HEADLINES

Handang dumalo sa Senate inquiry hinggil sa overpriced umanong pandemic supplies si dating Presidential Economic Adviser Michael Yang.

Kinumpirma ni Atty. Raymond Fortun, Legal Counsel ni Yang, na kasalukuyang nasa bansa ang kanyang kliyente na dadalo sa pamamagitan virtual conference, simula ngayong araw.

Humiling naman si Fortun ng interpreter para sa negosyante dahil hirap itong magsalita ng ingles at tagalog.

Nito lamang Martes ay nag-issue ng warrant of arrest ang Senate Blue Ribbon Committee laban kay Yang at sa limang opisyal ng pharmally pharmaceuticals dahil sa kabiguang dumalo sa imbestigasyon.—sa panulat ni Drew Nacino

Pagbabawalang lumabas ng bahay ang mga health worker at Authorized Personnel Outside of Residences kung saklaw ng granular lockdown ang kanilang mga lugar.

Ito ang nilinaw ni Interior Undersecretary Martin Diño sa gitna ng ikinakasang granular lockdowns sa Metro Manila.

Ayon kay Diño, isang kalsada o lugar lamang na may COVID-19 cases ang isasailalim sa quarantine.

Hindi rin anya papapasukin ang delivery services at hanggang checkpoint lamang ang mga ito habang tanging barangay personnel ang magdadala ng kanilang i-de-delivery sa recipient.

Samantala, tiniyak naman ng DILG official na magkakaroon ng ayuda ang mga residenteng maaapektuhan.—sa panulat ni Drew Nacino

Aabot sa 5,132 cases ang idinagdag ng Department Of Health sa kanilang Setyembre 8 COVID-19 tally.

Ayon sa DOH, nagkaroon ng technical issues kaya’t hindi napabilang sa report noong Miyerkules ang mahigit P5K additional daily cases.

Dahil dito, sumampa sa 17,883 ang daily COVID-19 cases noong Setyembre 8 sa halip na 12,751.

Nasa 20,192 naman ang gumaling noong Miyerkules makaraang madagdag ang 41 recoveries.

Katuwang ng DOH sa pagresolba sa nasabing issue ang Department of Information and Communications Technology  (DICT) sa pamamagitan ng kanilang COVID kaya data system.—sa panulat ni Drew Nacino

Muling nakapagtala ang Department Of Health ng all-time high na daily COVID-19 cases na 22,820.

Batay ito sa naantalang case bulletin ng DOH na inilabas dakong alas-8 kagabi sa halip na alas-4 nang hapon na karaniwang oras ng pagsasapubliko ng bilang ng nagkakasakit.

Dahil dito, lumobo na sa 2,161, 892 ang total COVID-19 cases sa bansa simula nang pumutok ang pandemya, noong isang taon.

Nadagdagan naman ng 12,337 ang gumaling dahilan para umabot na sa 1,960,487 ang total recoveries.

Samantala, nasa 61 ang nadagdag sa mga pumanaw kaya’t sumirit na sa kabuuang 34,733 ang death toll.

Aabot na sa 166,672 ang aktibong kaso ng COVID-19 sa bansa.—sa panulat ni Drew Nacino

Nakalabas na ng Philippine Area of Responsibilty o PAR ang bagyong Jolina bandang 6:15 ng gabi ng Huwebes.

Huli itong namataan sa layong 650 km sa kanluran ng Dagupan City.

Dala nito ang hangin na aabot sa 95 kph malapit sa gitna at bugso na aabot sa 115 kph.

Kumikilos naman ito sa bilis na 30 kph.

Wala naman ng nakataas na ano mang tropical cyclone wind signal sa ating bansa dahil kay Jolina.—sa panulat ni Rex Espiritu

Higit sa 200 tolenada ng isda ang nakawala matapos mawasak ang mga kulungan nito sa kasagsagan ng pagbayo ng bagyong si Jolina sa Lipa City, Batangas.

Sa unang pagtataya ng mga mangingisda, aabot sa higit 30 fish cages ng tilapia at bangus ang nasira dahil sa epekto ng bagyo.

Ayon kay Robert Martinez ng kilusan ng mga maliliit na mangingisda ng lawa ng Taal, dahil sa lakas ng hangin at malalaking alon kaya nasira ang mga ito.

Dahil dito, walang makuhang isda ang Metro Manila sa lalawigan ng batanggas kaya’t sa Pampanga muna humango ng tilapia ang Muñoz market at Kamuning market sa Quezon City.

Pumalo rin sa P20 hanggang P50 ang itinaas ng mga isda ayon sa mga tindero nito.

Nililikom pa ng Department of Agriculture o DA ang datos sa halaga at lawak ng pinsala ng bagyo sa mga palaisdaan ng Batangas at Cavite.—sa panulat ni Rex Espiritu

Dismayado ang ilang may-ari ng negosyo sa biglang pagkambyo ng pamahalaan sa pagpapatupad ng General Community Quarantine o GCQ.

Ayon kay Inchang Mendoza may-ari ng apektadong negosyo, hindi nila malaman kung ano ba talaga ang plano ng pamahalaan.

Nakapag-order na kasi siya ng mga ititinda niya na nagkakahalaga ng P300K.

Umaasa naman na prank lang ang anunsyong ito ng pamahalaan ang isa sa staff ni Mendoza na bumiyahe pa mula Cavite para makapasok.

Samantala, umasa din ang Employer’s Confederation of the Philippines na mapaplantya pa ang quarantine classification kahit pa naiintindihan nila na kailangan na ipatupad ito.

Setyembre 7 nang sabihin ng malakanyang na mananatili sa MECQ ang Metro Manila hanggang sa Setyembre 15 mula sa dating unang inanunsyo sa GCQ with alert level system na aarangkada sana nitong Setyembre 8.—sa panulat ni Rex Espiritu

Aabot sa dalawa ang nasawi sa Marinduque matapos na tangayin ng rumaragasang baha at malakas na current ng ilog dahil sa bagyong Jolina.

Ayon sa MIMAROPA Police Regional Office, isang mangingisda ang namatay sa bayan ng Buenavista.

Nakuhanan nanam ng video ang tangkang pagtawid sa ilog ng isang 65 years old na lalaki habang nanonood naman sa pampang ang mga kaanak nito.

Pinalalahahan pa ng mga kaanak nito na huwag nang tumawid sa ilog pero tinangay na ito ng agos habang nakawak sa tuyong sanga ng puno.

Natagpuan naman ang katawan nito ilang metro lang sa kaparehong ilog nitong Martes.—sa panulat ni Rex Espiritu

Inanunsyo ng Paranaque LGU nitong Huwebes ang pagbabawal sa pagbili ng alcoholic drinks hanggang Setyembre 30 sa nasabing lungsod.

Ayon sa social media post ng LGU, ang pagbebenta ng nakalalasing na inumin ay maari lang mula alas -10 ng umaga hanggang alas-6 ng gabi.

Pero, ang pagseserve nito ay mananatiling bawal sa lahat ng mga establisimyento sa lugar.—sa panulat ni Rex Espiritu