HEADLINES

Inihayag ni Speaker Lord Allan Velasco na dapat ay irekonsidera  ang mandatory na pagsusuot ng face shield sa pampublikong lugar partikular na sa mga mall, commercial establishment, at public transportation.

Nabatid na nagbigay ng rekomendasyon si Velasco kay Pangulong Rodrigo Duterte na alisin na ang pag-oobliga sa mga indibidwal sa pagsusuot ng face shield.

Sa liham na ipinadala ng mambabatas, sinabi niya na ang pagsusuot ng faceshield ay hindi nakakatulong sa pagpapababa ng kaso ng COVID-19 sa bansa.

Ayon kay Velasco, wala umanong matibay na ebidensya na ang paggamit ng face shield ay epektibo para mapigilan ang transmission o pagkalat ng COVID-19.

Aniya, tanging ang Pilipinas lamang sa mga bansa sa buong mundo ang gumagamit ng faceshield kung saan, mas nahihirapang umangat ang ekonomiya dahil sa dagdag na gastos ng pamahalaan.

Base sa COVID-19 low income household panel and economic o hope, 56% ng mga pinoy ay walang sapat na budget para makakain.

Aniya ang paggastos o pagbili ng faceshield ay maaring gamitin bilang pandagdag sa pambili ng pagkain ng isang mahirap na pamilya sa bansa.—sa panulat ni Angelica Doctolero

Magsasagawa ng pagpupulong ang Department Of Justice at Philippine National Police para pag-usapan ang operasyon sa anti-illegal drugs.

Nabatid na sisilipin ng DOJ ang resulta sa ginawang pag-review ng kagawaran sa 52 anti-illegal drug operations na nagresulta sa pagkamatay ng mga suspek.

Pag-uusapan din sa ikakasang pagpupulong ang pananagutan ng mga pulis sa sinasabing misconduct sa anti-illegal drugs operation.

Ayon kay PNP Chief General Guillermo Eleazar suportado at ibibigay nila ang kooperasyon sa DOJ. —sa panulat ni Angelica Doctolero

Irerequire na ng Commission on Election o COMELEC ang antigen test sa filing ng Certificate Of Candidacy o COC sa mga nais kumandidato para sa 2022 national election.

Ito ay matapos tinanggap ng House of Representative ang rekomendasyon ng COMELEC.

Ayon kay COMELEC Spokesperson James Jimenez, mas maghihigpit ang kanilang ahensya dahil patuloy parin ang banta ng COVID-19 sa bansa.

Sa ngayon, planong makipagpulong ng DOH sa COMELEC upang talakayin ang kanilang plano para sa nalalapit na eleksiyon.—sa panulat ni Angelica Doctolero

Patuloy pang naghahanap ng pondo ang Department of the Interior and Local Government o DILG para sa ayudang kanilang ipamamahagi sa gitna ng granular lockdown.

Ayon kay Interior Undersecretary Jonathan Malaya, wala pang hiling na ayuda ang mga lokal na pamahalaan para sa mga residenteng apektado ng granular lockdown pero mayroong nakalaang isang libong food packs para ideploy sa mga residente ano mang oras.

Sinabi din ni Malaya na wala nang matatanggap na tulong pinansyal ang mga residente dahil nagamit na ang P11.2 bilyon noong nakaraang buwan sa Metro Manila.

Dagdag pa ng kalihim na nakadepende parin sa LGUs kung maglalaan pa sila ng cash aid sa kanilang nasasakupan. —sa panulat ni Angelica Doctolero

Makikipagtulungan na din ang Philippine National Police o PNP sa Department of Education o DEPED at Anti-Cybercrime Group o ACG upang imbestigahan ang nagaganap na online kopyahan ng mga estudyante.

Nabatid na humingi na ng tulong sa mga otoridad ang DEPED upang tukuyin ang salarin sa “online cheating.”

Matatandaang laganap sa Facebook group ang pagbibigayan ng mga sagot ng aabot sa 600,000 na mga mag-aaral sa kanilang mga exams at iba pang academic activities.

Ayon kay PNP Chief Gen. Guillermo Eleazar, agad niyang inatasan ang kaniyang mga tauhan para imbestigahan ang naturang insidente.

Bukod pa sa PNP, makikipagtulungan din sa imbestigasyon ang National Bureau of Investigation o NBI.—sa panulat ni Angelica Doctolero

Inaresto ng mga tauhan ng Bureau of Immigration ang dalawang dayuhang Koreano na wanted sa kanilang bansa matapos masangkot sa pagpapatakbo ng isang “online big-time illegal gambling”.

Kinilala ang mga inaresto na sina Kim Hyundou, 42-anyos at Lee Hyunjoo, 37-anyos na parehong pababalikin sa kanilang bansa dahil sa pagiging “undesirable” at “undocumented” matapos bawiin ang kanilang mga passport ng South Korean government.

Ayon kay Immigration Commissioner Jaime Morente, humiling at nag isyu ng summary deportation order at warrant of arrest ang South Korea para harapin ang mga kasong kriminal na isinampa laban sa mga suspek.

Sa ngayon inilagay na sa immigration blacklist ang dalawang puganteng Koreano upang maiwasan ang muling pagpasok ng mga ito sa bansa.—sa panulat ni Angelica Doctolero

Muling isinulong sa kamara ang House Bill 7678 na layuning bigyan ng danyos perwisyos ang mga biktima ng batas militar na ipinatupad ni dating Pangulong Ferdinand Marcos.

Ayon kay Bayan Muna Rep. Carlos Isagani Zarate, nasa limampung libong human rights victims ang hindi pa nakakukuha ng danyos.

Mula sa 60K biktima, 6K lamang ang inaprunahan ng human rights victims claims board  kaya’t umaapela ang mga pinagkaitan ng kompensasyon.

Kaya’t dapat lamang isulong ang panukalang batas na nabinbin simula noong 2020.

Kung maisasabatas anya ang bill, ilalaan ang umano’y ill-gotten wealth ng mga marcos na aabot sa P10 bilyon upang pondohan ang kabayaran sa mga biktima.

Ang naturang halaga ay mula sa perang nakuha ng Pilipinas sa ilalim ng Disyembre 10, 1997 order ng Swiss federal supreme court.—sa panulat ni Drew Nacino

Nanindigan ang COMELEC na hindi nito palalawigin ang voter registration para sa 2022 national elections.

Ito’y sa kabila ng isinusulong ng kongreso na i-extend ang registration sa bansa at ibayong dagat upang maiwasan ang voter disenfranchisement sa gitna ng COVID-19 pandemic.

Ayon kay Comelec Spokesman James Jimenez, bagaman ang kongreso ang may kapangyarihan, hindi naman nagbabago ang posisyon ng poll body.

Una nang nagbanta si Senate Minority Floor Leader Franklin Drilon na tatapyasan ang 2022 proposed budget ng Comelec kung tatanggi itong palawigin ang registration.

Magtatapos ang voter registration sa Setyembre 30.—sa panulat ni Drew Nacino

Aminado ang Malakanyang na mahirap hanapin ang Western-brand vaccines laban sa COVID-19.

Ito ang tugon ni Presidential Spokesman Harry Roque sa ulat na nagpakita ng mababang pagtanggap o “low acceptability” ang Davao City sa mga bakunang gawa ng China lalo na sa Sinovac at Sinopharm.

Ayon kay Roque, sadyang mayroong global shortage ng vaccine supply at hindi nag-iisa ang pilipinas sa mga bansang nahihirapang kumuha ng western brands ng bakuna.

Mas makabubuti anyang paalalahanan ang mga pilipino na ang lahat ng COVID-19 vaccines na inaprubahan para magamit ay epektibo.

Samantala, umabot na sa 64.9 million vaccines ang nakuha ng pilipinas at mahigit kalahati nito o nasa 36 milyon ay Sinovac habang ang Pfizer vaccine ang “most preferred” sa hanay ng Western brands.—sa panulat ni Drew Nacino

Nilinaw ni OCTA Research Group Fellow Molecular Biologist, Father, Nicanor Austriaco na hindi pa kailangan ang vaccine booster shots sa mayorya ng populasyon laban sa COVID-19.

Ito, ayon kay Austriaco, ay dahil nananatiling epektibo ang mga bakuna, batay sa kanilang kalkulasyon sa vaccine effectiveness sa Davao City.

Ang mga bakuna anyang ginagamit ngayon sa bansa ay nananatiling malakas at may kakayahang protektahan ang mga Pilipino laban sa Delta variant, na mas nakahahawang uri ng COVID-19.

Sa datos mula Davao, 86% ang effectivity ng bakuna indikasyon na hindi pa kailangan ng boosters para sa general population.

Samantala, inihayag ni Austriaco na nagsasagawa na sila ng pag-aaral upang malaman ang epekto ng mga COVID-19 vaccine sa health care workers.—sa panulat ni Drew Nacino