HEADLINES

Nilinaw ng Department Of Health (DOH) na maaaring maiba ang COVID-19 test results sa samples na kinuha sa isang pasyente sa ibang oras.

Kaugnay ito ng pahayag ni Pangulong Rodrigo Duterte na mayroong “false positive” results sa mga pagsusuri na ginawa ng Philippine Red Cross.

Ayon kay DOH Spokesperson at Undersecretary Maria Rosario Vergeire, maraming “factors” ang naka-aapekto sa resulta ng laboratory test.

Kailangan anyang i-interpret ang mga test gamit ang “epidemiological at clinical situation” ng pasyente. —sa panulat ni Drew Nacino

Kinumpirma ni Manila Mayor Franciso “Isko Moreno” Domagoso ang kanyang pagtakbo pagka-Pangulo sa 2022 national elections.

Inanunsyo ni Domagoso na magiging Vice Presidential running mate niya si 2019 Senatorial Candidate, Dr. Willie Ong.

Nakatakda naman ang pormal na deklarasyon ng tandem ni Yorme at Doc Willie sa lungsod ng Maynila, ngayong araw.

Samantala, nilinaw ng Alkalde na hindi pa sarado ang kanilang pinto para sa isang united opposition.

Kamakailan lamang ay tinanggap mayorisko ang pagiging Pangulo ng sinalihang aksyon demokratiko na itinatag ni dating Senador Raul Roco.—sa panulat ni Drew Nacino

Lumagpak pa sa 16,361 ang bagong COVID-19 cases sa bansa kahapon dahilan upang lumobo naman sa 2,401,916 ang kabuuang bilang ng nagkakasakit.

Sa datos ng Department Of Health (DOH), mayroong 21,974 na gumaling habang 140 ang namatay.

Sa kabuuan ay nasa 2,193,700 ang recoveries habang umakyat sa 37,074 ang pumanaw.

Sumadsad naman sa 171,142 ang active COVID-19 cases.

Samantala, apat na laboratoryo naman ang hindi nakapagsumite ng datos sa COVID-19 document repository system.—sa panulat ni Drew Nacino

Tinatayang nasa 3,000 pamilya ang apektado ng ipinatutupad na granular lockdown sa Metro Manila.

Ito’y ayon sa datos na hawak ng MMDA mula nang pairalin ang naturang hakbang para masugpo ang banta ng COVID-19 at mga variants nito.

Ang naturang bilang aniya ng mga apektadong pamilya ay mula sa siyam na mga eskinita; tatlong buildings; higit sa 100 condo units; at 48 compounds.

Mababatid na sa naturang bilang, ay walang barangay na ini-lockdown.

Paliwanag ni MMDA chair Benhur Abalos, ito’y dahil sa pagpapatupad ng granular lockdown ay talaga aniyang hinihiwalay ng awtoridad ang isang lugar na nakitaan ng pagsirit ng kaso ng COVID-19 mula sa ibang kalapit na lugar nito.

Iminungkahi ng grupong Teacher’s Dignity Coalition na pag-isipang mabuti ang pag-apruba sa limited face-to-face classes sa mga low risk areas.

Ayon sa grupo, hindi pa ito napapanahon dahil lubhang mapanganib pa rin ang panahon ngayon para sa mga estudyante.

Giit ng grupo, patuloy ang pagtaas ng kaso ng COVID-19 sa Pilipinas at nahihirapan na nang lubos ang health care system ng bansa.

Magugunitang inaprubahan na ang pagsasagawa ng face-to-face classes sa mga pampubliko at pribadong paaralan.

Walang nakikitang paglabag ang Department of the Interior and Local Government (DILG) sa paglalagay ng ribbon sa mga bahay na may positibong kaso ng COVID-19 sa Pateros.

Ayon kay DILG undersecretary for barangay affairs Martin Diño, voluntary o wala namang pilitan sa paglalagay ng yellow ribbon sa mga bahay ng may kaso ng COVID-19.

Gaya aniya ng depensa ni Mayor Miguel Ike Ponce, kung pumayag naman ang may-ari ng bahay ay wala siyang nakikitang problema rito.

Dagdag pa ni Diño, ang hakbang na ito ay bahagi lamang din ng kanilang monitoring ng COVID-19 case sa kaniyang nasasakupan.

Nagpositibo sa ng COVID-19 ang 36 na health workers ng Lung Center of the Philippines.

Ayon kay Dr. Norberto Francisco ng media relations ng ospital, dahil sa mga tinamaan ng virus na health workers, nagkukulang na sila ngayon sa manpower.

Ani Francisco, gustuhin man nilang palawigin pa ang kanilang serbisyo lalo’t isa ang Lung Center sa may pinakamaraming bed capacity ang inilaan para sa COVID patients, nalilimitahan ang kanilang serbisyo dahil sa kakulangan sa tao.

Sa ngayon ay puno pa rin aniya ang kanilang ospital at minsan ay umaabot ng hanggang limang araw ang paghihintay ng mga pasyente sa emergency room para maiakyat sa kwarto.

Mas marami ang bilang ng nasawing mga Amerikano dahil sa COVID-19 kumpara nang maranasan ang flu pandemic noong 1918.

Batay sa datos ng Johns Hopkins University Tracker, nitong nakaraang Biyernes, pumalo na sa 675,722 ang bilang ng COVID deaths sa US.

Nahigitan nito ang 675,000 deaths sa US noong Inluenza outbreak na nagsimula sa huling taon ng World War 1.

Posibleng pag-aralan ng Commission on Elections (COMELEC) ang pagpapalawig ng voters registration na nakatakdang magtapos sa Setyembre  30, 2021.

Ito’y matapos maghain ang senado ng resolusyon para umapela ng extension ng registration period hanggang Oktubre 31.

Ayon kay COMELEC Commisioner Rowena Guanzon, dahil sa resolusyong ito ng senado, tiyak na isa ito sa agendang tatalakayin ni Chair Sheriff Abas sa kanilang gagawing pulong.

Isa aniya sa mga kailangan tukuyin sa pag-uusap ay kung kaya pa ba ng COMELEC i-extend o hindi na ang voter registration.

Sinabi ni Guanzon na noong unang nagkaroon ng botohan, Mayorya sa mga commissioner ay hindi na pabor na palawigin pa ang registration period dahil sa gipit na sa oras para sa paghahanda sa National Elections.

Magluluwag ng travel restrictions ang Estados Unidos sa mga biyaherong fully vaccinated na mula sa 33 bansa sa Nobyembre.

Batay sa anunsyo ng White House, ilan sa mga bansang kabilang sa kanilang listahan ay China, India, Brazil at karamihan sa mga bansa sa Europe.

Sa ngayon umano ay hindi pa napapanahon na magluwag ng travel restrictions sa kahit anong bansa sa gitna ng tumataas pang kaso ng COVID-19 dahil sa banta ng delta variant.

Hindi naman nagbigay ang White House ng eksaktong petsa para sa pagluluwag ng travel restrictions para sa mga fully vaccinated na.