Nangako ang bagong tagapagsalita ng Philippine National Police o PNP na lalabanan niya ang pagpapakalat ng ‘fake news’ at iba pang propaganda.
Sa kanyang unang araw sa puwesto, sinabi ni PNP Spokesman Chief Superintendent John Bulalacao na mahalagang matukoy ng publiko kung ano ang mga totoong balita at impormasyon, at kung ano ang mga kasinungalingan lamang.
Tiniyak din ni Bulalacao na bubuo sila ng mga hakbang para maging mas ‘transparent’ at pagkatiwalaan sila ng publiko.
Ilalabas din aniya nila ang mga accomplishment o tagumpay ng PNP sa pagpapatupad ng batas at pagapapanatili ng kapayapaan.
Pinalitan ni Bulalacao si Chief Superintendent Dionardo Carlos na nagsimula nang umupo bilang pinuno ng Aviation Security Group (AVSEGROUP).
