Ilang pasahero sa EDSA carousel ang umalma sa anila’y paniningil ng ilang konduktor ng pamasahe sa ipinatutupad na 24/7 bus free ride.
Kasunod na rin ito nang pagbubunyag ng ilang pasahero ang paniningil ng pasahe ng ilang konduktor sa EDSA carousel pagsapit ng alas-11 ng gabi.
Dahil dito, nagpapasaklolo sa mga otoridad partikular sa DOTr ang mga pasaherong parokyano ng EDSA carousel sa gabi para mapagsabihan ang ilang pasaway na konduktor.
Sumipa sa mahigit 12% ang positivity rate ng COVID-19 sa National Capital Region (NCR).
Ayon ito kay Dr. Guido David, fellow ng OCTA research group na nagsabing ang 12.4% na positivity rate ay naitala mula November 26 hanggang December 3 mula sa 11.1%.
Sinabi ni David na nakapagtala rin ng pagtaas sa positivity rate sa parehong panahon ang mga lalawigan ng Bataan, Cagayan, Camarines Sur, Ilocos Norte, Ilocos Sur, Laguna, Nueva Ecija, Pampanga, Pangasinan, Quezon, Rizal at Zambales.
Ang Nueva Ecija ang nakapagtala ng pinakamataas na positivity rate sa Luzon na nasa 39.1% mula sa 32. 9% noong November 26, ikalawa ang Camarines Sur sa 38.8% at Isabela – 38.6%.
Kabilang naman sa mga lalawigan sa Luzon na nakapagtala nang bumabang positivity rates ang Albay, Batangas, Benguet, Bulacan, Cavite, Isabela, Kalinga, La Union, Mountain Province at Tarlac.
Muling magpapatupad ng rollback sa presyo ng produktong petrolyo ang mga kumpanya ng langis sa Martes.
Batay sa pagtaya, posibleng maglaro sa P1.90 centavos hanggang P2.10 centavos ang tapyas-presyo sa kada litro ng gasolina;
P1.70 centavos hanggang P2.00 naman sa kada litro ng diesel habang P1.30 centavos hanggang P1.60 centavos naman sa kada litro ng kerosene.
Kabilang sa mga dahilan ng panibagong rollback sa produktong petrolyo ang pagluluwag ng China sa Covid-19 restrictions at ang paglalagay ng price cap sa krudo mula Russia.
Sisimulan na ngayong araw ang idaraos na “Bakunahang Bayan” vaccination drive ng Department of Health.
Ayon kay DOH officer-in-charge Maria Rosario Vergeire, magbabahay-bahay sila upang mabakunahan ang mga senior citizen, may comorbidities, mga hindi pa bakunado at mga kabataang edad 5 hanggang 11.
Bukod dito, mayroon ding ilalagay na vaccination sites sa palengke, malls, paaralan, simbahan at iba pang pampublikong lugar.
Kaugnay nito, hinimok ni Vergeire ang publiko na magpabakuna at magpa-booster shot laban sa Covid-19.
Iginiit pa ng opisyal na kabilang ang pagpapabakuna sa mga paraan upang maprotektahan ang sarili laban sa Covid-19.
Ang Bakunahang Bayan ay tatagal hanggang sa Disyembre a-7.
Pinag-iingat ng Department of Migrant Workers (DMW) ang mga indibidwal na nais magtrabaho sa ibang bansa laban sa mga naglipanang pekeng recruiters.
Sinabi ni DMW Undersecretary for Welfare and Foreign Employment Hanz Leo Cacdac na nakatanggap sila ng ulat kaugnay sa paglobo ng kaso ng mga nabibiktima ng Cybercrime at Human Trafficking Syndicates sa Myanmar, Laos, at Cambodia.
Nanghihikayat aniya ang mga sindikato sa pamamagitan ng pag-aalok ng libreng ticket o libreng pagproseso ng Visa sa pupuntahang bansa.
Kaugnay nito, pinapayuhan ng DMW ang publiko na kilatising mabuti ang mga recruitment agency.
Tuluy-tuloy ang pagbaba ng presyo ng asukal.
Ayon ito kay Manuel Lamata, pangulo ng United Sugar Producers Federation kung saan ang pinakamababang halaga ng asukal na nasa merkado ay 90 pesos kada kilo.
Gayunman, sinabi sa DWIZ ni Lamata na mayroon pa ring mga nagsasamantala at nagtataas ng presyo ng asukal lalo sa panahong ito kung saan kailangang kailangan aniya ang asukal.
Kahit mahal…bibilhin kasi celebration talaga. ‘Yun lang ito mga luko-luko they are in the game also, sasabihin nila “pwede naman pala nila bilhin kahit mahal, ibenta natin ng mahal”, ‘yun ang problema. But what can we do, it’s the way things going.
Ipinabatid pa ni Lamata na may oversupply na ng asukal.
Dami na oversupply na nga tayo…that’s why sa ‘yung sa asukal unti-unti bumababa…hindi na mapigilan ‘yan ng mga loko-loko, sobra na supply.
United Sugar Producers Federation Philippines Manuel Lamata sa panayam ng DWIZ.
Inihayag ni Infectious Diseases Expert Dr. Rontgene Solante na kabilang sa mga dahilan kung bakit hindi pa inaalis ang State of Public Health Emergency sa bansa ay bunsod ng Covid-19 variants of concern.
Sinabi ni Solante na ”Very Stable” na ang Covid-19 infections at hindi na rin napupuno ang mga ospital ng mga bagong kaso ng virus.
Matatandaang idineklara ni dating Pangulong Rodrigo Duterte ang State of Public Health Emergency sa bansa noong March 2020.
Sa ilalim ng Proclamation 922, mananatili ang pag-iral ng State of Public Health Emergency hanggat hindi ito inaalis o binabawi ng Punong Ehekutibo.
Sa kasalukuyan ay nakapailalim pa rin ang bansa sa State of Public Health Emergency makaraang palawigin ito ni Pangulong Ferdinand “Bongbong” Marcos Jr., hanggang December 31, 2022.
Nakatakdang ibenta sa Kadiwa stalls ang mga smuggled na puting sibuyas na nasabat ng Bureau of Customs (BOC) at Department of Agriculture (DA) kamakailan.
Ayon kay DA Deputy Spokesperson Rex Estoperez, isasailalim muna ang mga sibuyas sa phytosanitary inspection.
Ito’y upang matiyak na ligtas ang mga ito bago ibenta sa Kadiwa Center.
Nakumpiska ng mga otoridad ang halos P4-M halaga ng mga puting sibuyas sa magkakahiwalay na operasyon sa Maynila.
Wala anyang sertipikasyon mula sa DA ang mga produkto kaya’t malinaw na iligal na ipinasok ang mga ito sa bansa. —sa panulat ni Jenn Patrolla
Mahigit P2-M halaga ng smuggled na puting sibuyas ang nasabat ng Bureau of Customs (BOC) sa DNR Building sa Tondo, Maynila.
Tinungo ng BOC ang warehouse sa Sto. Cristo Street, Divisoria kasama ang mga tauhan ng Manila Police District (MPD) dala ang letter of authority na pirmado ni Customs Commissioner Yogi Filemon Ruiz.
Gayunman, hindi nakaharap ng customs ang may-ari ng building pati ang administrator kaya’t ang dalawang barangay kagawad na lamang ang tumanggap ng letter of authority.
Walang kaukulang permit ang mga nasabat na mahigit 1,000 sako ng sibuyas.
Inaalam na ng mga otoridad kung saan nagmula ang mga smuggled onion at kung sino ang may-ari nito. —sa panulat ni Jenn Patrolla
Nagkasundo na ang Department of Justice (DOJ) at Public Attorney’s Office (PAO) sa imbestigasyon sa pagkasawi ng ilang batang tinurukan ng Dengvaxia.
Kapwa ibinasura na ng DOJ at PAO ang sinasabing conflict of interest sa preliminary investigation sa kaso.
Ito’y matapos italaga bilang DOJ Undersecretary si Atty. Jesse Hermogenes Andres, na dating abogado ni dating Health Secretary Janet Garin na pangunahing respondent sa Dengavaxia case.
Kamakailan iginiit ni PAO Chief Persida Acosta sa DOJ panel na huwag hawakan ang kaso sa halip ipaubaya na lamang sa Quezon City Metropolitan Trial Court upang hindi umano maging bias sa kaso. —sa panulat ni Jenn Patrolla