HOT STORIES OF THE WEEK

Tumaas na naman ang presyo ng Asukal sa Metro Manila ngayong linggo.

Sa Marikina Public Market, umakyat sa P80 ang presyo ng kada kilo ng white sugar o primera mula sa dating P75; wash, P75 kumpara sa P65 at brown sugar o segunda, P65 mula sa dating P60.

Ang pagtaas ng presyo ay bunsod ng epekto ng nagdaang Bagyong Odette sa mga Sugar Mill partikular sa Iloilo at Negros Provinces.

Nagdulot kasi ito ng pagbaba ng produksyon ng tubo na ipinoproseso para maging asukal.

Batay sa tala ng DA, papalo sa P10-B ang halaga ng pinsala ng Bagyong Odette sa sektor ng agrikutura sa Visayas at Mindanao.

Pinaplano ng Philippine National Police (PNP) na gamitin ang Philippine Arena sa Sta. Maria, Bulacan bilang viewing area sa nalalapit na inagurasyon ni President-elect Ferdinand Marcos, Jr.

Ayon kay PNP Director for Operations, Maj. Gen. Valeriano de Leon, akma ang venue para kabitan ng malaking LED Television upang masaksihan ng mga supporters ni PBBM ang panunumpa nito sa tungkulin.

Nakikipag-ugnayan na ang PNP sa kampo ni Marcos para sa mungkahi.

Bukod sa Philippine Arena, sinabi ni de Leon na maaari ring gamitin ang Philippine Sports Center sa Pasig City bilang viewing area sa Live streaming na kayang mag-accomodate ng 40K katao.

Pinag-aaralan ding  gamitin ang North Luzon Express Terminal sa Bulacan at ang Mall of Asia sa pasay city para sa nasabing okasyon.

Manunumpa sa tungkulin si Marcos sa National Museum sa susunod na linggo, Hunyo a-30.

Inamin ni Vice President-elect Sara Duterte-Carpio na sa Davao City pa rin siya maninirahan kahit maupo na bilang Pangalawang Pangulo ng bansa sa Hunyo a-30.

Ayon kay Duterte-Carpio, hindi na niya ipinaalam sa Davaoeños ang ulat dahil puro trabaho lang ang gagawin niya sa Metro Manila.

Nabatid na ganito rin ang ginawa ni Pangulong Rodrigo Duterte sa nakalipas na anim na taong panunungkulan nito.

Madalas nasa malakanyang ang Outgoing President kapag weekdays at umuuwi lang sa Davao tuwing weekends o may okasyon at holidays.

Aabot sa 90k kabataan ang sinagip ng Department of Labor and Employment (DOLE) sa mapanganib na pagtatrabaho.

Ayon kay Labor Secretary Silvestre Bello III, nakapaloob ito sa layunin ng Philippine Development Plan simula noong 2017 na bawasan ng 30% ang child labor cases sa bansa.

Layunin dito nitong makalikha ng database na magiging basehan sa pagbibigay ng nararapat na serbisyo at intervention sa mga kabataan.

Sa huling datos ng Philippine Statistics Authority, 597K na kabataan ang dumaranas ng child labor na karamihan ay nagtatrabaho sa sektor ng agrikultura.

Sa kasagsagan ng pandemya, tumaas ng 264% ang mga kaso sa bansa ng Online Sex Abuse at Exploitation sa kabataan.

Kabilang ito sa pinakamalalang epekto ng Child Labor na tinukoy ng International Labor Organization.

Umaasa ang ilang opisyal ng gobyerno na magagampanan ng maayos ni incoming Vice President Sara Duterte-Carpio ang kaniyang tungkulin bilang bagong bise-presidente ng bansa.

Ayon kay Senator-elect Loren Legarda, hiling niyang dadalhin ni Duterte-Carpio ang brand of leadership nito sa Davao City patungo sa National Level.

Naging matagumpay aniya si Duterte-Carpio sa pagiging Alkalde ng Davao kung saan maraming proyekto ang naipatupad.

Naniniwala naman si Senator Bong Go na kaparehas lang ni Pangulong Rodrigo Duterte ang anak nitong si Inday Sara lalo na sa pag-prayoridad sa kapakanan ng mga mamamayan.

Samantala, proud si Senator ‘Bato’ Dela Rosa na isang dabawenya ang magiging susunod na bise-presidente ng bansa.

Nagpapasalamat naman si Tourism Secretary-Designate Lilion Mayor Maria Christina Frasco sa lahat ng sumusuporta kay Inday Sara.

Ikinokonsidera ng kampo ni outgoing Vice President Leni Robredo na magsagawa ng legal na aksyon laban sa mga nagpapakalat ng fake news, disinformation at kasinungalingan.

Ayon sa tagapagsalita ni Robredo na si Atty. Barry Gutierrez, posibleng gawin nila ito pagtapos ng termino ng bise presidente sa katapusan ng buwan.

Aniya, sa mga darating na linggo at buwan, maglulunsad ang kanilang kampo ng malawakang pagkilos at inisyatiba para tugunan at kalabanin itong paninira at paglaganap nitong fake news sa social media.

Paliwanag ni Gutierrez, ang mga ganitong kalakaran ay nakakasira sa ating demokrasya at maayos na diskursong pampubliko.

Giit ng tagapagsalita, hindi lamang para kay Robredo ang kanilang gagawing aksyon kundi para sa kapakanan at kabutihan ng ating buong bansa at ng ating buong lipunan.

Hinikayat ng Malacañang ang mga Pilipino na suportahan si Vice President-elect Sara Duterte na nakatakdang manumpa bilang ika-15 bise presidente ng bansa ngayong araw.

Ayon kay Acting Spokesperson Martin Andanar, kailangan na magkaisa ang mga Pilipino sa pagsuporta kay VP-elect Duterte at iba pang newly elected leaders sa pagsisimula nito sa mga responsibilidad sa opisina at gampanan ang mandatong paghahatid ng tunay na pagbabago sa ating bansa.

Una nang sinabi ni Duterte na maiksi lamang ang kaniyang inauguration speech dahil sa hindi ma-predict na panahon.
Patungkol aniya ang kaniyang talumpati sa dapat gawin at pagtuunan ng pansin ng bansa.

Ilang araw bago ang nakatakdang pagbaba sa pwesto, inanunsyo ng Office of Vice President (OVP) na isasagawa ang final general assembly ni outgoing VP Leni Robredo sa Hunyo a-27.

Ayon sa tagapagsalita ni Robredo na si Atty. Barry Gutierez, posibleng isagawa ito sa Quezon City Reception House na kasalukuyan ding headquarters ng OVP.

Pangungunahan mismo ni Robredo ang huling general assembly.

Dagdag pa ni Gutierrez, nagpaabot na rin sila ng imbitasyon kay incoming Vice President Sara Duterte-Carpio kung nanaiisin nitong dumalo.

Samantala, bigo namang makadalo si Robredo sa inagurasyon ni Sara Duterte ngayong araw dahil may nauna na itong dadaluhang pagpupulong bago pa man matanggap ang imbitasyon ng susunod na bise presidente.

Pero, nilinaw naman ng kampo ni Robredo na nagpaabot na sila ng pagbati kay Duterte-Carpio.