HEADLINES

Itinanggi ng Palasyo ang impormasyon na ipatutupad ang bagong COVID alert level system sa buong bansa.

Nilinaw ni Presidential Spokesman Harry Roque na pilot pa lamang ang implementasyon ng bagong alert level system at hindi pa ito ipatutupad sa buong bansa sa Oktubre.

Setyembre 16 nang simulang ipatupad sa NCR ang alert level 4 kung saan pinayagan ang 30% capacity, habang ang indoor dining ay limitado lamang safully vaccinated.

Samantala,pinapayagan naman ang religious gatherings at personal care services ng hanggang 30% capacity.—sa panulat ni Drew Nacino

Isinailalim na ang Batanes sa pinakamahigpit na community quarantine level simula kahapon.

Ito, ayon provincial COVID-19 task force group ng Batanes, ay dahil sa patuloy na pagtaas ng COVID-19 cases.

Tatagal ang Enchanced Community Quarantine ng dalawang linggo o hanggang Oktubre 4.

Sa datos kahapon, naitala ang isandaang bagong kaso ng COVID-19 kaya’t sumampa sa 138 na ang kumpirmadong kaso simula nang pumutok ang pandemya.

Patuloy na binabantayan ang 121 active cases ng COVID habang 17 na ang nakarekober.—sa panulat ni Drew Nacino

Aabot sa 155 ang nasawi sa COVID-19 bawat araw noong Agosto, batay sa datos ng Department Of Health (DOH).

Ayon kay DOH Undersecretary Maria Rosario Vergeire, nalagpasan ng nasabing bilang ang 135 na daily COVID-19 death noong Abril.

Posible anyang tumaas pa ang kasalukuyang death rate sa mga susunod na araw dahil sa patuloy na pagtaas ng COVID-19 cases.

Kabilang sa mino-monitor ng DOH ang Metro Manila, regions 3, 4-a, 7, 2, 6, 1 at Cordillera dahil sa mataas na total deaths sa unang dalawang linggo ng Setyembre. —sa panulat ni Drew Nacino

Hindi pa pinapayagan ang pagbabakuna sa mga menor-de-edad subalit maaari nang simulan ng mga local government unit ang pagpaparehistro.

Ito ang nilinaw ni Dr. Ted Herbosa, Special Adviser to the National Task Force against COVID-19, sa gitna ng ikinakasang vaccination sa mga edad 12 hanggang 17.

Ayon kay Herbosa, pinag-aaralan pa Ng National Immunization Technical Advisory Group ang datos sa pagbabakuna sa nabanggit na age group.

Pinapayagan lamang anya ng LGU ang pagpaparehistro upang mabatid kung ilan ang kabataang magiging candidate sa bakuna.

Samantala, patuloy naman ang diskusyon para sa booster shots ng healthcare workers at immune-compromised individuals.—sa panulat ni Drew Nacino

Patay ang isang lalaki matapos magulungan ng 14-wheeler truck sa Tondo, Maynila.

Nabatid na ang nasawing lalaki ay customer ng isang kainan sa nabanggit na lugar.

Sa nakuhang video ng mga otoridad, makikita ang biktima na naglalakad kasama ang kaniyang kaibigan papunta sa isang restaurant.

Dahil sa dami ng mga bumibili ay inabot na nito ang gitna ng kalsada kung saan nakapuwesto ang biktima.

Dito na nahagip ng driver ang biktima na sumabit pa sa gulong ng naturang truck.

Naisugod pa sa ospital ang biktima pero idineklara itong dead-on-arrival.—sa panulat ni Angelica Doctolero

Nakapagtala ang Department Of Health ng karagdagang 18,937 na bagong COVID-19 cases, kahapon.

Sumirit naman sa 2,385,616 ang kabuuang bilang ng kaso ng naturang sakit sa bansa.

Sa pinaka-bagong datos ng DOH, nasa 176,850 ang active cases, 20,171 ang nakarekober kaya’t sumampa sa 2,171,832 ang total recoveries.

Samantala, umabot naman sa 146 ang namatay dahilan upang sumampa sa 36,934 ang death toll.—sa panulat ni Drew Nacino

Pinabulaanan ng DOH ang ulat na bubuwagin na ang Research Intitute For Tropical Medicine (RITM) at papalitan ng Virology Institute of the Philippines (VIOP).

Sa laging handa briefing sinabi ni Health Usec. Maria Rosario Vergeire na may mga pag-uusap na tungkol sa pagtatayo ng VIOP pero hindi aniya kabilang sa planong ito ang pag-abolish sa RITM.

Dahil base aniya sa mga ginagawa nilang pagpupulong, ilalagay o isasailalim lamang ang RITM sa isang malaking institusyon para mas mapaigting at mapalawak pa ang kanilang expertise sa research at paglikha ng mga bakuna.

Kaya naman hindi aniya totoo na mabubuwag na ang RITM kundi maisasama lamang siya sa isang mas malaking health institution upang mas magkaroon ng mas maraming resources at mapalawig ang kanilang expertise.

Aminado ang  DOH na isang malaking hamon sa kanila ang pagtalima ng mga ospital sa pagsusumite ng kanilang mga COVID-19 data sa tamang oras.

Ayon kay Usec. Maria Rosario Vergiere, na maayos na ginagampanan ng DOH ang pangongolekta nito ng mga datus mula sa mga pagamutan ngunit sadyang hindi talaga aniya nasusunod ng mga ospital, clinics at mga laboratories ang pagsusumite sa tamang oras ng kanilang mga emergency room data.

Ito ani Vergiere ang dahilan kung bakit madalas na nagkakaroon ng kakulangan o inadequacies ang kanilang reporting system.

Giit ng health official, hindi aniya sila nagkukulang sa pagbibigay paalala sa mga pagamutang ito na regular na isumite ang mga datus hinggil sa kanilang emergency room admissions.

Dinepensahan ni Pateros Mayor Miguel “Ike” Ponce III ang paglalagay ng yellow ribbon sa mga bahay na mayroong nakatirang positibo sa COVID-19.

Ayon kay Ponce, wala siyang nakikitang diskriminasyon o paglabag sa karapatang pantao sa kanilang hakbang na ito.

Ani Ponce, posible ang diskriminasyon o paglabag kung umayaw ang residente at pinilit ito, ngunit kung parehas silang nagkasundo ay walang siyang nakikitang problema rito.

Giit ng opisyal ang paglalagay ng ribbon ay bahagi ng pagpapatupad ng granular lockdown upang mas maging epektibo ang monitoring na ginagawa ng mga kinauukulan.