HEADLINES

Excise tax sa LPG at kerosene, pansamantalang sinuspende ni PBBM

Pansamantalang sinuspinde ni Pangulong Ferdinand Marcos Jr. ang excise tax sa liquefied petroleum gas at kerosene sa pamamagitan ng Executive Order Number 125.

Sa ilalim ng direktiba, saklaw ang LPG maliban kung ginagamit bilang raw material sa petrochemical products o bilang panggatong sa mga sasakyan.

Bukod dito, hindi rin saklaw ang kerosene kung ginagamit bilang aviation fuel.

Ginawa ang suspensyon matapos umabot sa 99.41 dolyar kada bariles ang average Dubai crude oil price sa nakaraang tatlumpung araw, mas mataas sa 80 dolyar na threshold para sa suspensyon ng excise tax.

Inirekomenda ito ng DBCC, kasama ang Department of Energy. | Sa panulat ni Reabelle Medina

September 26, 2026 0 comment

HEADLINES NATIONAL NEWS

DOTr, inaprubahan ang fare hike sa mga PUV; pamasahe sa jeepney, nadagdagan

written by DWIZ 882

Inaprubahan ni Acting Transportation Secretary Giovanni Lopez ang rekomendasyon ng Land Transportation Franchising and Regulatory Board para sa pagtaas ng pamasahe sa mga public utility vehicle.

Kabilang sa inaprubahan ang pisong dagdag sa minimum fare ng mga traditional jeepney at dagdag na dalawang piso sa bawat susunod na kilometro.

Ayon kay Sec. Lopez, mula sa dating labintatlong piso, magiging labing-apat na piso ang pamasahe para sa unang apat na kilometro.

Samantala, para sa mga modern jeepney naman, magiging labing-pitong piso ang minimum fare mula sa labinlimang piso at magiging dalawang piso at apatnapung sentimo naman ang dagdag sa bawat susunod na kilometro, mula sa dating dalawang piso at dalawampung sentimo.

Kasabay nito, inaprubahan din ng DOTr ang rekomendasyon ng LTFRB para sa provisional fare hike sa UV Express at taxi services alinsunod sa mga fare adjustment na inaprubahan ng LTFRB noong Marso. | Sa panulat ni Reabelle Medina

September 26, 2026 0 comment

HEADLINES HOT STORIES OF THE WEEK NEWS

Voting Threshold, Hindi Ibinaba Ayon sa Prosecution

written by DWIZ 882

“Hindi po ibinaba ang threshold!”

Ito ang binigyang-diin sa press conference ni House Lead Prosecutor Gerville Luistro, na walang binago sa nakasaad sa Konstitusyon at mananatiling two-thirds ang batayan para sa voting threshold o kakailanganing boto mula sa mga senator-judge para sa conviction.

Ayon kay Luistro, nilinaw na ng Senate Impeachment Court na ang two-thirds of votes ay tumutukoy sa mga senator-judge na dumadalo at kwalipikadong bumoto.

Paliwanag ni Luistro, hindi kasama sa botohan ang mga nakakulong, suspendido, nagtatago at hinahabol ng batas, mga may physical at medical capacities, at maging ang mga hindi na saklaw ng kapangyarihan ng Senado.

Samantala, nilinaw naman ni House Committee on Human Rights Chairman at Manila Rep. Benny Abante, na ang ruling sa voting threshold ay hindi hatol ng mga alegasyon kundi kailangang marinig at timbangin ang buong ebidensya.

Pinasalamatan naman ni Abante ang Senate Impeachment Court dahil napanindigan nila ang kanilang karapatan sa pagdedesisyon sa voting threshold. | mula sa panulat ni Geli Mendez

September 24, 2026 0 comment

HEADLINES NATIONAL NEWS NEWS

Kasunduan ng discord at pamahalaan, malaking tulong sa pagtiyak ng kaligtasan ng publiko partikular ng mga menor-de-edad

written by DWIZ 882

Naniniwala ang Department of Information and Communications Technology-Cybercrime Investigation and Coordinating Center o DICT-CICC na malaking tulong sa pagtiyak ng kaligtasan ng publiko, partikular sa mga menor-de-edad, ang mga commitment ng online communication platform na Discord sa pamahalaan.

Kasunod ito ng anunsiyo ni Sec. Henry Aguda sa Kamara na binawi na ang “ban” ng Gobyerno ng Pilipinas sa online communication platform na Discord.

Ayon kay CICC Executive Director Renato Paraiso, kabilang sa ipinangako ng Discord ang pagkakaroon ng Philippine presence at “green lane” para sa mga request ng pamahalaan, kasama ang mga reklamo at sumbong.

Paliwanag ni Paraiso, ang Discord ay popular platform sa hanay ng mga online gamers.

Nauna nang iniuugnay ang platform sa mga alegasyong ginagamit umano ang Discord ng Nihilistic Violent Extremism o NVE actors at groomers. | mula sa panulat ni Geli Mendez

September 24, 2026 0 comment

HEADLINES HOT STORIES OF THE WEEK NEWS

Usapin sa Voting Threshold, Natuldukan na Ayon sa Prosecution

written by DWIZ 882

Malinaw na para sa House Prosecution Team ang usapin sa voting threshold o kinakailangang bilang ng boto para sa conviction matapos ang naging ruling ng Senate Impeachment Court sa impeachment case laban kay Vice President Sara Duterte.

Sa press conference, ikinatuwa ni House Lead Prosecutor Gerville Luistro ang naging aksyon ng senator-judges na itakda ang voting threshold batay sa kanilang interpretasyon ng constitutional mandate.

Ayon kay Luistro, may “exclusive power” o kapangyarihan ang Senado na magpasya sa mga usapin kaugnay ng impeachment case, upang mas plantsado ang kinakailangang boto para sa conviction.

Aniya, natapos na ang debate sa tanong kung ilang boto ang kailangan para sa conviction o acquittal.

Iginiit ni Luistro na malinaw ang desisyon ng senator-judges matapos makakuha ng 13 na botong pabor, isa ang kontra, at anim naman ang hindi lumahok sa pagpapatibay ng voting threshold batay sa mga senador na dumadalo sa impeachment trial.

Una nang inimbitahan ng senator-judges ang mga “amici curiae” upang hingan ng legal na pananaw at karanasan kaugnay ng kinakailangang bilang ng boto para sa conviction. | mula sa panulat ni Geli Mendez

September 24, 2026 0 comment

HEADLINES HOT STORIES OF THE WEEK NATIONAL NEWS NEWS

DOE, Nakikipag-ugnayan na sa DOTr para sa Hirit na Dagdagan ang Kasalukuyang Fuel Subsidy sa mga Benepisyaryo

written by DWIZ 882

Patuloy ang pakikipag-ugnayan ng Department of Energy o DOE sa Department of Transportation o DOTr kaugnay ng posibleng dagdag sa kasalukuyang P12 per liter fuel subsidy para sa mga kwalipikadong benepisyaryo.

Sa ambush interview kaugnay sa 2027 budget ng DOE sa Kamara, sinabi ni Energy Secretary Sharon Garin, hindi pa niya makumpirma kung itataas o palalawakin ang subsidiya dahil ang DOTr ang namamahala sa transport sector.

Aniya, nagbibigay lamang ang DOE ng payo at regular update sa presyo ng langis maging ang monitoring sa ipinatutupad na presyo sa mga gasolinahan.

Paliwanag ni Garin, kailangang munang matukoy kung ilan ang makikinabang at magkano ang kakailanganing pondo bago pagdesisyunan ang anumang pagbabago.

Samantala, wala pa ring tiyak na projection ang DOE sa posibleng rollback sa susunod na linggo dahil nakabatay ito sa limang araw na galaw ng world oil prices. | mula sa panulat ni Geli Mendez

September 24, 2026 0 comment

HEADLINES NEWS

Fully Functional na Digital System para sa mga Benepisyaryo ng 4Ps, Tiniyak ng DSWD sa Kamara

written by DWIZ 882

PANTAWID PAMILYANG PILIPINO PROGRAMA 4PS DSWD

Tiniyak ng Department of Social Welfare and Development o DSWD na magiging fully functional bago matapos ang taon ang bagong digital system para sa mas mabilis na pag-monitor sa mga benepisyaryo ng Pantawid Pamilyang Pilipino Program o 4Ps.

Ito ang sinabi ni Appropriations Vice Chair JC Nava, matapos ang pag-usisa ni Philreca Party-list Rep. Presley De Jesus sa deliberasyon ng Kamara para sa 2027 national budget.

Ayon kay Nava, magbibigay ang bagong sistema ng real-time tracking sa status ng mga benepisyaryo.

Layunin nitong mapabilis ang pag-update sa listahan ng mga pamilyang nakaabot na sa self-sufficiency at dapat nang matanggal sa programa.

Kasunod ito ng pag-flag ng COA sa mga overpayment sa ilang benepisyaryo dahil sa delay sa pag-update ng kanilang status.

Sa pamamagitan ng digitalization, inaasahang bibilis ang palitan at integration ng datos at mababawasan ang anumang pagkakamali. | mula sa panulat ni Geli Mendez

September 24, 2026 0 comment

HEADLINES HOT STORIES OF THE WEEK NEWS

Deliberasyon Para sa Panukalang Budget ng Office of the President, Tinapos na ng Kamara

written by DWIZ 882

Tinapos na ng Kamara ang plenary deliberations sa panukalang P10.156-billion 2027 budget ng Office of the President o O.P.

Sa deliberasyon ng pambansang pondo, naging mainit ang talakayan matapos ungkatin ni ACT Teachers Party-list Rep. Antonio Tinio ang mga isyu laban sa Local Government Support Fund o LGSF, Confidential at Intelligence Funds o CIF, at ang flood control scandal.

Kinuwestyon din ni Tinio ang paraan ng paggawad ni Pangulong Ferdinand Marcos Jr. ng LGSF kay Naga City Mayor Leni Robredo at sa iba pang lokal na pamahalaan.

Bilang tugon, sinabi ni House Appropriations Senior Vice Chairman Albert Garcia, na ang LGSF ay ipinatutupad batay sa mga guideline ng General Appropriations Act o GAA at ipinatutupad lamang ng ehekutibo batay sa itinakdang guidelines.

Sinabi rin ni Garcia na ginagamit ang CIF para sa kaligtasan at seguridad, kabilang ang pag-aresto kay Alice Guo at paglansag sa mga illegal POGO at scam.

Humingi naman si Tinio ng kopya ng report at breakdown ng CIF, at iginiit na dapat managot ang mga sangkot sa flood control scandal, kabilang si Pangulong Marcos.

Sinabi ni Garcia, na may nagpapatuloy nang imbestigasyon gaya ng Ombudsman, DOJ, at iba pa kung saan, marami na ring nakakulong kabilang na sina dating House Speaker Martin Romualdez at Sen. Jinggoy Estrada.

Samantala, terminated na rin ang deliberasyon sa budget ng Presidential Communications Office at Presidential Management Staff. | mula sa panulat ni Geli Mendez

September 24, 2026 0 comment

HEADLINES

KITA SA MGA NEGOSYO, HINDI PA SAPAT PARA MAIPALIWANAG ANG PAGLAKI NG YAMAN NI VP SARA AYON SA PROSECUTION

written by DWIZ 882

Para sa House Prosecution Team, hindi pa rin naipapaliwanag ng mga kita mula sa mga negosyo ni Vice President Sara Duterte ang pagtaas ng kanyang yaman batay sa idineklarang Statement of Assets, Liabilities and Net Worth o SALN.

Matatandaang tumaas ang kanyang net worth mula sa P71.66-million noong 2022, patungong P98.66-million noong 2025.

Ayon kay House Trial Spokesperson Zia Alonto Adiong, malinaw na tumaas ng aabot sa P27 million ang kanyang kita habang siya ay nasa posisyon bilang bise presidente.

Sa cross-examination, inamin ng SEC official na si Gerardo Del Rosario na hindi obligadong magdeklara ng dibidendo ang isang kumpanya kahit ito ay kumikita.

Para kay Adiong, hindi pa rin nasasagot ng depensa kung saan nanggaling ang pagtaas ng net worth ni VP Sara.

Malinaw aniya, na maaaring kumita ang isang kumpanya nang hindi ipinapamahagi sa mga shareholder nito ang kita bilang dibidendo.

Patuloy namang ikinukumpara ng prosecution ang SALN ni VP Sara sa corporate records, tax, bank at iba pang financial records na magdidiin sa Article II ng Articles of Impeachment na tumutukoy sa hindi maipaliwanag na yaman ni VP Sara. | via Geli Mendez (DWIZ Patrol)

September 23, 2026 0 comment

HEADLINES

Villar’s statement

written by DWIZ 882

ahayag ni Villar
Setyembre 18, 2026

Nalaman namin sa pamamagitan ng mga ulat sa media ang tungkol sa mga reklamong iniulat na inihain sa Office of the Ombudsman. Sa ngayon, hindi pa namin natatanggap ang mga kopya ng mga nasabing reklamo kaya hindi pa kami makapagbibigay ng makabuluhang komento hinggil sa mga partikular na alegasyon na nakapaloob dito.

Iginagalang namin ang proseso ng batas at tutugon kami sa mga reklamo sa tamang panahon at sa nararapat na forum. Kumpiyansa kami na kapag nabigyan ng pagkakataong masuri ang mga alegasyon at ang mga ebidensiyang sumusuporta sa mga ito, lubos at maayos naming maipagtatanggol ang aming mga karapatan at matutugunan ang mga isyung ibinibintang laban sa amin.

Samantala, hinihiling namin na hayaan munang umusad ang legal na proseso at iwasang bumuo ng mga konklusyon bago mabigyan ang lahat ng panig ng sapat na pagkakataong marinig at maipahayag ang kanilang panig.

September 18, 2026 0 comment

Newer Posts

Older Posts