EXPLAINERS

Mahirap ang mawalan ng trabaho, lalo na kung hindi mo ito napaghandaan. Pero ibahin niyo ang lalaking ito sa Auckland na inabisuhan pa ng kaniyang boss na magsama ng support person sa kanilang meeting dahil nakatakda pala itong tanggalin sa trabaho. Para pagaanin ang loob ng lalaki, nagsama siya ng clown sa opisina.

Kung nagawa nga ba nang maayos ng clown ang trabaho niya, eto.

Nakatanggap ng email mula sa kaniyang boss ang lalaking kinilalang Si Josh Jack mula sa Auckland kung saan sinasabing kinakailangan nilang pag-usapan sa isang meeting ang kaniyang posisyon sa trabaho.

Bukod diyan, inabisuhan din si Josh na magsama ng support person sa meeting, kung kaya sumagi sa isip nito na dalawa lang ang posibleng mangyari: mapo-promote siya o masisesante.

Sa isang litrato, makikita si Josh sa isang kwarto na masinsinang nakikipag-usap sa dalawa niyang employers kasama ang napili niyang isama na support person na clown.

Ang nirentahang clown, tila nasa isang children’s party lang at gumawa pa ng lobo na hugis unicorn at poodle habang nasa kalagitnaan ng meeting.

Ayon kay Josh, maya’t-maya nilang pinagsabihan ang clown dahil may kaingayan ito habang gumagawa ng lobo.

Gayunpaman, mabuti na lang at nagawa pa rin ng clown ang kaniyang trabaho na magbigay aliw kahit na wala ito sa isang party, lalo na at tuluyan ngang sinesante si Josh.

Bagama’t natanggal ang lalaki sa trabaho, nagpasalamat pa umano ang kaniyang mga boss dahil nagawa niyang pagaanin at lagyan ng twist ang isa sanang mabigat na meeting.

Sa mga natanggal sa trabaho diyan, ano ang ginawa niyong coping mechanism matapos kayong sibakin sa posisyon?

Sinong mag-aakala na isang pamilya ang masisira nang dahil lang sa mababaw na dahilan ng pag-aaway ng mga magulang? Ang mag-asawa kasi, hindi lang naman nagkasundo sa ibibigay nilang pangalan sa kanilang new-born baby.

Kung nagkaroon din ba sa wakas ng pagkakakilanlan ang bata, eto.

Nauwi sa paghahain ng divorce sa Pudong New Area People’s Court ang isang hindi pinangalanang mag-asawa mula sa Shanghai, China dahil umano sa personality indifferences.

Taong 2023 nang ikasal ang dalawa at agad na biniyayaan ng isang baby boy makalipas lang ang isang taon.

Pero nang ipanganak ang kanilang bata, doon na nagsimulang magkaroon ng lamat ang relasyon ng dalawa dahil sa hindi pagkakasundo sa kung ano ang ibibigay na pangalan sa kanilang anak.

Ayon sa mga ulat, dahil sa kagustuhan ng mag-asawa na pareho silang masunod sa magiging pangalan ng baby, magkahiwalay silang nagpunta sa ospital para ipa-register ang preferred names nila, pero pareho itong rejected dahil sa hindi pagsunod sa policy.

Ang misunderstanding ng dalawa, umabot pa sa punto ng pagde-demand ng ‘power of attorney’ nang sa ganon ay isa sa kanila ang magkaroon ng kapangyarihan na mag-decide.

Dahil dito, naiipit ang bata at nalalagay sa alanganin ang kalusugan at hindi makapagpabakuna dahil sa kakulangan sa legal documents.

Matapos ang pagpapabalik-balik sa korte, nagkasundo rin sa huli ang mag-asawa sa ibibigay nilang pangalan sa bata, habang kasama naman nilang pupunta ang judge sa ospital para i-apply ang birth certificate nito at sa wakas ay magkakaroon na rin ng pagkakakilanlan ang bata.

Sa mga ikakasal diyan, mukhang mas maigi kung ngayon pa lang ay magkasundo na kayo ng fiancee niyo sa ibibigay na pangalan sa magiging anak niyo. Sige kayo, baka mauwi lang din sa hiwalayan ang kasal na pagkakagastusan niyo.

He was ‘small but terrible.’ Pinatunayan ng isang maliit na aso sa New Zealand na hindi kailanman masusukat sa laki ang katapangan. Ang aso kasi na ito, buong tapang na nilabanan mag-isa ang dalawang pit bull na umatake sa mga kalaro niyang bata kahit na ang kapalit ay ang mismong buhay niya.

Ang kwento ng katapangan ng maliit na aso na ito, eto.

Nakikipaglaro noon ang siyam na taong gulang na Jack Russell Terrier na si George sa limang bata matapos nilang manggaling sa isang tindahan sa Manaia, New Zealand nang sumulpot sa likuran nila ang dalawang pit bull.

Ayon sa isa sa mga bata na si Richard Rosewarne na noo’y 11-anyos, ang apat na taong gulang niyang kapatid na si Darryl ang target ng mga pit bull.

Bagama’t maliit, walang takot na pinagtanggol ni George ang mga bata. Ayon pa kay Richard, sinubukang itaboy ni George ang mga aso sa pamamagitan ng pagtahol sa mga ito.

Pero ang mga pit bull, agad na umatake at kinagat si George sa ulo at sa likurang bahagi ng kaniyang katawan. Sa tindi ng pinsala sa engkwentro, sinabi ng owner ni George na noo’y 69-anyos na si Alan Gay na tumuklap ang balat ng kawawang aso sa lalamunan, dibdib, at likod.

Sa kasamaang palad, hindi na nailigtas pa ng veterinarian na si Steven Hopkinson ang aso mula sa mga injuries na tinukoy nito na pinakamatinding pinsala na nakita niya.

Matapos nito ay sinurrender ng owner ang mga pit bull sa Dog Control Officers at isinailalim sa euthanasia alinsunod sa kautusan sa kanilang bansa.

Samantala, ilang linggo matapos pumanaw ni George, pinatayuan ito ng rebulto sa Manaia at pinarangalan ng dalawang medalya bilang pag-alala sa katapangan at pagiging selfless ng small but terrible na aso.

Sa mga pet owners diyan, tandaan na hindi natatapos ang pagiging responsible owner sa pagpo-provide ng mga pangangailangan ng mga alaga niyo. kabilang din dito ang paninigurado na hindi magdudulot ng kapahamakan ang inyong mga pets.

Ika nga ng matatanda, enjoyin ang kabataan at huwag masyadong subsob sa pag-aaral. Pero sa kaso na ito sa China, mga magulang mismo ng isang bata ang nagtulak sa kaniya na mag-aral sa loob ng 14 na oras. Dahil sa pagod at kawalan ng pahinga, ang bata, isinugod sa ospital.

Kung ano ang diagnosis ng bata, eto.

Sa halip na good grades, sakit ang nakuha ng isang 11-anyos na batang lalaki mula sa Changsha na matatagpuan sa probinsya ng Hunan, Southern China matapos nitong mag-aral nang halos kalahating araw.

Ayon sa mga ulat, alas otso ng umaga nagsimulang gumawa ng kaniyang summer homework ang bata at natapos ng alas diyes na ng gabi.

Pagdating ng alas onse ng gabi, bigla na lang nag-iba ang timpla ng bata at nakaramdam ng pagkahilo, pananakit ng ulo, pamamanhid ng limbs, at mabilis na paghinga.

Agad namang naisugod ng mga magulang ang kanilang anak sa ospital kung saan agad itong sinuotan ng breathing mask para ibalik sa normal ang paghinga ng bata.

Samantala, ayon sa mga ulat, nag-ugat umano ito sa stress at pressure na naramdaman ng bata sa kaniyang mga magulang na nagbabantay sa kaniya habang gumagawa ng homework sa loob ng 14 hours nang wala man lang pahinga.

Bilang resulta, sa halip na mag-enjoy sa pag-aaral, nakaranas ng hyperventilation ang bata na sa murang edad na-diagnose na ng isang respiratory condition.

Sa mga magulang diyan, hinay-hinay sa pagbabantay. hindi naman porke maluwag kayo sa mga anak niyo ay magbubulakbol na agad ang mga ito sa eskwelahan.

Sabi nga nila, kilalanin mo muna nang maigi ang isang tao bago mo jowain. ganyan naman ang ginawa ng isang babae sa China nang makipag-date ito.
Ang problema nga lang, nasobrahan ang babae at isinama pa ang pamilya niya para lang alamin kung generous ba ang kaniyang ka-date.

Kung ano ang kinahinatnan ng blind date na ito, eto.

Nag-set ng blind date ang mismong nanay ng isang 29-anyos na lalaki mula sa China dahil nababahala umano ito sa matamlay na lovelife ng kaniyang anak.

Nang dumating ang araw ng date ng lalaki sa isang restaurant sa Eastern Chinese Province, hindi lang ang sinet up sa kaniya na babae ang dumating kundi pati na rin ang pamilya nito.

Bagama’t first date pa lang, pinatunayan agad ng wais na babae na gusto muna niyang kilalanin ang lalaki bago niya ito maging nobyo.

Ayon sa mga ulat, 23 myembro ng kaniyang pamilya ang isinama ng babae sa restaurant.

Willing naman umano ang lalaki na bayaran ang kanilang bill pero hindi nito inasahan na hindi lang silang dalawa ng babae ang mag-ge-getting to know.

Matapos ang date ay agad na sumibat ang lalaki nang makita na umabot ng $3,100 ang total ng kinain nila sa restaurant o tumataginting na mahigit 150,000 pesos.

Gayunpaman, kalaunan ay binayaran naman ng lalaki ang parte niya sa bill pero hinayaan niya ang pamilya na bayaran ang natitirang balanse.

Ikaw, ganito ka rin ba ka-agresibo kahit na nasa first date pa lang kayo?

Marami ngayon ang nangangarap na lumipat sa ibang bansa para makapagbagong buhay at manirahan sa lugar kung saan walang nakakakilala sa kanila. Katulad na lang ng lalaking ito mula sa Wisconsin na bigla na lang naglaho para manirahan sa ibang bansa. ang problema, pamilyado itong tao at hindi sinama ang kaniyang pamilya.

Kung gaano katagal ang ipinataw na sentensya sa lalaki, eto.

August 2024 nang maglaho na lang bigla ang 45-anyos na tatay mula sa Wisconsin na si Ryan Borgwardt nang magpunta ito sa isang fishing trip.

Bukod sa pag-iwan nito sa kaniyang cellphone at I.D., natagpuan na lang din sa huli nitong pinuntahang lugar ang isang nakataob na bangka.

Nang imbestigahan ang insidente, nadiskubre na ang nawawalang lalaki ay lumipad na pala patungong Canada bago naglagi sa Georgia kung saan ito nakipag-meet up sa isang babae na nakilala nito online.

Wala naman sanang kaso sa biglaang pag-alis ni Ryan at pagbabagong-buhay sa Europe. Pero ang problema, mayroon itong tinalikurang asawa at tatlong anak.

Tila masusing pinlano ang pag-alis ng lalaki dahil nagawa pa nitong maglipat ng pera sa isang foreign bank account, nag-apply ng replacement passport, at pina-reverse pa ang kaniyang vasectomy.

Sa tulong ng isang russian woman, na-contact nila ang lalaki na siya namang nag-send ng video kung saan sinabi nito na nasa maayos siyang kalagayan.

Nang bumalik ang lalaki sa U.S., sa halip na salubungin ito ng kaniyang pamilya ay obstruction case ang bumungad dito at pinatawan pa ng 89 na araw ng pagkakakulong, katumbas ng mga araw na ginugol ng mga otoridad sa paghahanap sa kaniya.

Pinagbabayad din ito ng $30,000 o mahigit isang milyong piso bilang kabayaran sa ginastos sa isinagawang search and rescue operation.

Bukod sa maigsing sentensyang ito, tuluyan na rin itong hiniwalayan ng kaniyang asawa na naghain na ng divorce.

Samantala, nilinaw naman ng abogado nito na si Erik Johnson na bumalik ang lalaki sa america para harapin ang iniwan niyang problema.

Sa mga may asawa diyan, walang masama kung babantayan niyo ang online activities ng mga asawa niyo at baka bigla na lang itong umalis nang walang paalam para mamuhay nang hindi na kayo kasama.

Hindi naman na bago sa ating lahat ang makarinig ng mga kaso ng kurapsyon dito sa Pilipinas. Halos gawin na ngang libangan ng mga tao ngayon ang pagsubaybay sa mga hearing at imbestigasyon na ginagawa hinggil sa bilyun-bilyong pisong halaga ng flood control scandal.

Gayunpaman, hindi pa rin nawawala sa isip ng mga Pilipino kung paano ba tuluyang mawawala ang kurapsyon sa bansa?

May tyansa pa kaya na isang araw, gigising tayo nang wala ng pangamba para sa tax na binabayaran natin?

Alam niyo ba na ang kalapit nating bansa na Singapore ay naitala bilang least corrupt country sa asya nitong nakaraang taon? Sana all, diba?

Ayon yan sa inilabas na Corruption Perception Index ng Transparency International the Global Coalition Against Corruption kung saan nanguna ang Denmark, Finland, Singapore, New Zealand, at Luxembourg.

Sa katunayan, ayon sa isang report, sunud-sunod ang pagbaba ng mga naitatalang kaso ng kurapsyon sa Singapore.

Noong 2016, 447 reports at 118 cases of corruption ang natanggap ng the Corrupt Practices Investigation Bureau (CPIB) ng Singapore.

Pagdating ng 2023, halos kalahati ang ibinaba ng mga report at naging 215 na lang, habang ang mga kaso naman ay 81 na lang.

At nito lang 2024, naabot na nga ng Singapore ang pinaka mababang kaso ng kurapsyon na naitala sa bansa.

Ayon sa report na inilabas ng CPIB, 177 na lang ang mga natanggap nilang reports na may kinalaman sa kurapsyon. 75 sa mga ito ang naka-register para maimbestigahan at 61 naman sa mga ito ay inireport anonymously.

Pero paano nga ba ito nangyari? ang CPIB kasi, hindi nagpapaka-kampante at talagang sinisiguro nila na mapapanagot ang mga tiwali.

Halimbawa na lang ay ang former Transport Minister na si S. Iswaran na pinatawan ng isang taong pagkakakulong at ngayon ay nakasailalim sa home detention matapos mapatunayang guilty sa pagtanggap ng mamahaling regalo habang nasa pwesto at paglabag sa Obstruction of Justice.

See? Mayroon naman palang solusyon. May pwede naman palang gawin para mapanagot ang mga kurakot at hindi magipit ang mga nasasakupan nito.

Ang tanong ngayon, posible pa kaya tayong lumaya mula sa pandaraya? Tandaan, ika nga ng matatanda, kung gusto may paraan, kung ayaw may dahilan.

Isa na namang balita ang pumutok nito lang September 29 kung saan pormal na inanunsyo ni Ako Bicol Party-list Representative Elizaldy Co sa isang Facebook post ang kaniyang resignation bilang miyembro ng House of Representative.

Sa kasunod na post naman ay pansamantala muna siyang nagpaalam bilang kinatawan ng kaniyang partido.

Nangyari ang mga announcement na ito sa kaparehas na araw na binigay sa kaniya na deadline para bumalik sa Pilipinas.

Gayunpaman, hindi pa rin nawawala ang tanong kung kailan nga ba ito babalik sa Pilipinas?

Matatandaan na nasa ibang bansa ngayon ang dating kongresista dahil sa kaniyang medical condition.

Sa opisyal na panayam ng DWIZ, tinanong ang nakakagirian nito na si Navotas Rep. Toby Tiangco kung ano nga ba ang posibleng kaharapin ni Zaldy Co kapag umuwi ito sa Pilipinas. Ang kongresista, isa lang naman ang gusto at yan ay ang sagutin ni Zaldy Co ang mga paratang na idinidikit sa pangalan niya.

Habang mas maganda aniya na kanselahin ang passport nito kung sakaling hindi ito babalik sa Pilipinas.

Gayunman, nauna nang nag-resign sa kongreso at naghain ng leave of absence sa Ako Bicol Party-list ang dating kongresista sa kadahilanang nasa panganib umano ang buhay nila ng kaniyang pamilya dahil sa natatanggap nilang mga banta.

Tila mata ng agila kung magmatyag ngayon ang mga Pilipino sa bawat galaw ng mga pulitiko, government officials, pati na rin sa pamilya ng mga ito.

Parang may nabuong trust issue sa taumbayan matapos isiwalat sa publiko ang maling paggamit ng pondo o tax mula sa mga Pilipino, partikular na sa bilyun-bilyong halaga ng palpak na flood control projects.

Kabilang sa mga opisyal ng goberyno na pinupuna ngayon sa social media ay ang anak ni Broadcaster-Senator Raffy Tulfo na si Quezon City 2nd District Representative at Assistant Majority Leader Ralph Wendel Tulfo.

Ito’y matapos mag-viral sa social media ang video ni Rep. Tulfo sa isang high-end nightclub sa Las Vegas noong December 2023 na lumalagok ng mamahaling alak.

Bukod pa riyan, nakuhanan din kung paano binayaran at pinirmahan ni Rep. Tulfo ang kanilang bill na nagkakahalaga ng 42,605 US dollars at 73,951.64 US dollars. Sa pera natin, tumataginting na 6,768,120.17 pesos ang total nito.

Pero ang paliwanag niya sa isang pahayag, wala silang ginamit na pera ng gobyerno o ng taumbayan sa kanilang pag gu-goodtime.

Humingi rin ito ng pang-unawa at sinabing mayroong natanggap na good news ang kaniyang mga kaibigan at private Christmas celebration ang ginawa nila sa nightclub.

Paliwanag niya, credit card man niya ang ginamit, lahat naman daw ay sila nag-ambag sa mga nagastos. Sinabi niya rin na naiintindihan niya kung bakit nasasaktan ang mga Pilipino sa mga magagarbong selebrasyon.

Samantala, matatandaan na si Rep. Tulfo rin ang nag-viral nito lang January matapos mahuling dumaan ang kaniyang sasakyan sa EDSA busway.

Panibagong impormasyon na naman ang naisiwalat sa katatapos lang na ika-anim na Senate Blue Ribbon Committee hearing na siyang mas nagdiin sa mga dawit umano sa flood control issue na sina Cong. Elizaldy Co at former House Speaker Martin Romualdez.

Ito ang surpresang dinala ni Sen. Marcoleta na si Orly Regala Guteza na nagpakilala bilang dating Security Consultant ni Rep. Zaldy Co at miyembro ng Philippine Marines.

Kabilang sa mga isiniwalat ni Guteza ay ang pagde-deliver umano ng 46 na maleta sa bahay ni Ako Bicol Party-List Rep. Co.

Pero karamihan umano sa mga maleta ay dinala sa bahay ni Cong. Martin Romualdez sa Mckinley Street, Taguig City. At take note, tinatayang aabot lang naman sa P48 million ang laman ng bawat maleta.

Pero ang problema, itinanggi ng abugado na si Atty. Petchie Rose Espera na siya ang nag-notaryo sa affidavit ni Guteza.

Pero ayon naman kay Senate President Pro Tempore Sen. Panfilo ‘Ping’ Lacson sa opisyal na panayam ng DWIZ, side issue lang ang usapin kung tama ba ang pagkakanotaryo sa nasabing affidavit dahil substance ng nilalaman nito ang mas mahalaga.

Pero paglilinaw ni Sen. Lacson, kung sakali man na mapapatunayang nagsinungaling si Guteza nang sabihin na notarized ni Atty. Espera ang kaniyang affidavit, maaapektuhan ang mga impormasyon ni isiniwalat niya sa hearing.

Gayunpaman, sinabi ng senador na matatawag na matibay ang affidavit ni Guteza kung masusuportahan pa ito ng mga ebidensya at hindi mare-refute o mapapatunayang mali. Dahil kung wala ang mga ebidensya, mananatili lamang alegasyon ang mga isiniwalat ng bagong witness.

Samantala, sinabi ng senador na hindi na pahaharapin pa sa korte ang nasabing abugado dahil magiging destruction lang ito. Habang nag-request naman si Guteza na maisailalim sa witness protection program para maproteksyunan siya at ang kaniyang pamilya.