HEADLINES

Kinumpirma ni Executive Secretary Salvador Medialdea ang pagtatalaga ng Pangulong Rodrigo Duterte kay dating PNP chief retired police general Debold Sinas.

Si Sinas ay itinalaga ng Pangulo bilang Undersecretary ng Office of the President.

Magugunitang naging kontrobersyal si Sinas nang lumabag sa ban hinggil sa mass gatherings at physical distancing rules nang magsagawa ng Manianita sa kanyang birthday noong May 2020 kung kailan siya pa ang NCRPO chief.

Idinipensa ng Pangulo si Sinas sa insidenteng ito at sinabing hindi sisibakin ang opisyal.

Nasunduan pa ito ng isa pang kontrobersya nang lumabag din sa health protocols si Sinas nang bumisita sa Oriental Mindoro government kung saan nag positibo ito matapos ang naturang pagbisita.

Pinagpapaliwanag ng Pangulong Rodrigo Duterte si senate minority floorleader Franklin Drilon sa anito’y kaugnayan kina Janet Lim-Napoles at dating Iloilo City mayor Jed Patrick Mabilog.

Sa gitna na rin ito nang pakikiisa ni house minority floorleader Franklin Drilon sa pagdinig ng senate blue ribbon committee hinggil sa overpriced medical items na binili ng DOH.

Tinukoy ng Pangulo ang pakikipagkita ni Drilon kay Napoles sa heritage park sa Taguig City gayundin ang anito’y limang P5-M campaign fund na ibinigay ni Napoles sa senador.

Ito’y ayon sa Pangulo ay tiyak na pinalitan ng pabor ni Drilon.

Dapat din aniyang magpaliwanag si Drilon sa relasyon nito kay Mabilog at maging kay Retired Police General Marcelo Garbo, Jr. na kapwa isinangkot ng Pangulo sa kanyang narco list.

Bukod dito, pinatutukoy rin ng Pangulo kay Drilon kung sino ang may-ari ng pinakamalaking mall sa Iloilo City at kung sino ang nagsilbing broker sa pagbebenta ng lumang Iloilo City Airport sa Megaworld.

Panibagong record high na 26,303 bagong kaso ng COVID-19 ang naitala ngayong araw.

Dahil dito umabot na sa  2,206,021 ang kabuuang bilang ng mga kumpirmadong kaso ng COVID-19 sa Pilipinas.

Pumalo naman sa 185,706 ang active cases.

Habang umakyat sa   1,985,337  ang kabuuang bilang ng mga gumaling sa sakit matapos iulat ng DOH ang 16,013 new recoveries.

Nadagdagan naman ng 79 ang bilang ng mga namatay dahilan para umabot na sa 34,978 ang kabuuang bilang ng mga nasawi sa nasabing sakit.—sa panulat ni Hyacinth Ludivico

Nagbanta ang Pangulong Rodrigo Duterte na ititigil ang lahat ng transaksyon ng gobyerno sa Philippine Red Cross.

Kasunod na rin ito ng panibagong pambubukas ng Pangulo kay PRC chair, Senador Richard Gordon sa pangunguna sa imbestigasyon hinggil sa umano’y overpriced COVID-19 medical supplies.

Tinawag pang buang ng Pangulo si Gordon na aniya’y malalim na ang kanilang away.

Sinabi ng Pangulo na susulatan niya ang prc para buksan ang record nito at hihilingin mismo kay COA Chair Michael Aguinaldo na iaudit ang pondong ibinibigay ng gobyerno sa red cross.

Kung hindi papayag si Gordon, binigyang-diin ng Pangulo na ititigil na niya ang anumang transaksyon ng gobyerno sa PRC at wala siyang pakialam dito dahil alam niyang nasa katuwiran siya.

Pinasisibak ng isang grupo ng mga doktor sa Pangulong Rodrigo Duterte si Presidential Spokesman Harry Roque matapos atakihin ang mga health workers.

Subalit mas mabuti, ayon kay Dr. Maricar Limpin, pangulo ng Philippine College of Physicians (PCP) na magbitiw sa na lamang sa tungkulin si Roque dahil sa delicadeza.

Ipinabatid sa DWIZ ni Limpin na hindi alam ni Roque ang mga pinagsasabi nito sa sitwasyon ng medical workers na aniya’y pagod na pagod na sa kanilang mga trabaho.

Nilinaw ni Limpin na hindi lang naman isyu ng kalusugan ang concern nila kundi maging ang iba pang usapin na kaakibat ng pandemya.

“Hindi naman po kami, yung parang ang concern lang namin ay pangkalusugan. Kaya nga ho ang sinasabi namin, sana si Secretary Roque, he should get his facts straight. Hindi ho tamang information yung kanyang mga sinasabi. So, alam ho namin, nakikipag-usap po kami sa mga economic experts. Sila po ang nagsasabi na may pagkukuhaan ng pera, at itong perang ito, malaking malaki, malaking pera pong ‘to ay hindi po ito utang. So, meron pong paraan kung pano natin matutulungan yung mga hindi makakapagtrabaho, kung mabibigyan natin sila ng financial assistance at pwede rin pong bigyan ng assistance yung mga small, medium enterprise,” wika ni Dr Maricar Limpin, Pangulo ng Philline College of Physicians sa panayam ng DWIZ.

Idinipensa ng Pangulong Rodrigo Duterte ang Pharmally Pharmaceutical Corporation at si dating presidential adviser Michael Yang, matapos bakbakan ang pagdinig ng senado sa umano’y overpriced medical supplies.

Nag alok din ang Pangulo na magbitiw sa tungkulin kapag napatunayang may katiwalian sa pagbili ng gobyerno ng face mask at face shield.

Ayon sa Pangulo, Motu Propio Investigation ang agenda ng Senate Blue Ribbon Committee at wala siyang pakialam sa pagbubisi ng mga senador sa technical at financial requirements ng Pharmally Corporation.

Ipinagtanggol din ng Pangulo si Yang matapos ihayag na natural lamang sa negosyante na tumutok sa ibat ibang bidding.

Binigyang diin ng Pangulo na malinaw na mayruong kontrata kung saan kumpleto ang specifications, quality at quantity, at nagbayad ang Pilipinas matapos mai deliver ang medical supplies.

Tinawag ding maldito ng Pangulo ang Kongreso sa imbestigasyon nito sa paggastos ng DOH sa COVID-19 funds kabilang ang pagbili sa umano’y overpriced medical goods.

Muling kinastigo ng Pangulong Rodrigo Duterte ang mga human rights advocates, kasunod nang pagbibigay nito ng update sa Anti-Drug Campaign ng administrasyon.

Ipinakita ng Pangulong Duterte sa kanyang Talk to the Nation ang litrato ng dalawang indibidwal na napatay sa drug operations sa Bacoor, Cavite noong Setyembre 9.

Iniulat din ng Pangulo ang isa pang drug operation sa parehong araw sa Imus City kung saan narekober ang 48 kilos ng shabu na nagkakahalaga ng halos P332-M  at kung saan naaresto ang isang mag asawa.

Sinabi ng Pangulo na ayaw niyang may mawalang buhay subalit kailangang isulong ang kampanya kontra iligal na droga kahit pa patuloy siyang bakbakan ng human rights advocates.

Binigyang diin ng Pangulo na hindi niya hahayaang maging inutil ang mga Pilipino bunsod ng illegal drugs dahil hindi niya alam kung saan pupulutin ang Pilipinas kapag nangyari ito.

Patuloy ang pagkilos ng DOH para mahimok ang mga Pilipino na magpa bakuna na kontra COVID 19.

Ito ayon kay Dr Beverly Ho, Director ng DOH Promotion Bureau ay matapos nilang mahimok ang online shopping giant na Lazada para magbigay ng 15% sa mga bakunadong bibili sa nasabing online shop.

Sinabi ni Ho na mabenta ang mga produkto sa Lazada kaya’t naisip nilang gamitin ito para mahikayat ang mga Pilipinong magpaturok na kontra COVID-19.