HEADLINES

Hindi pa naabot ng Pilipinas ang “peak” ng pagsirit ng COVID-19 cases ayon sa DOH.

Ito’y taliwas sa naunang pahayag ng OCTA Research kung saan naniniwala ang grupo na naabot na ng bansa ang pinakamataas na bilang ng kaso ng COVID-19 matapos makapagtala ng weekly negative growth rate sa unang pagkakataon mula nuong Mayo.

Ayon kay Undersecretary Maria Rosario Vergeire, batay sa kanilang pagaanalisa sa sitwasyon, tuloy-tuloy ang pagtaas ng kaso ng nakahahawang sakit sa bansa.

Paliwanag ni Vergeire, kapag sinabing “peak”, naitala na ang pinaka mataas na bilang ng kaso at may pagbaba nang nakikita sa bilang, ngunit sa ngayon ay hindi pa aniya ito nararamdaman.

Posible umanong maabot ng Pilipinas ang peak sa October ngunit posibleng aniya itong maiwasan kung mas mag-iimprove pa ang COVID-19 response.

Kinumpirma ni Manila Mayor Isko Moreno na nagkaroon sila ng pulong ni Vice President Leni Robredo at Sen. Manny Pacquiao bago pa man ang filing of candidacy sa Oktubre.

Ayon kay Moreno, sinisikap niyang maabot ang lahat upang mapakinggan ang mga ito lalo’t wala namang masamang makinig.

Tumanggi naman ang alkalde na magbigay pa ng karagdagang detalye kaugnay sa kanilang paguusap ng Bise Presidente.

Gayuman, sinabi ni Moreno na inaasahan pa niyang masusundan pa ang pulong na ito para pagusapan ang marami pang bagay.

Masyado pang maaga para matukoy ang epekto ng ipinatupad na bagong quarantine system o Alert level scheme ayon sa DOH.

Sinabi ni Health Undersecretary Maria Rosario Vergeire, inaasahang dalawa hanggang tatlong linggo pa mararamdaman ang epekto ng new alert level scheme kung saan isinailalim sa alert level 4 ang Metro Manila.

Ani Vergeire, kakasimula pa lang ng pag-iral nito sa NCR kaya’t inaasahan ang improvement sa bilang ng kaso ng COVID-19 matapos ang dalawa hanggang tatlong linggo.

Sa ilalim ng alert level scheme, sinabi ni Vergeire na maliban sa pagpapatupad ng granular lockdowns, ilang bagong hakbang din ang ipinatupad gaya ng active case-finding, intensive tracing of contacts, testing at immediate isolation.

Nasa 319 ang bagong kaso ng Delta variant na natukoy sa pinaka huling genome sequencing na ginawa ng Philippine Genome Center nitong September 18.

Ito ang kinumpirma ng DOH dahilan para maging most common variant na sa bansa ang Delta.

Bukod dito, naitala rin ang labing tatlong bagong kaso ng Alpha variant at siyam na bagong kaso ng Beta variant.

Ayon kay Health Undersecretary Maria Rosario Vergeire, sa Region 2 may pinakamaraming naitalang kaso ng Delta variant na umabot sa 40.

Natukoy din aniya ang P.3 variant na may limang bagong kaso at lumalabas na lahat ng rehiyon sa bansa ay mayroon na nito.

Inaprubahan na ni Pangulong Rodrigo Duterte ang pagsisimula ng face to face classes.

Nagpadala na ang Pangulo ng guidelines para sa pilot testing nito kung saan pinagsasama-sama ang mga panuntunan mula sa DOH, DepEd, IATF at mga eksperto sa child education.

Ilan sa mga nakasaad dito ay kailangang makapasa sa safety assessment ng DepEd, ang lugar kung saan gaganapin ang face to face classes.

Dapat din na pumayag ang Local Government Units dahil sila ang mangangasiwa sa pilot testsing na ito ng face to face classes.

At mahalaga rin na may written concent ng mga magulang kaugnay sa pagpayag ng mga ito para sumali ang kanilang mga anak sa face to face classes.

Inaasahang magsisimula ito sa 100 pampublikong paaralan schools  at 20 private schools na kailangan namang magsumite ng kanilang mga plano.

Iginiit ni Presidential Spokesperson Harry Roque na walang pruwebang mag-uugnay kay Pangulong Rodrigo Duterte sa Vigilante Killings na pinangungunahan umano ng Davao Death Squad (DDS).

Ito’y matapos ihayag ng International Criminal Court (ICC)  Pre-Trial Chamber na nakitaan ng ugnayan sa pagitan ng patayan sa Davao City bago ang 2016 at ang malawakang war on drugs ng administrasyong Duterte.

Itinanggi rin ni Roque ang sinasabi ng mga self-confessed dds members na sina Arturo Lascañas at Edgar Matobato kaugnay sa umano’y utos ng Pangulo na pagpatay sa Davao City.

Ani Roque, kilala na niya ang mga ito nuon pa at pinuntahan nila ang lugar kung saan sinasabing mayroong nakalibing na mga bangkay ng tao ngunit sa halip ay mga buto ng aso ang kanilang natagpuan.

Wala pang rekomendasyon ang DOH na bakunahan na kontra COVID-19 ang mga nasa edad 12 hanggang 17 anyos.

Ito ang binigyang linaw ni Health Undersecretary Maria Rosario Vergeire, kung saan patuloy pa aniyang pinag-aaralan ng mga eksperto ang posibilidad na mabakunahan ang mga menor de edad laban sa COVID-19.

Ani Vergeire, unang-unang kailangang ikunsidera sa pagbabakuna sa mga bata ay ang kaligtasan at posibleng epekto nito sa kanila.

Binigyang diin din ni Vergeire na bagama’t nariyan ang posibilidad na makakuha sila ng virus, mas mataas pa rin ang tyansa na tamaan nito ang mga matatanda.

Maliban dito, hindi pa rin aniya stable ang suplay ng COVID-19 vaccine sa bansa at binibigyang prayoridad pa rin sa ngayon ang pagbabakuna sa mga matatanda.

Maliban sa COVID-19 ay pinatututukan din ng mga health expert ang stroke bilang isa sa mga dahilan ng kamatayan ng maraming Pilipino buhat nuong isang taon.

Ito ang babala ng mga eksperto matapos lumabas sa datos ng Philippine Statistics Authority (PSA) na 99,700 o halos isandaang libo ang  naitalang nasawi sa bansa nuong isang taon dahil sa stroke.

Sa isinagawang webinar ng Menarini Asia-Pacific, iginiit ng mga health expert na dapat ding pagtuunan ng pansin ng Pamahalaan ang iba pang karamdaman bukod sa COVID-19.

Batay pa sa pag-aaral ng PSA, 5 sakit ang pangunahing nagiging sanhi ng kamatayan ng mga Pilipino kabilang na ang atake sa puso, cancer, diabetes, chronic lung disease at stroke na itinuturing na non-communicable disease.

Subalit pinakamahirap anila rito ang stroke dahil sa ito ay nagmumula sa pagkakaroon ng blood clot o pamumuo ng dugo sa ugat na nagiging sanhi ng pagbabara sa daluyan ng dugo ng isang tao para makarating sa utak.

Payo ng National Stroke Association, maiiwasan naman ang stroke sa pamamagitan ng tamang gamot, regular na pagpapatingin sa doktor at tamang pag-aalaga sa sarili. —sa ulat ni Jaymark Dagala (Patrol 9)