Umakyat na sa 2,565,487 ang kabuuang kaso ng COVID-19 sa bansa.
Sa datos ng Department of Health (DOH) ito’y makaraang madagdagan ng 15,000 na bagong kaso ng virus.
Sa nasabing bilang, nasa 130,268 na ang aktibong kaso ng virus sa bansa.
2,396,726 naman ang bilang ng mga gumaling sa COVID-19 dahil sa karagdagang 23,483 na bagong gumaling.
Samantala, 199 naman ang bagong nasawi sa COVID-19 sa bansa dahilan para sumirit sa 38,493 ang kabuuang bilang ng mga nasawi bunsod ng COVID-19.
Nananatiling nasa critical risk level pa rin ang healthcare utilization sa tatlong rehiyon sa bansa.
Sa Laging Handa briefing, sinabi ni One Hospital Command Center Medical Director Dr. Marylaine Padlan, na ito ang mga rehiyon ng Cordillera Administrative Region (CAR), Region 2 at CARAGA.
Aabot naman sa mahigit 100,000 ang bilang ng mga pasyenteng nagpapagaling pa sa sakit.
Kabilang rin sa nasa high risk level ang Region 4B o MIMAROPA, Region 5 at Region 9.
Sa naturang bilang, nasa 77% ang mild cases, 15% naman ang asymptomatic 2% ang severe cases at 1% naman ang nasa critical condition.
Palit puwesto ang mga kongresista at alkalde ng ibang lalawigan sa Halalan 2022.
Ito’y matapos maghain ng Certificate of Candidacy si Muntinlupa Representative Ruffy Biazon para kumandidato bilang alkalde kung saan tatakbo namang kongresista ng lungsod.
Si Biazon ay anak ni dating Senador Rodolfo Biazon, ang kasalukuyang vice chairperson ng House Committees on Appropriations at National Defense and Security.
Samantala, naghain din ng COC si Deputy Speaker Wes Gatchalian, para tumakbo bilang alkalde ng Valenzuela na pinamamahalaan ngayon ng kanyang kapatid na si Rex Gatchalian.
Tatakbo naman sa 2022 Elections si Rex bilang kongresista, kapalit ng kaniyang kapatid na si Wes.
Habang ang kanilang kapatid na si Sen. Sherwin Gatchalian ay Re-Electionist bilang senador sa naturang Halalan.
Aabot sa P6.8-M halaga ng shabu ang nakumpiska sa tatlong miyembro ng criminal group sa ikinasang buy-bust operation sa Parañaque City, kamakalawa.
Kinilala ang mga suspek na sina Esmail Taha Abdilla alyas Waway Taba, ng ‘Arman Apinado Robbery and IlleGal Drug Group’ at kabilang sa High Value Individual (HVI); Salahudin Burak Zumbaga at Amad Abo.
Maliban sa isang kilo ng shabu, nakuha din sa mga ito ang isang Ford Lynx, iba’t ibang identification cards, at dalawang cellphone.
Nahaharap sa kasong paglabag sa RA 9165 o Comprehensive Dangerous Drugs Act of 2002 ang mga suspek. —sa panulat ni Hyacinth Ludivico
Inihayag ng pharmaceutical firm na Merck, na epektibo ang kanilang gamot na “Molnupiravir” laban sa lahat ng variant ng COVID-19.
Ayon sa Merck, mas mabisa ang nasabing gamot kung maibibigay ito kaagad sa pasyente sa simula pa lang na mahawahan ng virus.
Sa ulat naman ng Reuters, naibaba umano ng Molnupiravir ng hanggang 50% ang tiyansa na maospital at masawi ang mga pasyenteng itinuturing na severe cases.
Balak ng Merck at partner nitong Ridgeback Biotherapeutics na magsumite ng Emergency Use Authorization sa iba’t ibang mga bansa. —sa panulat ni Hyacinth Ludivico
Umabot na sa 523 ang aktibong kaso ng COVID-19 sa Batanes.
Sa datos ng provincial government nitong Biyernes, nakapagtala ng 14 na panibagong kaso ang lalawigan kaya’t umakyat na sa 589 ang kabuuang COVID-19 cases sa lalawigan.
Nakapagtala rin ang Batanes ng 18 bagong gumaling sa sakit dahilan upang pumalo na sa 64 ang total recoveries.
Habang dalawa naman ang naitalang nasawi dahil sa COVID-19 sa Batanes.
Muli namang pinaalalahanan ng lokal na pamahalaan ang mga residente na sundin ang minimum public health standards. —sa panulat ni Hyacinth Ludivico
Panibagong batch ng Pfizer-Biotech at Sinovac COVID-19 vaccines ang natanggap ng bansa kahapon.
Unang dumating ang 883,350 doses ng Pfizer na donasyon mula sa Covax facility at bago mag-alas sais ng gabi ay lumapag naman ang eroplanong may dala ng 2.5 million doses ng Sinovac vaccine.
Ayon kay National Task Force Against COVID-19 Chief Implementer Carlito Galvez Jr., ipamamahagi ang mga naturang bakuna sa calabarzon, Central Luzon, Central Visayas, at Davao Region.
Sa ngayon, aabot na sa mahigit 74.7 million doses ng COVID-19 vaccine ang kabuuang suplay ng bakuna na natanggap ng Pilipinas. —sa panulat ni Hyacinth Ludivico
Walo ang naitalang nasawi dahil sa COVID-19 sa Sorsogon.
Kinumpirma ito ng pamunuan ng Sorsogon Provincial Health Office kung saan nabatid na pito sa mga ito ay fully vaccinated na laban sa virus habang ang isa naman ay nakatanggap pa lamang ng first dose ng bakuna.
Sinabi ni Provincial Health Officer Dr. Renato Bolo Jr., na batay sa kanilang datos ay umabot na sa 286 ang kabuuang bilang ng mga nasawi sa naturang sakit.
Base rin aniya sa kanilang pag-aaral, maraming senior citizen na bakunado na ang nakaligtas mula sa pagkasawi kumpara sa mga hindi pa nabakunahan.
Kaugnay nito, patuloy na hinihikayat ng PHO ang mga residente na magpabakuna na kontra COVID-19. —sa panulat ni Hyacinth Ludivico
Naging mapayapa ang unang araw ng Filing of Candidacy para sa 2022 Elections ayon sa COMELEC.
Sinabi ni COMELEC Spokesperson James Jimenez na walang naging problema kahit pa sa pagsunod sa mga ipinatutupad na health protocols.
May mga pagkakataon lang aniya na minsan ay kailangan magpaalala ng mga poll officer sa mga tao na panatilihin ang physical distancing.
Una rito, ni-require ng COMELEC ang lahat , kabilang ang media na magprisinta ng negative COVID-19 test na valid sa loob ng 24 oras bago sila payagang pumasok sa COC filing area.
Magpapadala ang Armed Forces of the Philippines ng medical teams sa mga ospital sa Metro Manila dahil sa kakulangan sa mga personnel bunsod ng pagtaas ng mga kaso ng COVID-19.
Ayon kay AFP Surgeon General Col. Fatima Claire Navarro, magdedeploy ang militar ng dalawang team sa mga ospital na binubuo ng isang military doctor at limang military nurses.
Kabilang umano rito ang St. Luke’s Medical Center na may Memorandum of Agreement na sa Department of Health.
Sinabi pa ni Navarro na ang bawat medical team ay obligadong magpakita ng negatibong COVID-19 result at sasailalim sa 14-day duty na susundan ng 14-day quarantine. —sa panulat ni Hyacinth Ludivico