HEADLINES

Iginiit ni Quezon City Mayor Joey Belmonte ang pagbabakuna sa mga bata.

Kasunod na rin ito ng pahayag ni Vaccine Czar Carlito Galvez na target ng gobyerno na itaas sa 90% ng populasyonang mabakunahan para makamit na ang herd immunity sa gitna pa rin ng banta ng Delta variant.

Kasabay nito, ipinabatid ni Belmonte na batay sa report ng City Epidemiology and Disease Surveillance Unit hanggang nitong Setyembre 8, nasa halos 13,000 nasa 0 hanggang 17 years old sa lungsod ang nag positibo sa COVID-19.

Binigyang diin ni Belmonte na krusyal ang pagsama sa mga bata sa vaccination program dahil 30% ng populasyon ng QC ay pawang menor de edad.

Una nang nag positibo sa COVID-19 ang halos isandaang bata sa Gentle Hands Orphanage sa Quezon City.

Pinabubunyag ng isang public policy think tank sa National Telecommunications Commission (NTC) ang aktuwal na resulta at paraan ng ginawang ikalawang technical audit sa Dito telecommunity.

Ito ayon kay Atty. Terry Ridon, convenor ng Infrawatch Ph at dating miyembro ng House Information and Communications Technology ay dahil ang resulta ng audit ay hindi nagpapakita ng actual customer experience.

Sinabi ni Ridon na mahalagang maisiwalat ng NTC ang technical audit methodology nito para matukoy kung binigyan nito ang dito ng “fair or favorable shake” sa panahon ng audit.

Dapat din aniyang isaalang-alang ang findings ng third parties na nauugnay sa totoong performance ng Dito telecommunity matapos lumabas sa third-party report ng open signal na ang download, upload at video experiences ng Dito ay bumagal ng ilang buwan habang consistent ang resulta ng ibang operators.

Iginagalang ng Malakanyang ang panukala ni Ombudsman Samuel Martires na parusahan ang mga indibidwal na magkokomento laban sa SALN ng mga government official.

Tinukoy ni presidential spokesman Harry Roque ang mandato ng Ombudsman bilang constitutional body tulad ng Commission on Audit.

Magugunitang sa pagdinig ng Kamara, isinulong ni Martires ang pagpapakulong ng hindi bababa sa  taon laban sa mga magkokomento ng negatibo sa SALN ng government officials, bilang aniya’y pag amyenda sa Republic Act 6713 o Code of Conduct and Ethical Standards for Public Officials and Employees.

Nakatakdang magsagawa ng mandatory review ang bids and awards committee ng COMELEC.

Ayon kay COMELEC chairman Sheriff Abas, walang nagsumite ng bid para sa rerentahang dagdag na sampung libong vote counting machines para sa 2022 National Elections.

Sinabi ni Abas na sa mandatory review malalaman kung kailangan pang ituloy ang biddng o gagamitin na lamang ang 97,000 VCMs na ginamit sa nakalipas na eleksyon.

Ipinabatid ni Abas na sakaling hindi madagdagan ang VCMs, mananatili sa 1K ang mga botanteng ilalaan sa bawat voting precinct, subalit uubra itong maging 800 na lamang kapag nakapagrenta ng dagdag na sampung libong VCMs.

Pinadadagdagan ng mga kongresista ang budget para sa 2022 ng tanggapan ni Vice President Leni Robredo.

Ang inaprubahang 2022 budget ng OVP na nasa halos P714-M ay 21% na mas mababa sa 2021 budget nitong P900-M.

Ayon kay Camarines Sur congressman Gabriel Bordado, dapat dagdagan ang budget ng OVP dahil malaking pondo naman nito ay napupunta sa financial assistance at subsidies sa ilalim ng anti-poverty program na Angat Buhay.

Umaasa naman si Vice President Robredo na gagawing P1-B ang budget ng kanyang opisina sa susunod na taon.

Dapat bukas sa komento ng publiko ang SALN o Statement of Assets, Liabilities and Net worth ng mga opisyal ng gobyerno.

Reaksyon ito ni senador Risa Hontiveros matapos isulong ni Ombudsman Samuel Martires ang pagpapataw ng multa sa mga indibidwal na magsasalita laban sa SALN ng public officials.

Binigyang-diin ni Hontiveros na ang SALN ay isang public document, kaya’t dapat ay bukas din ito sa komento ng mamamayan kahit pa mula sa mga nagtatrabaho sa gobyerno.

Mahalaga aniya ang SALN sa imbestigasyon ng mga kaso ng katiwalian sa gobyerno.

Uubra pa ring makaboto sa 2022 National Elections ang mga rehistradong botante na dinapuan ng COVID-19.

Ipinabatid ito ni COMELEC chairman Sheriff Abas, sa pagdinig ng 2022 budget ng COMELEC.

Sinabi ni Abas na gagawan nila ng paraang makapagtayo ng isolation center sa kada polling center para maihiwalay ang mga COVID-19 positive at makaboto pa rin ang mga ito.

Nakatikim ng panunumbat mula sa health workers si presidential spokesman Harry Roque matapos nitong kastiguhin ang isang grupo ng mga doktor na nagbabala sa posibleng pagsirit pa ng COVID-19 cases kapag niluwagan ang restrictions.

Sinabihan ni Dr. Leni Jara ng Shape Up to Defeat COVID-19 group si Roque na tumigil na dahil sumosobra na ito sa pambabastos sa mga nagtatrabaho at aniya’y nagliligtas ng mga pasyente.

Pinagso-sorry rin ni Jara si Roque sa mga doktor dahil hindi aniya katanggap-tanggap ang pagiging stress nito para magsalita laban sa health professionals.

Kinontra ng ECOP Employers Confederation of the Philippines ang panukalang bigyan ng mas maluwag na restrictions ang mga fully vaccinated.

Ayon kay Sergio Ortiz-Luis, pangulo ng ECOP, malinaw na discriminatory ang panukalang tanging ang mga bakunado lamang ang payagang makalabas ng bahay bagama’t pabor naman silang mabigyan ng insentibo o benepisyo ang mga nabakunahan na.

Sinabi ni Luis na hindi dapat magkaroon ng diskriminasyon at dapat payagang magtrabaho lalo na kung APOR lalo pa’t hindi naman mabibigyan ng ayuda ng gobyerno sakaling hindi magtrabaho kapag nagpatupad ng lockdown.

Dalawang quarantine classification lamang ang ipatutupad ng gobyerno sa ikinakakasang alert level system para sa COVID-19 response sa NCR.

Ito ayon kay presidential spokesman Harry Roque ay matapos aprubahan “provisionally” ng IATF ang mga panuntunan para sa implementasyon ng alert level system para sa COVID-19 response.

Sinabi ni Roque na batay sa gagawing policy shift, ECQ at GCQ lamang ang quarantine classification at ang pupuwede at hindi pupuwede ay nakadepende sa alert level na nakapataw sa lugar sa loob mismo ng Metro Manila.

Inihayag ni Roque na sa ilalim ng alert level 4 o high risk classification, bawal ang dine-in, personal services at mass gatherings samantalang isinasailalim pa ng IATF ang mga aktibidad na uubra sa alert level 4.

Binigyang-diin ni roque na lahat ng lugar ay magpapatupad ng granular lockdowns, batay sa IATF guidelines.

Ang apor aniya ay limitado lamang sa health workers at professionals, kaya’t ang mga government officials at employees na nakatira sa mga lugar na nasa ilalim ng localized lockdowns ay hindi papayagang lumabas ng kanilang mga bahay.