HEADLINES

Nananatiling nasa critical risk level pa rin ang healthcare utilization sa tatlong rehiyon sa bansa.

Sa laging handa briefing, sinabi ni One  Hospital Command Center Medical Director  Dr. Marylaine Padlan, na ito ang mga rehiyon  ng Cordillera Administrative Region o CAR,  Region 2 at CARAGA.

Aabot naman sa mahigit isandaang libo ang bilang ng mga pasyenteng nagpapagaling pa  sa sakit.

Kabilang rin sa nasa high risk level ang  Region 4B o MIMAROPA, Region 5 at Region 9.

Sa naturang bilang, nasa pitumpu’t-pitong porsyento ang mild cases, labinglimang porsiyento naman ang asymptomatic dalawang porsiyento ang severe cases at  isang porsiyento naman ang nasa critical condition.

Kinumpirma ng Bureau of Immigration o BI na ang Bermuda ang nag-iisang bansa na nasa red list ng Pilipinas.

Ang mga bansa o teritoryo na nasa moderate risk ay ang mga yellow list.

Samantala ang mga pasahero na mula sa green at yellow countries ay kinakailangang sumailalim sa quarantine at testing protocols ng Bureau of Quarantine o BOQ.

Sa kasalukuyan, nananatiling pina-iiral na travel restrictions sa international travelers kung saan mga pilipino lamang, balikbayan at mga dayuhan na may valid at existing visa ang pinapayagang pumasok sa bansa.

Itutuloy ng Meralco ang pamumutol ng kuryente sa kabila ng pagpapatupad ng alert level 4 system hanggang sa akinse ng Oktubre.

Siniguro ng Meralco ang mga customer sa NCR na nakatira sa mga lugar na inilagay sa granular lockdown ay hindi muna puputulan ng kuryente.

Samantala, ang disconnection activities sa mga lalawigan ng Bulacan, Cavite, Laguna, Rizal, at Lucena City sa Quezon na nasa ilalim pa rin ng Modified Enhanced Community Quarantine o MECQ  mula Oktubre 1 hanggang 15, ay mananatili pa ring suspendido.

Samantala, sinabi ng Meralco na sa mga natitirang lugar ng kanilang franchise, partikular na sa  Batangas at Quezon na nasa ilalim ng General Community Quarantine ay patuloy pa rin ang disconnection activities.

Tiniyak naman ng naturang kumpanya na magiging “considerate” sila sa mga hinaing ng kanilang mga konsyumer.

Umakyat na sa 2, 565, 487 ang kabuuang kaso  ng Covid-19 sa bansa.

Sa datos ng Department Of Health o DOH ito’y  makaraang madagdagan ng 15,000 na bagong kaso ng virus.

Sa nasabing bilang, nasa 130, 268 na ang aktibong kaso ng virus sa bansa.

2, 396,726 naman ang bilang ng mga gumaling sa Covid-19 dahil sa karagdagang 23, 483 na  bagong gumaling.

Samantala, 199 naman ang bagong nasawi sa  Covid-19 sa bansa dahilan para sumirit sa 38, 493 ang kabuuang bilang ng mga nasawi bunsod ng Covid-19.

Positibo ang naging resulta sa isinagawang clinical trials sa virgin coconut oil at lagundi bilang gamot kontra Covid-19.

Ito’y ayon kay Jaime Montoya, Executive Director ng Department of Science and Technology-Philippine Council for Health Research and Development.

Sinabi ni Montoya na naging maganda ang resulta matapos gamitin panggamot ang virgin coconut oil at lagundi sa mga pasyenteng nakararanas ng mild at moderate symptoms ng Covid-19.

Ibinahagi ito ni Montoya makaraang kamustahin ni Sen. Francis Tolentino ang potensyal ng purong langis ng niyog at lagundi sa paglaban sa virus.

Kabilang si Montoya sa humarap sa pagdinig ng Senate Finance Subcomittee sa hinihinging dagdag pondo ng DOST para sa susunod na taon.

Samantala, umaasa si Montoya na matatapos ang clinical trials ng paggamit ng tawa-tawa sa mga pasyente na may Covid-19 sa susunod na buwan.

Pinapayagan na ng pamunuan ng Metro Rail Transit o MRT line-3 ang pagpasok at pagsakay ng mga bisikleta sa tren ng MRT-3.

Ito ay kasunod pa rin ng pagdami ng bilang ng mga manggagawa na gumagamit na ng bisikleta sa pagpasok sa trabaho sa gitna ng nararanasang pandemya.

Sa abisong inilabas ng Department of Transportation (DOTr) MRT-3, ang mga folding bike pa lamang na may gulong na hindi lalagpas sa 20 inches ang diameter ang pinahihintulutang maisakay sa mga tren.

Pero ayon sa MRT-3 management, maaari din namang mag-iwan ng bisikleta sa mga free bicycle rack na inilagay sa lahat ng istasyon ng MRT-3 mula pa noong July noong nakalipas na taon.

Ang pagpayag na maisakay ang mga bisekleta ay bahagi pa rin ng layunin ng DOTr na isulong ang active transport kabilang na ang paggamit ng bisikleta ngayong panahon ng new normal.

Inihayag ni Pangulong Rodrigo Duterte na bibisita ito sa Marawi City sa ika-apat na anibersaryo ng paglaya nito mula sa mga terorista.

Sa isang recorded na talk to the people ng pangulo, sinabi nito na a-attend siya sa ribbon-cutting ceremony sa ni-rehabilitate na Grand Mosque.

Mismong si Housing Secretary Eduardo Del Rosario, pinuno ng Task Force Bangon Marawi ang nag-imbita kay Pangulong Duterte.

Una ng binanggit ng pangulo na pumunta ito sa marawi nuong panahon ng giyera lalo na ngayong payapa na ito mula sa kamay ng mga terorista.

Sa ngayon, sinabi ni Del Rosario na marami nang natapos na mga proyekto sa marawi upang makabalik na sa normal na pamumuhay ng mga kapatid na muslim.

Pirmado na ni Pangulong Rodrigo Duterte ang Republic Act 11591 o an act fixing the last day of registration of voters for the 2022 national and local elections.

Nakasaad sa nasabing batas, na palalawigin pa ng isang buwan ang pagpaparehistro mula September 30 ililipat ito sa a trenta ng Oktubre base na rin sa panukalang pinagtibay ng mababa at mataas na kapulungan ng kongreso.

Una nang nanawagan ang malakanyang sa mga botante na magparehistro para sa karapatan na makaboto sa susunod na halalan.

Sinabi ng palasyo na samantalahin ang pagboto at huwag na hintayin ang huling araw nito.

Pumalo na sa kabuuang 39,967 ang kabuuang bilang ng mga dinapuan ng Covid-19 sa hanay ng pulisya.

Ito’y matapos na maitala ng PNP health service ang 134 na bagong kaso ng virus.

2,023 ang bilang ng mga nananatiling aktibo sa Covid-19.

37,826 na ang bilang ng mga nakarekober sa Covid-19 matapos na madagdagan ng 195.

Samantala, 118 na ang kabuuang bilang ng mga nasawi sa Covid-19 matapos na madagdagan ng isang panibagong nasawi.