Inaprubahan na ng mga expert panel ang pagbabakuna sa edad 12 hanggang 17 taong gulang.
Ayon kay Health Undersecretary Myrna Cabotaje, patuloy pang tinutukoy ang pinaka mainam na araw kung kailan magsisimula ang pagbabakuna.
Aniya, prayoridad ng Department Of Health ang mga batang may comorbidities.
Sa ngayon, inaayos pa ang policy at guidelines kung kailan uumpisahan ang pagbabakuna.—sa panulat ni Angelica Doctolero
Nakarating na sa bansa ang karagdang doses ng bakuna mula sa ibang bansa.
Aabot sa tatlong milyong doses ng mga bagong batch ng Sinovac vaccine ang dumating sa Ninoy Aquino International Airport terminal 2 alas-6 kahapon ng hapon.
Ayon kay Vaccine Czar Sec. Carlito Galvez, Jr., inaasahan ng pamahalaan na aabot sa 34 milyon doses ng COVID-19 vaccines mula sa ibat-ibang manufacturers ang dadating ngayong buwan.
Sa ngayon nasa 58 milyon doses na ng bakuna ang natanggap ng bansa ngayong buwan ng Setyembre.—sa panulat ni Angelica Doctolero
Muling magpapatupad ng taas-singil sa presyo ang ilang kumpaniya ng langis na sisimulan sa Martes, Setyembre 21,2021.
Ayon sa ilang industriya ng langis, ito na ang ika-apat na sunod-sunod na pagtaas sa naturang produkto.
Aabot kasi sa P0.80 hanggang P0.90 ang kada litro ng gasolina habang tataas naman sa P0.75 hanggang P0.85 ang presyo ng diesel at kerosene.—sa panulat ni Angelica Doctolero
Pinadapa ng Magnolia ang San Miguel Beer sa score na 100-90 sa 2021 PBA Philippine Cup sa Bacolor, Pampanga.
Si Paul Lee ang nanguna sa Hotshots matapos kumamada ng 32 points.
Sa isa pang laro, wagi naman ang NorthPort laban sa Rain or Shine sa score na 91-88 sa overtime ng kanilang laro sa katulad na venue.
Sa pagkakataong ito, si Greg Slaughter ang bumuhat sa Batang Pier sa pamamagitan ng kanyang 25 points, 11 rebounds, at six blocks.
Napatay ng security forces ang umano’y hardline leader ng isang grupong may kaugnayan sa ISIS o Islamic state sa Sulawesi island sa Indonesia.
Ayon kay Central Sulawesi regional military chief Brigadier General Farid Makruf, nanlaban sa joint operation ng militar at pulisya si Ali Kalora ng East Indonesia Mujahideen o MIT na ikinasawi ng suspek.
Nabatid na napatay din sa operasyon ang isa pang lider na si Jaka Ramadhan o mas kilala bilang Ikrima habang tinutugis pa ang apat pang miyembro ng grupo.
Narekober naman sa encounter site ang ilang pampasabog, isang M16 rifle at dalawang tabak o machete.
Patay ang pitong indibidwal habang sugatan naman ang 30 iba pa sa serye ng pagsabog sa mga lungsod ng Jalalabad at Kabul sa Afghanistan.
Batay sa ulat ng Al Jazeera, pinaghihinalaan ng Taliban ang Islamic State na siyang responsable sa mga pag-atake.
Sa Jalalabad ay apat ang nasawi kung saan naaresto na ang karamihan sa mga suspek.
Nagbanta naman ang Taliban na papanagutin nito ang lahat ng mga may kagagawan sa mga naturang krimen.
Inatasan ni Philippine National Police Chief Gen. Guillermo Eleazar ang Police Regional Office Bangsamoro Autonomous Region o PRO BAR na magsagawa ng malalimang imbestigasyon sa nangyaring pagsabog sa Maguindanao na ikinasugat ng walong indibidwal.
Ayon kay Eleazar, dapat mahuli sa lalong madaling panahon ang mga salarin at mapaigting ang seguridad sa lalawigan at iba pang lugar na may nangyaring katulad na karahasan.
Matatandaang niyanig ng pagsabog ang isang covered court kung saan may nagaganap na volleyball game sa bayan ng Datu Piang.
Ligtas nang nakauwi sa Pilipinas mula Syria ang pitong trafficking-in-persons survivors.
Ayon sa Department of Foreign Affairs (DFA), nagpasaklolo sa Philippine Embassy sa Damascus ang mga repatriates bunsod ng naranasang poor working conditions at pang-aabuso sa kamay ng kanilang mga amo.
Tiniyak naman ni DFA Undersecretary Sarah Lou Arriola na tutulungan ng gobyerno ang mga biktima sa pagsasampa ng reklamo laban sa kanilang mga employers.
Sarado pa rin hanggang Setyembre 24 ang dalawang Consular Offices ng Department of Foreign Affairs (DFA) na kinabibilangan ng Robinsons Galleria sa Ortigas, Quezon City at Calasiao sa Robinsons Place sa Pangasinan.
Ayon sa DFA, sa halip na noong Setyembre 17 ay pinalawig pa ang pagsasara ng ilan sa kanilang mga sangay upang bigyang daan ang quarantine ng mga empleyado na tinamaan ng COVID-19.
Magbabalik-operasyon naman ang consular office ng DFA sa Calasiao sa Setyembre 27.
Mahigit 2.1 milyon na ang kabuuang bilang ng mga gumaling sa COVID-19 sa Pilipinas.
Ito’y makaraang makapagtala ang Department of Health (DOH) ng 25,037 na bagong recoveries.
Sa kasalukuyan, nasa 178,196 na ang bilang ng mga aktibong kaso.
Nagkaroon naman ng higit 19,000 na bagong kaso kaya’t lampas 2.3 milyon na ang coronavirus infections sa bansa.
Samantala, sumirit na sa 36,788 ang kabuuang bilang ng mga nasawi bunsod ng pagpanaw ng higit 200 pasyente.