NATIONAL NEWS

Tiniyak ng Malacañang na hangad ni Pangulong Ferdinand Marcos Jr. na mapanatili ang maayos na relasyon ng Pilipinas sa China sa kabila ng palitan ng mga pahayag ng Chinese Embassy at ilang opisyal ng pamahalaan.

Ayon kay Palace Press Officer Claire Castro, nananatiling bukas ang administrasyon sa pakikipag-usap sa China sa pamamagitan ng diplomasya.

Gayunman, iginiit ni Castro na hindi isinasantabi ng Pangulo ang pagtatanggol sa interes at teritoryo ng bansa, partikular sa West Philippine Sea.

Paliwanag pa niya, magkaiba ang usapin ng pakikipagkalakalan at pamumuhunan sa China sa usapin ng soberanya at pambansang interes.

Isinusulong ni Albay 3rd District Rep. Adrian Salceda ang apat na panukalang batas para sa pagpapaunlad ng ecotourism sa lalawigan, kasabay ng pangangalaga sa kalikasan at paglikha ng kabuhayan para sa mga residente.

Sa ilalim ng panukala, pauunlarin ang 4 na likas at makasaysayang lugar sa lalawigan, kabilang ang Mount Quiasog sa Libon, Simeon Ola Cave sa Guinobatan, Jovellar Cave and Underground River, at Buhawi Hills sa Pio Duran.

Target din ng panukala na mapalawak ang mga destinasyon ng mga turista sa Albay, mapangalagaan ang kalikasan, mabigyang-proteksiyon ang pamana ng kasaysayan, at makalikha ng kabuhayan para sa mga lokal na komunidad.

Sa kaniyang privilege speech sa House Committee on Tourism, sinabi ni Salceda na hindi lamang Bulkang Mayon ang maaaring puntahan sa Albay dahil marami pang likas at makasaysayang lugar ang dapat matuklasan, kabilang na ang kuweba, mga bundok, at underground river.

Kabilang sa mga batas na itinutulak na maipasa ang House Bill Nos. 4002, 4008, 4010, at 4013 na may iisang prinsipyo… ang paramihin ang turista, makatulong ang bawat turistang darating sa kabuhayan ng komunidad, mapalawak ang oportunidad sa kanilang kabuhayan, at mapanatili ang kasaysayan at kultura ng Albay.

Binigyang-diin ng mambabatas na kailangang tiyaking hindi masisira ang kalikasan sa pagdami ng mga turista, habang nabibigyan ng oportunidad ang mga lokal na komunidad na kumita mula sa turismo. | Sa panulat ni Geli Mendez

Halos limang toneladang ilegal na droga na nagkakahalaga ng ₱11.32 bilyon ang nakumpiska ng Philippine National Police (PNP) sa 47,503 anti-drug operations sa buong bansa mula Enero 1 hanggang Setyembre 30, 2026.

Ayon sa PNP, umabot sa 55,306 ang mga naarestong suspek sa nasabing panahon.

Mas mataas ang nakumpiskang droga kumpara sa kaparehong panahon noong nakaraang taon, kung saan nasa mahigit dalawang tonelada lamang na nagkakahalaga ng halos ₱4.98 bilyon ang nasamsam. Tumaas din ang bilang ng operasyon at mga naarestong suspek.

Ayon kay PNP Chief PGEN Jose Melencio C. Nartatez Jr., patuloy nilang paiigtingin ang kampanya kontra ilegal na droga habang pinangangalagaan ang buhay, ipinapatupad ang batas, at pinananatili ang pananagutan ng mga pulis.

Naniniwala si House prosecution adviser at trial spokesperson Robert Ace Barbers na posibleng bahagi ng estratehiya ng China ang mga “provocation” o pang-uudyok nito sa West Philippine Sea.

Ito’y para samantalahin ng Beijing ang pagkakahati-hati ng mga Pilipino sa gitna ng mga kaganapan sa impeachment trial ni Vice President Sara Duterte.

Ayon kay Barbers, kailangang masusing suriin ng mga opisyal sa pambansang seguridad kung may mas malawak na layunin ang pagiging agresibo ng China sa karagatang sakop ng Pilipinas.

Naniniwala ang dating kongresista na maaaring makinabang ang China kung lalo pang lalalim ang pagkakahati-hati ng mga Pilipino dahil sa usapin ng impeachment at malilihis ang atensyon ng publiko mula sa kaganapan sa WPS.

Gayunman, iginiit niyang dapat ibatay ang anumang pagsusuri sa mapagkakatiwalaang intelligence at beripikadong ebidensiya, at hindi sa haka-haka sa politika.

Hinikayat din niya ang mga Pilipino na magkaisa sa pagtatanggol sa soberanya at protektahan ang pambansang interes ng bansa sa kabila ng pagkakaiba ng pananaw sa politika. | Sa panulat ni Geli Mendez

Posibleng maharap sa kasong plunder at malversation si Vice President Sara Duterte dahil sa umano’y maling paggamit ng P612.5 million na confidential funds ng Office of the Vice President o OVP at Department of Education (DepEd) noong 2023 hanggang 2024.

Ito ang sinabi ni House Prosecutor Joel Chua, batay na rin sa umiiral na batas tungkol sa wastong paggamit ng pondo ng gobyerno.

Gayunman, kinikilala ni Chua na nasa kapangyarihan ng Office of the Ombudsman ang pagpapasya kung anong mga kasong kriminal ang maaaring isampa laban sa bise presidente.

Iginiit ni Chua na kailangang maingat na suriin ang mga kasong posibleng isampa bukod sa plunder na lampas sa P50 million ang itinakdang halaga.

Matatandaang ang paggamit ni VP Sara sa confidential funds ay kabilang sa Article 1 ng impeachment complaint na iniharap sa Senado, subalit kabilang ito sa 3 artikulong binawi ng prosecution.

Paliwanag ni Chua, binawi man ang 3 articles of impeachment, pero hindi ito nangangahulugang ligtas na ang bise presidente sa pananagutan dahil lamang sa pagbawi ng mga naturang artikulo sa impeachment trial.

Una nang sinabi ni Ombudsman Jesus Crispin Remulla na kinakalap at sinusuri na nila ang mga impormasyon para sa posibleng kasong isasampa laban kay VP Sara.

Handa naman aniya ang prosecution na isumite ang lahat ng ebidensyang nakalap at iniharap sa impeachment proceedings. | Sa panulat ni Geli Mendez

Sinita ng Commission on Audit (COA) ang pagpapatupad ng Senado ng overtime payments sa mga empleyadong hindi nakumpleto ang itinakdang 40 regular working hours, batay sa 2025 Annual Audit Report nito.

Ayon sa mga state auditor, nakatanggap ng overtime pay ang ilang empleyado kahit may absent sa kanilang workweek.

Sa 4 na araw na workweek ng Senado, inaatasan ang mga empleyado na magtrabaho ng 10 oras kada araw, kaya ang pagliban sa 1 araw ay nagreresulta sa hindi pagkumpleto ng 40 oras na regular na trabaho.

Ayon sa COA, labag ang ganitong practice sa mga alituntunin ng Civil Service Commission at Department of Budget and Management Joint Circular No. 02, Series of 2015.

Nasita na rin ng mga state auditor ang kaparehong problema sa nakaraang audit, ngunit hindi pa rin ganap na naiaangkop ang mga patakaran ng Senado sa itinakdang guidelines.

Dahil dito, inirekomenda ng COA na tapusin at aprubahan ang draft Senate policy sa pagpapatupad ng overtime services upang matiyak na sumusunod ito sa mga panuntunan ng pamahalaan.

Samantala, sumang-ayon naman umano ang Senado sa rekomendasyon ng COA. | Sa panulat ni Jordan Gutierrez

Pinag-aaralan ng Pilipinas at Estados Unidos ang posibilidad ng pagtutulungan sa pagbuo ng estratehikong reserbang langis ng bansa.

Sa pagpupulong nina Energy Secretary Sharon Garin at U.S. Energy Secretary Chris Wright sa Washington noong October 15, tinalakay nila ang mga hakbang upang mapatatag ang suplay ng enerhiya sa gitna ng pagbabago sa presyo ng langis sa world market.

Ayon kay Sec. Garin, layon ng panukalang ito na magkaroon ang Pilipinas ng nakaimbak na krudo at produkto ng langis na magagamit sa panahon ng krisis.

Bukod sa reserbang langis, tinalakay din ng dalawang bansa ang kooperasyon sa mapayapang paggamit ng nuclear energy, gayundin ang pagpapaunlad ng geothermal energy at natural hydrogen.

Binigyang-diin ng kalihim ng DOE na mahalaga ang mas matibay na ugnayan sa Estados Unidos, upang mapalawak ang mga pinagmumulan ng enerhiya at mapaunlad ang kakayahan ng bansa sa paghahanda sa mga krisis. | Sa panulat ni Reabelle Medina

Kinumpirma ni Department of the Interior and Local Government (DILG) Secretary Jonvic Remulla na service vehicle ng ahensiya ang red-plated Toyota Innova na nakitang nakaparada sa labas ng men’s club na Pegasus.

Namataan ang sasakyan bandang 10 A.M. noong Oktubre 13, batay sa larawang ibinahagi sa Facebook page na Parkeserye.

Ayon kay Sec. Remulla, ang sasakyan ay pag-aari ng DILG Region 4-B.

Kasalukuyang iniimbestigahan ng kagawaran kung sino ang nakatalagang gumamit nito at kung sino ang nagmamaneho sa oras na namataan ito sa nasabing lugar.

Ipinaliwanag din ng kalihim na nasa tabi lamang ng Pegasus ang kasalukuyang tanggapan ng DILG Region 4-B at limitado ang parking space sa gusali.

Dahil dito, gusto niyang ilipat ang opisina sa mas angkop na lugar.

Inaasahang maililipat ang tanggapan sa bagong DILG main office sa Abril.

Samantala, patuloy ang imbestigasyon upang matukoy kung sino ang gumamit ng sasakyan at kung may paglabag sa mga alituntunin sa paggamit ng mga sasakyang pampamahalaan.

Pinag-iisipan na ng Senate Majority Bloc ang paghahain ng resolusyon para kondenahin ang umano’y mapanlaban at nagbabantang pahayag ni Chinese Ambassador Jing Quan.

Ang inihahandang resolusyon ay nagpapakita ng pagtutol ng mga senador sa mga pahayag na itinuturing nilang nagbabanta sa ugnayan ng Pilipinas at China.

Ayon kay Senador JV Ejercito, napag-usapan na ng mga senador ang usapin at inaasahang pormal na ihahain ang resolusyon sa muling pagpapatuloy ng sesyon ng Senado.

Iginiit ng senador na hindi diplomatiko ang mga pahayag ng Chinese ambassador at maituturing na banta, lalo na ang pahayag umano na kayang talunin ng China ang Pilipinas kung gagamit ito ng puwersa. | Sa panulat ni Jordan Gutierrez

Aabot sa 1.9 milyon ang mga pasaherong inaasahang daraan sa Parañaque Integrated Terminal Exchange (PTX) para sa Undas 2026.

Ayon kay PITX Spokesman Jason Salvador, posibleng magsimulang dumagsa ang mga biyahero sa Linggo, Oktubre a-bente singko, hanggang sa Araw ng mga Patay.

Dahil dito, tuluy-tuloy anya ang paghahanda ng terminal para sa pagdami ng mga pasahero.

Paliwanag ni Salvador, taun-taong tumataas ang bilang ng mga bumibiyahe tuwing Undas dahil nagdadagdag ng mga biyahe ang mga bus papunta sa mga lalawigan.

Samantala, mahigit isandaang libong pulis ang ide-deploy sa buong bansa para sa seguridad ng publiko sa Undas, mahigit doble kumpara noong nakaraang taon. | Sa panulat ni Jordan Gutierrez