HEADLINES

Nakapagtala rin ng “breakthrough infections” o pagkakasakit ng COVID-19 ng mga fully vaccinated sa Pilipinas.

Batay sa datos ng Food and Drug Administration, aabot sa 242 na fully vaccinated ang nagkasakit pa rin kabilang ang limang namatay.

Sa kabuuang bilang, 180 ang binakunahan ng Sinovac kung saan apat ang nasawi, 47 na fully vaccinated ng Astrazeneca ang tinamaan din ng COVID, 4 sa mga nabigyan ng Pfizer vaccine habang 11 sa Janssen kung saan isa ang namatay.

Nilinaw naman ni FDA Director-General Eric Domingo na napakaliit pa rin ng mga nasabing bilang kumpara sa kabuuang dami ng mga binakunahan.

Hindi rin anya kataka-takang Sinovac at Astrazeneca ang may pinakamaraming breakthrough cases dahil ang dalawang vaccine ang mga unang ginamit sa bansa na itinurok sa mas maraming tao.

Karamihan din sa mga naitalang kaso ay 18 hanggang 44 anyos at pagdating sa breakthrough mortalities, pawang senior citizens ang tinamaan dahil ang mga ito ang may mas malaking tsansang magkaroon ng severe COVID-19.—sa panulat ni Drew Nacino

Bahagyang bumaba sa 75% ang occupancy rate ng Intensive Care Unit beds para sa COVID-19 patients sa bansa.

Batay sa datos ng Department Of Health, 75%  ng 4,100 ICU beds ang okupado sa buong bansa habang 73%  ng 1,400 ICU beds ang kasalukuyang ginagamit sa NCR.

Gayunman, nananatili sa “high risk” ang occupancy rate ng mga ICU bed maging ang mga ward bed sa buong bansa at Metro Manila.

Nasa 72% ng 15,500 ward beds sa bansa ang okupado habang 73% ng 4,400 ward beds sa NCR ang okupado na rin.

Samantala, 58% naman ng 3,300 mechanical ventilators sa bansa ang ginagamit habang 62% ng 1,200 mechanical ventilators sa Metro Manila ang occupied.—sa panulat ni Drew Nacino

Umabot na sa 4,077 ang aktibong kaso ng COVID-19 sa Bataan.

Sa pinakahuling datos na inilabas ng bataan Provincial Health Office, 18 ang nadagdag sa bilang ng mga nasawi sa nasabing sakit, kung saan ito ang pinakamataas na naitalang bilang ng COVID-19 related death sa isang araw.

Ang mga nasawi ay may edad 33 hanggang 89-taong gulang mula sa mga munisipalidad ng Hermosa, Samal, Abucay, Limay, Orani, Orion, Dinalupihan at Balanga City.

Kinumpirma rin ng mga doktor na karamihan sa mga nasawi ay hindi pa nababakunahan laban sa virus.

Dahil sa pagtaas ng mga kaso ng COVID-19, apat na ospital sa lalawigan ang nasa full capacity—sa panulat ni Hyacinth Ludivico

Ipinanawagan na ng 17 Alkalde sa Metro Manila sa national government ang mas maluwag na COVID-19 restrictions para sa mga fully vaccinated individual sa National Capital Region.

Sa resolution 21-19 ng MMDA, hinimok ng Metro Manila Council ang Inter-Agency Task Force na ikunsidera ang kanilang hiling upang manumbalik ang takbo ng ekonomiya.

Kinatigan naman ni Presidential Adviser for entrepreneurship Joey Concepcion ang panawagan ng Metro Mayors.

Ang hirit anya ng mga Alkalde ay alinsunod sa bakuna bubble model na kaniyang isinusulong para sa mga fully vaccinated.

Ipinunto ni Concepcion na sa ayaw at gusto natin ay dapat tayong matutong mamuhay sa kabila ng presensya ng COVID-19 dahil maaaring magtagal ito sa mga susunod pang panahon. —sa panulat ni Drew Nacino

Nasakote ng mga otoridad sa isang buy-bust operation ang isang kawani ng pamahalaan sa bayan ng Inopacan, Leyte.

Kinilala ng Philippine Drug Enforcement Agency ang suspek na si Leo Mejia, 48 anyos.

Nakumpiska kay Mejia ang shabu na nagkakahalaga ng P20,400

Nahaharap naman ang suspek sa kasong paglabag sa Comprehensive Dangerous Drugs Act of 2002 at kasalukuyang nakapiit sa custodial facility ng PDEA sa Palo, Leyte.—sa panulat ni Drew Nacino

Itinanggi ng Gentle Hands Orphanage sa Barangay Bagumbuhay, Quezon City na may asymptomatic COVID-19 patient ang bumisita sa kanilang pasilidad kaya’t nahawaan ang mahigit 100 indibiwal.

Nilinaw ni gentle hands Incorporated Executive Director Charity Graff na matagal na silang hindi tumatanggap ng bisita lalo’t may mga bata ang madaling dapuan ng sakit o immuno-compromised.

Habang 99 na bata ang kabilang sa mga nagpositibo habang patuloy nilang inaalam kung saan nanggaling ang virus.

Tiniyak naman ni Graff na walang bata ang nakararanas ng respiratory distress o seryosong problema sa baga.—sa panulat ni Drew Nacino

Posibleng sa katapusan ng taon o sa unang bahagi na ng 2022 mag-apply ng product registration sa Food and Drug Administration (FDA) ang mga COVID-19 vaccine manufacturer.

Ayon kay FDA Director Eric Domingo, sa mga nasabing panahon ay maaaring sapat na ang mga datos ng karamihan sa mga bakunang ginagamit ngayon.

Ipinaliwanag ni Domingo na mas mahabang clinical trial ang kailangan ng mga manufacturer kung mag-a-apply ng marketing authorization.

Minimum na anya ang isang taon na datos para sa bakuna upang makakuha ng otorisasyon.

Sa oras na aprubahan ang product registrations, maaari nang simulan ng mga manufacturer ang pagbebenta ng mga COVID-19 sa mga pharmacy at ospital.—sa panulat ni Drew Nacino

Sumampa na sa P300 milyon ang halaga ng pinsalang dulot ng bagyong Jolina sa mga pananim.

Ayon sa Department of Agriculture, mahigit 57K  ektaryang lupain ang apektado sa Calabarzon, Bicol Region, Western at Eastern Visayas.

Nasa 16,155 metric tons ng pananim ang napinsala at mahigit 62 thousand na magsasaka at mangingisda ang naapektuhan.

Kabilang sa mga napinsala ang mga tanim na palay, mais, high value crops maging ang livestock at fisheries.—sa panulat ni Drew Nacino

Ilulunsad na ng Commission on Elections (COMELEC)  ang nationwide synchronized mall registration day bukas o 21 araw bago ang deadline ng voter registration para sa may 2022 national at local polls.

Sa NCR  na nasa ilalim ng Modified Enhanced Community Quarantine, maaaring tumanggap ang Election Officers (OEO) ng aplikante sa piling malls ng Robinsons, Ayala at SM hanggang ala-5 ng hapon.

Ayon kay Comelec Commissioner Aimee Ferolino, bukod sa kaginhawaan, nais din nilang matiyak ang kaligtasan at seguridad ng publiko lalo sa mga huling araw ng pagpaparehistro.

Lahat anya ng schedule ng mall registration ngayong buwan ay nakapaskil sa kanilang official website at social media  accounts  maging sa bulletin board ng District, City o Municipal Halls at mga OEO .—sa panulat ni Drew Nacino

Hindi naiiwan ang Pilipinas sa iba pang bansa pagdating sa pagbabakuna laban sa COVID-19.

Ito ang pinanindigan ni Vaccine Czar, Secretary Carlito Galvez sa gitna ng batikos ng ilang kritiko na mababa ang vaccination rate ng bansa.

Ayon kay Galvez, sa katunayan ay nasa 21^st ang ranking ng pilipinas mula sa dalawandaan apat na bansa.

Sa datos kahapon, umabot na sa 37,176,513 ang naiturok na bakuna.

Nasa 21,338,714 na ang tumanggap ng first dose habang 15,836, 799 ang nakatanggap na ng 2nd dose o fully vaccinated.

Kumpiyansa naman si Galvez na maaabot ng NCR, Central Luzon, Calabarzon, Metro Cebu, Metro Davao, Iloilo at Cagayan De Oro cities maging ng iba pang high risk area ang 70% fully-vaccinated population sa Oktubre.—sa panulat ni Drew Nacino