Darating na sa bansa bukas ng gabi ang labi ng Pinay na pinaslang sa Kuwait.
Ayon kay Foreign Undersecretary for Migrant Workers Affairs Eduardo De Vega, sasagutin ng employer ng biktimang si Jullebee Cabilis Ranara ang mga gastusin sa pagbabalik sa bansa ng labi nito.
Una rito, ang sunog na labi ni Ranara ay natagpuan sa disyerto samantalang naaresto na ng Kuwaiti Police ang 17 taong gulang na suspek na anak mismo ng employer ng Pinay.
Mayorya sa mga Pilipino ang naniniwala na nakapipinsala lamang sa bansa ang operasyon ng Philippine Offshore Gaming Operators (POGO).
Ito ayon kay Senador Sherwin Gatchalian ay batay sa survey ng Pulse Asia na ginawa mula Nobyembre 27 hanggang Disyembre 1 noong nakalipas na taon kung saan ipinasama nila ang tanong ukol sa POGO.
Sa survey, lumitaw na 58% ng mga respondent ang nagsabing nakakasama ang operasyon ng mga POGO sa bansa habang 19% lamang ang nagsabi na kapaki-pakinabang ang operasyon nito.
Kabilang sa mga dahilan kaya naniniwala ang mga respondent na nakapipinsala ang industriya ng POGO ang paglaganap ng mga bisyo, pagtaas ng insidente ng krimen na may kaugnayan sa POGO na kinasasangkutan ng mga Chinese national, tax evasion ng POGOs, pagtaas ng bilang ng mga Chinese national na nagtatrabaho sa mga POGO, walang karagdagang oportunidad na ibinigay sa mga Pilipino, at pagtaas ng halaga ng upa, tirahan at business properties.
Ayon kay Gatchalian, ang resulta ng survey ay mahalagang bahagi ng data na kanilang isinasaalang-alang sa ipalalabas na rekomendasyon dahil ito ang kumakatawan sa mga sentimyento ng mga Pilipino.
Una nang inihayag ni Gatchalian na binubuo na ng Senate Committee on Ways and Means na kanyang pinamumunuan ang committee report kaugnay sa ginawang pagdinig sa epekto ng POGO operations sa ekonomiya ng bansa. —sa ulat ni Cely Ortega-Bueno (Patrol 19)
Halos kalahati ng public school teachers ang mayruong malaking utang sa GSIS at iba pang financial institution.
Ipinabatid ito ni Vladimir Queta, Chairperson ng Alliance of Concerned Teachers (ACT) sa gitna na rin nang pag amiyenda sa Republic Act 4670 o Magna Carta for Public School Teachers.
Ayon kay Queta, kawawa rin ang maraming public school teachers dahil kinakasuhan na ang mga ito at nais ng mga bangko na ipatanggal pa ang kanilang lisensya.
Nakakalungkot din aniya ang nangyayari dahil bukod sa mababang suweldo ay kulang din sa mga benepisyo ang mga guro kaya’t kailangan nang maamiyendahan ang Magna Carta for Public School Teachers.
Mas mabenta ang imported na bawang kaysa lokal na bawang.
Batay ito sa monitoring ng Department of Agriculture na nagsabing mas mura ang imported garlic na nasa P80 kada kilo kumpara sa P300 na presyo ng lokal na bawang.
Sa paglilibot ng agriculture department sa 13 malalaking wet markets sa Metro Manila, pumapalo sa P100 hanggang P130 ang kada kilo ng imported na bawang.
Kasabay nito , tiniyak ng D.A. na babaha na sa merkado sa Abril ang halos 4,000 metriko tonelada ng bawang mula sa 22 garlic producing towns ng Ilocos Region na top growers ng bawang.
Inaasahang mailulunsad sa unang bahagi ng 2023 ang Motorcycle Riding Academy ng Metro Manila Development Authority (MMDA).
Nilinaw naman ni MMDA Chairman Romando Artes na libre para sa mga rider ang enrollment sa nasabing programa kung saan bibigyan ng refresher course ang mga ito.
Sa ilalim ng naturang programa, kabilang sa mga ituturo sa mga rider ang basic emergency response at tamang disiplina sa pagpapatakbo ng motorsiklo upang maka-iwas sa aksidente.
Matapos naman ang refresher course ay bibigyan ng certificate ang mga nag-enroll. —sa panulat ni Hannah Oledan
![dubai]](https://www.dwiz882am.com/wp-content/uploads/2023/01/dubai.png)
Naging instant millionaire ang isang pinoy sa Dubai matapos mapanalunan ang epic grand prize sa Emirates draw kamakailan.
Kinilala ang OFW na si Russel Tuazon na isang store keeper at nagtatrabaho sa isang sikat na restaurant sa United Arab Emirates (UAE) na nakakuha ng tumataginting na 15 million aed o katumbas ng P224 million.
Ayon kay Tuazon, ito ang kauna-unahan niyang pagsali sa laro at hindi niya inakala na agad siyang mananalo at magiging milyonaryo kung saan, kaniyang tinayaan ang mga numero ng kaarawan ng kaniyang mga mahal sa buhay.
Dahil dito, planong magtayo ng negosyo ni Tuazon na nakalinya umano sa kaniyang hilig.
Kinumpirma ng Philippine Egg Board Association (PEBA) na tumigil na sa operasyon ang ilan pang maliliit na poultry farm owners at egg producers sa bansa.
Ito ang isa sa itinuro ni PEBA Chairman at United Broilers Raisers Association President Gregorio San Diego na dahilan nang pagtaas ng presyo ng itlog sa mga pamilihan, partikular sa Metro Manila.
Ayon kay San Diego, nagkaroon ng over-production noong 2021 pero bagsak ang presyo kasabay ng pagmahal ng patuka na sinundan ng bird flu outbreak noon namang isang taon.
Kung sosobra anya ang produksyon ay malulugi sila kaya’t maraming small at medium producers ang tumigil na sa operasyon habang nagbawas ng volume ang malalaking poultry farm.
Kinagigiliwan online ang isang estudyanteng nagtitinda ng ice candy na may fluent British accent.
Sa isang video na ipinamalas ni Jomar Villamor, ice candy vendor mula sa Maasin City, Southern Leyte, ang galing nito sa ingles at bisaya.
“By the way, sir, I got a product in here and I am just hoping you gonna like this. So, I’m gonna sell this to you,” pa-sample ng binata na pumatok naman sa social media.
Ayon sa report, natutunan ni VIllamor ang accent sa kaniyang panonood ng “Harry Potter” movie series.
Samanatala, isang dating guro naman ang nagbahagi na kahit huminto sa pag aaral si Jomar, ito ay matalino at madiskarte sa buhay.
Nasa mahigit 50,000 na Subscriber Identity Modules (SIMs) ang na-deactivate at inilagay ng isang telco sa blacklist noong 2022.
Sinasabing ito’y kaugnay ng mas pinaigting na kampanya nito laban sa mga naglipanang online fraud.
Napag-alaman na bilang parte ng mas pinalakas na inisyatibo para maprotektahan ang mga konsyumer, nag-deactivate ang Globe ng 20,225 na SIMs habang 35,333 na iba pa ang binlock na may kinalaman sa mga scam at spam messages noong nakaraang taon.
Halos 2.72 bilyon na scam at spam messages naman ang naharang noong 2022 kung saan ang 83.4 milyon ay may kaugnayan sa mga bank transaction.
Ayon kay Anton Bonifacio, Chief Information Security Officer ng telco, bago pa man naisabatas ang SIM Registration Act ay nagsasagawa na ng mga hakbang ang kanilang kompanya para protektahan ang mga kustomer laban sa scam messages at iba pang fraudulent activities gamit ang mga SIM.
“Globe recognizes the growing threat posed by scammers, who use various tactics, including text messages, to deceive innocent victims into giving up personal information that could be used to compromise their financial accounts. We will continue to invest in our cybersecurity program to protect our customers from these unscrupulous individuals,” wika ni Bonifacio.
Bilang bahagi ng programa, mabilis na dine-deactivate ng Globe ang mga SIM sa ilalim ng network nito sa sandaling ma-detect na may kinalaman ito sa fraud habang ang mga SIM naman sa labas ng network ay automatic na blacklisted para hindi na makapag-send ng messages sa kanilang mga subscriber.
Hindi maitatanggi na batid ng telco ang kahalagahan na maproteksiyunan ang mga kostumer laban sa mga masasamang-loob sa internet o online.
Dahil dito, patuloy itong nakikipagtulungan sa iba’t ibang financial institutions para mabilis na maharang ang mga kahina-hinalang SMS o text messages.
Maaari namang mag-report ang mga kostumer kapag nakatanggap ng spam at scam messages sa pamamagitan ng Stop Spam portal ng network.
Maliban dito, matatandaang naglunsad din ang Globe ng awareness at education campaign para palawakin ang kaalaman ng mga kustomer at nang maprotektahan nila ang kanilang mga sarili laban sa mga online scammer.
Samantala, para mas mabawasan din ang dumaraming bilang ng reklamo laban sa mga hindi rehistradong numero sa likod ng mga cybercrime, ipinasa ng pamahalaan ang Republic Act No. 11934 o mas kilala bilang SIM Card Registration Act na nilagdaan ni Pang. Ferdinand Marcos Jr. noong Oktubre 2022 kung saan kinakailangang irehistro ang mga SIM sa kani-kanilang mga telco.
Itinutulak ni Senator Mark Villar ang pagkakaroon ng karagdagang P2,000 transportation allowance para sa mga empleyado ng gobyerno.
Makatutulong umano ang Senate Bill 1625 para sa mga kawani ng gobyerno dahil ang malaking porsyon ng sinasahod ng mga ito ay napupunta sa pamasahe o sa gasolina.
Sa ilalim ng panukala, mabibigyan ng transportation allowance ang lahat ng mga empleyado ng gobyerno na may permanent status. —sa panulat ni Hannah Oledan