EXPLAINERS

Sabi nga nila, iba ang pagmamahal ng mga lolo at lola sa kanilang mga apo kumpara sa pagmamahal nila sa sarili nilang mga anak. Katulad na lang ng lolo na ito mula sa France na sinira ang malinis niyang record at napilitang gumawa ng krimen para makulong at mai-rescue ang apo nito na nakakaranas umano ng pang-aabuso sa loob ng bilangguan.

Kung matagumpay nga bang nakapasok ang lolo sa kulungan, eto.

Isang araw, nagpunta ang hindi pinangalanang 60-anyos na dating bumbero sa isang supermarket na matatagpuan sa Sainte-Rose, France, hindi para mag-grocery kundi para magnakaw.

May takip ang mukha at bitbit ang isang baril, pinasok ng nasabing lolo ang grocery store at nilimas ang lahat ng laman ng cash register. Pero ang totoo, hindi ito interesado sa pera.

Ayon sa ulat, hindi nagtagal ay agad ding naaresto ang matanda habang mabagal itong naglalakad pabalik sa kaniyang sasakyan. idagdag pa na malapit lang sa police station ang ninakawan nitong grocery.

sa isang pahayag naman sinabi ng abogado nito na si Lea Le Chevillier na desperado ang matanda na makita ang nakakulong nitong apo.

Kung bakit pursigido ang lolo na matulungan ang kaniyang apo? Ito ay dahil minsanang nakita ng lolo ang kaniyang apo sa visiting room sa kulungan na nagtamo ng damage sa ngipin matapos pagsamantalahan ng kapwa nitong preso.

Sa huli, inamin ng matanda sa korte ang ginawa nitong krimen ngunit hindi ito hinatulan ng anumang kaparusahan dahil nagawa lang umano ito ng lolo dahil sa desperasyon.

Sa halip, ipinagbawal na itong magpunta sa grocery store at pinagbabayad lang ito ng kompensasyon sa ninakaw nitong pera.

Gayunman, nakatakdang sumailalim ang lolo sa psychological treatment at sa kabutihang palad ay hindi ito tinanggalan ng karapatan na malayang bisitahin ang kaniyang apo sa bilangguan.

Ikaw, kaya mo rin bang labagin at kalabanin ang batas para maprotektahan ang mga mahal mo sa buhay?

Bukod sa mismong estudyante, nalulungkot din ang mga magulang kapag mababa ang nakukuhang grades ng kanilang mga anak dahil sa takot na tuluyan itong bumagsak. Katulad na lang ng tatay na ito sa China na hindi napigilang maiyak matapos bumagsak sa math exam ang kaniyang anak.

Kung naiyak nga ba ang tatay dahil lang sa mababa nitong score? O dahil siya ang nagturo rito? alamin.

Nag-trending sa Chinese social media platform ang isang tatay mula sa Zhengzhou, Henan province matapos kumalat ang video nito na umiiyak dahil sa kaniyang anak. Maririnig pa na tinatawanan ito ng kaniyang asawa nang sabihin nito na wala na siyang pakialam dahil nasayang ang efforts niya.

Ayon sa mga ulat, walang sinayang na oras ang ma-effort na tatay dahil sa loob ng isang taon, araw niyang tinututor ang kaniyang anak.

Nagpupuyat pa umano ito para lang makasigurado na makakapasa ang bata sa exam.

Pero wala nang nagawa ang pagod na tatay nang makita ang scorecard ng kaniyang anak kung saan makikita ang lumalagapak na score nito sa math examination na 6/100.

Ang mas nakakaiyak pa sa kwento na ito ay bumaba lang ang scores ng bata matapos itong turuan ng kaniyang tatay. Dati naman kasi, nagagawa nitong maka-score ng 40, 50, at minsan pang nakakuha ng 90.

Samantala, hindi naman naiwasan ng mga online netizen na kwestyunin ang teaching skills ng tatay at sinabi pa na baka hindi ito magaling sa math kaya bumagsak ang kaniyang anak.

Habang ang pinaalala naman ng iba na grades are just numbers at hindi mangangahulugan na papalpak na sa buhay ang isang tao kapag nakakuha ito ng mababang grado.

Sa mga magulang diyan, huwag masyadong mahigpit at hayaan ang mga anak na matuto sa paraan na komportable sila. Habang kayo naman ay dapat ding matuto na pagkatiwalaan ang kakayahan ng inyong mga anak.

Gusto mo bang mag-check in sa isang hotel kung saan ikaw pa ang babayaran? Kung ganon, mag-sign up na sa longest-running hotel casino na ito sa Las Vegas at manalo ng limpak-limpak na salapi. Ang kailangan mo lang gawin ay maghanap ng mga multo nang walang kasama. Nakalimutan ko bang sabihin na itinuturing din ito na oldest at most haunted hotel sa lugar? Good luck.

Kung magkano ang premyo na matatanggap ng maglalakas-loob na sumali, eto.

Bago dumating ang kapaskuhan, daanan muna natin ang season ng katatakutan. Para sa mga mahilig sa usaping paranormal at naghahanap ng thrill sa buhay, may pa-contest ang El Cortez Hotel and Casino para sa inyo.

Itinayo ito noong 1941 at matatagpuan sa Fremont Street o ang tinatawag na Old Strip o Old Vegas. Bilang may kalumaan na ang nasabing hotel, inaasahan na mayroong naninirahan doon na hindi nakikita.

Sa lahat ng magre-register at gustong kumasa sa challenge, isa lang ang mapipili na mananatili sa hotel para mag-ghost hunting nang mag-isa.

Bitbit ang provided gears katulad ng EMF meters, EVP recorders, at thermal sensors, mag-iikot sa buong hotel ang mapipiling ghost hunter at kailangan i-document sa pamamagitan ng pictures at videos ang pinaka nakakatakot, nakakatawa, at misteryosong discoveries.

Gayunpaman, panigurado naman na may magpaparamdam sa ghost hunter lalo na at may sabi-sabi na nagkalat ang abo ng mga pumanaw na empleyado ng hotel sa basement nito.

Ikaw, uunahin mo pa ba ang takot mo kung papaldo ka naman sa mahigit 200,000 pesos na premyo?

Extreme focus, dedication, sipag, at tibay ng loob ang kinakailangan sa pag-aaral ng medisina. Kung minsan nga ay nawawawalan na ng oras para sa sarili ang mga estudyante dahil sa sobrang busy. Pero ang estudyanteng ito, hinangaan dahil sa galing sa pagmu-multistask. nag-aral lang naman kasi ito habang gumigimik sa isang club.

Kung paano ito nagawa ng lalaki, eto.

Nag-viral sa social media at umani na ng mahigit 1 million likes ang video ng isang lalaki kung saan kitang-kita kung paano ito nag-stand out sa crowd ng isang club.

Kung titingnan, mistulang KJ ang lalaki at napilitan lang na sumama para gumimik.

Habang nagsasayawan kasi ang mga party-goers, nanatili lang na nakaupo at nag-aaral ang lalaki na ayon sa caption ng post ay isa palang medical student at future doctor.

Bagama’t priority nito ang pag-aaral, hindi napigilan ng lalaki na sumabay sa maingay na kanta at bigla na lang sumayaw habang hindi pa rin iniaalis ang tingin sa kaniyang notes at tablet.

Pero hindi rin nagtagal ay mas lalo pang na-feel ng lalaki ang upbeat music at panandaliang binitawan ang kaniyang reviewers. Napapikit pa nga ito habang sumasayaw pero agad ding bumalik sa pag-aaral.

Samantala, pinuri naman ng commentators ang dedikasyon ng future doctor at mayroon pang nagsabi na kung nagagawa nitong mag-aral sa isang maingay na lugar, paniguradong he can also work under pressure sa ospital.

Sa mga medical students diyan, tuluy-tuloy lang sa pag-aaral para sa pangarap. Pero matuto ring magpahinga at baka makalimutan niyo na kung paano gumimik.

Ika nga nila, self-love is key. Yan ang motto ng mga taong gustong gawing priority ang kanilang sarili, at ng mga taong hindi makahanap ng lovelife. Pero ibahin niyo ang babaeng ito mula sa Italy na piniling pakasalan ang sarili dahil sa paniniwala na kaya niyang maging masaya mag-isa.

Kung bakit napagdesisyunan ng babae na makatuluyan ang kaniyang sarili, eto.

Sumagi sa isip ng noo’y 40-anyos na vlogger at fitness trainer na si Laura Mesi na pakasalan ang kaniyang sarili matapos manggaling sa isang 12-year relationship.

Kadalasan ay nawawalan na ng pag-asa na makahanap pa ng panibagong pag-ibig ang isang tao matapos manggaling sa isang long-term relationship dahil sa trauma, attachment problems, trust issues, at marami pang ibang dahilan.

Pero si Laura, hindi pinressure ang kaniyang sarili. Naging bukas siya sa posibilidad na ma-in love ulit kahit na naniniwala siya na posible pa rin siyang magkaroon ng fairytale kahit na walang prince charming.

Sa tindi ng pagiging strong and independent ng babae, positibo rin ito na hindi niya idedepende ang kaligayahan niya sa isang lalaki kahit na mayroon pa siyang bagong makilala.

Sa halip, nag-set ito ng deadline na kung single pa rin siya sa pagpatak ng kaniyang 40th birthday, pakakasalan niya na ang kaniyang sarili.

Nang tuluyang hindi nakahanap ng panibagong pag-ibig si Laura, she finally said yes to a lifetime with herself.

Suot ang isang white wedding gown, ginanap ang seremonyas na tila isang tunay na kasal na siyang dinaluhan ng mga bridesmaids at 70 mga bisita.

Dahil dito, si Laura ang pinaniniwalaang pinakaunang babae sa italy nagpakasal sa sarili.

Gayunpaman, kahit na hindi itinuturing na legally valid ang solo-weddings o sologamy, ang mahalaga ay hindi na kailangan pang maligaw at maghintay ni laura sa kakahanap ng kapayapaan at pagmamahal mula sa ibang tao.

Ikaw, hirap ka rin bang makahanap ng lovelife? Kung ganon, baka sign na ito para tigilan ang paghahanap ng pag-ibig sa maling lugar at maling tao.

Sabi nga ng matatanda, kapag bata ka pa, huwag mo munang problemahin ang pera. Pero ang mga kabataan sa America, hindi na lang napupuyat dahil sa pagbababad sa social media kundi dahil sa stress sa kaiisip sa pera.

Kung paano nangyaring biglaang naging problemado ang mga kabataan sa usaping pinansyal, eto.

Walang duda na mahirap mag-relax sa gabi lalo na kung maraming tumatakbo sa isip mo katulad na lang ng problema sa pera.

Kung noon, mga magulang at matatanda lang ang namomroblema rito, pero ngayon, kabilang na rin ang mga Gen Z o ang pinakabatang generation sa workforce sector ngayon.

Ayon sa isinagawang pag-aaral ng american memory foam mattress and bedding company na Amerisleep sa 1,000 Americans, 49% sa mga ito ang hindi makatulog dahil sa financial stress.

Pero kung hihimayin ito, lumalabas na 52% sa mga ito ang kabilang sa Generation Z, sumunod naman ang 50% ng mga Millennial, 45% mula sa mga Gen X, at 38% ng Baby Boomers.

Kung ano ang partikular na dahilan ng stress na ito? Nangunguna ang inflation na pumalo sa 69%; 43% naman ay dahil sa rent at housing costs; 37% ang dulot ng job security; 21% dahil sa medical bills; at 19% naman ang nagsabi na dulot ito ng retirement planning.

Bukod pa riyan, lamang din sa bilang ang 52% ng mga gen z na lumala ang sleeping problems dahil sa usaping taripa.

Base sa resulta ng pag-aaral, top 3 coping mechanisms ng Americans ang panonood ng TV, pagbababad sa social media, at paghilata sa kama nang mahabang oras o bed rotting na nakakuha ng 45%, 41%, at 31%.

Ayon sa Amerisleep, hindi lang pagtulog ang apektado ng financial stress kundi pati ang paggising nang pagod sa umaga. Sa kasamaang palad, napabilang na ang unhealthy habit na ito sa nighlty routine ng karamihan.

Ang payo nila, bumuo ng bedtime routine nang sa ganon ay magkaroon ng sapat na oras para makapagpahinga ang isip mula sa fiinancial stress, lalo na at hindi naman natin kontrolado ang ekonomiya.

Ikaw, kabilang ka rin ba sa mga nakakaranas ng financial stress? Kung ganon, anong mechanism ang ginagawa mo para mabawasan ang stress at makasabay sa ekonomiya?

Iba kung alagaan at bigyan ng atensyon ng mga magulang ang kanilang mga anak lalo na kapag wala pang muwang ang mga ito sa mundo. Kung kaya nga hindi na nakakapagtaka na natuliro ang isang nanay mula sa Australia nang bigla na lang mawala ang kaniyang anak na iwanan sa pangangalaga ng daycare center matapos sunduin ng isang estranghero.

Kung naibalik ba nang ligtas ang bata, eto.

Nagulat na lang ang isang hindi pinangalanang nanay nang madiskubreng nawawala na pala ang isang taong gulang niyang anak matapos itong iwanan sa child care center sa Bangor’s First Steps Learning Academy na matatagpuan sa Australia.

Ito’y matapos nagkamaling maibigay ang kaniyang anak sa isang lolo na nakatakdang sunduin ang sarili nitong apo sa nasabing daycare center.

Ayon naman sa asawa ng lolo, hindi nito agad na napansin na maling bata ang kaniyang nasundo, lalo na at kaparehas nito ng buhok ng kanilang apo. Madilim din umano ang kwarto sa center at kapwa natutulog ang mga bata nang dumating doon ang lolo.

Pero nilinaw naman ng nanay ng bata na wala siyang nararamdamang galit sa lolo na nagkamaling sunduin ang kaniyang anak, at tanging ang day care center lang umano ang sinisisi ng mga ito sa insidente.

Samantala, nagbigay naman ng pahayag ang Bangor’s First Steps Learning Academy kung saan inamin nila na hindi nasunod ang kanilang standard protocol sa paghahatid at pagsusundo sa mga bata kung kaya nangyari ang insidente.

Humingi na rin sila ng paumanhin dahil sa idinulot nitong stress sa mga magulang at nilinaw na wala na sa serbisyo ang involved na daycare worker.

Gayunpaman, ligtas namang naibalik ng lolo ang bata sa daycare center pagkalipas ng dalawang oras. Hindi na rin nagsagawa pa ng criminal investigation ang kapulisan pero siniguro pa rin ng NSW Early Childhood Education at Care Regulatory Authority na susuriin nila ang insidente.

Sa mga empleyado diyan, maging mas maingat at huwag lang sarili ang isipin dahil buhay ng ibang tao ang nakataya ano pa man ang trabaho mo.

Sa mga mahilig makipag-date diyan, ano ang madalas na problema niyo? Kung sino ang magbabayad ng bill? Kung susunduin niyo ba ang ka-date niyo? O kung paano kayo tatakas dahil mabilis kayong na-turn off? Pwes, ibahin niyo ang naging problema ng babaeng ito mula sa Massachusetts na napilitan lang naman maging getaway driver ng ka-date niya na isa palang kriminal.

Kung nakulong din ba ang nadamay na babae, eto.

Bumiyahe patungo sa Chepachet, Rhode Island ang isang hindi pinangalanang babae para sunduin ang kaniyang ka-date na si Christohper Castillo sa bahay ng mga magulang nito.

Ayon sa report, habang nagmamaneho ang babae patungo sa North Attleboro, Massachusetts, umiinom naman ng wine si Christopher na prenteng nakaupo sa kaniyang passenger seat.

Sa kalagitnaan ng byahe, bigla umanong ipinahinto ng lalaki ang sasakyan at iniwan ang kaniyang date para pumasok sa Bristol County Savings Bank.

Sa loob ng bangko, tinakot ni Christopher ang teller gamit ang kaniyang baril at nagdahilan na mayroon siyang iniindang sakit para mabigyan siya ng pera.

Pagkalipas lang ng ilang minuto, humahangos na lumabas ng bangko ang lalaki at pawis na pawis na nagmamadaling sumakay sa sasakyan habang nakasuot ng salamin at sumbrero habang bitbit sa mga kamay ang isang baril at pera na nagkakahalaga ng $1,000 o mahigit P58,000.

Si Christopher, inutusan lang naman ang kaniyang ka-date na magmaneho papalayo sa bangko at ginawa pa itong getwaway driver.

Ang napilitang sumunod na babae, agad na pumreno nang mapansin na mayroong nakabuntot sa kanila na mga pulis at naglakad papalayo sa kaniyang sasakyan.

Doon na naaresto ang lalaki at nahulihan ng .44 caliber gun na pag-aari ng kaniyang stepfather. Makalipas ang apat na taon, napatunayang guilty si Christopher sa paglabag sa armed robbery at three counts of assault and battery.

Sa huli, pinatawan ng limang taong pagkakakulong ang lalaki para pagbayaran ang mga krimen na ginawa nito sa first date nila ng babae.

Gayunpaman, sa kabutihang palad ay hindi pinatawan ng anumang kaparusahan ang babae na gusto lang naman sanang makipag-date.

Sa mga mahilig makipag-meetup diyan, kilalanin niyo muna ang mga nakakausap niyo sa social media. Baka sa halip na makatagpo kayo ng pag-ibig ay matagpuan niyo na lang ang mga sarili niyo sa bilangguan.

Kung sa palagay niyo ay imposible ang mabigyan tayo ng second chance at life, nagkakamali kayo. Sa India kasi, isang bangkay ang dadalhin na sana sa huling hantungan pero ibinalik pa sa ospital dahil sa biglaan nitong pag-ubo sa libing.

Kung tuluyan nga bang nabuhay muli ang patay, eto.

Idineklarang brain-dead ang 19-anyos na si Bhau Lachke mula sa Trimbakeshwar Taluka, India matapos magtamo ng matinding injuries sa isang car accident.

Ayon sa pamilya ng lalaki, sinubukan pang isalba ng mga doktor ang kanilang kaanak pero inabisuhan sila ng mga ito na wala nang tyansa na maka-survive ang lalaki.

Tinuring na itong hudyat ng pamilya para simulan ang paghahanda para sa libing ng lalaki.

Nang dumating ang araw ng libing, bago pa magsimula ang seremonyas ay bigla na lang gumalaw at umubo ang bangkay.

Sa sobrang gulat ng pamilya, sa halip na matakot ay nabuhayan ng loob ang mga ito at agad na isinugod pabalik sa ospital ang lalaki kung saan ito muling ginamot at inilagay sa ventilator support.

Samantala, ayon sa ulat, inakusahan ng pamilya ng lalaki ang mga doktor ng misdiagnosing at sinabi na misleading ang pag-anunsyo ng mga ito na brain-dead na ang kanilang kaanak.

Ang depensa naman ng mga doktor, hindi umano sila nagkaintindihan ng pamilya dahil hindi naman daw nila idineklarang patay ang lalaki.

Ikaw, sino sa tingin mo ang may pananagutan sa kasong ito? kasalanan ba ng pamilya na hindi nila naintindihan ang nasabing diagnosis?

Pagibig na sana, naging bato pa. ganyan ang sinapit ng isang matanda mula sa Japan na nahulog ang loob sa nakilala nitong astronaut kuno pero isa pala talagang manggagamit na scammer.

Kung paano nahulog sa patibong ang lola, eto.

Nagkakilala sa social media ang 80-anyos na Japanese woman mula sa Northern Hokkaido Island at ang isang nagpakilalang astronaut na na-stuck umano sa space at nangangailangan ng pera na pambili ng oxygen.

Ang kwento ng astronaut, mayroong umaatake sa kanila habang sakay sila ng spaceship at nangangailangan sila ng oxygen.

Dahil nakuha na nga ng astronaut ang loob ng matanda na tuluyan nang na-in love sa kanya, nagpadala ang lola ng pera para makabili ang mga ito ng oxygen.

Pero ang astronaut, nanghihingi na nga lang ng pera, may kondisyon pa sa matanda. Ang utos sa lola, kinakailangan niyang i-transfer ang pera gamit ang prepaid systems mula sa limang magkakaibang tindahan.

Sa pagitan ng July at August, ipinadala ng lola ang pera na umabot sa 1 million yen o mahigit 370,000 pesos.

Nang sa wakas ay nakatunog ang matanda na scammer ang kausap niya na nagpapanggap na astronaut, doon niya lang ito ikinwento sa kaniyang pamilya at isinumbong sa mga pulis.

SAa kasamaang palad, malabo umano na mabawi pa ng lola ang ipinadala niyang pera matapos mabiktima ng tinukoy ng mga pulis na online romance scam.

Gayunpaman, bilang paalala sa mga taong posibleng samantalahin at targetin ng scammers, isinapubliko ng mga pulis ang nangyari sa matanda at nag-abiso na walang masama na agarang magsuspetsa kapag mayroong nanghihingi ng pera mula sa social media.

Sa mga scammer diyan, bakit hindi niyo na lang gamitin ang galing niyo sa paghahanap-buhay nang marangal sa halip na nag-iisip kayo ng bagong modus? tandaan, pumaldo man kayo sa nakulimbat niyo, iba pa rin kumilos ang karma na bigla-bigla na lang sumusulpot.