HEADLINES

Arestado ang isang dayuhan at dalawang pinoy na kasama nito sa isinagawang buy bust operation sa Purok 2, Gibraltar, Baguio City.

Kinilala ang foreign national na si Hamed Abraham habang ang dalawang Pinoy ay sina Troy Adalim Mencio Jr., at Daniel Paul Castro.

Tinatayang nasa P20,000 halaga ng kush o dried marijuana ang nakumpiska sa mga suspek.

Narekober din ang 19 na piraso ng P1,000 na pekeng pera na ginamit bilang buy bust money.

Nilinaw ng pulse asia survey na hindi natutukoy sa mga isinasagawang election survey kung sino ang mananalo sa halalan.

Ayon kay Dr. Ana Maria Tabunda, ang ipinapakita lamang ng mga election survey na ito ay ang mga kandidatong napipisil ng publiko na tumakbo sa partikular na puwesto.

Ani Tabunda, kung mapapansin sa mga nakaraang presidential elections, ang mga nangunguna sa mga maagang inilabas na survey ay hindi naman nananalo pagdating sa resulta ng eleksyon.

Giit ni Tabunda, ang survey ay nagbibigay lamang ng ideya sa publiko kung ano ang preference ng ibang tao o kung sino ang maaaring kumandidato.

Marami pa aniyang isyu na posibleng lumabas sa mga susunod na panahon na maaaring maka-impluwensya sa mga botante.

Inindorso ng opposition coalition 1Sambayan si Vice President Leni Robredo sa 2022 presidential elections.

Ang pag-endorso ng 1Sambayan kay Robredo ay inanunsyo mismo ni retired Associate Justice Antonio Carpio, isa sa mga convenor ng koalisyon.

Una nang inihayag ni Robredo na magpapasya siya sa tatakbuhang posisyon sa 2022 elections sa panahon ng filing ng Certificate of Candidacy simula bukas, Oktubre 1 hanggang 8.

Ang 1Sambayan ay inilunsad noong Marso para magkasa ng national candidates sa 2022 elections bilang panlaban sa mga kandidato ng Duterte administration.

Ibinunyag ni Defense Secretary Delfin Lorenzana ang anito’y pakikialam ng China sa Philippine US mutual defense treaty.

Sinabi ni lorenzana na nakikialam ang ibang bansa kaya’t bigo ang Pilipinas at Amerika na repasuhin ang nasabing treaty na malaki ang tulong para mapalakas ang defense capability ng Pilipinas.

Sa katunayan, ipinabatid ni Lorenzana na sinabihan siya ng dating Chinese ambassador na huwag nang galawin o baguhin ang bahagi ng kasunduan.

Binigyang-diin  ni Philippine Ambassador to US Jose Manuel Romualdez na dapat palakasin ang kasunduan lalo pa’t maraming hamon ang kinakaharap ng Indo Pacific Region.

Ayon naman kay bagong US Embassy Charge De Affaires Heather Variava, Pilipinas ang pinakamatandang kaalyado ng Amerika sa Asya at ang 70 taong gulang na MDT ay patunay ng magandang relasyon ng dalawang bansa.—mula sa ulat ni Jaymark Dagala (Patrol 9)

Pinaiimbestigahan ng Makabayan Bloc sa House Committee on Agriculture and Food ang pagdagsa ng imported na gulay sa mga palengke.

Ayon sa Makabayan Bloc, may impormasyon silang nakuha na nakaimbak lamang sa isang maliit na bodega malapit sa divisoria ang mga inangkat na gulay na inilalabas lamang kapag tumaas na ang presyo ng mga gulay mula sa Benguet.

Sinabi ng makabayan bloc na tatlumpung sako na lamang ng Carrots  mula sa dating 100 ang nabebenta kumpara sa mga nailalakong imported carrots at iba pang gulay.

Una nang binalaan ng Department of Agriculture ang publiko laban sa pagbili ng smuggled vegetables dahil sa taglay nitong  pesticide residue.

Hindi lahat ng mga bansa ay kabilang sa bloomberg report.

Ito ayon sa Palasyo ay kaya’t hindi maituturing na pinakamalala o worst ang Pilipinas sa isyu ng COVID-19 resilience.

Sinabi ni Presidential Spokesman Harry Roque na 53 lamang mula sa halos 200 bansa ang isinailalim sa survey ng bloomberg.

Gayunman, inihayag ni Roque na ang pagtugon ng gobyerno sa COVID-19 pandemic ay naapektuhan ng quarantine restrictions kabilang ang lockdowns na ipinatupad ng gobyerno para hindi kumalat ang COVID-19 sa gitna na rin nang pag-usbong ng delta variant.

Isinusulong ng Phapi Private Hospitals Association of the Philippines ang dalawang linggong extension ng alert level 4 sa NCR.

Ayon kay Dr. Jose De Grano, pangulo ng Phapi, hindi kumbinsido ang healthcare professionals na pababa ang kaso ng COVID-19 kaya’t maaga pa para ibaba ang alert level system sa Metro Manila.

Sinabi ni De Grano na mataas pa rin ang mahigit 10,000 COVID-19 cases kada araw kahit pa pababa na ang trend dahil sa ipinatutupad na alert level system.

Bukod dito, ipinabatid ni De Grano na puno pa rin ang mga pribadong ospital sa NCR at nasa kritikal na sitwasyon dahil sa kakulangan ng healthcare workers.

Tuluyang bumaba na sa 0.87 ang COVID-19 reproduction number sa National Capital Region o NCR ayon sa OCTA research.

Sinabi ng OCTA, na ikinukunsidera na itong “low” dahil mas mababa ito sa 0.9.

Bumaba na rin umano sa 3,891 ang average ng bagong kaso ng COVID-19 sa NCR sa nakalipas na pitong araw.

Gayunpaman, nananatili pa rin umanong high risk ang NCR ngunit posibleng mabago ito sa moderate risk sa mga susunod na linggo.

Sa ngayon, nasa moderate risk sa NCR ang Navotas, Maynila, Malabon, Pasay, Valenzuela at Pateros.