HEADLINES

Daan-daang Pastor at simbahan mula sa iba’t ibang bahagi ng bansa ang nagsanib-pwersa upang ipanawagan ang pagtakbo sa pagkaPangulo ni dating House Speaker Alan Peter Cayetano.

Sa kanilang liham kay Cayetano, 558 Pastor kasama ang halos 1600 nilang miyembro ang humikayat sa Kongresista mula sa unang distrito ng Taguig-Pateros na ikunsidera ang kanilang panawagan.

Si Cayetano anila ang nakikita nilang leader na may kakayahang pagkaisahin ang mga Pilipino na manalig sa kapangyarihan at pananampalataya sa gitna ng iba’t ibang krisis.

Ayon kay Pastor Raul Limpiado ng Catarman Temple of Praise International sa Northern Samar, kailangan ng bansa ng isang lider na may takot sa Diyos at gagawin ang kanyang kalooban lalo na ngayong balot ang mundo ng krisis.

Una nang inihayag ni Cayetano ang pagnanais niyang magsulong ng isang faith-based, values-oriented at bible-centered leadership sa paparating na halalan.—sa panulat ni Drew Nacino

Opisyal nang idineklara ni Senador Manny Pacquiao ang kanyang pagtakbo sa pagka-Pangulo sa 2022 national elections.

Ito’y makaraang tanggapin ni Pacquiao ang nominasyon ng partido Demokratiko Pilipino – Lakas ng Bayan o PDP-Laban.

Nagkaisa ang mga miyembro ng PDP-Laban Pacquiao faction kasama na ang mga regional representatives ng partido sa kanilang National Assembly na isinagawa kahapon.

Sa kaniyang talumpati, ibinahagini Pacman ang dinanas na kahirapan bilang tugon sa mga tanong kung ano ang kanyang magagawa o ma-i-aambag sa bayan.

Binalaan din ng pambansang kamao ang mga kurakot sa gobyerno at nanawagan ng suporta sa publiko.

Samantala, nanindigan si Party Chairperson at Senador Koko Pimentel na anumang mangyari, ang people’s champ ang pambato ng tunay na PDP-Laban.—sa panulat ni Drew Nacino

Maaaring palawigin ng dalawa pang linggo ang alert level 4 sa Metro Manila na magtatapos sa Setyembre 30.

Ayon kay National Task Force against COVID-19 Spokesman Restituto Padilla, naka-depende ang magiging desisyon ng gobyerno sa resulta ng COVID-19 infection rate o kung kaunti o marami pa rin ang nagkakasakit.

Hindi pa anya nila masabi ang magiging pasya wala pa naman nakikitang resulta o epekto na posibleng maramdaman sa unang linggo ng Oktubre.

I-a-assess naman ang pagpapatupad ng COVID-19 alert level 4 sa NCR  matapos ang unang linggo ng pilot implementation nito. —sa panulat ni Drew Nacino

Nilinaw ng Pateros local government na hindi sapilitan ang paglalagay ng dilaw na laso sa bahay ng mga COVID-19 positive.

Una nang binatikos partikular ng mga netizen ang naunang kautusan dahil isa umano itong uri ng diskriminasyon.

Ayon kay Pateros Mayor Ike Ponce, nakadepende na lamang sa residente kung gusto nilang magpalagay ng yellow ribbon.

Ito’y upang epektibong makapagpadala ng tulong at bilang bahagi ng pagpapatupad ng granular lockdown.

Setyembre a-kinse nang i-anunsyo ni Ponce ang paglalagay ng dilaw na laso sa gate o labas ng bahay ng mga kumpirmadong positibo sa COVID-19 upang mas madali umanong malaman.—sa panulat ni Drew Nacino

Kinwestiyon ni VP Leni Robredo ang pagpapagamit ng pamahalaanng faceshield laban sa COVID-19.

Ayon kay Robredo, mas mahalagang gamitin nalang ang pondo sa pagbili ng mga gamot laban sa COVID-19 sa halip na mga face shields.

Nabatid na tanging ang Pilipinas lamang sa mga bansa ang nag-oobliga sa paggamit ng faceshield.—sa panulat ni Drew Nacino

Inirekomenda ni Presidential Adviser for Entrepreneurship Joey Concepcion sa IATF na itaas sa 50% ang capacity sa mga dine-in at personal care services para sa mga bakunado sa huling bahagi ng taon.

Ito, ayon kay Concepcion, ay dahil hindi sapat ang kikitain ng mga establisyimento na kung mananatili lamang sa 10% ang operating capacity.

Dapat lamang anyang tiyakin na maglagay pa ng mas maayos na bentilasyon ang mga business establishment tulad ng mga restaurant upang mas maiwasan ang hawaan ng COVID-19.

Sa ilalim ng kasalukuyang quarantine restriction, 10% lamang ang pinapayagan na kapasidad para sa dine-in ng mga bakunado at 30% maximum capacity sa outdoor o al fresco dining para sa bakunado o hindi bakunado.—sa panulat ni Drew Nacino

Pinayuhan ng Department Of Health (DOH) ang Commission on Elections na pag-isipang maigi ang pagpayag na makaboto nang personal ang mga nagpositibo sa COVID-19 dahil maaaring magkaraoon ng hawaan.

Ayon kay Health Undersecretary Maria Rosario Vergeire, batid naman ng lahat na maaaring makahawa ng ibang tao ang isang COVID-19 positive patient.

Umaasa si Vergeire na makapag-iisip ng ibang paraan ang COMELEC upang maisagawa ang pagboto ng mga pasyenteng may covid nang hindi makahahawa ng iba.

Isa anyang paraan na maaaring ikonsidera ang pagboto sa pamamagitan ng text messages o iba pang pamamaraan na gagamitan ng electronics.

Una nang inihayag ng COMELEC na magtatayo sila ng polling centers sa mga isolation center upang makaboto pa rin ang mga COVID positive na nakararanas lamang ng mild na sintomas o asymptomatic.—sa panulat ni Drew Nacino

Mananatiling naka-high alert status ang Bureau of Immigration para sa posibleng pagpasok ng mga terorista mula sa ibang bansa.

Ayon kay Immigration Commissioner Jaime Morente, nakaalerto ang mga tauhanng international airports at seaports nationwide upang mapigilan ang mga dayuhang terorista na makapasok sa bansa.

Sa ngayon, mahigpit na nag iingat ang mga immigration officers sa pagpayag na makapasok ang mga foreign nationals na may kaduda-dudang pagkilos.

Ang sino mang mabibigong magpaliwanag sa kanilang layunin sa pagpunta sa bansa ay posibleng pabalikin at muling i-book sa first available flight pabalik sa kanilang pinagmulang bansa.—sa panulat ni Angelica Doctolero

Aminado ang Department Of Health (DOH) na umabot na sa 10k doses ng COVID-19 vaccine ang nasayang simula noong lumarga ang vaccination sa Pilipinas.

Ayon kay DOH Undersecretary Myrna Cabotaje, isa sa pangunahing dahilan umano ay ang ‘temperature excursion’ o pagkatunaw ng mga bakuna matapos ilagak ng matagal sa freezer.

Mayroon rin anyang pagkakataon na nawalan ng kuryente at hindi agad naisaksak ang freezer nang bumalik na ang suplay nito habang sa ibang lugar ay nabasag, walang label o may mga nahulog.

Sa kabila nito, tiniyak ni Cabotaje na maituturing na maliit na bahagi lamang ito ng mahigit 40 milyon doses na naiturok.——sa panulat ni Drew Nacino