HEADLINES

Asahan pa rin ang pag-ulan sa malaking bahagi ng bansa sa kabila ng paghina ng epekto ng Low Pressure Area na nakapaloob sa Intertropical Convergence Zone.

Namataan ng pagasa ang LPA sa layong 125 kilometers Hilaga ng Coron, Palawan.

Magkararanas ng maulap na papawirin na may kalat-kalat na pag-ulan at thunderstorms ang Metro Manila, Central Luzon, Calabarzon, Mimaropa, Bicol Region, Visayas, Zamboanga Peninsula, Basilan, Sulu at Tawi-Tawi.

Inaasahan namang magiging mainit sa nalalabing bahagi ng Mindanao. ——sa panulat ni Drew Nacino

Kritikal ngayon sa ospital ang 12-anyos na babae matapos barilin ng kaniyang step father sa Cavite.

Sa imbestigasyon ng mga otoridad nagalit ang amain matapos bunutin ng batang babae ang plug ng kanilang internet kung saan, nanonood umano ang suspek na si Reynaldo Managan, 55-anyos sa isang online television.

Dito na pinagalitan at pinagbintangan ng suspek ang menor de edad na anak ng kaniyang kalive-in partner.

Agad naman itong nakita ng nanay ng biktima dahilan para magsimula ang kanilang pag-aaway.

Dahil dito, aksidenteng nabaril ng suspek ang biktima saka umano tumakas na ngayon ay pinaghahanap na ng mga otoridad.—sa panulat ni Angelica Doctolero

Isang hukom ng Regional Trial Court sa Naga City, Camarines Sur ang sinibak dahil sa kasong rape at acts of lasciviousness o kabastusan.

Ito ay matapos mapatunayang guilty sa grave misconduct kasunod ng nasabing mga kaso.

Kinilala ang sinibak na si Naga City Judge Jaime Contreras kung saan, ang lahat umano ng kaniyang leave credits ay forfeited at hindi na maari pang makabalik sa serbisyo sa anumang pampublikong tanggapan.

Una nang sinibak sa tungkulin si Contreras noong Disyembre 2020 dahil sa 3 counts ng kasong criminal rape at attempted rape na May 8 counts ng Acts of lasciviousness at paglabag sa Republic Act no. 7610 o Child Abuse Law.—sa panulat ni Angelica Doctolero

Lilimitahan lang ng pamahalaan ang mga suplay ng bakunang ipadadala sa mga probinsya.

Nabatid na ang mga suplay ng COVID-19 vaccine ay magmumula sa gobyerno habang ang mga vaccinator at incentive sa mga magpapabakuna ay manggagaling naman sa Office of the Vice President (OVP) at mga private sector.

Sa ngayon, marami mang volunteer doctors sa mga probinsya ay problemado pa rin ang mga LGUs kung saan kukuha ng mga bakuna.

Marami pa rin kasing mga residente ang gustong magpabakuna pero walang sapat ang mga lalawigan para dito.—sa panulat ni Angelica Doctolero

Iniutos na ni PNP Chief General Guillermo Eleazar ang pag-iimbestiga sa pagkamatay ng isang delivery rider sa Tondo, Maynila.

Ito ay matapos masangkot ang isa sa mga tauhan ng Philippine National Police na kinilalang si Police Corporal Oliver Ferrer na nakatalaga sa Manila Police District Station 1.

Base sa imbestigasyon, pinaglaruan ni Ferrer ang kaniyang baril sa harap ng biktima at aksidenteng nakalabit ang gatilyo nito.

Agad namang isinugod sa Chinese General Hospital ang biktima pero idineklara itong dead on arrival.

Hinihingan na ni General Eleazar ng report ang MPD Director tungkol sa initial investigation ng pulis at biktima na napag-alaman na magkaibigan.

Bukod pa dito, nagpaabot nadin ng pakikiramay si Eleazar sa pamilya ng biktima.

Sa ngayon, nakakulong at nadis-armahan na ang naturang pulis matapos kasuhan ng homicide ng Prosecutor’s Office.—sa panulat ni Angelica Doctolero

Hinimok ng Department of the Interior and Local Government o DILG ang Local Government Units na tiyaking mapalakas ang kanilang case finding at Contact Tracing Efforts kasabay ng pilot implementation ng alert level system sa NCR.

Ayon kay DILG Secretary Eduardo Año, kailangan ng mga lokal na pamahalaan na magtalaga ng kahit isang contact tracer sa bawat barangay na may populasyon na hindi hihigit sa 5,000.

Aniya, kailangan na maging agresibo sa case finding at contact tracing lalo’t mabilis ang pagkalat ng mas nakakahawang delta variant.

Sinabi pa ni Año na handa ang ahensya na magsanay ng mas maraming contact tracer sa pamamagitan ng local government academy at Department Of Health.—sa panulat ni Hyacinth Ludivico

Halos 37,000 katao ang nahuling lumabag sa minimum public health standards sa unang tatlong araw ng implementasyon ng granular lockdown sa NCR.

Ayon kay PNP Chief Gen. Guillermo Eleazar, sa 36,854 na nahuli, kalahati ang binigyan ng warning, 44% ang pinagmulta, at ang iba naman ay dinala sa presinto upang kasuhan dahil sa iba pang paglabag.

Kaugnay nito, inatasan ni Eleazar ang mga pulis na tutukan ang mga lugar kung saan mayroong mga nagtitipon-tipon.

Nasa 244 police personnel naman ang ipinakalat ng National Capital Region Police Office o NCRPO para bantayan ang mga lugar na nakasailalim sa special concern lockdown.—sa panulat ni Hyacinth Ludivico

Inihayag ng palasyo na lalahok si Pangulong Rodrigo Duterte sa unang araw ng high-level general debate sa 76th United Nations  General Assembly na isasagawa sa Setyembre 21 hanggang 27.

Kabilang sa mga tatalakayin ng Pangulo ang pagharap ng Pilipinas sa pandemya, climate change, human rights, international security at kalagayan ng mga manggagawa at refugees.

Pangungunahan naman ni Abdulla Shahid, Minister of Foreign Affairs ng Maldives at incoming President ng 76th UNGA, ang nasabing high-level general debate.

Ang United Nations General Assembly ang main deliberating organ ng UInited Nations na mayroong 193 member states.—sa panulat ni Hyacinth Ludivico

Umabot sa 99,700 ang bilang ng mga nasawi dahil sa stroke noong nakaraang taon.

Ayon sa datos ng Philippine Statistics Authority o PSA, ilan sa mga sakit na dahilan ng pagkamatay ng maraming Pilipino noong nakaraang taon ay ang heart attack, cancer, diabetes, chronic lung disease, at stroke na tinatawag na non-communicable diseases.

Kaugnay nito, sinabi naman ng National Stroke Association na maiiwasan ang ganitong sakit sa pamamagitan ng tamang gamot kung regular ang medical check up at pagkakaroon ng healthy lifestyle at pag-eehersisyo.

Hinihikayat rin ng mga eksperto ang publiko na pagtuunang pansin rin ang iba pang mga sakit maliban sa COVID-19.—sa panulat ni Hyacinth Ludivico

Hindi pa kumbinsido ang isang political analyst sa kaliwa’t kanang deklarasyon ng mga kandidato sa 2022 national elections partikular ang mga tatakbo sa pagka-Presidente at Bise Presidente.

Ayon kay Professor Ramon Casiple, marami pang puwedeng mangyari lalo’t hindi pa naman naghahain ng Certificate of Candidacy ang mga pumupormang kandidato.

Bukod pa anya ito sa COVID-19 pandemic na may malaking epekto sa halalan.

Huwag kang maniwala sa mga sinasabi, kasi itong period na ito ang tawag diyan tactics period. Hindi kaagad-agad sinasabi nila, ayun ang mangyayari , malalaman din nila kung sino ang mga kandidato, kapag nag-file ng candidacy nila sa 1st week ng October,”pahayag ni Prof. Casiple.

Dahil anya sa pandemya, naniniwala si Casiple na magiging malaking hamon ang pagdaraos ng kampanya at mismong araw ng botohan kumpara sa mga nagdaang eleksyon.

Mabigat ang eleksyong ito, marami ang nakataya dito, hindi natin pwedeng isantabi lamang kasama rito maraming bagay, “wika ni Prof. Ramon Casiple—sa panulat ni Drew Nacino