HEADLINES

Bahagyang magdaragdag ng kanilang singil sa kuryente ang Manila Electric Company o MERALCO ngayong buwan.

Ayon sa MERALCO, 10 sentimos ang kanilang idaragrag sa generation charge sa bawat kilowatt hour.

Ito na ang ika-anim na sunod na buwang magpapatupad ng taas singil ang naturang power distributor

Gayunman, nilinaw ng MERALCO na suspendido pa rin ang kanilang disconnection sa mga hindi nakababayad ng bill sa tamang oras .

Ito’y hangga’t nakapailalim pa sa Modified Enhanced Community Quarantine o MECQ ang Metro Manila hanggang sa Setyembre 15.—ulat mula kay Jaymark Dagala (Patrol 9)

Mahigpit na rin ang ginagawang kampaniya ng Armed Forces of the Philippines o AFP kontra loose firearms sa bansa habang papalapit na ang halalan sa susunod na taon.

Ito’y matapos ang matagumpay na pagkakasabat ng mga operatiba ng Militar at Pulisya sa matataas na kalibre ng armas at mga bala sa dalawang operasyon sa Quezon City at Sta. Maria sa Bulacan nuong Setyembre  8.

Sa Quezon City, anim ang naaresto at nasabat din ang may 5,000 piraso ng mga bala gayundin ang iba pang personal na kagamitan ng mga suspek nang salakayin ang isang bodega sa lugar.

Habang nasabat din sa Bulacan ang iba’t ibang matataas na kalibre ng armas tulad ng reassembled na caliber 5.56 rifle, iba’t ibang bala at mga armas na handa para sa re-assembly.

Ayon kay AFP Chief of Staff Lt/Gen. Jose Faustino Jr, malaking bagay aniya ang pagkakasabat sa mga armas para mapilay ang operasyon ng mga lokal na terrorista tulad ng CPP-NPA-NDF gayundin ang iba pang private armed group sa bansa.—ulat mula kay Jaymark Dagala (Patrol 9)

Pinapurihan ng pamunuan ng Philippine National Police o PNP ang mga tauhan nito sa Sto. Niño Municipal Police Station sa lalawigan ng Leyte .

Ito’y matapos masagip ng pulisya ang humigit kumulang 50 mangingisda na inanod ng mga alon habang nasa karagatan sa kasagsagan ng pananalasa ng bagyong Jolina .

Ayon kay PNP Chief P/Gen. Guillermo Eleazar, hindi inalintana ng mga pulis ang kakulangan nila sa kagamitan, masagip lamang ang mga kababayang nangangailangan ng tulong.

Pero sa kabila ng pagkakasagip sa naturang mga mangingisda ay may apat na labi naman ang nakuha ng pulisya matapos malunod .

Nakipag ugnayan na ang pulisya sa pamilya ng mga nasawi at nasagip upang maiproseso na agad ang kanilang pagbabalik.—ulat mula kay (Jaymark Dagala (Patrol 9)

Patuloy na hinihikayat ng pamunuan ng Philippine National Police o PNP ang kanilang mga tauhan na magpabakuna na kontra COVID-19.

Ito’y makaraang i-ulat ng Administrative Support to COVID 19 Operations Task Force o ASCOTF na aabot sa 112,829 o kalahati ng mahigit 220,000 puwersa ng PNP ang bakunado na kontra sa virus.

Sinabi ni ASCOTF Commander at Deputy Chief PNP for Administration, P/LtG. Joselito Vera Cruz na nasa 95, 675 o 42.96 percent ang nabakunahan na ng first dose habang nasa 14,197 o 6.37 percent pa ng kanilang hanay ang hindi pa nababakunahan.

Batay sa pinakahuling COVID-19 update sa PNP, bumaba sa 168 ang naitalang bagong kaso ng virus kaya’t sumampa na ang kabuuan nito sa 36,715 kung saan ay 2,592 rito ang aktibong kaso.

Nakapagtala naman ang PNP ng 155 na bagong gumaling sa sakit kaya’t sumampa na sa 34, 015 ang total recoveries habang nananatili naman sa 108 ang bilang ng mga nasawi.—ulat mula kay Jaymark Dagala (Patrol 9)

Nagpasalamat si UN Resident Coordinator and Humanitarian Coordinator Gustavo Gonzales sa naging desisyon ng Pilipinas na tumanggap ng Afghan refugees.

Ayon kay Gonzales, ang hakbang na ito ay nagpapakita ng pakikiisa ng mga Pilipino.

Nitong Miyerkules nang i-anunsyo ni Foreign Affairs Secretary Teodoro Locsin na tumanggap na ang Pilipinas ng unang batch ng Afghan refugees kung saan kabilang dito ang mga kababaihan at mga bata.

Nangako naman ang UN ng tulong at suporta sa mga refugee na may mga kinakailangan pang requirements.

Matatandaang nitong Agosto ng kubkubin ng taliban ang Afghanistan ilang araw lamang matapos i-pull out ni US President Joe Biden ang libo-libong american troops sa nasabing bansa.—sa panulat ni Hyacinth Ludivico

Inihayag ng Puerto Princesa City Incident Management Team na hindi muna tatanggap ang lungsod ng mga returning resident hanggang Setyembre 15, 2021.

Ayon kay Puerto Princesa IMT Commander Dr. Dean Palanca, bunsod ito ng pagbawi ng Inter-Agency Task Force sa general community quarantine sa NCR.

Aniya, agad nilang inihinto ang pagtanggap ng returning residents matapos ianunsyo na balik MECQ ang Metro Manila.

Sinabi naman ni palanca na makakapasok pa rin sa lungsod ang mga returning Overseas Filipinos o ROFs at mga Authorized Persons Outside of Residence.—sa panulat ni Hyacinth Ludivico

Hindi natinag si Ombudsman Samuel Martires sa panawagang isapubliko na ang Statement Of Assets, Liabilities and Net Worth o SALN ni Pangulong Rodrigo Duterte.

Sa deliberasyon ng P3.97 bilyong Budget ng Office of the Ombudsman sa Kamara, binigyang-diin ni Martires ang mahigpit niyang pagtalima sa memorandum circular number 1 na inilabas noong Setyembre 2020.

Sa ilalim ng naturang kautusan, pinagbabawalan ang publiko na silipin ang SALN ng Pangulo at ilan pang government official habang may makukulong ang mga magko-komentaryo laban dito.

Ayon kay Martires, may mga kondisyon kung kailan ilalabas ang SALN ng isang partikular na government official pero kung hindi tumalima sa requirement ay hindi ito i-re-release.

Kabilang anya sa requirement ay kailangang may basbas ang request ng korte na may kaugnayan sa nakabinbing kaso.

Nanindigan din ang tanodbayan na hindi siya natatakot na ma-bash at kuyugin sa social media dahil hindi naman kasama sa kanyang job description ang opinyon ng publiko at handang magbitiw o mapatalsik sa pwesto bilang depensa sa memorandum circular.—sa panulat ni Drew Nacino

Aabot sa 200 kilo ng shabu na nagkakahalaga ng isa’t kalahating bilyong piso ang nasabat ng PNP at PDEA sa magkahiwalay na operasyon sa mga lungsod ng Bacoor at Imus, Cavite.

Napatay ng mga otoridad sa naturang operasyon ang dalawang lalaking hinihinalang may kaugnayan sa isang chinese drug syndicate sa Barangay Molino 3, Bacoor.

Daan-daang pakete ng shabu na tumitimbang ng 181 kilo at nagkakahalaga ng 1.2 bilyon ang nakumpiska mula sa naturang lugar.

Natiklo naman sa Bahaya ng Pag-asa Subdivision sa Barangay Magdalo, Imus ang mag-asawang edad 45 at 47 anyos.

Nasakote mula sa dalawa ang mahigit isang dosenang pakete ng shabu na nagkakahalaga ng P326 milyon.

Inilunsad ang operasyon dalawang araw matapos malambat ng PDEA ang nasa 580 kilos ng shabu na nagkakahalaga ng P3.9 bilyon sa magkahiwalay na operasyon sa Candelaria, Zambales.—sa panulat ni Drew Nacino

Pumanaw na ang isa sa mga opisyal ng Overseas Workers Welfare Administration o OWWA na sangkot umano sa kontrobersyal na pagbili ng ‘overpriced’ COVID-19 sanitary kits para sa mga OFW.

Tinukoy ni OWWA Administrator Hans Leo Cacdac ang yumaong si Deputy Administrator Faustino “Bubsie” Sabarez III.

Binawian anya ng buhay si Sabarez sa Manila Doctor’s Hospital noong Miyerkules ng gabi.

Hindi naman binanggit ni Cacdac ang dahilan ng pagkamatay ni Sabarez.

Ang yumaong OWWA official ang pinuno ng Enhanced Community Quarantine operations ng ahensya noong Hunyo 2020 na nag-utos na bumili ng mga COVID-19 hygiene kits kabilang ang mga sanitary napkin, PPE at pagkain na na-red flag ng Commission On Audit.—sa panulat ni Drew Nacino