HOT STORIES OF THE WEEK

Pormal nang kinansela ang pagdaraos ng Pista ng Itim na Nazareno sa ika-9 ng Enero sa susunod na taon.

Sa post online ng Manila Public Information Office, ang pagkansela sa taunang Traslacion ay bahagi ng pag-iingat kontra coronavirus disease 2019 (COVID-19) pandemic.

Nauna rito, inihayag ni Fr. Douglas Badong, Parochial Vicar ng Minor Basilica ng Poong Nazareno ng Quiapo, na tatanggapin nila ang anumang pasya ng pamahalaang lungsod ng Maynila maging ng Inter-Agency Task Force na responsable sa mga ginagawang panuntunan kontra COVID-19 ng bansa.

Magugunita ring ipinagbabawal muna ng pamahalaan ang pagdaraos ng malakihang mga okasyon, maging ang pagpa-party, upang maiwasan ang paglaganap pa ng virus.

Sa pinakahuling tala ng Department of Health, umaabot na sa 363,888 ang kaso ng COVID-19 sa bansa.

Lusot na sa ikatlo at huling pagbasa sa Kamara de Representantes ang House Bill 7727 o ang 2021 General Appropriations Bill (GAB).

Ito’y sa kabila ng maraming isyu na kinaharap ng mababang kapulungan sa mga nakalipas na linggo, kabilang na ang girian sa speakership.

Matapos bumoto ang 257 na kongresista na pabor at anim naman ang tumutol, tuluyang nakapasa ang P4.506-T na proposed 2021 national budget na mas mataas ng 9.9% kumpara sa 4.1-T budget ngayong taon.

Sinasabing ang pinakamalaking bahagi ng 2021 budget ay mapupunta sa personnel services na nasa 29.2% o katumbas ng P1.32-T kung saan dito kukunin ang alokasyon para sa dagdag na hiring ng mga healthcare workers, second tranche ng Salary Standardization Law, at dagdag na pensiyon para sa mga retired uniformed at military personnel.

Maliban dito, nakapaloob din sa pambansang pondo ang mga stimulus para sa muling pagbangon ng ekonomiya sa gitna ng COVID-19 at ang P2.5-B na bakuna laban sa impeksiyon.

Samantala, kumalas si Manila Rep. Benny Abante bilang lider ng minorya at nagpahayag ng kanyang pagnanais na lumipat na sa mayorya.

Tuloy ang pagbibigay ng 13th month pay sa tamang oras.

Tiniyak ito ni Labor Secretary Silvestre Bello III kasabay ang kasiguraduhang  kikilos ang gobyerno para matulungan ang mga kumpanyang makapagbigay ng nasabing benepisyo na naaayon sa batas.

Sinabi ni Bello na bukas inaasahang mailalabas nila ang mga detalye hinggil sa pagbibigay ng 13th month pay ngayon taon bago mag ika-24 ng Disyembre.

Nanawagan si Bello sa Department of Finance (DOF) para i-subsidize ang small businesses at makapag-loan sa bangko ang mga ito para makapagbigay ng 13th month pay sa kanilang mga empleyado.

Pormal nang itinalaga bilang pinuno ng Kamara si Marinduque Representative Lord Allan Velasco.

Sa botong 186, pabor kay Velasco, ng mga miyembro ng Kamara, opisyal nang niratipikahan ang una nang pagluklok kay Velasco na ginanap sa Celebrity Sports Plaza sa Quezon City, kahapon, Lunes, ika-12 ng Oktubre.

Ginanap ang pagratipika sa House Plenary Hall —ilang oras bago ang inaasahang special session upang ipagpatuloy ang deliberasyon ng panukalang pambansang budget para sa susunod na taon.

Cayetano nagbitiw bilang House Speaker

Nagbitiw na si Taguig Representative Alan Peter Cayetano bilang Speaker ng Kamara. Sa isang Facebook live, inianunsiyo ni Cayetano ang kaniyang pagbaba bilang House Speaker.

Kaugnay nito, sinabi ni Cayetano na iisa lamang ang kaniyang pakiusap sa kanyang kapwa mambabatas at ito ay ang maipasa ang panukalang P4.5-trilyon na pambansang budget.

Ang ginawang resignation ni Cayetano ay kasunod ng ratipikasyon ng Kamara de Representantes sa eleksyon ni marinduque Rep. Lord Allan Velasco bilang bagong House Speaker.

Ipinatawag ni Pangulong Rodrigo Duterte sina Cong. Alan Peter Cayetano at Cong. Lord Allan Velasco para sa isang pagpupulong ngayong araw.

Kasunod na rin ito ng pagluluklok ng mga mambabatas kay Velaso bilang House Speaker, kahapon, Lunes, ika-12 ng Oktubre.

Ayon kay Presidential Spokesperson Harry Roque, nakatakda ang naturang pagpupulong mamayang alas-12:30 ng tanghali, bago ang inilatag na special session sa Batasan para sa deliberasyon ng panukalang pambansang pondo para sa susunod na taon.

Gaganapin naman, ani Roque, ang pagpupulong sa Malacañang Golf Club at sesentro sa pagpapasa ng mahigit P4.5-trilyong pambansang pondo.

Magugunitang sinertipikahang “urgent” ni Pangulong Duterte ang pagpasa sa panukalang 2021 national budget. —ulat mula kay Jopel Pelenio 

Hindi opisyal ang mace o ceremonial staff of office ng kamara na naka-display sa isang lugar kung saan nagtitipun-tipon ang mga kongresistang tagasuporta ni Congressman Lord Allan Velasco.

Ayon ito kay Retired Police Deputy Director General Ramon Apolinario, Sergeant at Arms ng kamara, ay dahil hawak niya official mace ng mababang kapulungan.

Ang mace, batay sa website ng kamara at simbolo ng otoridad sa Mababang Kapulungan at nakalagay sa paanan ng rostrum ng speaker kapag nasa sesyon ito, na senyales ng pagpapatupad ng kaayusan ng Sergeant at Arms, base na rin sa direktiba ng lider ng kamara.

Ang 187 congressmen supporters umano ni Velasco ay nagtitipun-tipon sa Celebrity Sports Plaza sa Quezon City.

Nagpatawag ng special session sa Kongreso si Pangulong Rodrigo Duterte para matiyak na maipapasa sa oras ang panukalang 2021 national budget.

Ayon kay Presidential Spokesperson Harry Roque, nakatakda mula Oktubre a-13 hanggang a-16 ang special session.

Layunin nitong maibalik ang congressional deliverations para sa proposes 2021 national budget at maiwasan ang anumang pagkakaantala sa agarang pagpasa nito.

Sinabi ni Roque, alinsunod sa section 15 article 6 ng 1987 constitution, maaaring magpatawag ng special session ang pangulo anumang oras.

Sa kapareho ding proklamasyon, sinertipikahan ni Pangulong Duterte bilang urgent ang proposed P4.5 trillion national budget para sa susunod na taon.

Oras na nasertipkahan bilang urgent, maaari nang laktawan ng Kongreso ang three-day rule para agad na maipasa ang panukalang batas sa ikatlong pagbasa matapos makalusot sa ikalawang pagbasa.

Siyam na Persons Deprived of Liberty (PDL) ang natagpuang patay matapos sumiklab ang riot sa loob ng New Bilibid Prison (NBP).

Ito ang kinumpirma ni Bureau of Corrections (BuCor) public Information Chief Gabriel Chaclag, bagama’t hindi pa matukoy ang eksaktong bilang ng sugatan.

Hindi pa rin malinaw kung ang sumiklab na riot ang dahilan ng pagkasawi ng mga naturang bilanggo.

Batay sa paunang report, pasado ala-2:30, Biyernes ng madaling araw, nang magpang-abot at magka-initan ang grupong Sputnik at Commando.

Sinabi ni Chaclag, agad naman aniyang nakontrol ang kaguluhan sa iisang quadrant lamang ng maximum security compound.

Dagdag ni Chaclag, nagpapatuloy pa ang imbestigasyon para matukoy ang pinagmulan ng insidente.

Inihayag ng Palasyo na may naitabing pondo si Pangulong Rodrigo Duterte para may ipangbili ng magagawang bakuna kontra COVID-19.

Batay ito sa inilabas na pahayag ng Palasyo makaraang sabihin ng pamunuan ng World Health Organization (WHO) na posible nang lumabas sa merkado ang bakuna kontra COVID-19 sa katapusan ng taon.

Ani Presidential Spokesperson Secretary Harry Roque, batid na ng pamahalaan ang mekanismo ng pagbili nito.

Paliwanag nito, ang Philippine International Trading Corporation (PITC) ang bibili ng naturang bakuna, habang ang Land Bank of the Philippines at Development Bank of the Philippines naman ang magfi-finance sa gagastusin dito.

Nauna rito, inihayag ng Palasyo na naglaan ito ng higit P2-B pondo para may maipangbili ng bakuna.