Krystine Belen

Patay ang isang lalaki matapos itong barilin ng pinaghihinalaang kalaguyo ng kanyang live-in partner sa kanilang tirahan sa Brgy. Zone 14-A, Talisay City, Negros Occidental.

Kinilala ang biktimang si Jaylord Lamag, 28 anyos.

Batay sa imbestigasyon, natutulog ang biktima kasama ang kanyang live-in partner nang dumating ang 40 anyos na suspek.

Biglang nagising ang biktima dahil sa tahol ng mga aso. Nang lumabas ito upang silipin kung ano ang nangyayari, dito na siya binaril ng suspek.

Idinala ang biktima sa ospital kung saan ito nawalan ng buhay dahil sa tama ng bala sa batok.

Arestado naman ang suspek na nagtago sa bahay ng kanyang kaibigan sa Brgy. Dos Hermanas at sasampahan ng kasong murder.

Nakatanggap ng tulong pinansyal at pangkabuhayan ang 14 na dating miyembro ng Communist Party of the Philippines-New People’s Army (CPP-NPA) sa Brgy. Agan-an, Sibulan, Negros Oriental.

Ang mga natanggap na benepisyo ng mga sumukong rebelde ay mula sa Enhanced-Comprehensive Local Integration Program (E-CLIP) ng Department of the Interior and Local Government (DILG).

Nagkaloob din ng P5,000 cash assistance ang Provincial Veterinary Office sa bawat beneficiary.

Bukod rito, nagbigay ang Provincial Agriculture Office ng native chicken, vegetable seedlings, at reading materials; habang isang sako ng bigas at food packs ang ipinamahagi ni Gov. Manuel Sagarbarria sa pamamagitan ng Provincial Social Welfare and Development Office.

Dead on the spot ang isang lalaki, habang sugatan ang asawa nito, sa nangyaring pamamaril sa Antipolo, Rizal.

Batay sa ulat, nagmamaneho ng sedan ang biktimang kinilalang si Abad Antonius Lazaro, 48 anyos, sakay ang asawa nitong si Grace, nang pinagbabaril ang mga ito ng mga naka-motorsiklong suspek sa kahabaan ng Sumulong Highway sa Brgy. Mayamot.

Namatay ang lalaki sa pinangyarihan ng krimen, habang natamaan ng bala sa binti ang asawa nito at kasalukuyang nagpapagaling sa ospital.

Iniimbestigahan na ang pagkakakilanlan ng mga suspek at ang mga posibleng motibo sa likod ng krimen.

Bumaba ng 11.46% ang naitalang kaso sa Baguio noong 2023.

Ito ang iniulat ng Baguio City Police Office (BCPO) na ibinahaging 1,706 na krimen ang naitala ng pulisya noong nakaraang taon; samantalang 1,927 naman noong 2022.

Kabilang sa mga nangungunang krimen sa Baguio ang pagnanakaw, pisikal na pananakit, at panggagahasa.

Iniulat din ng BCPO na 100% drug-cleared na ang lungsod.

Hinikayat naman ng pulisya ang publiko na agad i-report kung may mapansing ilegal na aktibidad sa lugar.

Arestado ang isang pulis na pinaghihinaalang nanggahasa ng kanyang sariling anak sa Cebu.

Batay sa ulat, dating miyembro ng special unit ng Cebu Police Provincial Office (CPPO) ang suspek.

Ayon kay Police Major Windel Abellana, information officer ng CPPO, huling hinalay ng suspek ang 14 anyos na anak nitong babae noong March 17.

Nagtungo ang biktima at ang ina nito sa istasyon ng pulis upang isumbong ang nangyaring insidente.

Agad namang tumakas ang suspek, ngunit naaresto rin sa manhunt operation ng Liloan Police Station.

Tiniyak ng Police Regional Office-Central Visayas (PRO-7) na magsasagawa sila ng kaukulang aksyon laban sa suspek.

Samantala, isasailalim naman ang menor de edad na biktima sa stress debriefing.

Sinibak na sa trabaho ang isang guro mula sa University of Cebu (UC) Banilad Campus matapos itong makuhaan ng video na nanghihikayat sa mga estudyante na magpakamatay.

Ito ang kinumpirma mismo ni UC Chancellor Candice Gotianuy.

Sa video  na naunang nag-viral sa TikTok, maririnig ang hindi pa pinangalanang lalaking instructor na nagsasabing wala siyang pakialam kung mag-suicide ang mga mag-aaral.

Aniya,  “blissful gift” at ikatutuwa niya pa ang pagpapakamatay ng mga ito.

Marami na rin ang nag-reklamo sa naturang guro sa isang social media page dahil sa panghihipo at pamamahiya nito sa mga estudyanteng miyembro ng LGBTQ+ community.

Samantala, isang linggong sinuspinde ang klase ng mga mag-aaral na kasalukuyang sumasailalim sa counseling.