HEADLINES

17 katao ang namatay sa salpukan ng isang dump truck at pampasaherong van sa antipas, North Cotabato nitong Lunes.

Kabilang sa mga biktima ang driver ng van at 5-  taong gulang na babae.

Ayon sa Antipas Disaster and Risk Reduction Management Office, nagliyab ang van matapos nitong bumangga sa dump truck na may kargang buhangin, at nakaladkad pa ng truck ang van nang ilang metro.

Kaugnay nito, na-trap sa loob ng nasusunog na van ang mga biktima at kalaunan ay nasawi.

Sinasabing nawalan ng kontrol ang driver ng truck sa bahagi ng barangay luhong.

Samantala, tatlong indibidwal naman ang nakaligtas sa insidente na pawang nagtamo ng major burns at injuries.

Tiniyak naman ng Antipas Police na patuloy nilang iniimbestigahan ang naturang insidente.

Nagbigay na ng show cause order ang Department of Education (DepEd) laban sa public school teacher na nag-viral matapos nitong manermon sa kanyang mga estudyante habang naka-live sa isang video-sharing platform.

Ayon kay DepEd Assistant Secretary Francis Bringas, inutusan na ng DepEd regional office ang guro na ipaliwanag ang kanyang naging aksyon sa naturang insidente.

Binigyan ng ahensya ang guro ng 72 hours upang sagutin ang show cause order.

Nagpaalala naman si Asec. Bringas na maging responsable at sundin ang mga umiiral na polisiya sa paggamit ng social media.

Hindi na umabot sa ospital ang isang 3 taong gulang na batang babae nang gilitan ito ng sariling ama na namatay din matapos nitong saksakin ang kanyang sarili sa Inopacan, Leyte.

Kinilala ang namatay na suspek na si Crisencio Timon Jr., 42-anyos

Ayon sa Inopacan Municipal Police Station, pinatulog muna ng suspek ang biktima at saka nilaslas ang leeg nito gamit ang patalim.

Pagkatapos nito ay ilang beses naman na sinaksak ng suspek ang sarili hanggang sa mawalan ito ng ulirat.

Nadiskubre ng isang kapitbahay ang duguang mag-ama nang magtungo siya sa bahay ng mga ito para magdala ng isda sa suspek.

Base sa ginawang imbestigasyon ng mga pulis, ilang araw ng balisa ang suspek matapos na bumalik ang kinakasama nito na nanay ng batang biktima para makipaghiwalay sa kanya.

Nakatakda sanang humarap sa barangay ang maglive-in partner para pag-usapan ang kanilang problema pero bago ito mangyari ay nagawa na ng suspek ang krimen.

Posible umanong inatake ng depresyon ang suspek dahilan upang magawa nitong patayin ang kanyang sariling anak at pagkatapos ay patayin naman nito ang sarili.

Matagumpay na nakakalap si Pangulong Ferdinand Marcos Jr. ng iba’t ibang investment deals na nagkakahalaga ng $4 billion sa kanyang three-day working visit sa Berlin, Germany.

Kabilang sa mga kasunduang ito ang pamumuhunan para sa fully integrated solar cell manufacturing facility sa bansa at pagkakaroon ng partner hospital na magsisilbi rin bilang training center para sa mga mas maliliit na pagamutan.

Mayroon ding nilagdaang Memorandum of Agreement (MOA) ang Pangulo para sa rehabilitasyon ng mga nasirang lupang sakahan at Letter of Intent (LOI) na lilikha ng Innovation Think Tank hub.

Pinasalamatan naman ni Pangulong Marcos ang German investors sa kanilang patuloy na tiwala sa kakayahan at talento ng mga Pilipino.

Dead on the spot ang isang illegal-drug surrenderee matapos itong barilin ng hindi pa nakikilalang suspek habang sakay ng kanyang motorsiklo sa Cabugao, Ilocos Sur

Kinilala ng awtoridad ang biktimang si Jerwin Inofinada, 35-  anyos

Ayon sa Cabugao Police Station, binabaybay ang biktima sakay ng kanyang motorsiklo ang kahabaan ng barangay Cuantacla nang sabayan ito ng naka-motorsiklo ring suspek.

Bumunot ito ng calibre 45 at saka ito pinagbabaril

Agad na tumakas ang suspek sa hindi pa malamang lugar.

Nagsasagawa na ng follow-up investigation ang pulisya para sa ikadarakip ng suspek at motibo sa pamamaril.

Isang  2-taong-gulang na bata ang malubhang nasugatan ng 4 na aso sa Calbiga, Samar.

Sa inisyal na imbestigasyon ng awtoridad, sinundan ng bata, ang kaniyang ina na papunta sa trabaho

Nang mapadaan ito sa isang kulungan ng baboy, kung saan 4 na aso ang nagbabantay sa mga alagang hayop at walang tali.

Inatake ng mga aso ang bata, na nawalan ng kaliwang tenga at isang tipak ng laman sa kanang bahagi ng kanilang katawan.

tinali na ng may-ari ng piggery ang mga aso at nangakong tutulong sa pamilya ng bata.

Aarangkada na sa lalong madaling panahon ang public hearings sa pagrebisa sa Executive Order No. 12, series of 2023, upang “maingat na isaalang-alang ang lahat ng mga pananaw ng industry stakeholders,” ayon kay National Economic and Development Authority (NEDA) Secretary Arsenio Balisacan.

Kaya inatasan ni Balisacan ang Tariff Commission, isang ahensiya sa ilalim ng NEDA, na magsagawa ng open discussions sa mandatory review sa mga stakeholder at environmentalist na nagsusulong sa ilang amendments sa EO12.

Sa isang statement, inatasan ng NEDA chief ang TC na magsagawa ng public hearings para sa pagrebisa ng executive order na pansamantalang nagbababa sa rates ng import duty sa ilang electric vehicles, mga parts at components nito sa loob ng limang taon.

“The review shall follow the tariff modification process under Section 1608 of the Customs Modernization and Tariff Act, and shall be presented to the Committee on Tariff and Related Matters and the NEDA Board,” sabi ni Balisacan.

Sa ilalim ng Section 1608 ng Tariff and Customs Code of the Philippines, o mas kilala bilang Flexible Clause, bago magsumite ng anumang rekomendasyon ang NEDA sa Pangulo, ang TC ay kailangan munang magsagawa ng public hearings kung saan ang mga interesadong partido ay bibigyan ng pagkakataong madinig.

Gayunman, hanggang ngayon, ay wala umanong EV industry players ang nagsabing nakatanggap sila ng mga detalye sa pagsasagawa ng public hearing na may kinalaman sa mandatory review ng EO12.

Ito ay sa kabila ng malawakang panawagan sa pamahalaan na amyendahan ang EO12 para isama ang electric motorcycles sa tax incentives.

Isinusulong ng mga stakeholder ang pagsasama sa electric motorcycles sa tax break dahil sa malaking maiaambag nito sa layunin ng pamahalaan na lumipat sa fully electric transportation system sa 2040, tulad ng nakaprograma sa Department of Trade and Industry.

“With the review on the horizon, the list of EVs with reduced rates on import duties is expected to expand and cover e-motorcycles and hybrid vehicles,” sabi ni Balisacan.

Ayon sa Statista Research Department, may 7.81 million private motorcycles at tricycles na nakarehistro sa Pilipinas noong 2022, na mayorya ng mga motorista na bumibiyahe sa mga kalsada sa bansa.

Nagsama-sama ang ibat-ibang ahensya at organisasyon bilang suporta sa pagdiriwang ng International Women’s Day ngayong araw.

Nanguna sa aktibidad sina SM Supermalls President Steven Tan; Philippine Commission Women Officer-in-Charge Atty. Khay Ann Magundayao-Borlado; UN Resident Coordinator in the Philippines Gustavo Gonzales; UN Women Country Coordinator Rosalyn “Lenlen” Mesina; at She Loves Tech Founder Leanne Robers; kasama ang iba pang opisyal na patuloy na lumalaban para protektahan ang mga kababaihan na may mahalagang papel sa global harmony at equality.

Ang nasabing aktibidad ay may temang; investing in equality toward gender-inclusive prosperity na ginanap sa Samsung Hall, SM Aura, Taguig City.

Nagsilbing host ng event ang batikang mamamahayag na si bernadette sembrano; katz salao; at Carol Dy na dinaluhan at sinuportahan ni Senator Loren Legarda maging ng iba pang ahensya ng gobyerno.

Binigyang-diin sa aktibidad ang pagkakapantay-pantay ng bawat isa anoman ang lahi, edad, at kasarian.

Umaasa ang SM Supermalls na magkakaroon ng koordinasyon o kolaborasyon sa Department of the Interior and Local Government na maghihikayat sa mga lokal na pamahalaan na suportahan ang kanilang kampaniya na labanan ang diskriminasyon, karahasan, pang-aabuso, at pananamantala sa mga kababaihan.

Naniniwala rin sila na mas mapapalakas ang security system sa bansa at mapapanatili ang pagkakapantay-pantay ng bawat isa kung makikipagtulungan ang mga ahensya ng gobyerno.

Bukod pa dito, target din ng SM Supermalls na palawakin ang mga programa at proyektong magpapalakas at magbibigay ng pagasa sa mga kababaihan na ipaglaban ang kanilang karapatan; irespeto ng tama; at maprotektahan ang kanilang mga sarili tungo sa mas maayos at mas magandang kinabukasan.