HEADLINES

Inaasahang sa April 2022 matatapos ang clinical trials sa Ivermectin bilang gamot sa COVID 19.

Gayunman, sinabi ni DOST Secretary Fortunato Dela Penia na maaaring lumabas ang resulta ng clinical trial sa Ivermectin sa Disyembre ngayong taon.

Ayon kay Dela Penia, walong buwan ang itatagal ng clinical trials sa Ivermectin na nagsimula nuong kalagitnaan ng Agosto at ito aniya ay mas maikling panahon lamang kumpara sa ibang clinical trials.

Naghahanda na ang pambansang pulisya at interior department para sa pilot implementation ng granular lockdown kasabay ng mga alert level system nito sa Metro Manila.

Ayon kay Interior Undersecretary Epimaco Densing III, may nabalangkas na silang guidelines na siya namang papaabrubahan sa Lunes.

Habang sa panig naman ng pambansang pulisya, inatasan na ni pnp Chief Guillermo Eleazar ang mga tauhan nito na makipag-ugnayan sa mga lokal na pamahalaan na kanilang kinaruruonan bago mag-Setyembre 16.

Pagtitiyak ng pamahalaan na maagang  aabisuhan ng mga awtoridad ang mga lugar na maaapektuhan ng granular lockdown para makapaghanda ang mga ito.

Samantala, habang umiiral ang two week pilot implementation sa Metro Manila, tanging isang alert level lamang ang ipatutupad.

Itinalaga ni Pangulong Rodrigo Duterte si dating PNP Chief Debold Sinas bilang Undersecretary ng Office of the President.

Ito ang kinumpirma ni Executive Secretary Salvador Medialdea pero hindi na tinukoy kung kailan nilagdaan ng Pangulo ang appointment paper ng dating heneral.

Magugunitang naging kontrobersyal ang pangalan ni Sinas nang magdaos ito ng Mañanita para sa kanyang birthday celebration noong nakaraang taon gayong ipinagbabawal ito sang-ayon sa mass gatherings kontra COVID-19.

Pumalo sa 6,575 na kabahayan sa CALABARZON, MIMAROPA at Regions 5, 6, at 8 dahil sa bagsik ni bagyong Jolina.

Habang sa pinakahuling datos ng NRRMC, lumalabas na tinatayang nasa 190,911,048 ang pinsala ng bagyong Jolina sa agrikultura sa MIMAROPA gayundin sa Regions 3, 5, 6 at 8.

Habang nasa 30,675,253 naman ang pinsala sa imprastraktura na naitala sa MIMAROPA at Regions 5 at 6.

Posibleng payagan na ng pamahalaan na makabili ng sarili bakuna kontra COVID-19 ang mga Local Government Units (LGUs) at pribadong sektor para hindi na pumasok ang mga ito sa multi party contracts.

Ito’y ayon kay Vaccine Czar Carlito Galvez Jr., dahil kanila nang babaguhin ang ipinatutupad na procurement strategy ng pamahalaan.

Ibig sabihin, oras na matuloy ito ay pwede nang dumiretso ang mga LGUs at pribadong sektor na bumili ng bakuna kahit wala nang multi party agreements.

Paliwanag pa ni Galvez, na ang pagbabago sa diskarte sa pagkuha ng bakuna ay posibleng magsimula sa reformulated boosters at fill authorization ng Pfizer at iba pang brands ng mga COVID-19 vaccines.

Nakaamba na namang tumaas muli ang presyo ng langis sa Martes, Setyembre 14.

Ayon sa mga source mula sa industriya, nasa 25 centavos hanggang 35 centavos kada litro ang magiging dagdag-presyo sa diesel habang 30 centavos hanggang 40 centavos naman kada litro sa gasolina.

Magkakaroon naman ng 10 centavos hanggang 20 centavos na price hike sa kada litro ng kerosene.

Sinasabing ito na ang ikatlong sunod na linggo ng dagdag sa presyo ng mga produktong petrolyo.

Nanawagan ang tatlong Arsobispo sa publiko na panatilihin ang pagtanggi at pagwaksi sa anila’y nakagisnan at kulturang pagpatay at pandarambong.

Ito ang kapwa binigyang diin nina Archbishop Marlo Peralta ng Nueva Segovia; Socrates Villegas ng Lingayen Dagupan; at ni Ricardo Baccay ng Tuguegarao sa pamamagitan ng kanilang pastoral letter hinggil sa umano’y walang katuturang pagpatay at pamumuno.

Giit ng mga ito kailan matitigil ang mga pagpatay sa iba’t ibang uri ng bagay tulad ng pamamayagpag ng COVID-19; umano’y walang paruruonang pamamahala, maging ang kagutuman.

Panawagan ng tatlong opisyal ng simbahanang katolika sa publiko, gawin ang nararapat at katanggap-tanggap na paraan para kontrahin ang mga ito.

Kabilang na ang pagpaparehistro ng mga kabataan at first time voters bagay na nakikitang pinakamainam na paraan para maging maayos ang mga namamahala sa ating bansa.

Suspendido pansamantala ang operasyon ng ilang consular office ng Department of Foreign Affairs (DFA) sa loob ng limang araw dahil sa COVID-19.

Sa isang pahayag, tinukoy ng DFA ito’y matapos na dapuan ng COVID-19 ang ilang mga tauhan nila sa NCR Central na nasa Robinsons Galleria maging sa Robinson Place sa Calasiao, Pangasinan.

Ibig sabihin, walang tigil operasyon muna mula bukas, Setyembre 13 hanggang 17.

Giit ng DFA na habang suspendido ang operasyon ng dalawang nabanggit na mga consular offices ay bibigyang daan nito ang ilang hakbang para mapuksa ang virus gaya ng disinfection sa mga gusali nito.

Gayunman, tiniyak ng DFA na sa mga may confirmed appointment sa nabanggit na petsa ay ma-rereschedule ang mga ito sa pinakamalapit na araw oras na magbalik sa normal ang kanilang operasyon.

IPINAUUBAYA na ni Pangulong Rodrigo Duterte sa mga medical professionals at sa kanilang mga pasyente ang desisyon kung gagamitin nito ang Ivermectin bilang panlaban o gamot kontra COVID-19.

Sa kanyang regular na Talk to the People, ipinaliwanag ng Pangulong Duterte na nais niyang ang mga doktor at ang mga tao na ang susugal sa bisa ng anti-parasitic drug laban sa impeksiyon.

Ayon sa Punong Ehekutibo, hindi niya rin naman maaaring balewalain ang ilang claims na epektibo ang Ivermectin laban sa coronavirus.

Matatandaang ilang beses nang nagbabala sa publiko ang Department of Health o DOH laban sa pag-inom ng Ivermectin kahit marami nang public officials at ilang senador ang umaming gumagamit sila ng naturang gamot.