HEADLINES

TODO ang suporta ni Electric Vehicle Association of the Philippines (EVAP) President Edmund Araga sa pagsasama sa e-motorcycles sa mga pagkakalooban ng tax incentives sa ilalim ng Executive Order No. 12 na sumasailalim sa mandatory review magmula noong Pebrero 21 ngayong taon.

Sa isang panayam, sinabi ni Araga na hindi dapat ‘car-centric’ ang Pilipinas at dapat nitong isaalang-alang ang karamihan ng road users sa bansa na motorcycle riders.

Nabatid sa Statista Research Department na ang Pilipinas ay may kabuuang 7.81 million registered motorcycles at tricycles na bumubuo sa karamihan ng mga motorista na gumagamit ng mga kalsada.

“We are very vocal that with the proliferation of [EVs] in the Philippine setting, kailangan na kailangan din ‘yang mga [e-motorcycles] na ‘yan. In fact, most of the consumers can afford to buy two wheels and three wheels, and not on the four wheels… mahirap kung ang basis natin ay nasa four wheels lang,” pahayag ni Araga nang hingan ng komento sa posibleng pagsasama sa e-motorcycles sa listahan ng EVs na nabibiyayaan ng tax breaks sa ilalim ng Executive Order No.12 series of 2023.

Sa ilalim ng EO12, series of 2023, binago ang tariff rates para sa ilang uri ng EVs at mga parts at components nito sa loob ng limang taon upang makatulong sa pagsusulong ng green transportation sa bansa.

Subalit sa kasalukuyan ay hindi kasama ang e-motorcycles sa listahan ng EVs na nabibigyan ng tax break kaya pinapatawan pa rin ito ng 30% tariff rates. Ang executive order ay kasalukuyang nirerepaso makaraang magkabisa ito noong Pebrero 20, 2023.

Sabi ni Araga, ang pagkakaloob ng tax breaks sa motorcycles ay magiging isang game-changer sa trapiko sa bansa, subalit sinabing ang pagpasok ng mga ito ay dapat na maayos na masubaybayan at madodokumento upang maiwasan ang maling paggamit ng mga ito sa kalsada.

“This would really be a game-changer kung talagang naisama ito [e-motorcycles on EO12]… We have to strike a balance out of these rules and regulations in order for us to secure and make sure that the application is in place,” sabi pa ni Araga.

Maliban dito, isinusulong din ni Araga ang localization ng e-motorcycle production, kasabay ng pagbibigay-diin na kailangang tingnan ng pamahalaan ang ‘win-win situation’ para sa mga producer at consumer ng e-motorcycles sa bansa.

“What we are pushing is bringing a manufacturing plant that is capable na mag-build dito. We are working tirelessly para ma-lure namin ang investors to come here and produce EVs, in particular, the two-wheels,” ani Araga.

Sinasabing umalma ang ilang stakeholders ng EV industry matapos ma-itsa-pwera ang
e-motorcycles sa initial implementation ng EO12 dahil hindi anila ito makatarungan sa riders.

Samantala, pahayag naman ni National Economic Development Authority Chief Arsenio Balisacan, ang pagrepaso sa EO12 ay sesentro sa pagtalakay sa pagkakaloob ng tax breaks sa e-motorcycles.

Ibinida ni Pangulong Ferdinand Marcos Jr. ang mayamang kultura ng Pilipinas sa pamamagitan ng inorganisang guided tour para sa mga ambassador na nakatalaga sa bansa.

Tinanggap ang mga ambassador sa Goldenberg Mansion, dating Presidential guest house.

Inilibot sila sa exhibits ng katabi nitong Teus Mansion, isang 19th-century home na kasalukuyang kinalalagyan ng Presidential Museum at nagsisilbing “treasure trove” ng Philippine history.

Nagpatuloy ang tour sa Bahay Ugnayan kung saan makikita ang “Road to Malacañang”, isang exhibit na nagtatampok sa buhay ni Pangulong Marcos mula pagkabata hanggang sa pagiging pinuno ng Pilipinas.

Bukas sa publiko ang tatlong historic homes na nagsisilbi bilang museums.

Samantala, nagkaroon din ng surprise visit ang mga ambassador sa newly-restored Laperal Mansion. Nakatakda itong maging official presidential guest house para sa mga pinuno ng ibang bansa.

Patuloy na nagsisikap ang administrasyon ni Pangulong Ferdinand Marcos Jr. upang mabilis na mapababa ang presyo ng mga bilihin.

Ito ang naging pahayag ng National Economic and Development Authority (NEDA) matapos na lumabas ang resulta ng isang survey mula sa OCTA Research kung saan naipakitang 75% ng mga Pilipino ang hindi nasisiyahan sa pagtugon ng pamahalaan sa inflation.

Ayon kay NEDA Secretary Arsenio Balisacan, pinabibilis ng administrasyong Marcos ang mga aksyon upang makontrol ang presyo ng mga pangunahing bilihin tulad ng bigas, sa gitna ng nararanasang El Niño phenomenon at pagtaas ng presyo nito sa pandaigdigang merkado.

Dagdag pa ng kalihim, gumagawa ang pamahalaan ng mga mahahalagang hakbang pagdating sa foreign direct investments na lilikha ng mas maraming trabaho na may malaking kita at magpapataas sa purchasing power ng mga Pilipino.

Pagbibigay-diin ni Sec. Balisacan, simula ng termino ni Pangulong Marcos noong 2022, unti-unting nakakabawi ang ekonomiya ng bansa mula sa naitalang 9.5% gross domestic product (GDP) contraction noong 2020.

ISUSULONG ng pamahalaan sa susunod na linggo ang pagrepaso sa Executive Order (EO) na nagbabago sa tariff rates para sa electric vehicles (EVs), kung saan posibleng maisama ang e-motorcycles sa listahan ng mga sasakyan na nakikinabang sa tax breaks.

Naunang sinabi ni National Economic and Development Authority (NEDA) Chief Arsenio Balisacan na ang EO No. 12, series of 2022 na nagbibigay ng tax breaks sa ilang uri ng EVs ay magkakaroon ng mandatory review ngayong buwan.

Ang EO12 ay na-upload sa Official Gazette noong January 19, 2023, at nagkabisa noong February 20, 2023. Isasailalim ito sa pagrepaso simula February 21, 2024.

Ang EO12 ay inilabas upang palakasin ang Electric Vehicle Industry Development Act (EVIDA), sa layuning maisulong ang EVs sa bansa para matulungan itong maitulak ang green transport at mabawasan ang carbon emissions.

Maliban sa e-motorcycles, na hindi kasama sa tariff suspension at pinapatawan pa rin ng 30 percent import charge, ang iba’t ibang uri ng electric vehicles at mga component nito ay nakakuha ng mas mababang taripa sa ilalim ng EO12 mula sa dating 5 hanggang 30 percent sa kasalukuyang zero percent import duty.

Ang NEDA ang ahensiya na nagrekomenda sa pagpapatupad ng EO12 sa loob ng limang taon upang baguhin ang tariff rates para sa ilang EVs at mga parts at components nito.

Nagpahayag ng alalahanin ang EV industry stakeholders sa EO12 buhat nang simulan ito noong 2023, binigyang-diin na hindi makatarungan na i-etsa-puwera ang e-motorcycles sa mga tumatanggap ng tax breaks mula sa pamahalaan kahit na ang motorsiklo ang bumubuo sa karamihan sa mga motorista sa bansa, ayon sa datos mula sa Land Transportation Office (LTO).

Sa datos ng Statista Research Department, nasa 7.81 million private motorcycles at tricycles ang nakarehistro sa Pilipinas noong 2022.

Ito rin ang nagtulak kay Albay Rep. Joey Salceda na ihain ang House Bill 9573, na naglalayong rebisahin ang EO12, upang isama ang e-motorcycles ss EVs na nabibigyan ng tax breaks.

“Some 60 percent of electric vehicles are two-wheeled, meaning that the vast majority of electric vehicles do not benefit from the tax incentives granted under the law… encouraging electric cars while locking out electric motorcycles does not address congestion issues, but merely substitutes petroleum-fueled cars for their space on the road,” sabi ni Salceda sa kanyang bill.

“In order to address these issues, this proposal clarifies in its definition of terms that electric vehicles include two-wheeled vehicles. Additionally, the measure provides a zero-percent duty treatment on completely-built electric vehicles to accelerate the shift to these types of vehicles,” dagdag pa niya.

Sa isang pag-aaral noong 2021, natuklasan ng international consulting firm Frost & Sullivan na ang mga consumer sa Pilipinas ay nasasabik sa pagpapakilala sa EVs sa Pilipinas, sa patuloy na pagsusulong sa lumalawak na environmental awareness.

 Sapat ang suplay ng mais, bigas, asukal, karne ng baboy, manok, at iba pang mga pangunahing pangangailangan o basic necessities para sa mga susunod na buwan.

Ito ang sinabi ni Department of Agriculture Usec. Roger Navarro sa kabila aniya ng umiiral tagtuyot.

Batay sa rice supply at demand outlook para sa 2024, nananatiling stable ang suplay ng bigas sa bansa hanggang sa katapusan ng taon.

Habang sapat naman ang suplay ng itlog hanggang sa 6 na buwan partikular na ang sibuyas, asukal, at isda.

Sinabi ni Agriculture Usec. Navarro na ang mais ay sapat hanggang sa huling quarter ng 2024 o may 42 days na buffer stock at maging ang karneng baboy at manok.

Samantala, tiniyak naman ni Task Force El Niño Spokesperson at Communications Assistant Secretary Joel Villarama ang sapat na suplay ng tubig at kuryente sa metro manila at sa mga lalawigan. – sa panunulat ni Jeraline Doinog

Pinatitiyak ni Pangulong Ferdinand Marcos Jr. sa Department of Agriculture (DA) ang katatagan at suplay ng pagkain sa gitna ng El Niño phenomenon.

Sa isang press briefing, ibinahagi ni Agriculture Undersecretary Roger Navarro na nagkaroon ng pagpupulong sina Pangulong Marcos at DA Secretary Francisco Tiu Laurel Jr. tungkol sa suplay ng mga pangunahing bilihin sa Pilipinas.

Ayon kay Usec. Navarro, stable at walang magiging problema ang bansa sa mga susunod na buwan pagdating sa crop commodities, partikular na sa bigas at mais, at karne ng baboy at manok.

Batay naman sa Rice Supply and Demand Outlook para sa 2024, magiging matatag ang suplay ng bigas sa bansa hanggang sa pagtatapos ng taon na may annual average surplus na 3.7 million metric tons.

Samantala, inihayag ng Task Force El Niño na kailangan pa ring ipatupad ang mga paghahanda sa tagtuyot na maaaring magpatuloy hanggang sa Mayo.

Personal na inabot ni Pangulong Ferdinand Marcos Jr. ang special financial assistance sa 12 sundalong sugatan sa pakikipaglaban sa Dawlah Islamiyah-Maute Group.

Maliban sa tulong pinansyal, binigyan din ni Pangulong Marcos ng iba’t ibang karangalan ang apat na sundalong wounded in action (WIA), kabilang na ang Gold Cross Medal, Military Merit Medal with Bronze Spearhead Device, at Wounded Personnel Medal.

Dito, kinilala ng Pangulo ang katapangan at dedikasyon nilang protektahan ang mga mamamayang Pilipino at ipagtanggol ang bansa laban sa mga banta sa seguridad.

Kasalukuyang naka-confine sa Army General Hospital (AGH) ang mga sugatang sundalong lumaban sa militanteng Dawlah Islamiyah-Maute Group. Matatandaang sangkot ang grupong ito sa pagbomba sa Mindanao State University-Marawi.

Samantala, tiniyak ni Pangulong Marcos na patuloy na pagsisikapan ng pamahalaan ang pagpapatupad sa mga programang magbibigay ng tulong sa mga nasawing sundalo, pati na rin ang pagsusulong sa kapakanan ng mga tauhan ng Armed Forces of the Philippines (AFP) at kanilang mga pamilya.