HEADLINES

Tumanggap ang Pilipinas ng dagdag na 11.3 million dollars mula sa Estados Unidos bilang tulong sa COVID-19 response ng pamahalaan.

Sa abiso ng US embassy na ipinadaan sa Department of National Defense, ang nasabing dagdag tulong ay ibinigay ng US government sa pamamagitan ng US aid United States Agency for International Development.

Sinabi ng US embassy na ang nasabing pondo ay suporta ng Amerika sa patuloy na bakunahan sa Pilipinas at iba pang hakbangin para matukoy, tugunan at gamutin ang mga kaso ng COVID-19 sa bansa.

Una nang nagbigay ng 39 million dollars ang Amerika sa Pilipinas para sa COVID-19 response, simula nang maideklara ang pandemya noong isang taon.

Sa kasalukuyan ay nasa mahigit 6 milyong doses ng bakuna na  ang naibigay ng Amerika sa Pilipinas bukod pa sa tulong nito sa 44K healthcare workers at 800 ospital at klinika sa bansa sa pamamagitan ng mga gamot, PPEs, hygine kits at iba pa.—mula sa ulat ni Jaymark Dagala (Patrol 9)

Nag-sorry na si Presidential Spokesman Harry Roque sa dalawang doktor sa napagtaasan niya ng boses sa isang pulong ng IATF.

Ayon kay Roque, naging emotional lamang siya sa naging paggigiit ng ilang doktor na magpatupad muli ng hard lockdown sa gitna na rin nang patuloy na pagsirit ng kaso ng COVID-19.

Binigyang-diin ni Roque na maraming mawawalan ng trabaho at magugutom kapag nagpatupad muli ng lockdown.

Maaaring balansehin na lamang ang sitwasyon lalo pa’t halos kalahati ng mga taga-Metro Manila ay nabakunahan na.

Sinabi ni Roque na ang hindi niya pag-sang ayon ay hindi naman pagpapakita ng kawalang concern kundi nakikiusap sila sa lahat dahil ang mga desisyon ng gobyerno ay hindi lamang kapritso.

Pumapalo sa 808 kilos o katumbas ng P5.5-B na halaga ng shabu ang nasabat ng awtoridad sa loob lamang ng isang linggo.

Ipinagmalaki ito ng PNP matapos masabat ang 229 kilo ng shabu na nagkakahalaga ng mahigit P1.5-B sa magkasunod na operasyon sa Imus City at Bacoor sa Cavite.

Ayon kay PNP chief P/Gen. Guillermo Eleazar, ang mga nasabat na droga ay bahagi ng bigtime operation sa Zambales na sinundan pa sa Bataan noong Setyembre 7.

Dalawa ang napatay habang dalawa rin ang naaresto sa mga naturang operasyon kabilang na ang nasawing si Basher Bangon na may direktang kaugnayan sa international drug syndicate na nag-o-operate sa Visayas at Mindanao

Binigyang-diin ni Eleazar na ang operasyon ay patunay na hindi natitinag ang awtoridad para lagasin ang mga nasa likod ng kalakalan ng ilegal na droga sa bansa sa gitna ng COVID-19 pandemic.—sa ulat ni Jaymark Dagala (Patrol 9)

Pinaigting pa ng AFP ang kampanya nito kontra loose firearms habang papalapit na ang halalan.

Kasunod na rin ito nang matagumpay na pagkakasabat ng awtoridad sa matataas na kalibre ng armas at mga bala sa dalawang operasyon sa Quezon City at Sta. Maria, Bulacan noong Setyembre 8.

Sa pagsalakay sa isang bodega sa Quezon City, anim ang naaresto at nasabat din ang limang libong piraso ng mga bala at iba pang personal na kagamitan ng mga suspek.

Samantala, nasabat naman sa Sta. Maria, Bulacan ang iba’t ibang matataas na kalibre ng armas tulad ng reassembled caliber 5.56 rifle, iba’t ibang bala at mga armas na handa para sa re-assembly.

Ayon kay AFP chief of Staff Lt./Gen. Jose Faustino Jr., malaking bagay ang pagkakasabat sa mga nasabing armas para mapilay ang operasyon ng mga lokal na terorista tulad ng CPP-NPA-NDF gayundin ang iba pang private armed group sa bansa.–-mula sa ulat ni Jaymark Dagala (Patrol 9)

Hindi kasama sa 2022 budget ng COMELEC ang pondo para sa mga magsisilbi sa National Elections sa susunod na taon.

Ipinabatid ito ni COMELEC chairman Sheriff Abas sa pagdinig ng Kamara hinggil sa budget ng komisyon.

Dahil dito, muling umapela si ACT teachers party list representative France Castro na bigyan ng hazard pay ang mga tatayong  Board of Election Inspectors sa darating na eleksyon.

Iginiit din ni Castro ang pagbibigay ng service credits para sa mga BEI na ayon naman kay Abas ay inihihirit din ng pondo, bagama’t ang minimum na maibibigay nila ay 5 libong piso.

Nasabat ng mga awtoridad ang tinatayang P331-M na halaga ng hinihinalang shabu sa isang operasyon sa Imus City sa Cavite.

Natimbog din sa nasabing operasyon ang isang mag-asawa na nagsabing hindi nila alam na ang laman ng mga nakuhang kahon ay naglalaman ng illegal drugs.

Iniwan lamang anila sa kanila ang mga nasabing kahon ng dalawang contact nila mula sa isang vehicle rental service company.

Gayunman, sinabi ng PDEA na ang mag-asawa ay under surveillance na nila nitong mga nakalipas na buwan.

Umalma ang ilang kongresista sa pagtatalaga kay Lt. General Antonio Parlade, Jr. bilang Deputy Director General ng National Security Council.

Sinabi ni ACT teachers partylist representative France Castro na tiyak na mas marami pang indibidwal at grupo ang isasangkot sa insurgency dahil kilalang king of red taggers at terrorist taggers si Parlade.

Ayon pa kay Castro, magagamit din ang puwesto ni Parlade sa eleksyon para makapag tag pa ng mas maraming aktibista at mga kritiko ng administrasyong Duterte.

Kasabay nito, binatikos ni Castro ang nakasanayan na ng Pangulong Rodrigo Duterte sa pag-recycle at pag-reuse ng mga opisyal tulad ni Parlade na aniya’y mayroong bad track record.

Naniniwala ang mga kaalyado ni Davao City Mayor Sara Duterte-Carpio sa Hugpong Ng Pagbabago (HNP) na magbabago pa ang pasya nito bago ang itinakdang paghahain ng Certificate of Candicacy para sa 2022 National Elections.

Ayon kay Davao Occidental governor Claude Bautista, marami pa ang posibleng mangyari bago ang deadline ng filing ng COC.

Binigyang-diin ni Bautista na tanging si Mayor Sara lamang ang makakapagpatuloy ng mga nasimulan ng amang si Pangulong Rodrigo Duterte.

Samantala, ipinabatid naman ni Mayor Christina Frasco ng Liloan, Cebu at spokesperson ni Mayor Sara na posibleng tumakbo muling alkalde ang Presidential Daughter.

Iginiit ng CHED ang pagsasagawa ng face-to-face classes sa mga eskuwelahang mayroong health allied programs at iba pang kurso sa mga lugar na nasa MGCQ.

Sinabi ni CHED chairman Prospero De Vera na naghihintay rin sila ng pasya ng Pangulong Rodrigo Duterte matapos na iendorso ng IATF ang pagbabalik ng face-to-face classes ngayong pasukan.

Ayon kay De Vera, isinama nila sa mga kursong dapat magkaroon na rin ng face-to-face classes ang Engineering, Hospitality/Hotel and Restaurant Management, Tourism and Travel Management, Marine Engineering at Marine Transportation.

Kasabay nito, ipinabatid ni De Vera na mula Hulyo 2021, mahigit 13,000 estudyante na ang sumailalim sa limited classes habang nasa 1K faculty members ang nagsagawa ng limited classes sa halos 120 higher education institutions sa bansa.

Bumaba na 7 ang bilang ng mga nawawala bunsod ng pananalasa ng bagyong Jolina sa iba’t ibang panig ng bansa.

Ito’y ayon sa National Disaster Risk Reduction and Management Council o NDRRMC ay makaraang masagip na ang may 20 indibiduwal sa kasagsagan ng bagyo.

Ayon kay NDRRMC Spokesman Mark Timbal, kasama na sa mga nasagip ang 15 mangingisda sa Masbate gayundin ang 5 mangingisda sa Catbalogan, Samar.

Ngunit nilinaw ni Timbal na sa 7 nawawala, 4 dito ang kumpirmado habang nasa ilalim pa ng beripikasyon at validation ang 3 iba pa.

Nananatili naman sa 3 ang naitalang nasawi kung saan, 1 ang kumpirmado habang for validation pa ang 2 habang 16 naman ang kumpirmadong sugatan sa bagyo.

Nasa 28,444 pamilya o katumbas ng 109,680 indibiduwal naman ang apektado ng bagyong Jolina sa Central Luzon, CALABARZON, MIMAROPA, Bicol, Eastern at Western Visayas gayundin sa SOCCSKSARGEN at Metro Manila.—ulat mula kay Jaymark Dagala (Patrol 9)