HEADLINES

Nagbabala ang PAGASA ng “severe” na epekto ng habagat sa ilang bahagi ng Luzon sa paparating na weekend.

Inaasahan ang malalakas at tuluy-tuloy na pag-ulan na maaaring magdulot ng pagbaha at malawakang pagkaantala sa pang-araw-araw na gawain.

Kabilang sa posibleng matinding maapektuhan ang Bataan, Pampanga at Zambales, gayundin ang ilang lugar sa Bulacan, Laguna, Nueva Ecija, Rizal at Tarlac.

Ayon sa PAGASA, “significant” naman ang inaasahang epekto sa Metro Manila at ilang bahagi ng Batangas, Bulacan, Nueva Ecija, Rizal at Tarlac.

Sa ngayon, patuloy naman ang ahensya sa pagpapaunlad ng impact-based forecast para sa baha, storm surge at landslide.

Samantala, asahan ang paminsan-minsang pag-ulan sa ilang lugar sa Northern at Central Luzon, habang makikita ang maulap na kalangitan, kalat-kalat na pag-ulan at pagkidlat-pagkulog sa Metro Manila at ilang karatig-lugar.

Habang sa Visayas, Luzon at Mindanao, posible naman ang hiwa-hiwalay na pag-ambon o pag-ulan at thunderstorms. | mula sa panulat ni Reabelle Medina

Pinaiimbestigahan na sa Senado ang sanhi at pinsalang naidulot ng mga nagdaang bagyo at patuloy na epekto ng habagat sa bansa.

Ayon kay Senate President Pro Tempore Tito Sotto III, layunin ng imbestigasyon na mapalakas ang disaster mitigation effort ng bansa sa panahon ng kalamidad.

May pangangailangan anya na masuri ang katatagan ng mga public infrastructure sa gitna ng matitinding bagyo at habagat na nanalasa sa bansa.

Sa Resolution No. 631 ni Senador Sotto, tinukoy ang sunod-sunod na bagyo at habagat nitong Agosto na nagdulot ng malawakang baha, suspensyon ng klase, pagka-stranded ng mga commuter, at pagsasara ng mga negosyo, na umabot sa 5.1-billion pesos ang pinsala.

Nangangamba rin ang senador sa report ng Department of Health na mahigit limang libo na ang kaso ng leptospirosis, habang mahigit tatlong daan na ang nasawi ngayong taon dahil sa nasabing sakit na dulot ng pagbaha dahil sa bagyo at habagat. | mula sa panulat ni Jordan Gutirrez

Iginiit ng depensa ni Vice President Sara Duterte na bagamat handa silang i-stipulate na walang confidential funds na inilipat ang DepEd sa AFP, hindi nila kinikilala na walang confidential o intelligence information na ibinahagi sa dalawang ahensya.

Ayon kay lead defense lawyer Sheila Sison, may mga certification mula sa mga opisyal ng militar na nagpapakitang nagpatuloy ang kooperasyon ng DepEd at AFP sa mga Youth Leadership Summits, bilang bahagi ng pagpigil sa recruitment ng mga estudyante ng insurgent groups.

Kabilang anya dito ang mga dokumentong naglalahad na nagbunga ang kooperasyon sa “zero reported” recruitment ng Communist Terrorist Group sa mga estudyante.

Nagkasundo naman ang prosekusyon at depensa na itakda bilang stipulation na walang confidential funds na direktang inilipat ng DepEd sa AFP o mga unit nito.

Samantala, ipinagtanggol din ni Atty. Sison ang paggamit ng DepEd ng confidential funds noong kalihim pa si Vice President Duterte, at binanggit ang isang Notice of Credit mula COA noong August 8, 2024, kaugnay ng 75-million-peso Audit Observation Memorandum para sa taong 2023. | mula sa panulat ni Jordan Gutirrez

Itutuloy na ng Department of Education ang nationwide simultaneous school safety drill sa September 3, para palakasin ang kahandaan ng mga paaralan sa active threat scenarios.

Ayon kay Education Secretary Sonny Angara, layunin ng aktibidad na bumuo ng kalmadong kahandaan at tamang response habits, at hindi magdulot ng takot.

Nauna nang ipinagpaliban noong Agosto a-bente singko ang nationwide safety drill para maiangkop ito sa child-centered at trauma-informed standards.

Dahil dito, mahigpit na ipagbabawal ang hyper-realistic at fear-inducing simulations, kabilang ang aktuwal na aggressor role-players, armas, at graphic materials.

Magsasanay ang mga estudyante sa pag-secure ng entry points, tahimik na pagtatago mula sa mga bintana, at pag-review ng evacuation routes.

Pagkatapos ng drill, magsasagawa ng first aid at post-drill debriefing ang guidance personnel at school health officers.

Binigyang-diin ni Secretary Angara na dapat pantay na bigyang-halaga ang pisikal na seguridad at peace of mind ng mga estudyante. | mula sa panulat ni Jordan Gutierrez