HEADLINES

MATINDI ang pangangailangan ng Sultanate of Oman para sa health care workers dulot ng pandemya.

Katunayan, ayon kay Labor Attaché Gregorio Abalos Jr., nangangailangan ito ng 350 medical workers, partikular ang mga nurses.

Sinabi ni Abalos na naghahanap ng 150 nurses ang Apollo hospital habang nag-request din ng dalawang daang Filipino nurses ang Sultan Kabul Cancer Care hospital.

Umaabot sa 300 Omani rials o limampung libong piso kada buwan ang sahod ng mga nurses sa Oman pero hindi umano kasama sa employment package ang accommodation expenses.

PATAY ang isang umano’y miyembro ng New People’s Army o NPA habang arestado naman ang apat na iba pa sa magkahiwalay na sagupaan sa Bukidnon.

Ayon kay Brig. Gen. Ferdinand Barandon, 403rd Brigade commander, nagka-bakbakan ang mga sundalo at mga rebelde sa Talakag at Valencia City.

Maliban sa mga nasawi at nahuli, kabilang ang dalawang menor de edad, nakasabat din ang militar ng anim na matataas na uri ng armas.

DALAWANG road sections ang sarado habang apat na iba pa ang nilimitahan ang public access dahil sa pananalasa ng bagyong Jolina sa ilang bahagi ng Luzon.

Ayon sa Department of Public Works and Highways o DPWH, binanggit sa report ng Bureau of Maintenance na sarado sa trapiko ang ilang kalsada sa Bongabon, Nueva Ecija at Ternate, Cavite dulot ng landslides.

Limitado rin ang access sa Nueva Ecija-Aurora Road at maging ang kalsada patungong Barangay Bicos sa bayan ng Rizal dahil sa napinsalang tulay.

Agad namang nagtalaga ng alternate routes ang DPWH habang nagsasagawa ito ng clearing operations.

NANGAKO ang Nueva Ecija Police Provincial Office na bibigyan nito ng hustisya ang pagkamatay ng dalawang pulis sa Barangay Magsaysay Sur, Cabanatuan City.

Ayon kay provincial police director Col. Rhoderick Campo, iniimbestigahan pa nila ang kaso ng pagpaslang sa mga biktimang sina Staff Sgts. Allan Capinpin at Aries Dichoso, kapwa nakatalaga sa Drug Enforcement Unit o DEU ng City Police Station.

Nasa loob ng kanilang bahay sina Capinpin at Dichoso nang pumasok ang dalawang killer at pinagbabaril ang mga ito.

Bago ang pamamaslang, ayon kay Campo, pinangunahan nina Capinpin at Dichoso ang isang buy bust operation na naging dahilan upang makumpiska ang higit anim na raang libong pisong halaga ng hinihinalang shabu sa Barangay Sangitan West.

SUMAMPA na sa mahigit 1.9M ang bilang ng mga gumaling sa COVID-19 sa Pilipinas.

Ito’y makaraang makapagtala ang Department of Health o DOH ng higit 16K recoveries sa nakalipas na 24 na oras.

Sa nasabing bilang, halos 186,000 na ang mga aktibong kaso.

Pero nagkaroon naman ng 26,303 na bagong impeksiyon kaya’t sumirit na sa higit 2.2M ang bilang ng mga tinamaan ng coronavirus sa bansa.

Halos 35,000 na ang death toll kasunod ng pagpanaw ng 79 na pasyente.

DINAGSA ng mga tao ang pag-arangkada ng voter registration sa mga mall sa Kamaynilaan kahapon.

Una rito, binuksan ng Commission on Elections o Comelec ang voter registration sa mga lugar na naka-modified enhanced community quarantine tulad ng National Capital Region o NCR.

Samantala, umarangkada rin ang pagpaparehistro sa mga mall kung saan kasama sa mga dinagsa ang isang mall sa lungsod ng Quezon.

DAAN-DAANG bakuna kontra COVID-19 ang nasira at maging ang mga bakuna para sa mga bata sa naganap na sunog sa ikalawang palapag ng municipal health office ng bayan ng San Nicolas sa Ilocos Norte.

Pahayag ng San Nicolas LGU, nasa mahigit 400 COVID-19 vaccines at bakuna ng mga bata ang napinsala sa insidente.

Hanggang ngayon ay wala pang detalye kung anong COVID-19 vaccine brand ito at kung ilang vials ang apektado ng sunog.

NAGPOSITIBO sa COVID-19 ang 18 kawani ng Marinduque Police.

Ito ang kinumpirma ni provincial police director Col. Wilson Santos matapos lumabas sa resulta ng RT-PCR test na positibo ang anim nilang miyembro habang 12 naman ang nagpositibo sa antigen test.

Sa kasalukuyan ay naka-isolate na ang 53 indidbiwal na na-expose sa mga nagpositibo.

Kumpiyansa naman si Santos na mapagtatagumpayan nila ang laban sa virus.

Nagbukas na ang Manila City Government ng registration para sa COVID-19 vaccination ng mga may edad 12 hanggang 17 na residente ng lungsod.

Subalit nilinaw ni Manila Mayor Isko Moreno na ang registration ay habang hinihintay nila ang go signal ng National Government kung uubra nang magpabakuna ang nasabing age group.

Una nang binuksan ng Pateros at Marikina ang online registration para sa mga menor de edad.