HEADLINES

Tiniyak ni DILG Secretary Eduardo Año na hindi basta-basta makapagpapatupad ng granular lockdown ang isang local executive.

Ito ang nilinaw ni Año sa gitna ng pangambang maaaring magamit ang pagpapatupad ng granular lockdown sa isang lugar upang mapigilang makalabas ang isang kalaban sa politika para mangampanya sa May 2022 elections.

Sa ilalim ng alert level system sa Metro Manila, ang mga local government unit ang may kapangyarihan na magpatupad ng granular lockdowns sa mga COVID-19 hotspot area.

Gayunman, hindi naman anya kontrolado lahat ng mga LGU ang pagpapatupad ng lockdown dahil dadaan ito sa kumpirmasyon ng Regional Inter-Agency Task Force.

Ipinangako naman ng kalihim na mahaharap sa kaso ang mga tiwaling opisyal na mananamantala sa pagpapatupad ng granular lockdown para sa kanilang sariling political interest. —sa panulat ni Drew Nacino

Sumirit pa sa P11. 64 trilyong ang utang ng Pilipinas sa pagtatapos ng Agosto, kumpara sa P11.61 trilyon na naitala noong Hulyo.

Ito na ang pinakamataas sa kasaysayan ng bansa na nataong kasabay ng COVID-19 pandemic.

Ayon sa Bureau of Treasury, pinakamalaking bahagi ay domestic debts na aabot sa 8.22 trillion pesos habang P3.42 trilyon sa foreign debts.

Una nang tinaya ng gobyerno na lolobo sa P13 trilyon ang outstanding debt ng Pilipinas sa 2022. —sa panulat ni Drew Nacino

Plantsado na ang Certificate Of Candidacy ni Pangulong Rodrigo Duterte.

Ayon kay Presidential Spokesman Harry Roque, nilagdaan na ni Pangulong Duterte ang COC pero hindi pa malinaw kung personal itong ihahain sa Commission on Elections.

Mayroon pa naman anyang hanggang Oktubre 8 at Nobyembre 15 ang Pangulo para makapag-desisyon.

Una nang tinanggap ni Pangulong Duterte ang nominasyon ng PDP – laban Cusi faction bilang kandidato sa pagka-Bise Presidente sa 2022 election. —sa panulat ni Drew Nacino

Muling ipinaalala ng Commission on Elections sa mga kandidatong maghahain ng Certificate Of Candidacy simula ngayong araw hanggang Oktubre 8 na sumunod sa public health standard.

Magugunitang nilimitahan ng COMELEC ang pagsasama ng mga supporter ng mga kakandidato sa paghahain ng COC.

Ayon sa poll body, hanggang tatlo lamang ang maaaring isama ng mga kandidato sa national level habang isa sa mga local candidate.

Ang mga national candidate ay maghahain ng COC sa Sofitel garden tent, pasay city pero dapat magpresenta ng negative antigen result o RT-PCR test na kinuha hindi lalagpas sa bente kwatro oras.

Tiniyak naman ni COMELEC Chairman Sheriff Abas ang koordinasyon sa AFP at PNP para sa seguridad at MMDA para sa pagsasaayos ng daloy ng trapiko. —sa panulat ni Drew Nacino

Pinalawig din ng dalawang linggo ang Modified Enchanced Community Quarantine (MECQ) sa ilan pang lugar lalo sa Luzon.

Simula ngayong araw hanggang Oktubre ay mananatili sa MECQ ang mga lalawigan ng apayao, Kalinga, Batanes, Bataan, Bulacan, Cavite, Lucena City, Rizal, Laguna, Naga City at Iloilo Province.

Epektibo naman hanggang Oktubre 15 ang General Community Quarantine sa Abra, Baguio City, Ilocos Sur, Pangasinan, Cagayan, Isabela, City of Santiago, Nueva Vizcaya, Quirino, Quezon, Batangas, Bacolod City.

Kabilang rin ang ,Capiz, Iloilo City, Lapu-Lapu City, Negros Oriental, Bohol, Zamboanga Del Norte, Zamboanga Del Sur, Cagayan De Oro City, Misamis Oriental, Davao Del Norte, Davao Occidental, Butuan City At Surigao Del Sur habang hanggang 15 lang sa Davao De Oro.

Naka-GCQ. rin hanggang Oktubre 31 ang Ilocos Norte, Dagupan City, Benguet, Ifugao, Tarlac, Marinduque, Occidental Mindoro, Oriental Mindoro, Puerto Princesa, Albay, Camarines Norte For Luzon, Aklan, Antique;

Habang kasama rin ang Guimaras, Negros Occidental, Cebu City, Cebu Province,  Mandaue City, Siquijor, Tacloban City Zamboanga Sibugay, Zamboanga City, Misamis Occidental, Iligan City, Davao City, Davao Oriental, Davao Del Sur, General Santos City, Sultan Kudarat, Sarangani.

Gayundin ang mga lugar sa North Cotabato, South Cotabato, Agusan Del Norte, Agusan Del Sur, Dinagat Islands, Surigao Del Norte, Cotabato City, and Lanao Del Sur habang ang nalalabing bahagi ng bansa ay nasa ilalim ng Modified General Community Quarantine.—sa panulat ni Drew Nacino

Pinalawig ang pilot implementation ng alert level 4 sa Metro Manila, simula ngayong araw hanggang Oktubre 15.

Ayon kay Presidential Spokesman Harry Roque, bagaman epektibo ang bagong alert level system dahil sa unti-unting pagbaba ng COVID-19 cases,hindi dapat mawala ang momentum ng gobyerno sa kampanya kontra COVID.

Aprubado na rin ng IATF ang re-opening ng fitness studios at gyms sa limitadong 20% capacity para sa mga fully vaccinated individual, basta bakunado ang lahat ng gym workers.

Gayunman, kailangang naka-facemask sa lahat ng oras at ipinagbabawal ang group activities sa mga gym.

Pinayagan ding magdagdag ng 10% capacity ang mga establisyimentong may safety seal certification.  —sa panulat ni Drew Nacino

Kumpiyansa si National Task Force against COVID-19 special adviser Dr. Ted Herbosa na maaari nang ibaba sa alert level 3 ang Metro Manila.

Ayon kay Herbosa, ito ay dahil nasa 80% na ang vaccination rate ng Pilipinas.

Positibo rin aniya ang magiging epekto ng pagbabakuna sa general population para lalong maibaba ang alert level status sa rehiyon.

Gayunman, naniniwala si Herbosa na hindi pa napapanahon para magkaroon ng batas para maipatupad ang mandatory vaccination.

Mas maganda umano kung gagawin ito sa mga doktor at nurse dahil sila ay maituturing na high risk workers sa COVID-19.

Pinag-aaralan ngayon ng ECC o Employees’ Compensation Commission ang posibilidad na maisama ang mga empleyadong naka-work from home sa kwalipikadong makatanggap ng COVID-19 benefits.

Ayon kay ECC executive director Stella Zipagan Banawis, sa ngayon kasi ang tanging maaaring makatanggap ng benepisyo ay ang mga empleyadong nakakuha ng virus sa trabaho.

Kaya naman sinisilip ngayon kung maaari rin na maisama ang mga empleyadong nagka-COVID sa bahay dahil nagtatrabaho rin ang mga ito sa kanilang tahanan.

Sa kasalukuyan, ang mga benepisyong natatanggap ng mga empleyadong tinamaan ng virus dahil sa trabaho ay income, medical reimbursement, death at funeral at cash assistance.

Nagbabala ang Food and Drug Administration o FDA sa publiko laban sa pagbili ng COVID-19 vaccine online.

Nakasaad sa abiso ng FDA, scam ang mga nagbebenta ng bakuna sa social media at iba pang online selling platform.

Tunay aniyang nakakatawag pansin sa mga buyer dahil maaari ka pang mamili ng brand ng bakuna kung ito ba ay Astrazeneca, Pfizer o Moderna,

Nag-aalok umano ng iba’t ibang packaged deal ang mga scammer na ito sa kanilang ibinebentang bakuna kung saan kailangan munang magbayad ng delivery fee, insurance fee at iba pa nilang singilin bago i-deliver ang produkto, na sa katunayan ay wala namang ide-deliver sa buyer.

Kaugnay nito, nagpaalala ang ahensya na sa ngayon ay tanging mga awtoridad lamang ang maaaring makapagbigay ng bakuna kontra COVID-19.

Nasa 31 lugar sa bansa ang nakitaan ng aktibong kaso ng African Swine Fever o ASF ayon sa Bureau of Animal Industry o BAI.

Sinabi ni BAI director Reildren Morales, hindi pa nareresolba ang mga kasong ito ng ASF dahil hindi pa natatapos ang surveillance sa mga lugar na ito.

Saad pa ni Morales, dumarami ang mga lugar na nagkakaroon ng ASF dahil napaka-resilient ng virus na ito.

Kaugnay nito, nakiusap si Morales sa mga hog raiser na paigitingin ang kanilang biosecurity upang maprotektahan ang mga alagang baboy laban sa virus.