HOT STORIES OF THE WEEK

Nanawagan nang patuloy na pagkakaisa at pagtutulungan ang bagong talagang pangulo ng PhilHealth.

Binigyang-diin ni bagong PhilHealth president Emmanuel Ledesma, Jr. na ang pagkakaisa ang susi sa tagumpay ng national health insurance program kasabay ang paghimok sa mga empleyado ng ahensya na magtrabaho bilang suporta sa mga ospital at doktor na kanilang partners para maisulong ang kapakanan ng mga pasyente.

Sinabi pa ni Ledesma na ang tunay na kalaban ay ang iba’t ibang sakit at kondisyong pangkalusugan ng mga Pilipino na kailangan aniya ng suportang pinansyal para sa gastusin sa pagpapagamot.

Si Ledesma ay itinalaga ng Pangulong Ferdinand Bongbong Marcos, Jr. bilang acting president at Chief Executive Officer ng PhilHealth at miyembro ng board of directors bilang expert panel.

Nagsilbing pangulo ng power sector assets and liabilities management sa loob ng limang taon si Ledesma na dalubhasa sa banking at corporate finance at mayruong malawak na karanasan sa local at international banks.

70% ng mga Filipino ang kuntento sa pagtugon ng kasalukuyang administrasyon sa edukasyon, disaster response at kalusugan.

Batay ito sa tugon ng Masa Survey na isinagawa ng OCTA Research Group sa 1,200 na lalaki at babaeng respondents na edad 18 pataas noong October 23 hanggang 27.

Kabilang sa mga nakalistang programa sa naturang survey ay food security, murang bilihin, pagbibigay ng de-kalidad na edukasyon; paglaban sa krimen, korapsyon, pagpapalaganap ng kapayaan at kaayusan sa bansa;

Pagbabawas ng buwis sa mga mamamayan, pagprotekta sa kapakanan ng mga Overseas Filipino Workers, pagpapatupad ng batas at pagpigil sa pagkasira ng kalikasan at pagkontrol sa lumalaking populasyon.

Ayon sa OCTA, 70% ng respondents ang kuntento sa mga programang ito, lalo sa pagbibigay ng maayos na edukasyon sa elementary at high school na umani ng 75% satisfactory votes.

Sinundan ito ng pagtugon ng pamahalaan sa mga kalamidad, may 75%; probisyon ng tertiary, technical at vocational education, 74% at maayos at murang health care, 73% satisfactory votes.

Gayunman, nakatanggap ng low rating o mababa sa 50% ang ilang programa gaya ng pag-kontrol sa inflation, 33%;

 Paglikha ng mga trabaho, 22%; pagpapababa sa antas ng kahirapan, 25% at pagkontrol sa presyo ng mga bilihin sa 36%.

Sinimulan na ang ilang aktibidad bilang bahagi ng pagdiriwang ng Pista ng Itim na Nazareno sa Jan.1 ng susunod na taon.

Kabilang sa inilarga ang “Pagdalaw” o ang pagbisita ng imahen ng Black Nazarene sa iba’t ibang lungsod upang hindi na dumagsa ang mga deboto sa Maynila sa susunod na buwan.

Dec.1 nang simulan ang pagdalaw hanggang a – 15 at masusundan sa a – 27 hanggang a – 29.

Inabisuhan naman ng pamunuan ng Quiapo Church ang publiko na bisitahin ang social media pages ng Minor Basilica of Black Nazarene para sa petsa at oras ng pagbisita ng imahen.

Pinaalalahanan din ang mga deboto na ang pagbabasbas ng mga Replica at Estandarte o banner ay gagawin ng tatlong araw mula December 27 hanggang 29 sa Plaza Miranda.

Pinapayuhan ang mga deboto na magkakaroon lamang ng isang Entrada o pasukan sa Carriedo at labasan sa  Quezon Boulevard upang mapa-kontrol ang daloy ng tao.

Samantala, magsasagawa ng Thanksgiving Motorcade simula alas 11 ng gabi sa December 30.

Ipagpapatuloy ng Senado ang imbestigasyon sa ban ng Bureau of Fisheries and Aquatic Resources (BFAR) sa iligal na pagbebenta ng ilang imported na isda, tulad ng pampano at pink salmon sa mga palengke.

Ito’y kahit ipinatigil na ng BFAR ang pagpapatupad ng nasabing ban noong Biyernes.

Ayon kay Senator Francis Tolentino, hindi lamang ang mahigit dalawang dekada ng Fisheries Administrative Order (FAO) 195 ang tututukan ng Senate Committee on Agriculture kundi maging ang iba pang kinakaharap na issue ng BFAR.

Nakagugulat anya ang biglaang pagpapatupad ng FAO 195 ngayong holiday season maging ang pagiging limitado nito sa canning at processing.

Binigyang-diin ni Tolentino na karapatan ng bawat isa na kumain ng pampano at salmon, kaya’t maituturing na diskriminasyon ang nasabing kautusan.

Samantala, naniniwala naman ang Senador na kahit nag-issue ng moratorium laban sa implementasyon ng FAO 195, panahon na upang baguhin o rebisahin ito ng BFAR.

Nais ipabusisi nang husto ni Senador Jinggoy Estrada ang panukalang Maharlika Investment Fund.

Ito’y dahil napakarami pang tanong ni Estrada hinggil sa planong Sovereign Wealth Fund (SWF).

Kahit anya isinusulong mismo ni Pangulong Bongbong Marcos ang nasabing panukala ay dapat pa rin itong dumaan sa pagbusisi ng Kongreso, lalo’t pensyon ng retirees ang paghuhugutan ng pondo.

Sa ilalim ng Proposed SWF magmumula sa mga Government Financial Institutions tulad ng Government Service Insurance System at Social Security System ang gagamiting pondo. —ulat mula kay Cely Ortega Bueno (Patrol 19)

Pinaghahanap na ng mga otoridad ang nasa 2 grupo ng sindikato na nagdadala ng mga Badjao sa Maynila upang utusang makapanglimos.

Ayon kay Department of Social Welfare and Development (DSWD) secretary Erwin Tulfo mayroon na  sila ngayong hinahabol na sindikato na may –ari ng apartment sa Tondo kung saan dinadala ang mga Badjao.

Dagdag pa ni Tulfo bukod pa ito sa mga sindikato sa Zamboanga, Basilan at sa Jolo.

Bumuo na ang Philippine National Police (PNP) ng Tracker Team na tututok sa paghahanap sa dalawang suspek na nakita sa isang secret cellphone video na kasama ng isa sa mga nawawalang sabungero na si Michael Bautista.

Ayon kay PNP Criminal Investigation & Detection Group (PNP CIDG) spokesperson PMaj. Mae Ann Cunanan bawat lugar na may naitalang nawawalang sabungero ay mayroong tauhan ang CIDG na nakatutok para sa imbestigasyon.

Aniya, tuloy rin ang pakikipag-ugnayan ng CIDG sa  mga kinauukuluang Police Regional Office para malaman kung nasan ang mga nawawalang sabungero at kung sino ang nasa likod ng pagkawala ng mga ito pati na rin ang motibo sa krimen.

Nabatid na kamakailan lamang nang sampahan ng kasong Kidnapping at Serious Illegal Detention ng PNP sa Department of Justice sina Julie Patidongan alyas ‘’Dondon’’ at isang nagngangalang John Doe.

Pinaalalahanan ng Department of Migrant Workers (DMW) ang publiko na mag-ingat laban sa mga illegal recruitment na nag-aalok ng mga pekeng trabaho sa ibang bansa.

Ginawa ni DMW Undersecretary for Welfare and Foreign Employment Hans Leo Cacdac ang pahayag, matapos na makatanggap ng ulat na tumataas ang kaso ng mga Pilipinong nabibiktima ng Cybercrime at Human Trafficking Syndicates sa mga bansang Cambodia, Laos, at Myanmar.

Sinabi ni Cacdac na karamihan sa mga naging biktima ang nahikayat dahil sa mga social media advertisements na nag-aalok ng mga trabaho-abroad, gaya na lamang ng Customer Representative, Technical Support, Data Encoder, Call Center Agent, at iba pa.

Napaka-common aniya ng mga trabahong ito kayat napakabilis na makaakit ng tao.

Maliban dito, ipinapain din ani Cacdac ang libreng plane ticket o kaya’y sasabihin  ng illegal recruiter na hindi na kailangan ng Visa sa kanilang pupuntahang bansa.

Ngunit sa katotohanan, wala naman talaga aniyang Visa para sa mga turistang magtutungo sa mga bansang miyembro ng asean tulad ng Cambodia, Laos at Myanmar.

Magsisimula na ngayong Disyembre ang pamamahagi ng Department of Social Welfare and Development (DSWD) ng P5.2-B cash aid.
Ayon kay Edu Punay, Undersecretary ng DSWD, para ito sa ikatlong tranche ng pamamahagi sa mga benepisyaryo sa ilalim ng programang targeted cash transfer (TCT).
Noong Martes, unang sinabi ng Department of Budget and Management (DBM), na nakapaglabas na sila ng P5.2-B para masakop ang isang buwang kinakailangan sa TCT program ng DSWD.
Sa nasabing pondo, kabuuang 12.4 na milyong benepisyaryo ng TCT ang makatatanggap ng 500 pesos kada buwan, sa loob ng anim na buwan.
Kabilang sa mga benepisyaryo ang mga itinuturing na poorest of the poor kabilang ang social pensioners na indigent senior citizens.

Umabot na sa 300 Sama Bajau Indigenous Peoples (IPs) na nailigtas sa National Capital Region (NCR), ang napauwi sa kani-kanilang mga pinanggalingang bayan.
Ayon kay Edu Punay, undersecretary ng Department of Social Welfare and Development o DSWD, inihatid ang mga badjao na ito sa Zamboanga, Sulu at Basilan.
Nasa 100 badjao naman ang nananatili sa Jose Fabella Center na pinoproseso pa ang pag-uwi.
Ikatlong linggo na ngayon ng rescue operation para mailigtas ang mga badjao, na nanlilimos at naglipana sa daan lalo na ngayong Pasko.
Patuloy naman ang pakikipag-ugnayan ng DSWD sa mga local government units, lalo’t ang mga ito ay may pangunahing hurisdiksyon sa mga operasyon ng pagliligtas.