EXPLAINERS

Isa ang cobra sa mga pinakainiiwasan at kinatatakutang uri ng ahas dahil sa laki nito at kakayahan na kumitil ng tao in an instant. Pero ang 2-year-old boy na ito sa India, walang kaabog-abog na napatay ang isang deadly cobra sa pamamagitan lang ng kaniyang mga ngipin.

Kung ano ang nangyari sa bata pagkatapos ng insidente, eto.

Naglalaro noon ang dalawang taong gulang na si Govinda Kumar malapit sa kanilang bahay sa Bankatwa Village nang makita nito ang cobra.

Bilang isang bata, dahil sa curiousity at ka-inosentehan sa dalang panganib ng ahas, binato ito ni Govinda.

Bilang response, pumulupot ang cobra sa kamay ng bata.

Ayon sa lola nito na si Mateshwari Devi, nataranta sila at agad na nilapitan ang kaniyang apo nang makita ang sitwasyon nito. Pero bago pa sila makakilos, nagulat na lang ang mga saksi nang kagatin ni Govinda ang ahas na dead on the spot.

Bagama’t walang tinamong sugat ang bata, nawalan ito ng malay matapos kagatin ang cobra dahil sa venom na tinukoy naman bilang isang mild effect at hindi sapat para ikamatay nito.

Dinala ang bata sa Government Medical College Hospital (GMCH) kung saan tinukoy ang insidente na highly unusual.

Samantala, hinihinalang binawian ng buhay ang cobra dahil sa tinamong trauma sa ulo at bibig dahil sa kagat ng bata. Habang si Govinda naman ay sumailalim sa gamutan matapos ang insidente.

Sa mga magulang diyan, gugustuhin niyo rin ba na maging ganito katapang ang anak niyo?

Lubos na pinaghahandaan ng mga estudyante, lalo na ng kanilang mga magulang ang pagpasok nila sa medical school dahil sa kaakibat nitong gastos. Pero ang mga estudyante sa isang med school sa New York, pag-aaral na lang ang kailangang isipin dahil libre na silang makakapag-aral sa tulong ng isang babae at iniwanang pera sa kaniya ng kaniyang asawa.

Kung sino ang generous na mag-asawa na ito, eto.

Hindi na kinakailangan pang alalahanin ng mga estudyante ng Albert Einstein College of Medicine at ng kanilang mga magulang kung paano tutustusan ang mga bayarin sa mahabang panahong pag-aaral ng medisina dahil sa donasyon na natanggap nito mula sa Chairperson ng kanilang board of trustee na si Ruth Gottesman.

Ang donasyon ni Ruth, nagkakahalaga lang naman ng one billion dollars na iniwan sa kaniya ng kaniyang yumaong mister na si David Gottesman na noo’y isang financier.

Ayon kay Ruth, mahigit isandaang estudyante ang pumapaso sa nasabing kolehiyo taun-taon. At noon ngang agosto nitong nakaraang taon, nagsimula nang makatanggap ang mga maswerteng estudyante ng libreng tuition fee.

Bukod pa riyan, na-reimburse rin noong 2024 spring semester ang binayarang tuition fee ng mga noo’y 4th year students.

Dagdag pa ni Ruth, labis siyang nagpapasalamat sa namayaapa niyang asawa dahil sa iniwan nitong kayamanan at itinuturing na pribilehiyo ang pagtulong sa mga estudyante.

Sa katunayan, hindi ito ang unang pagkakataon na tinulungan ng mag-asawang Gottesman ang kolehiyo dahil aktibo na noon pa man ang mga ito sa pagkakawang-gawa.

Sa mga magulang diyan, hinihiling niyo rin ba na makatanggap ng ganitong pribilehiyo para mapagaan ang pag-aaral ng inyong mga anak?

Sharing is caring. ‘Yan ang motto ng isang stray dog sa Brazil na matyagang naglalakad nang mahaba tuwing gabi para lang makahanap ng pagkain, hindi lang para sa kaniyang sarili, kundi para na rin sa kaniyang mga kaibigan.

kung sinu-sino nga ba ang mga kaibigan ng generous dog na ito, eto.

Naninirahan ang abandunadong aso na si Lilica sa isang junkyard sa Sao Carlos, Brazil kasama ang kaniyang mga kaibigang mga pusa, mga manok, at iba pang mga aso.

Dahil kapwa mga stray animals ang mga ito, wala silang permanenteng pinagkukunan ng pagkain. kung kaya nang magkaanak si Llilica ay nagsimula itong dumiskarte at maghanap ng makakain sa kailaliman ng gabi.

Sa paglalakad ni Lilica, napadpad siya sa bahay ng animal lover na si Lucia Helena de Souza na walang pag-aatubiling nagbabalot ng mga pagkain para sa aso.

Sa gabi-gabing pagbisita ni Lilica, napansin ni Helena na hindi nito inuubos ang mag pagkain na inihahanda niya para rito at umaalis bitbit ang plastic na pinaglalagyan nito.

Dahil dito ay napagdesisyunan ni Helena na sundan ang aso at doon nadiskubre na ang tinitira pala nitong mga pagkain ay inilalaan nito para sa kaniyang mga kaibigan sa tambakan.

Nagtuluy-tuloy at nagtagal ng taon ang nabuong routine nila Lilica at Helena. sa katunayan, si Helena na mismo ang naghihintay sa pagdating ng aso sa kanilang tagpuan.

Ang kwento ng generous dog na ito, nagsilbing inspirasyon at paalala sa mga netizen online na hindi dahilan ang kahirapan para magdamot sa mga kapwa nangangailangan.

Sa mga fur parents diyan, tine-train niyo rin ba ang mga alaga niyo na maging mapagbigay?

Kung ang ibang kawatan ay maingat sa pagsasagawa ng krimen para hindi mahuli, kabaligtaran ito ng isang lalaki mula sa Gastonia, North Carolina na nagnakaw sa isang bangko para magpahuli nang sa ganon ay makatanggap siya ng medical attention sa kulungan.

Kung ano nga ba ang matinding pangangailangan ng lalaki, eto.

Nawalan ng trabaho ang noo’y 59-anyos na si James Verone matapos manilbihan bilang isang truck driver sa loob ng 17 taon. Pagkatapos nito ay naging part time truck driver ito at convenience store clerk.

Hindi nagtagal ay muli itong nawalan ng trabaho habang may iniindang sakit sa iba’t ibang bahagi ng kaniyang katawan.

Dahil sa desperasyon, naisipan ni Verone na magnakaw sa isang bangko ng pera na nagkakahalaga lang ng one dollar.

Pagdating sa bangko, habang humihingi ng one dollar sa bank teller ay sinabi nito na may dala siyang baril. Dahil sa labis na takot, isinugod ang teller sa ospital dahil sa high blood pressure.

Habang si Verone naman, hindi katulad ng iba, ay naghintay sa pagdating ng mga pulis para makulong dahil sa pag-iisip na iyon ang sagot sa kaniyang pangangailangan.

Samantala, bago isinagawa ang krimen ay si Verone mismo ang sumulat sa isang local newspaper at ipinaalam na ang nag-udyok sa kaniya na magnakaw ay ang pag-asa na maipagamot at maipa-opera sa kulungan ang kaniyang likod, paa, at bukol sa dibdib.

Bukod diyan, humingi rin ng tawad si Verone dahil sa idinulot nitong takot sa bank teller.

Gayunpaman, napunta pa rin ang lalaki sa kustodiya ng mga pulis at doon nakapagpa-checkup sa mga nurse habang hinihintay ang paglilitis.
Sa napakahirap na buhay ngayon, ano ang diskarte niyo sa tuwing dumarating ang petsa de peligro?

Sa makabagong panahon na ito, iilan na lang ang nagbabasa ng dyaryo, at kadalasan ay dinadala na lang ito sa mga junk shop para sa kiluhin at ibenta. Pero ang dyaryo na ito sa Japan, hindi kailanman mapupunta sa basurahan kundi sa lupa at makakatulong pa sa kalikasan.

Kung paano ito magagawa ng dyaryo, eto.

Muli na namang napatunayan ng Japan na pagdating sa innovations, sila ang nangunguna. Bukod kasi sa technology, sila ay eco-friendly din.

Ayon sa isang article, inaabot ng 95 milyong mga puno ang pinuputol at ginagamit taun-taon para makagawa ng dyaryo, na siyang nagkakaroon ng malaking epekto sa kalikasan.

Pero ang Japanese publishing company na The Mainichi Shimbunsha, bukod sa pag-iimprenta ng mga dyaryo, concerned din sa nature dahil sa mga kakaibang materyal na kanilang ginagamit.

Ito ay inimbento ng isa sa pinakamalaking advertising agencies sa Japan na Dentsu Inc. na nakikipagtulungan sa The Mainichi.

Ang birght idea na ito, inilabas noong 2016 para sa ‘The greenery day.’

Ang papel kasi, 100% biodegradable at plant-based naman ang ink na ginagamit dito. Higit pa riyan, naglalaman din ng seeds ang mga dyaryo.

Para tumubo ang mga bulaklak, kinakailangan lang punitin sa maliliit na piraso ang dyaryo, ibabaon sa lupa, at didiligan.

Samantala, ginagamit din ng The Mainchi ang nasabing dyaryo para magturo sa mga estudyante ng environmental lessons.

Ikaw, sa tingin mo ba ay ito na ang solusyon sa kakulangan sa mga halaman dito sa Pilipinas?

Ika nga nila, kindness is the best revenge. Ganyan ang ginawa ng isang lalaki sa India matapos maliitin at pagdamutan ng kanilang kapitbahay ang kaniyang asawa dahil sa kanilang kahirapan. Dahil sa labis na pagmamahal sa kaniyang misis, sinigurado ng lalaki na hindi na kailanman ito muling mararanasan ng kaniyang asawa, pati na rin ng kanilang mga kasamahan.

Ang buong kwento ng ginawang sakripisyo ng lalaki, eto.

Nagsilbing inspirasyon para sa myembro ng Dalit community mula sa India na si Bapurao Tajne ang pang-iinsulto na naranasan ng kaniyang misis na si Sangita nang subukan nitong kumuha ng tubig mula sa isang balon pero pinagkaitan ito ng may-ari.

Labis pa man ding nangangailangan ng tubig ang kanilang komunidad dahil nasa kalagitnaan ng water crisis ang Maharashtra nang mangyari ang insidente.

Dahil dito, masipag na hinati ni Tajne ang kaniyang oras sa loob ng 40 araw para maghukay. Apat na oras bago magtrabaho ay naghuhukay muna ang lalaki at babalikan ang kaniyang project sa loob ng dalawang oras matapos makauwi mula sa trabaho.

Bagama’t tinutulan ito ng kanilang mga kasamahan, ipinagpatuloy pa rin ni Tajne ang paghuhukay ng balon para sa kaniyang misis nang sa ganon ay hindi na ulit ito maliitin pa.

Dahil sa pagtyatyaga, matapos ang mahigit isang buwang pagsisipag ay nakagawa rin si Tajne ng sarili nilang pagkukunan ng tubig.

Ayon kay Tajne, pakiramdam niya ay nakaranas sila ng pang-iinsulto dahil sa kanilang kahirapan. Ngunit si Tajne, pinairal ang kabaitan at hindi na pinangalanan pa ang nagdamot ng tubig sa kaniyang asawa dahil ayaw umano niya ng hidwaan.

Samantala, nang matapos si Tajne sa paghuhukay ay nagawa niya itong palalimin ng 15 feet at lapad na 6 feet, na hindi lang ang kaniyang asawa ang nakikinabang kundi pati na rin ang buong dalit community.

Sa mga nakaranas ng pang-aapi diyan, ano ang ginawa niyong best revenge para bumawi sa mga sarili niyo?

Kung ang iba ay nais na matyempuhan ang pagdaan ng Google Street View car para makuhanan sila ng camera nito, ibahin niyo ang lalaking ito sa argentina na namataan sa google street view nang nakahubad. Dahil sa labis na kahihiyan, inireklamo nito ang Google.

Kung sino nga ba talaga ang may kasalanan sa pagitan ng dalawang panig, eto.

Naninirahan sa maliit na bayan sa Argentina ang isang hindi pinangalanang lalaki at nasaktuhan pa na nasa labas ito ng kaniyang bahay nang dumaan sa kanilang lugar ang Google Street View car.

Sa halip na ma-excite para sa isang possible exposure, nagresulta ito sa matinding kahihiyan sa lalaki dahil nakuhanan ito ng camera ng sasakyan na nakahubad sa kaniyang bakuran.

Matapos ang hindi inaasahang exposure ng lalaki at ng kaniyang puwitan, naging tampulan ito ng katatawanan, hindi lang sa kanilang lugar kundi pati na rin hanggang sa kaniyang trabaho. Ang lalaki, isa pa man ding pulis.

Dahil dito ay nagsampa ng reklamo ang lalaki laban sa Google sa kadahilanang na-violate nito ang kaniyang privacy, lalo na at malinaw sa litrato ang address ng kaniyang bahay.

Pagdating sa lower court, na-dismiss ang kaso at kinwestyon ang paglalakad ng lalaki nang nakahubad sa kaniyang bakuran. Pero ayon sa korte, tila nanghimasok ang Google sa private property ng lalaki at nagdulot ng labis na kahihiyan dito.

Nabsaura ang argumento ng Google na mababa umano ang gate ng bahay ng lalaki dahil nadiskubre na umaabot talaga ito ng 6 feet.

Samantala, matapos nito ay pinagbayad ang Google Argentina at Google Inc. ng 16 million pesos na danyos sa kahihiyang natanggap ng lalaki.

Ikaw, sino ba sa palagay mo ang may kasalanan sa kasong ito?

Nauwi sa trahedya ang isa sanang masayang reunion ng isang pamilya sa Negros Oriental nang hindi inaasahang binawian ng buhay ang isang overseas Filipino worker na uuwi na sana sa kaniyang mga mahal sa buhay.

Ang nakapanlulumong kwento ng babae, eto.

Viral ngayon sa social media ang litrato at video ng 41-anyos na babae na tinukoy na si Wilma Auza, isang OFW mula sa Kuwait na sa wakas ay uuwi na sana sa kaniyang pamilya.

Sa video, makikita si Wilma na nakaupo sa loob ng bus at wala ng buhay.

Ayon sa mga ulat, bago makarating sa Negros Oriental ay dumaan muna si Wilma sa mahabang biyahe mula sa Kuwait.

Sakay ito ng connecting flights na dumaan ng Japan, Manila, at Cebu, bago tuluyang nakasakay ng bus patungo sa Dumaguete City na maghahatid sana sa kaniya sa kanilang tirahan.

Pagkatapos ng mahabang biyahe, nang tuluyang huminto ang bus ay hindi na nagising pa si Wilma.

Ayon pa sa mga pag-uulat, bago nakatulog si Wilma ay nakaranas muna ito ng pagsusuka, habang ang mga otoridad naman ay susuriin muna ang medical history ng biktima para tukuyin kung ano nga ba ang tunay na dahilan ng biglaan nitong pagkamatay.

Samantala, ang insidenteng ito ay nagsisilbi ngayong paalala sa mga netizen online na higit pang bigyan ng halaga ang mga OFW na nakikipagsapalaran sa ibang bansa dahil sa mga sakripisyo at pagtitiis na ginagawa ng mga ito na malayo sa kanilang mga pamilya habang nagsusumikap na buhayin ang mga ito.

Gayunpaman, dinala na ang bangkay ni Wilma sa isang Rural Health Unit para sumailalim sa pagsusuri.
Sa mga may kaanak na OFW diyan, sa paanong paraan niyo ipinaparamdam sa kanila na sila ay appreciated?

Tumulong ka na nga, napasama ka pa. Ganyan ang sinapit ng isang babae na nagtatrabaho sa canteen ng isang eskwelahan matapos pakainin ang mga gutom na estudyante.

Kung bakit minasama ang pagtulong ng babae? Eto.

Taong 2017 nang matanggal sa pagiging cafeteria worker si Debbie Solsman matapos magtrabaho rito mula pa noong 2003 nang dahil lang binigyan niya ng extra food ang mga nagugutom na estudyante mula sa Denver Place Elementary School.

Ayon kay Debbie, kapag kinakausap niya ang mga bata ay sinasabi ng ilan sa mga ito na kung minsan ay hindi sila nakakakain ng hapunan.

Ang dahilan naman ng Willmington City School District para tanggalin sa pwesto ang babae ay dahil ipinamimigay umano ni Debbie nang libre ang mga pagkain sa mga bata, kabilang na ang kaniyang mga apo.

Pero ang depensa ni Debbie, binabayaran niya ang mga ekstrang pagkain na ibinigay niya sa mga bata kapag sumesweldo siya. Pero kapag wala umano siyang pera, nagsusulat siya ng IOU sa papel at inilalagay sa kaha.

Bagama’t natanggal sa trabaho dahil sa pagmamalasakit at mabuting gawain, sinabi ni debbie na kung mabibigyan siya ng pagkakataon na muling magtrabaho sa isang school canteen, tutulungan pa rin niya ang sinumang bata na manghihingi sa kaniya ng tulong.

Ikaw, sa palagay mo ba ay makatarungan ang ginawa sa cashier lady na ito?

Muli na namang napatunayan ang taglay na honesty ng mga Japanese nang dahil lang sa nasirang system sa toll gate. Pinagbigyan kasi ang mga ito na dumaan nang libre pero ang 24,000 na mga motorista, kusa pa ring nagbayad ng toll fee.

Ang buong detalye ng insidente, eto.

Sa pagitan ng april 8 at 9 sa kasalukuyang taon, nagkaroon ng malfunction ang Electronic Toll Collection o ETC sa Japan sa loob ng 38 oras, partikular na sa Chuo Expressway, Kanagawa, Yamanashi, Nagano, Shizuoka, Aichi, Gifu, at Mie.

Dahil dito, hindi nagawang basahin ng system ang card ng mga driver.

Bilang maaari itong maging sanhi ng matinding traffic, agad nang gumawa ng paraan ang Central Nippon Expressway Co o NEXCO Central at pinayagan ang mga motorista na pansamantalang dumaan sa toll gate nang libre.

Pero hinikayat ang mga ito na ihabol na lang ang kanilang bayad sa pamamagitan ng online payment.

Pero pagpatak ng alas diyes ng gabi sa unang araw na mag-crash ang system, sinabi ng NEXCO na nakatanggap sila ng online payment mula sa tinatayang 24,000 na mga motorista.

Bukod diyan, pagdating ng mayo ay nakatanggap ng good news ang mga motorista dahil ibabalik sa kanila ng expressway operator ang kabuuan ng kanilang bayad sa pamamagitan ng ETC mileage program o sa iba pang paraan.

Ang ganitong uri ng tagpo sa Japan, hindi na bago sa pandinig ng karamihan dahil kilala ang mga hapon sa pagiging matapat at maaasahan, kung kaya nga mas lalo pang nakatanggap ang mga ito ng papuri mula sa mga netizen.

Kung ikaw ang dumaan sa mga nasabing birthday, kusa ka rin bang magbabayad o sasamantalahin mo ang libreng pagdaan dito?