Karagdagang 15 ang nadagdag sa listahan ng mga namamatay sa COVID-19 sa lalawigan ng Benguet.
Ito na sa ngayon ang pinakamataas na daily COVID death toll sa lalawigan simula nang sumiklab ang pandemya.
Ayon sa Provincial Health Office, lumobo naman sa 402 kabuuang bilang ng namatay.
Bukod dito, nakapagtala rin ng karagdagang 337 COVID-19 cases kahapon kaya’t sumampa sa 14,268 ang total cases.
Sa ngayon ay mayroong 2,674 active cases at 11,192 recoveries sa lalawigan.—sa panulat ni Drew Nacino
Sumirit na sa $101.2 bilyon o mahigit P5 trilyon ang external debts Pilipinas sa ikalawang quarter ng taon.
Kumpara ito sa $97 bilyon o P4.8 trilyon sa pagtatapos ng unang quarter o hanggang katapusan ng Marso.
Ayon kay Bangko Sentral ng Pilipinas Governor Ben Diokno, ang 4.3% increase ay dahil sa net availments na $3.8 bilyon matapos makalikom ang gobyerno ng $3 bilyon sa mula sa issuance ng Euro-denominated global bonds at samurai bonds.
Umutang din anya ang pamahalaan ng $1.3 bilyon mula sa multilateral at bilateral creditors upang pondohan ang general financing requirements at pandemic response programs.
Pangunahing creditor ng Pilipinas ang Japan, Netherlands at United States.—sa panulat ni Drew Nacino
Umabot na sa 1,456,364 ang mga Pilipino mula sa ibang bansa ang napauwi o na-repatriate dahil sa COVID-19 pandemic.
Ayon kay Defense Secretary Delfin Lorenzana, kabilang sa mga na-repatriate ang halos 300K Pinoy na naninirahan na sa ibang bansa na piniling magbalik-bayan.
Ito na anya sa ngayon ang itinuturing na pinaka-malaking repatriation ng gobyerno simula nang sumiklab ang pandemya.
Tiniyak naman ng pamahalaan ang pagkakaloob ng tulong gaya ng negosyo at trabaho sa mga nagbabalikang Pinoy.—sa panulat ni Drew Nacino
Lusot na sa ikalawang pagbasa ng senado ang mga panukalang batas na magbibigay ng 25-year franchise sa Maynilad at Manila Water.
Inisponsoran ang House Bills 9422 at 9423 ni Senate Committee on Public Services Chairperson Grace Poe.
Sa ilalim ng mga panukalang batas, magpapatuloy ang Maynilad sa pagseserbisyo sa west zone service area ng Metro Manila at Cavite habang ang Manila Water sa East Zone ng Metro Manila at lalawigan ng Rizal.
Una nang inihayag ni Poe na inaasahan nilang pag-iigihin ng dalawang water concessionaires ang kanilang serbisyo sa mga customer.
Obligasyon anya ng mga ito na maghanap ng alternatibong pagkukunan ng tubig kapag may service interruption.
Samantala, inihirit naman ni Senador Pia Cayetano ang pag-aatas sa Maynilad at Manila water na magsumite sa Metropolitan waterworks and sewerage system ng completion plan para sa pagtatayo ng water, sewerage at sanitation projects hanggang taong 2037.—sa panulat ni Drew Nacino
Mistulang naghihingalo na ang ospital ng Imus sa Cavite dahil sa kakulangan ng staff sa gitna ng COVID-19 pandemic.
Ito’y makaraang magpositibo sa COVID-19 ang sampung health care workers na naka-assign sa COVID ward ng pagamutan.
Ayon kay Jong Tuazon, Nursing Supervisor ng ospital ng Imus, napuwersa na ang mga natitirang staff na magtrabaho ng dose oras.
Kailangan pa anyang maghintay na makatapos sa quarantine ang mga nagpositibo nilang katrabaho.
Aminado si Tuazon na kahit naka-12 hour duty na, napilitan na rin nilang isara ang kanilang outpatient department sa loob ng dalawang linggo.
Nananatiling nasa full capacity ang emergency room, Intensive Care Unit at COVID-19 ward ng nabanggit na ospital.—sa panulat ni Drew Nacino
Tiniyak ng Department of Education (DEPED) ang mas maayos o enhanced quality self-learning module ngayong school year 2021-2022.
Ayon kay DEPED Undersecretary for Curriculum and Instruction Diosdado San Antonio, nakipagtulungan sila sa Philippine Normal University sa pagsusuri ng mga learning materials.
Prayoridad din anya ng Bureau of Learning Delivery ang SLM enhancement na layuning magbigay ng mas maayos at magandang bersyon ng learning materials at suporta sa mga guro sa pamamagitan ng notes sa teachers.
Tinapos na rin ng kagawaran ang ikalawang bugso ng quality assurance para sa mga Self-Learning Module (SLM).
Bukas naman ang DEPED error watch para sa mga report hinggil sa mali-maling impormasyon na nakalagay sa module.—sa panulat ni Drew Nacino
Bumaba pa sa 1.1 ang reproduction rate ng COVID-19 sa National Capital Region, indikasyon na bumagal na ang hawaan ng naturang sakit.
Ayon kay OCTA research team fellow, Dr. Guido David, mas mababa na rin sa “zero” ang growth rate sa NCR sa mga nagdaang araw habang nasa negative growth rate na ang ibang LGU gaya sa Cavite at Laguna.
Kampante anya silang magpapatuloy ang downward trend ng COVID-19 cases sa Metro Manila gaya ng sitwasyon sa ibang bansa partikular sa India at Indonesia na nakaranas ng pagtaas at pagbaba ng kaso ng delta variant.
Gayunman, nilinaw ni David na hindi pa ito indikasyon na magtatapos na ang laban sa COVID-19 at dapat pa ring mag-ingat ng publiko, bakunado man o hindi. —sa panulat ni Drew Nacino
Nasa 2,600 trabaho ang alok ng Government Online Career Fair o GOCF 2021 ng Civil Service Commission.
Ayon kay CSC Commissioner Aileen Lizada, katuwang nila ang jobstreet sa pagbubukas ng online application sa mga bakanteng puwesto.
Batay sa website ng komisyon, dapat magparehistro sa kanilang registration link ang mga naghahanap ng trabaho at ilakip ang kanilang e-mail address kung saan pipirma rin ng personal data sheet.
Magbibigay naman ng abiso ang mga ahensya sa pamamagitan ng email o text message hinggil sa status ng application.
Samantala, bukas ang GOCF 2021 hanggang Biyernes, Setyembre 24. —sa panulat ni Drew Nacino
Nananatiling “gold standard” ang RT-PCR testing upang makumpirma ang presensya ng COVID-19.
Ito ang binigyang-diin ng Department Of Health sa kabila ng umano’y false positive COVID-19 results ng Philippine Red Cross sa Subic, Zambales.
Ayon kay DOH Spokesperson, Undersecretary Maria Rosario Vergeire, sinusuri rin ng Research Institute for Tropical Medicine ang tests kits na ginagamit sa bansa.
Una nang ipinag-utos ni Pangulong Rodrigo Duterte sa DOH na imbestigahan ang marami umanong false positive results ng RT-PCR test ng red cross.—sa panulat ni Drew Nacino
Pinagpaplanuhan na ng pamahalaang lokal ng Valenzuela ang paglalagay ng bike lane sa Mcarthur Highway para sa mga siklista.
Ayon sa Valenzuela City Government, nasa 6.7 kilometers ang haba ng gagawing daanan para sa mga nagbibisikleta sa naturang lugar.
Sa naging pahayag naman ni Valenzuela City Mayor Rex Gatchalian, marami sa mga residente sa kanilang lungsod ang gumagamit ng bisikleta papasok sa kanilang mga trabaho.
Aniya, layunin ng kanilang lungsod na maparami at mahikayat ang iba pang mga residente na gumamit ng mga bike sa halip na sumakay sa mga pampubliko at pribadong sasakyan.
Titiyakin naman ng pamahalaang lokal na dumaan sa pag-aaral ang paglalagay ng bike lane sa kanilang lungsod.—sa panulat ni Angelica Doctolero