HEADLINES

Pumanaw na ang isa sa mga opisyal ng Overseas Workers Welfare Administration o OWWA na sangkot umano sa kontrobersyal na pagbili ng ‘overpriced’ COVID-19 sanitary kits para sa mga OFW.

Tinukoy ni OWWA Administrator Hans Leo Cacdac ang yumaong si Deputy Administrator Faustino “Bubsie” Sabarez III.

Binawian anya ng buhay si Sabarez sa Manila Doctor’s Hospital noong Miyerkules ng gabi.

Hindi naman binanggit ni Cacdac ang dahilan ng pagkamatay ni Sabarez.

Ang yumaong OWWA official ang pinuno ng Enhanced Community Quarantine operations ng ahensya noong Hunyo 2020 na nag-utos na bumili ng mga COVID-19 hygiene kits kabilang ang mga sanitary napkin, PPE at pagkain na na-red flag ng Commission On Audit.—sa panulat ni Drew Nacino

Bahagyang humina ang bagyong Kiko habang nasa Silangan ng Southern Isabela.

Huling namataan ng PAGASA ang bagyo sa layong 280 kilometers, Silangan  Hilagang-Silangan ng bayan ng Casiguran, Aurora.

Taglay nito ang lakas na hanging aabot sa 185 kilometers per hour at pagbugso na hanggang 230 kilometers per hour.

Bumagal din ang kilos ng naturang sama ng panahon sa 20 kilometers per hour habang tinutumbok ang kanluran hilagang-kanlurang direksyon.

Samantala, itinaas na ang public storm signal number 3 sa dulong hilagang cagayan; signal number 2 sa  Batanes, Babuyan Islands, nalalabing bahagi ng Eastern portion ng Cagayan at Northeastern portion ng Isabela;

Signal number 1 naman sa nalalabing bahagi ng Cagayan, northeastern portion ng Ilocos Norte, Apayao, Northwestern at southeastern portion ng Isabela at northern portion ng Aurora. —sa panulat ni Drew Nacino

Lumiliit umano ang tsansa na makahakot ng suporta mula sa mga botante sa 2022 national at local elections ang ruling party na PDP-laban at oposisyon.

Ito ang paniniwala ni Political Analyst at Professor Edna Co, Dean ng UP National College of Public Administration and governance sa gitna ng kaliwa’t kanang paramdam ng mga kandidato, walong buwan bago ang halalan.

Ayon kay Co, ang kabiguan ng oposisyon na magkaisa laban sa Duterte administration at lumalalang hidwaan ng magkalabang paksyon sa PDP-Laban ang dahilan kaya’t maaaring mag-dalawang-isip ang mga botante.

May negatibo anyang impresyon sa mga botante ang banggaan ng paksyon nina Senator Manny Pacquiao at Energy Secretary Alfonso Cusi.

Gayunman, binigyang-diin ni Co na marami pa namang pwedeng magbago partikular ang pananaw ng mga botante. —sa panulat ni Drew Nacino

Ilang mataas na opisyal ng Philhealth Central at Regional Offices at 18 ospital ang  kinasuhan ng NBI – Dagupan kaugnay sa iregularidad umano sa paggamit ng COVID-19 advances.

Kabilang sa kinasuhan ng NBI – Dagupan District Office sa Ombudsman sina dating Philhealth President Ricardo Morales at dating Regional Vice President Alberto Manduriao.

Dawit din ang Healthcare Delivery Management Division Chief, dati at kasalukuyang fiscal controller head ng fund management section at Senior Social Insurance Officer at iba pang Regional Officer.

Ilan naman sa mga ospital na inireklamo ang Balaoan District Hospital, Candon St. Martin De Porres Hospital, Ilocos Sur District Hospital-Magsingal, La Union Medical Center at Pangasinan Doctors Hospital.

Kasong paglabag sa national health insurance act of 2013, anti-graft and corrupt practices act; grave misconduct, gross dishonesty, gross negligence at conduct prejudicial to best interest of service ang kahaharapin Nina Morales.—sa panulat ni Drew Nacino

Napag-alaman ng NBI na nag-apply ng COVID-19 reimbursements sa ilalim ng interim reimbursement mechanism ang mga naturang ospital noon pang 2018, dalawang taon bago nagsimula ang pandemya.

Kabilang ang Alkalde ng bayan ng Igbaras sa 37 bagong tinamaan ng COVID-19 sa lalawigan ng Iloilo.

Sa isang social media post, sinabi ni Igbaras Mayor Jaime Esmeralda na hindi muna niya magagampanan ang kanyang tungkulin dahil sa kanyang sitwasyon.

Mula pa noong nakaraang linggo ay naka-home quarantine na ang Alkalde dahil sa nararanasan nitong mild symptoms.

Sa ngayon ay si Vice Mayor Vicente Esorpion Jr. ang magsisislbing acting mayor hanggang sa siya’y makarekober na sa sakit.

Kabilang rin sa mga nagpositibo sa virus ang dalawang town councilors, walong tauhan ng Igbaras rural health unit, at iba pang mula iba’t ibang departamento.

Isinara naman ang Igbaras Municipal hall para sa disinfection.—sa panulat ni Hyacinth Ludivico

Pagtutuunan ng pamahalaan ang pagpapabakuna sa mga guro at school personnel upang muling maisagawa ang face to face classes.

Sinabi ni IATF Chief Implementer Sec. Carlito Galvez Jr., na napag-usapan nila ito kasama ang Department of Education o Deped at Commission on Higher Education o CHED upang makakabuo ng tinatawag na ring immunity para sa mga mag-aaral na papasok sa paaralan.

Aniya, planong simulan ang pagbabakuna sa mga guro bago matapos ang Setyembre o sa susunod na buwan.

Tiwala naman si Galvez na muling maisasagawa ang in-person classes sa bansa.

Una nang sinabi ng Malacañang na bukas na si Pangulong Rodrigo Duterte sa posibilidad na pagdaraos ng face-to-face classes sa mga lugar na mababa ang kaso ng COVID-19.—sa panulat ni Hyacinth Ludivico

Hinimok ng ilang mambabatas ang Commission on Elections o  COMELEC na maglabas ng guidelines para sa pagdaraos ng campaign rallies at door to door campaign sa 2022 national at local elections.

Iginiit nina Iloilo Rep. Lorenz Defensor at Caloocan City Rep. Edgar Erice na hindi dapat basta ipaubaya sa LGU’s ang paggawa ng sistema para sa campaign rallies dahil baka magamit lang din ng mga incumbent official na tatakbo sa 2022 elections ang mga ilalabas nilang ordinansa para sa kanilang sariling interes.

Ayon pa kay Defensor, dapat ding ipagbawal ang intermissions at entertainment personalities sa campaign rallies.

Sinabi naman ni COMELEC Commissioner Antonio Kho Jr., na ibabatay ng poll body ang kanilang guidelines sa polisiya ng IATF.—sa panulat ni Hyacinth Ludivico

Apat na lungsod sa Metro Manila ang malapit na sa downward trend ng COVID-19 cases.

Sinabi ni OCTA Research Fellow Dr. Guido David na kabilang dito ang Navotas City, Las Piñas City, Malabon City at Pasay.

Aniya, malapit na sa 1 ang reproduction number ng mga nasabing lungsod na nangangahulugan na pababa na ang mga kaso.

Nakapagtala rin ang mga nabanggit na lungsod ng negative one-week growth rate.

Paalala pa ng OCTA, maaaring pang magbago ang mga trend kung kaya’t kailangang mapanatili ng mga lgu ang kanilang pagsisikap upang hindi na tumaas ang mga kaso ng COVID-19.—sa panulat ni Hyacinth Ludivico

Kabilang ang 111 mga bata sa 143 na nagpositibo sa COVID-19 sa Gentle hands Orphanage sa Quezon City.

Ayon kay Mayor Joy Belmonte, 168 katao ang nanunuluyan sa bahay-ampunan.

Una nang sinabi ng Alkalde na 122 indibidwal ang nagpositibo sa virus, kabilang ang 99 na mga bata.

Sa nasabing bilang ng mga batang tinamaan ng COVID-19, 51 dito ay edad dalawa hanggang 10 taong gulang, at 48 naman ay edad 11 hanggang 18-anyos, habang ang 23 katao naman ay mga adult.

Kaugnay nito, nagpadala na ang lokal na pamahalaan ng mga gamot, vitamins, hygiene kits, face masks, alcohol, at food packs sa gentlehands orphanage.

Inatasan rin ni Belmonte ang City Epidemiology and Surveillance o CESU na i-monitor ang kalagayan ng mga pasyente.—sa panulat ni Hyacinth Ludivico

Nakapagtala rin ng “breakthrough infections” o pagkakasakit ng COVID-19 ng mga fully vaccinated sa Pilipinas.

Batay sa datos ng Food and Drug Administration, aabot sa 242 na fully vaccinated ang nagkasakit pa rin kabilang ang limang namatay.

Sa kabuuang bilang, 180 ang binakunahan ng Sinovac kung saan apat ang nasawi, 47 na fully vaccinated ng Astrazeneca ang tinamaan din ng COVID, 4 sa mga nabigyan ng Pfizer vaccine habang 11 sa Janssen kung saan isa ang namatay.

Nilinaw naman ni FDA Director-General Eric Domingo na napakaliit pa rin ng mga nasabing bilang kumpara sa kabuuang dami ng mga binakunahan.

Hindi rin anya kataka-takang Sinovac at Astrazeneca ang may pinakamaraming breakthrough cases dahil ang dalawang vaccine ang mga unang ginamit sa bansa na itinurok sa mas maraming tao.

Karamihan din sa mga naitalang kaso ay 18 hanggang 44 anyos at pagdating sa breakthrough mortalities, pawang senior citizens ang tinamaan dahil ang mga ito ang may mas malaking tsansang magkaroon ng severe COVID-19.—sa panulat ni Drew Nacino