Iniulat ng Task Force Bangon Marawi (TFBM) na 80% nang kumpleto ang rehabilitation efforts sa Marawi City.
Kasabay nito, tiniyak ni Task Force Chairperson at Housing Czar Secretary Eduardo Del Rosario na sa kabila ng banta ng pandemya at masamang panahon ay matatapos ang lahat ng infrastructure projects sa itinakdang panahon.
Nangako rin si Del Rosario na makukumpleto ang master development plan sa Marawi sa loob ng termino si Pangulong Rodrigo Duterte.
Bubuhusan ng mas maraming bakuna ang mga lugar sa labas ng Metro Manila na may mataas na kaso ng COVID-19.
Ayon kay National Task Force Against COVID-19 (NTF) Medical Adviser Dr. Ted Herbosa, mas palalawakin pa ang vaccination drive sa Visayas at Mindanao, partikular sa mga “Plus 8” areas, kabilang ang Metro Cebu, Metro Davao, Bulacan, Batangas, Cavite, Laguna, Pampanga, at Rizal.
Sinabi ni Herbosa na bagama’t magkakaroon ng dagdag na bakuna ang NCR mula sa mga bagong dating na COVID-19 vaccines, mapupunta aniya sa malalayong rehiyon ang mas malaking bahagi nito.
Ipinanawagan ni dating Senate President Juan Ponce Enrile na ideklarang ‘Persona non grata’ ang mga imbestigador ng International Criminal Court (ICC).
Ayon kay Enrile, pinipilit ng ICC na siyasatin ang Pangulo ng Pilipinas kahit na pinapayagan naman ito ng konstitusyon na ipatupad ang mga umiiral na batas.
Giit ni Enrile, maaari lamang mapanagot sa batas ang nakaupong presidente sa pamamagitan ng impeachment process kaya’t hindi dapat manghimasok ang ICC.
Tila ginagamit din aniya ng international tribunal ang mga kritiko o detractors ng Pangulo para mapalawak ang kanilang “political agenda.”
Inihayag ng Israel na nahuli na nito ang huling dalawang Palestinian prisoners na nakatakas mula sa isang maximum-security prison mahigit 10 na ang nakalilipas.
Kinilala ang mga bilanggo na sina Ayham Nayef Kamamji at Munadel Yacoub Infaat.
Ayon sa ulat, kusang-loob na sumuko ang mga preso matapos mapaligiran ng mga awtoridad ang pinagtataguan ng mga ito.
Maganda ang feedback sa pagpapairal ng alert level 4 sa Metro Manila.
Ibinalita ito ni DILG Secretary Eduardo Año sa kabila ng mga “issues” sa implementasyon ng alert level system na aniya’y na plantsahin rin naman kaagad.
Ang alert level 4 sa Metro Manila ay sinimulan nuong September 16 hanggang 30.
Posibleng naabot na ng Pilipinas ang peak ng pagsirit ng COVID-19 cases.
Ito ayon sa OCTA Research Group ay matapos makapagtala ang Pilipinas ng weekley negative growth rate sa unang pagkakataon mula nuong Mayo.
Sinabi ni Dr. Guido David, fellow ng OCTA Research na ang reproduction rate ng COVID-19 sa bansa ay nasa 1.16% at 1.18% naman sa Metro Manila.
Nakapagtala rin aniya ng negative growth rate bukod sa Metro Manila ang mga lalawigan ng Cavite, Laguna at Bulacan.
Taliwas naman ito sa assessment ng DOH na nagsabing wala pang nakikitang senyales nang pagbaba ng kaso ng COVID-19 lalo pat nasa 64 na lugar pa ang nakapagtala ng pinakamataas na alert level 4.
Patuloy na umaapela si Vice President Leni Robredo sa Comelec para i-extend ang registration ng mga botante para sa 2022 national elections.
Ayon kay Robredo, naiintindihan naman niya ang pagtatakda ng deadline subalit dapat ay ikunsider ng Comelec na nahaharap ang bansa sa extra ordinary situation dahil sa pandemya na maaaring nakaapekto sa mga nais pa sanang magpa rehistro.
Mas marami pa aniyang botante ang makapagpapa rehistro kung i-eextend ang registration na una nang ibinasura ng Comelec at sa halip ay pinalawig na lamang ang oras ng registration at nagbukas sa mga mall ng registration areas.
Inaasahang madadagdagan pa ang fully vaccinated Pinoys sa pagdating ng panibagong supply ng Sputnik V vaccines na dumating kagabi.
Ito ayon kay Vaccine Czar Carlito Galvez, Jr. ay dahil ang halos 200,000 doses ng Sputnik V ay nakalaan para sa mga tuturukan ng second dose.
Ipapamahagi aniya ang nasabing Sputnik V vaccines sa Metro Manila, Bohol, Isabela, Region 3 at Region 4A kabilang ang Bacoor City sa Cavite.
Tiwala ang mga kaanak ng mga nasawi sa drug war campaign ng gobyerno na makakakuha sila ng hustisya.
Sa pamamagitan ito ng imbestigasyon ng International Criminal Court (ICC).
Ayon sa mga kaanak ng mga biktima, nabuhayan sila ng loob dahil nabigyang pansin ang kaso ng mga napaslang sa drug war campaign kayat umaasa sila ng hustisya at mapanagot ang mga may sala.
Mahigit 18 milyon Pinoy na o 18.2 milyon ang fully vaccinated.
Ayon ito kay Health Undersecretary Myrna Cabotaje na nagsabing nasa halos 41 million doses na ng ibat ibang COVID-19 vaccines ang naiturok na sa mga Pilipino simula nang ikasa ang National Inoculation Program nuong March 1.
Kasabay nito, sinabi ni Cabotaje na mahigit 59 million doses ng COVID-19 vaccine na ang napapasakamay ng bansa.