HOT STORIES OF THE WEEK

Niratipikahan na ng Senado ang Bicameral Conference Committee report ng P5.268-T na 2023 General Appropriations Bill (GAB).

Ang Ratified Bill ay naglalaman ng pinag-isang bersyon ng Senado at Kamara.

Nagpahayag naman ng “No Vote” sina Senate Minority Leader Koko Pimentel at Senator Risa Hontiveros.

Partikular na tinututulan ng oposisyon ang pagbabalik sa P150 million Confidential at Intelligence Funds (CIF) ng Department of Education.

Bagaman noong una ay nagpasalamat sa pagtugon ng senado na tapyasan ng P120 million ang CIF ng DepEd at ilipat sa ibang programang mas mapapakinabangan ng ahensya, dismayado naman ang senadora dahil hinayaang makalusot ang nasabing pondo.

Kasama rin sa ibinalik sa pondo ang orihinal na budget proposal ng NTF-ELCAC na P10-B.

Ito ang unang pambansang pondo sa ilalim ng Marcos Administration.

Inaasahang bago mag-Pasko ay lalagdaan na ni pangulong Bongbong Marcos ang 2023 National Budget. —ulat mula kay Cely Ortega Bueno (Patrol 19)

Nabawasan na ang backlog sa issuance ng driver’s license.

Ayon kay Land Transportation Office chief Jose Arturo “Jay Art” Tugade, bumaba na sa 92,000 ang backlog sa lisensya hanggang nitong Nobyembre kumpara sa 300,000 noong Agosto.

Ang mabagal anyang issuance ng driver’s license ang laging problema ng mga motorista kaya’t doble-kayod na ang LTO upang masolusyunan ito.

Isa sa mga dahila ng backlog ang depektibong laser engraving machines sa ilang LTO District at Extension offices.

Sa ngayon ay kinukumpuni lamang ang mga dispalinghadong makina dahil wala pang budget para makabili ng bago nito.

Samantala, hinimok ni Tugade ang mga motorista na huwag nang pupunta sa mga LTO branch na may depektibong laser engraving machine upang maiwasan ang abala sa pagkuha ng lisensya.

Tutol ang grupo ng mga negosyante at ilang ekonomista sa panukalang lumikha ng isang Sovereign Wealth Fund (SWF) na tatawaging Maharlika Wealth Fund dahil isasabak bilang initial capital ang pension funds ng Government Service Insurance System at Social Security System.

Kabilang sa mga kumontra ang Foundation for Economic Freedom, Makati Business Club, Management Association of the Philippines, Movement for Good Governance at UP School of Economics Alumni Association.

Sakaling ipasa bilang batas ang Maharlika, ipag-uutos nito sa GSIS at SSS, maging sa state-owned lenders na Land Bank of the Philippines at Development Bank of the Philippines na maglaan ng initial investment na P200-B.

Bukod pa ito sa magiging kontribusyon na P25-B ng gobyerno, Bangko Sentral ng Pilipinas at Philippine Amusement and Gaming Corporation.

Ayon sa business groups, dapat i-prayoridad ang fiscal prudence o kakayahan ng gobyerno na mapanatili ang maayos na pagpapaikot sa pera ng taumbayan.

Dapat anila ay mayroong sobrang pera o commodity-based surpluses ang bansa upang ilagak sa Sovereign Wealth Fund (SWF) bilang kapital at dapat walang binabayarang malaking utang ang gobyerno.

Karaniwang nagmumula ang puhunan ng SWF sa natural resources extraction ng isang bansa, gaya ng langis at metal, na kalauna’y nauubos kaya’t tumataas ang halaga.

Nasa P63M halaga ng smuggled frozen goods ang nasabat ng Bureau of Customs sa ilang containers sa Manila International Container Port (MICP).

Kinumpirma ng Customs Intelligence and Investigation Service o (CIIS-MICP) na nakatanggap sila ng derogatory information hinggil sa dalawang containers mula Hong Kong at dalawang containers mula China na idineklara bilang kilu-kilong frozen prawn balls.

Ayon kay Customs Commissioner Yogi Filemon Ruiz, naglalaman din ng iba pang frozen foods ang mga container na hindi idineklara ng consignee sa kanilang manifesto.

Sa isinagawang inspeksyon, nadiskubre na kargado ang mga container ng frozen tofu, chicken paws, boneless beef, vietnamese suckling pig at beancurd skin.

Inirekomenda na ng CIIS-MICP ang pag-isyu ng Warrant of Seizure and Detention laban sa mga misdeclared goods.

Inaasahang mailalabas na ang Implementing Rules and Regulations (IRR) ng Sim Registration Act bago matapos ang taon.

Ito ang kinumpirma ng National Telecommunications Commission (NTC) matapos ang isinagawang public hearing, kahapon.

Ayon kay NTC Deputy Commissioner Jon Paulo Salvahan, masusing binalangkas ng mga miyembro ng Technical Working Group (TWG) at Public Telecommunication Entities (PTE) ang IRR.

Katuwang ng NTC sa pagbuo ng IRR ang Departments of Information and Communications Technology, Trade and Industry at National Privacy Commission.

Sa ilalim ng Republic Act 11934 o Sim Registration Law na nilagdaan ni Pangulong Bongbong Marcos noong October 10, magiging mandatory na ang pagpaparehistro ng lahat ng mobile communication devices.

Kabilang sa layunin nito ang pigilan ang pagkalat ng mga text scam o spam text messages.

Sa ikatlong sunod na linggo, inilarga na ng mga kumpanya ng langis ang tapyas-presyo sa kanilang mga produkto.

Buena manong nagpatupad ang Caltex ng P1.95 centavos na rollback sa kada litro ng gasolina; P1.90 centavos sa diesel habang P1.65 centavos sa kerosene, epektibo alas -12 kaninang hatinggabi.

Ala-6 kanina umarangkada rin ang kahalintulad na bawas presyo ng Flying V, Petron, Phoenix Petroleum, PTT Philippines, Petrogazz, Seaoil at JETTI Petroleum.

Alas 8:01 naman mamayang umaga ipatutupad ng Cleanfuel ang kanilang rollback maliban sa kerosene o gaas.

Ito ang unang beses na nagrollback ang presyo ng oil products ngayong Disyembre, bunsod ng epekto ng Covid-19 lockdown sa China, mas mataas na oil inventories at magkakasunod na interest rate hikes sa U.S.

Pang-limang beses naman itong bawas-presyo simula noong Oktubre a – 24.

Iginiit ng Department of Education na nananatiling boluntaryo ang Covid-19 vaccination sa mga mag-aaral at personnel ng DepEd.

Ito’y kahit suportado ng Kagawaran ang Bakunahang Bayan Drive na gumulong na simula kahapon.

Sa DepEd Order 051 ni Vice President at Education Secretary Sara Duterte, hinimok nito ang mga estudyante, personnel, magulang, guardian at iba pang stakeholders na lumahok sa “Bakunahang Bayan” ng Department of Health hanggang bukas.

Kahit boluntaryo ang pagpapabakuna ng lahat ng mag-aaral at personnel, binigyang-diin ng Kagawaran na hindi dapat magkaroon ng diskriminasyon laban sa mga indibidwal na piniling hindi magpabakuna o booster.

Gayunman, dapat may pahintulot ng mga magulang o legal guardian ang lahat ng menor de edad na magboboluntaryong magpabakuna.

Iginiit ng Department of Education (DepEd) na hindi maaaring gamitin bilang vaccination centers ang mga paaralan sa bansa.
Ito ang sinabi ni Vice President at Education Secretary Sara Duterte kasabay ng pag-arangkada ngayong Lunes ng tatlong araw na ‘bakunahang bayan’ na magtatagal hanggang sa Disyembre 7.
Sa DepEd Order No. 051 series of 2022 na nilagdaan ni Duterte para sa mga mag-aaral, personnel, magulang, guardians at stakeholders, ipinaalala nito na hindi gagamiting vaccination sites ang mga paaralan at hindi magkakansela ng klase para dito.
Dahil sa kautusan, inatasan ng DepEd ang kanilang regional directors, schools division superintendents, at DepEd attached agencies na makipag-ugnayan sa DOH para sa pagbabakuna sa kanilang mga personnel.
Maaari anila itong gawin sa central office, regional offices, schools division offices, at DepEd attached agencies.

Pinangunahan ni Pangulong Ferdinand Bongbong Marcos, Jr. ang pagkakaloob ng bahay at lupa sa ilang beneficiary ng housing projects ng gobyerno.

Sa ginanap na ceremonial turn over sa Barangay Calubcob sa Naic, Cavite, dalawang set ng pitong pares ng beneficiaries ang nabiyayaan ng bahay at lupa.

Kabilang sa isang batch ng pitong pares na pinagkalooban ng certificate of house and lot ay ang mga dating rebelde.

Target ng Marcos administration na makapagtayo ng isang milyong bahay kada taon hanggang 2028 o sa pagbaba nya sa pwesto.

Umapela sa pamahalaan ang pambansang lakas ng kilusang mamamalakaya ng Pilipinas o PAMALAKAYA na huwag isisi sa retailers ang pagbebenta ng ilang imported na isda.

Kabilang dito ang isdang pampano at pink salmon.

Sa panayam ng DWIZ kay Ronnel Arambulo, tagapagsalita ng PAMALAKAYA, nanawagan ito na huwag pag-initan ang mga nagbebenta ng isda dahil wala namang kasalanan ang mga ito.

Imbes na sisihin, mas mabuting ilipat ang buwelta sa Bureau of Customs na patuloy na tumatanggap ng imported na isda.

Ang amin po sanang panawagan dito huwag nilang pag-initan ‘yung mga retailer dapat ay mas ‘yung mga importer na nasa likod nito, dahil ang mga imported po na isda ay dumadaan sa custom at sila po ang nagtatakda para dalahin sa kung saan dadalhin itong mga imported na isda.

Totally tigil ‘yung importation,  itigil ‘yung pag-aangkat ng mga imported na isda, dapat kumikita, may hanap-buhay ang ating mga maliliit na retailer o mangingisda sa palengke at sa kabilang banda dapat ‘yung pinagkakakitaan nila ay mismo ay ating produkto.

Ang pahayag ni Ronnel Arambulo, tagapagsalita ng PAMALAKAYA sa panayam ng DWIZ