HEADLINES

Target ng Pilipinas na makapag-set-up ng isang “fill and finish” facility para sa COVID-19 vaccines sa susunod na taon ayon sa Food and Drug Administration (FDA).

Sinabi ni FDA Director General Eric Domingo na ang “fill and finish” facility na ito ay kung saan magbabagsak sa Pilipinas ng maramihang produkto at ire-repack ito sa maliliit na vials, ampoules o mga syringes.

Kapag naisakatuparan ito, sunod na pag-aaralan naman ay ang pagkakaroon ng manufacturing sa bansa nang iba’t ibang klase ng bakuna.

Ani Domingo, sinisimulan na ng awtoridad ang pakikipag-ugnayan sa manufacturers sa iba’t ibang bansa gaya ng Cuba, China at Russia para sa posibleng “technology transfer” para sa nasabing pasilidad.

Pinakikilos na ng PNP ang Anti-Cybercrime Group (ACG) nito para imbestigahan ang online kopyahan ng mga estudyante sa ilalim ng distance learning.

Ayon kay PNP Chief Gen. Guillermo Eleazar, kaniya nang inatasan ang ACG na makipag-ugnayan sa Department of Education o deped hinggil sa bagay na ito.

Sinabi ni Eleazar na gagawin nila ang lahat para matukoy kung sino ang nasa likod ng online kopyahan gamit ang Facebook at iba pang social media accounts.

Mababatid na sa naturang estilo, nagpapalitan ng sagot ang mga estudyante sa kanilang mga pagsusulit.

Una rito, nanindigan si Education Secretary Leonor Briones na hindi nila kukonsintihin ang anumang uri ng pandaraya sa hanay ng mga mag-aaral.

Samantala, bukod sa PNP pumasok na rin sa imbestigasyon hinggil dito ang National Bureau of Investigation (NBI). —sa ulat ni Jaymark Dagala (Patrol 9)

Posibleng dahil sa delta variant ang dahilan ng pagtaas ng kaso ng COVID-19 sa lungsod ng Bacolod.

Ayon kay Bacolod City Mayor Evelio Leonardia, ngayong buwan ng Setyembre lang nang muling tumaas ang kaso sa probinsya matapos na bumagal ang hawaan nito noong nakalipas na dalawang buwan.

Pero paglilinaw ni Leonardia, wala pang kumpirmasyon ang Department of Health (DOH) hinggil sa dahilan ng pagsirit ng naitatalang kaso.

Ito aniya ang dahilan kung bakit nasa kritikal na lebel pa rin ang mga ospital sa lungsod gayundin ang kakulangan sa mga health worker.

Sa pinakahuling tala ng Bacolod City Health Office, umabot na sa 1,836 ang aktibong kaso ng COVID-19.

Samantala, tiniyak ni Leonardia na patuloy ang kanilang pakikipag-ugnayan sa DOH para matugunan ang kanilang nararansan gayundin ang kakulangan sa kanilang manpowers.

Bumuo na ng Special Investigation Task Group (SITG) ang Police Regional Office Cordillera na siyang tututok sa pamamaslang sa doktor na dati ring kandidato sa pagka-alkalde sa Abra.

Ito’y bilang pagtalima na rin sa kautusan ni PNP Chief P/Gen. Guillermo Eleazar para maihatid ang katarungan sa pamilya ng doktor na si Amor Trina Dait.

Walang habas na pinagbabaril ang biktima sa loob mismo ng kanilang tahanan sa Barangay Poblacion sa bayan ng Pilar ang biktima nitong Sabado ng gabi.

Si Dra. Dait ay resident doctor ng La Paz District Hospital at dating tumakbo sa pagka-alkalde ng Bayan noong 2019.

Kasabay nito, nagpaabot ng pakikiramay ang PNP Chief sa pamilya Dait at nangako siyang personal na tututukan ang kaso at titingnan ang lahat ng anggulo para magbigay liwanag sa kaso.

Una rito, inatasan ng Eleazar ang lahat ng mga police commanders na paigtingin ang kampanya laban sa loose firearms at mga private armed groups bilang paghandaan sa nalalapit na eleksyon sa susunod na taon. —sa ulat ni Jaymark Dagala (Patrol 9)

Isang AUV na airport taxi ang bumaligtad at nahulog sa isang canal sa Quirino Highway, Barangay San Francisco, Tagkawayan, Quezon.

Dakong 9:45 ng gabi nitong Lunes nang mangyari ang aksidente.

Batay sa ulat ng Tagkawayan Municipal Police Station, pabalik na sana sa Maynila ang airport taxi galing Bicol nang magpagewang-gewang ito sa pababang bahagi ng highway.

Agad namang sumaklolo ang Municipal Disaster Risk Reduction Management Office at Bureau of Fire Protection-Tagkawayan at sinagip ang sugatan na driver.

Lubhang napinsala ang unahang bahagi ng naturang sasakyan. Kinilala ang driver na si Christopher Roxas, 38-anyos.

Patuloy naman ang isinasagawang imbestigasyon ng mga otoridad. —sa panulat ni Hyacinth Ludivico

Hinimok ni Presidential Adviser for Entrepreneurship Joey Concepcion ang gobyerno na iklian ang quarantine period ng mga biyahero mula North America.

Layunin nito na palakasin ang turismo at ekonomiya ng bansa sa gitna ng COVID-19 pandemic.

Kumpara sa kasalukuyang sampung araw, nais ni Concepcion na gawin na lamang limang araw ang quarantine period upang makabawas sa gastos ng mga byahero partikular ang mga turista.

Isinusulong naman ng Department of Tourism na tanggalin na ang quarantine period at luwagan ang restrictions lalo’t mayorya naman ng tourism workers ay bakunado na.

Samantala, inihayag ng Department of Health hindi pa nila inirerekomenda ang pagpapaikli sa quarantine period dahil 22 bansa sa North America ang nananatili sa moderate risk category. —sa panulat ni Drew Nacino

Posibleng payagan ng COMELEC ang magkaibang paksyon ng PDP-Laban na magkaroon ng dalawang presidential candidante sa 2022 National Elections.

Ito’y matapos tanggapin ni Senador Manny Pacquiao ang nominasyon bilang presidential bet ng PDP-Laban Pimentel Wing kahit si Senador Bong Go ang napili namang standard bearer ng Cusi Wing.

Ayon kay COMELEC Spokesman James Jimenez, ganito rin ang naging sitwasyon noon ng liberal party sa pagitan nina Senador Franklin Drilon at Buhay Partylist Rep. Lito Atienza.

Gayunman, nilinaw ni Jimenez na wala pang pinal na desisyon ang poll body sa issue. —sa panulat ni Drew Nacino