time best friend diyan, gaano kayo ka-loyal at hanggang saan aabot ang kaya niyong isakripisyo para sa inyong BFF?

Kadalasan ay mararamdaman natin ang unconditional love mula sa ating mga magulang o sa mga partner natin in life. Pero ang babaeng ito sa China, walang pag-aalinlangang ipinaramdam ang kaniyang unconditional love sa mga magulang ng kaniyang yumaong ex-boyfriend at inalagaan pa rin ang mga ito kahit na ikinasal na siya.

Ang kwento ng babae, eto.

Taong 2016 nang bawian ng buhay sa isang car accident si Zeng Zhi, ang nobyo ng 34-anyos na si Wang Ting mula sa Hunan Province na matatagpuan sa Central China.

Matapos bawian ng buhay si Zeng ay nakaranas ng mental breakdown ang kaniyang nanay, habang ang tatay niya namang may sakit sa puso ay kinakailangang dalhin sa ospital. Ang tiyuhin naman nito ay mayroong anak na may mental illness at hindi ito maalagaan.

Ang iniwang pamilya ni zeng, sinalo ng kaniyang ex-girlfriend na si wang ting at inalagaan sa loob ng siyam na taon. Isinasama niya sa bakasyon ang nanay ni Zeng para makapagpahinga at binabantayan niya rin ang tatay nito sa tuwing naoospital. Pati ang pinsan ng lalaki na mayroong iniindang sakit ay binibisita niya rin.

Bukod sa iniwang pamilya ng kaniyang businessman ex-boyfriend, binayaran niya rin ang mga utang nitong sahod sa mga empleyado at mga loan mula sa mga kaibigan na nagkakahalaga ng 600,000 yuan o mahigit 4.6 million pesos.

Bagama’t sinubukan siyang pigilan ng mga tao na akuin ang mga responsibilidad na ito, bukal sa puso niya pa rin itong inako. Gamit ang kaniyang savings na 200,000 yuan o mahigit 1.5 million pesos, lumipat siya sa ibang probinsya para doon magtrabaho. Nanghiram din siya ng pera sa kaniyang mga kaibigan para tapusin na ang mga natitirang balanse.

Apat na taon nang mamatay si Zeng, nagpakasal si Wang at inimbita ang mga magulang nito na para sa kaniya ay mga importanteng tao sa kaniyang buhay.

Sa ngayon, nagmamay-ari na si Wang ng isang food firm at tourism business na ayon sa mga netizen online ay isang reward para sa kaniyang kabaitan.

Sa mga may ex-partners diyan, kumusta ang relationship niyo sa mga magulang nila? Naputol din ba ito matapos ang inyong breakup?

Kung inaakala niyong mga tao lang ang may kakayahang sumabay sa technology, nagkakamali. Dahil mayroong parrot sa United Kingdom na sa sobrang techy, marunong nang mag-online shopping.

Kung ano ang pinag-oorder ng makulit na ibon, eto.

Napunta sa pangangalaga ng isa sa mga staff ng charity group sa United Kingdom na National Animal Welfare Trust na si Marion Wischnewski ang african grey parrot na si Rocco matapos itong ampunin ng nasabing grupo.

Ito ay dahil mahilig umanong magmura itong si Rocco, kung kaya nagprisinta si Marion na mag-alaga rito.

Ang makulit na parrot, sinasamantala ang abilidad niya na makapagsalita at tila isa itong tao na ginagamit pa ang smart speaker ng kaniyang amo.

Ang smart speakers ay ang uri ng speaker na voice-activated at maaaring utusan at tanungin.

Kung ano ang ginagawa ni Rocco sa speaker? Hindi niya lang ito basta-bastang kinakausap. Umoorder din ito sa isa sa mga sikat na online shopping platforms sa America ng kung anu-anong mga produkto.

Ayon kay marion, nadiskubre niya na lang ang online shopping habit ni Rocco nang tingnan niya ang kaniyang shopping list.

Isa sa mga inorder ni Rocco ay strawberries, broccoli, watermelon, raisins, at ice cream.

Mabuti na lang at kinakailangan munang mag-log in bago tuluyang mag-order gamit ang nasabing device kung kaya hindi naging matagumpay ang pagsha-shopping ni Rocco.

Samantala, matapos nito ay natuto na si Marion at naglagay na ng passcode sa smart speaker.
Sa mga may alagang parrot diyan, pwede niyo bang i-share ang kakatwang kwento ng kadaldalan ng mga alaga niyo?

Hindi basta-basta ang pagda-diet. Bukod sa gym coaches, ang iba ay kumukonsulta pa sa mga doktor at nutritionists para lang makasigurado na tama at effective ang gagawin nila sa kanilang fitness journey. Pero ang dalagitang ito sa China, walang anu-anong nagbawas ng kain at uminom pa ng gamot para lang magpapayat, dahil sa desperasyon na magkasya sa kaniya ang kaniyang birthday dress.

Kung naging matagumpay ba ang pagda-diet ng dalagita, eto.

Nanghina ang mga braso at binti, at kinapos sa hininga. Ganyan ang naranasan ng isang 16-anyos na babae sa china na kinilalang si ‘Mei’ matapos nitong biglaang mag-diet sa loob ng dalawang linggo.

Ang goal ni Mei? Ang magkasya sa kaniyang birthday dress.

Sa dalawang linggong pagda-diet, tanging kakaunting gulay lang ang kinain ng dalagita. Bukod pa riyan, sinabayan pa niya ito ng pag-inom ng laxatives.

Sa halip na pumayat, isinugod ito sa ospital dahil sa panghihina ng katawan. Bumaba rin ang blood potassium levels nito at nag-develop ng life-threatening condition na hypokalaemia.

Dahil dito, kinailangang sumailalim ng dalagita sa isang emergency medical procedure na tumagal ng labindalawang oras.

Sa halip na maging inspiring ang kaniyang fitness journey, ginawa pa itong halimbawa ng mga doktor para magbabala sa mga taong nagnanais na magpapayat nang mabilisan.

Sa mga nagdi-dyeta riyan, sigurado ba kayo na nakaka-healthy ang ginagawa niyo? O baka naman mas makakasira pa ito sa kalusugan niyo?

Sa isang pambihirang pagkakataon, sa halip na pagsamantalahan ang kainosentehan at mahigpit na pangangailangan ng isang estudyante, pinalaya ito ng gang leader matapos itong makaramdam ng konsensya.

Kung ligtas ba na nakauwi ang biktima, eto.

Isang 19-anyos na estudyante mula sa Northwestern China na si Peng Yuxuan ang naghahangad na kumita sana ng pera habang summer vacation kung kaya nagtungo ito sa Xi’an City para maghanap ng trabaho.

Nakilala niya sa isang job-hunting app ang isang babae na naghahanap umano ng live streamer na pinangakuan siya na kikita siya ng malaking halaga ng pera.

Kumagat sa offer ang binatilyo at ipinadala sa yunnan province kung saan regular na nakausap nitong ang kaibigan niyang si Xiaojia at nakiusap na huwag ipapaalam sa kaniyang mga magulang ang kaniyang trabaho.

Pero makalipas lang ang tatlong araw, matapos ipaalam ni Peng sa kaniyang kaibigan na siya ay nasa meng’a port na malapit sa border ng Myanmar, hindi na sila muli pang nagkausap.

Sa mga sumunod pang araw, naalarma ang nanay ni Peng nang isang estranghero mula sa Myanmar ang sumagot sa tawag niya rito. Dahil sa takot na baka nabiktima ng trafficking ang kaniyang anak, agad itong nag-report sa mga pulis na mabilis namang nakipag-ugnayan sa mga otoridad ng Myanmar.

Si Peng, nauwi sa isang scam compound sa Myanmar, ngunit kinompronta siya ng leader na hindi siya nababagay sa ilegal nilang gawain dahil mayroon itong magandang kinabukasan.

Hindi malinaw kung paano nalaman ng leader na katatapos lang ni Peng na mag-take ng gaokao o ang college entrance exam sa china.

Ayon kay Peng, sinabi ng leader na mayroon silang konsensya. Pinayuhan pa siya nito na maging mabuting anak at mag-aral nang mabuti bago pinalaya.

Matapos nito ay ni-rescue si Peng ng mga sundalo at tuluyang nakauwi sa China sa tulong ng United Wa State Army Judicial Committee.

Sa mga naghahanap ng mapagkakakitaan diyan, kahit na mahirap ang buhay, unahin pa rin ang kaligtasan at wag papaloko sa mga nag-aalok ng easy money.

Sinong mag-aakala na maaari palang magsilbing paraan ang Google Maps para mai-document ang ilang mga sandali sa sampung taon sa buhay ng isang matandang mag-asawa na ngayon ay kinaaantigan sa social media? Ang Google Maps kasi, natyempuhan lang naman ang mag-asawa sa labas ng kanilang bahay mula 2015 hanggang 2025.

Kung ano ang nabuong kwento sa mga litrato, eto.

Kumakalat ngayon sa social media ang nakakaantig na mga litrato ng isang matandang mag-asawa sa labas ng kanilang bahay na nakuhanan pala ng Google maps sa Indonesia.

Sa mga litrato, makikita kung gaano kasimple ang buhay ng magkasintahan na kapwa nakaupo sa isang kahoy na upuan sa labas ng kanilang bahay na gawa sa kahoy at mayroong bubong na pinagtagpi-tagping mga yero.

Nakalagay sa bawat litrato ang mga taon kung kailan ito nakuhanan. Nagsimula ito noong 2015 at hanggang sa sumunod na taon makikita ang mag-asawa na tila nagpapahangin sa labas ng kanilang bahay.

Pero pagdating ng 2017 hanggang 2021, mag-isa na lang ang lola na nakaupo sa nasabing upuan at kapansin-pansin din ang tuluyang panghihina ng katawan nito dahil sa katandaan. Ang hinala ng mga commentators, pumanaw na ang asawa nito.

Makalipas lang ang isang taon, makikitang hindi na okupado ang upuan sa labas ng bahay at sarado na rin ang pintuan nito.

Nanatiling nakasara ang pinto sa sumunod na dalawang taon, napabayaan na lang na tumubo ang matataas na damo at wala na sa labas ng bahay ang kahoy na upuan na dating tinatambayan ng mag-asawa.

Sa panghuling litrato na kinuhanan sa kasalukuyang taon, makikitang malinis na ang paligid dahil sa wakas ay tinabasan na ang mga tumubong damo pero, wala na sa kinatitirikan nitong lupa ang kahoy na bahay ng mga matanda.

Ang mga litrato, naghatid ng lungkot sa mga netizen at samu’t saring alaala sa mga netizen, pero nagsilbi rin itong paalala na ang oras ay mabilis na lumilipas kung kaya dapat lang na sulitin ang bawat sandali nito habang mayroon pang pagkakataon.

Sa mga mahilig kumuha ng litrato diyan, ano ang hugot niyo sa buhay? Ginagawa niyo ba ito for the aesthetic o para mangolekta ng mga alaala?

Mahirap mag-move on mula sa pagkawala ng mahal sa buhay, lalo na ng mga magulang. Kung kaya nga ang isang pamilya na ito sa Japan, itinabi sa loob ng limang taon ang pinakahuling pagkain na iniluto ng kanilang nanay bago ito biglaang pumanaw.

Kung nakain pa ba ng pamilya ang ulan, eto.

Papasok noon sa eskwelahan ang Japanese woman na si Mizuki nang tanungin sila ng kaniyang nanay kung ano ang gusto nilang hapunan para maipagluto sila nito.

Napagkasunduan nila na pork dish ang ipaluto, isang ulam na hindi nila kadalasang kinakain.

Pero nang umuwi ito mula sa eskwelahan, natagpuan na lang ni Mizuki ang kaniyang nanay na nakahandusay sa sahig ng kanilang bahay, at nang isugod ito sa ospital ay napag-alaman na stroke ang naging sanhi ng pagkamatay nito.

Ang naiwan namang ulam na niluto nito para sa pamilya, iprineserve ni Mizuki at ng kaniyang tatay sa loob ng limang taon.

Pagdating ng 2018, napagdesisyunan ng mag-ama na i-reheat ang ulam, pero bago ‘yan ay sinuri muna ito sa isang laboratory bago ito muling iniluto ng isang chef at sinigurado na mapapanatili pa rin ang original flavors nito at hindi magbabago ang lasa.

Nang tikman ito ni Mizuki, hindi nito naiwasang maluha at sinabing kaparehas na kaparehas nito ang lasa ng luto ng kaniyang nanay.

Ang chef, hindi rin napigilan ang kaniyang sarili na maiyak habang pinapanood ang mag-ama na matikman ang luto ng ilaw ng kanilang tahanan sa huling pagkakataon.

Sa mga kumpleto pa ang pamilya diyan, huwag sayangin ang oras na mayroon kayo kasama ang mga magulang niyo. Dahil sa bilis ng takbo ng oras, hindi niyo mamamalayan na balang araw, isa na lang silang alala.

Ika nga nila, it’s better late than never. Pinatunayan yan ng isang dating guro na piniling magpadala sa agos ng tubig at maglayag ng mahigit sampung taon para buhayin ang dati na niyang pangarap.

Ang inspiring na kwento ng babae, eto.

Oktubre itong nakaraang taon nang maglayag ang Caribbean boat na Villa Vie Odyssey para bumyahe patungo sa 147 bansa at bisitahin ang 425 na mga lugar nito.

May kakayahang magsakay ng 650 pasahero ang barko at kabilang doon ang 77-anyos na retired high school foreign language teacher na si Sharon Lane na ginamit ang kaniyang savings para maglayag sa loob ng labinlimang taon at maninirahan sa binili niyang interior villa sa barko.

Ayon kay Sharon, mas makakatipid siya kung sa barko siya maninirahan at para sa kaniya, mas mura ang cost of living dito.

Isa rin itong dream come true para sa dating teacher dahil nagagawa niya na rin sa wakas ang matagal na niyang gustong gawin.

Sa pagsampa nito sa barko noong june 16, nabisita na ni sharon ang Vancouver hanggang Alaska, at sunod naman silang lalayag patungong Japan at Taiwan.

Samantala, sa one-time fee na binayaran ni Sharon na nagkakahalaga ng $129,999 o may katumbas na mahigit 7 million pesos ay maeenjoy na ng pasahero ang mga facilities katulad ng library, fitness center, spa, pickleball court, swimming pool, entertainment lounges, clubs, at higit sa lahat, kasama na rito ang wifi.

Sa mga may savings na riyan, saan niyo balak gamitin ang inipon niyong pera? Make sure na bukod sa secured future, wag niyong kakalimutan na mag-enjoy.

Buong buhay ang handang ialay ng isang lalaki sa Japan para sa mga asong nakaranas ng pang-aabuso bilang pasasalamat sa kaniyang alaga na nagligtas sa kaniya nang magtangka siyang tapusin ang kaniyang buhay.

Ang kwento ng lalaki, eto.

Labindalawang taon na ang nakakaraan nang humarap sa problemang pinansyal ang kumpanya ng 54-anyos na Japanese man na si Hirotaka Saito.

Pinanghinaan ng loob si Saito at nagbalak na lisanin ang kanilang bahay at tuluyang tapusin ang kaniyang buhay.

Pero hindi natuloy ang pinlano ni Saito dahil hindi siya tinantanan ng alaga niyang aso na bigla na lang humarang sa kaniyang daanan kung kaya hindi ito nakaalis ng bahay.

Dahil dito, nangako si Saito na susuklian niya ang ginawang pagligtas sa kaniya ng alaga niyang aso sa pamamagitan ng pagsaklolo sa mga aso na nakaranas ng pang-aabuso.

Sinimulan ni saito ang kaniyang hangarin sa pamamagitan ng pagbebenta ng kaniyang luxury car at ipinatayo ang Wansfree Canine Rescue Centre na matatagpuan sa Central Japan.

Tumatanggap ang shelter ng mga asong may temper, yung tipong tinatahulan at kinakagat ang kahit na sino.

Ayon sa report, tumatanggap ang shelter ng mga asong nakaranas ng pang-aabuso, na siyang naging dahilan kung bakit may temper ang mga ito.

Sa kasalukuyan, 40 na mga aso at walong mga pusa na ang nasa pangangalaga ng Wansfree na balak pang paabutin ni Saito sa 300 mga aso sa susunod na tatlong taon.

Dahil sa pasasalamat sa isang aso, ginawa nang life-long goal ni Saito na magligtas ng mga aso. Bukod pa riyan, sinabi rin ni saito sa isang panayam na nasa magandang kalagayan na siya ngayon.

Sa mga pet lovers diyan, hanggang saan aabot ang pagmamahal niyo para sa inyong mga alaga? Willing din ba kayo na maging pet-rescuer?

Ika nga nila, ang lahat ng sobra, masama. Katulad na lang ng mga bisyo at regular na pagkonsumo ng alak o sigarilyo. Napatunayan yan ng isang lalaki mula sa Thailand na binawian ng buhay matapos uminom ng alak sa loob ng isang buwan.

Kung bakit nagpakalango sa alak ang lalaki, eto.

Kauuwi lang mula sa eskwelahan ng 16-anyos na lalaki mula sa Ban Chang District sa Thailand nang bumungad sa kaniya ang kaniyang 44-anyos na ama na si Thaweesak Namwongsa na nagse-seizure sa kama.

Para maisalba ang kaniyang ama, humingi ng tulong ang hindi pinangalanang menor de edad sa Siam Rayong Foundation, pero nang dumating ang rescuers, binawian na ng buhay ang kaniyang tatay.

Bukod sa wala ng buhay na katawan ng lalaki, tumambad din sa rescuers ang mahigit isandaang basyo ng beer na maayos na nakasalansan sa paligid ng kama kung nasaan ang bangkay.

Ayon sa anak ng nasawi, pagkauwi sa eskwelahan ay ipinagluluto niya ito ng pagkain pero ang kaniyang tatay, tinatanggihan ito at tanging alak lang ang kinokonsumo sa loob na ng isang buwan.

Sa kasamaang palad, hinihinalang ginawang coping mechanism ng lalaki ang pag-inom matapos nitong dumaan sa divorce.

Sa mga broken hearted diyan, malaki ang mundo. Kung sawi ka sa pag-ibig ngayon, ibig sabihin hindi siya ang para sayo. Magpasalamat ka at hindi ka napunta sa maling tao.