HEADLINES

Anim na atleta ang isasabak ng Association of Boxing Alliances in the Philippines sa 2024 Olympic Games sa Paris, France.

Ayon kay National Boxing Coach Elmer Pamisa, marami pang miyembro ng national team na may tsansang makapasok sa nasabing quadrennial event matapos ang matagumpay na kampanya sa Tokyo, Japan noong Hulyo.

Kabilang anya sa mga ito sina Eljay Pamisa, Jericho Acaylar, Mark Christian Laurence at Marvin Tabamo.

Sa nakaraang Tokyo Olympics ay sumikwat sina Featherweight Nesthy Petecio at Flyweight Carlo Paalam ng silver medal habang may bronze si Middleweight Eumir Felix Marcial.

Kumpiyansa naman si pamisa na may iba pang tubong Cagayan De Oro na makakalaro sa 2024 Paris Olympics bukod kay Paalam. —sa panulat ni Drew Nacino

Muling nagpatupad ng dagdag-presyo sa kanilang mga produkto ang mga kumpanya ng langis.

Epektibo alas-12:01 kaninang hatinggabi nang ilarga ng Caltex ang dagdag 80 centavos sa Gasolina at Diesel habang 85 centavos sa kada litro ng Kerosene.

Kaninang ala-6 naman sinimulang magpataw ng kahalintulad na price increase ang Flying V, PTT Philippines, Phoenix Petroleum, Petron, Total, Petrogazz, Shell at Seaoil.

Samantala, simula mamayang alas kwatro ng hapon ipatutupad ng Cleanfuel ang 65 centavos na dagdag sa kada litro ng Gasolina habang 70 centavos sa Diesel.

Ito na ang ika-apat na sunod na linggong nagpatupad ng price increase ang mga oil company. —sa panulat ni Drew Nacino

Nagbanta si Pangulong Rodrigo Duterte ng gulo sa pamahalaan kung ipag-uutos ng senado ang pagpapakulong sa kanyang mga cabinet official.

Ayon kay Pangulong Duterte, hindi maaaring ipilit ni Senate Blue Ribbon Committee Chairman Richard Gordon na ipilit na overpriced ang COVID-19 supply procurement gayong itinanggi na ito ng Commission on Audit.

Masyado na anyang tumatagal ang imbestigasyon sa halip na tumutok ang gobyerno sa kampanya laban sa COVID-19 pandemic. —sa panulat ni Drew Nacino

Inatasan na ni Pangulong Rodrigo Duterte ang Department of Health na imbestigahan ang umano’y “false positive” COVID-19 test results mula sa Philippine Red Cross (PRC).

Ito’y makaraang makatanggap ng reklamo na dispalinghado umano ang COVID test ng Red Cross.

Ayon sa Pangulo, ilang government employees kabilang ang mga hospital personnel ang nagpositibo sa RT-PCR test results mula sa PRC pero makalipas ang tatlong araw ay nag-negatibo naman sa ibang laboratoryo.

Mulinamang binanatan ni Pangulong Duterte si Senador Richard Gordon na Chairman ng PRC at nangunguna sa imbestigasyon sa umano’y anomalya sa pagbili ng gobyerno ng medical supplies mula sa Pharmally Pharmaceuticals. —sa panulat ni Drew Nacino

Inihayag ni Presidential Spokesperson Harry Roque na wala silang natanggap na negatibong ulat hinggil sa ipinatutupad na pilot implementation ng alert level system sa Metro Manila.

Sa kabila nito, sinabi ni Roque na wala pang diskusyon kung ipatutupad rin ito sa mga lugar na nasa labas ng NCR.

Una na ring sinabi ng mga alkalde sa Metro  na kuntento sila sa naging compliance ng mga business establishment sa mga unang araw ng implementasyon ng alert level system. —sa panulat ni Hyacinth Ludivico

Sinimulan na ang operasyon ng One Hospital Command Center (OHCC) sa CALABARZON upang mapaigting ang health care system sa gitna ng banta ng COVID-19 Delta variant.

Ayon kay Dr. Eduardo Janairo, DOH-CALABARZON Director, sa pamamagitan ng One Hospital Command Center ay mapapangasiwaan ang lahat ng kaso ng COVID-19 sa rehiyon.

Batay sa datos ng DOH CALABARZON Regional Epidemiology and Surveillance, pumalo na na sa 406 ang kaso ng Delta variant sa rehiyon kung saan pinakamarami sa mga ito ay naitala sa Laguna na may 112 cases at sinundan naman ng Cavite na may 99 na mga kaso.

Mayroong 83 Delta cases naman sa Rizal, 65 sa Batangas, 33 sa Quezon, at 14 sa Lucena City.

Karamihan sa naitalang Delta infections ay mula sa local transmission kung saan Laguna pa rin ang may pinakamaraming kaso na may 102 Delta variant cases. —sa panulat ni Hyacinth Ludivico

Hindi makakatanggap ng hazard pay ang mga kawani ng gobyerno na nasa NCR habang ito ay nasa pilot implementation ng unang 4 na antas ng COVID-19 alert level system.

Ayon kay Civil Service Commission Commissioner Atty. Aileen Lizada, batay sa  circular ng Department of Budget and Management ay hindi saklaw ng        umiiral na classification sa Metro Manila ang hazard pay.

Aniya, ang mga lugar lamang na nasa alert level 5 o ECQ ang makatatanggap nito.

Pinayuhan naman ni Lizada ang mga ahensya ng gobyerno na agad punan ang mga bakanteng posisyon sa kani-kanilang tanggapan ngayong marami ang naghahanap ng trabaho. —sa panulat ni Hyacinth Ludivico