Judith Estrada-Larino

Sinimulan na ng ilang pribadong kumpanya ang pagsasalang sa coronavirus disease 2019 (COVID-19) test sa kanilang mga empleyado matapos bahagyang paluwagin ang restrictions sa ilalim ng modified enhanced community quarantine (MECQ).

Kabilang dito ang Globe Telecom na linggo linggong magsasagawa ng rapid antibody testing ng frontliners nito o katumbas ng 15% ng 8,000 empleyado nito.

Sumasalang na rin sa COVID-19 test ang mga empleyado ng Villar group of companies gamit ang rapid tests na inaprubahan ng FDA.

Samantala ipinabatid naman ni Ramon Ang, President at COO ng San Miguel Corporation na uunahin nilang isalang sa RT PCR test ang kanilang security at iba pang maintenance staff na aniya’y nangangalaga sa kanilang opisina bago ang iba pa nilang empleyado na unti-unti nang babalik sa kanilang trabaho.

Patuloy ang nararanasang mainit at maalinsangang panahon sa Metro Manila at iba pang bahagi ng bansa.

Ayon sa PAGASA pumalo sa 41 degrees celsius ang heat index ang alinsangang naramdaman sa bahagi ng Science Garden sa Quezon City bandang ala una y medya ng hapon at pumapalo naman sa 35.4 degrees celsius ang air temperature sa nasabing lugar sa kaparehong oras.

Samantala limang synoptic stations nila ang nakapagtala ng pinakamaalinsangang panahon kahapon.

Kabilang dito ang ambulong, Tanauan City Legazpi City att Sangley Point sa Cavite City – pawang nasa 47 degrees celsius ang naramdamang heat index at Science of Muñoz at Roxas City na nasa kapwa 45 degrees celsius ang naramdamang alinsangan.

Ibinabala muli ng PAGASA ang panganib ng heat stroke mula sa heat cramps at heat exhaustion na kapag umabot sa 41 hanggang 54 degrees celsius ang heat index.

Dahil dito pinayuhan ng PAGASA ang publiko na dalasan ang pag-inom ng tubig at iwasan ang anumang physical activity tuwing tanghali o hapon.

Mabagal pa rin umano ang validation process ng Department of Health (DOH) sa resulta ng mga isinasagawang coronavirus disease 2019 (COVID-19) tests.

Ipinabatid ni Dr. Althea De Guzman ng epidemiology bureau ng DOH na makalipas ang ilang buwan ay nasa 10 hanggang 12 araw pa rin ang pagproseso ng data sa confirmed COVID-19 cases bago ito maisapubliko.

Ang turnaround time aniya ay inaabot kadalasan ng 7 hanggang 10 araw habang ang dalawang araw naman ay ginugugol para maibigay sa local government units ang COVID-19 test results.

Inamin ni De Guzman na malaking hamon sa kanilang makuha ang real time data dahil paper based ang mga dokumento at maraming tanggapan pang dinadaanan ito.

Ikinaalarma ng Malakaniyang ang presensya nang nadiskubreng illegal medical facility para sa mga Chinese nationals na umano’y tinamaan ng coronavirus disease 2019 (COVID-19).

Binigyang diin ni Presidential Spokesman Harry Roque na tanging mga kuwalipikadong doktor ang maaaring mag-practice ng medisina sa bansa at ang mga gamot ay aprubado dapat ng Food and Drug Administration (FDA).

Sinabi ni Roque na kakasuhan ang mga nahuli sa Fontana Leisure Park dahil sa paglabag sa dalawang batas kaugnay sa pagpa-practice ng medisina ng walang lisensya at gumamit ng gamot na hindi aprubado ng FDA.

Una nang ni-raid ng mga pulis ang loob ng Fontana Leisure Park na ikinonvert sa isang pharmacy at seven bed hospital para sa Chinese nationals.

Kinondena ng Philippine Medical Association (PMA) ang naging pahayag ni Presidential Adviser for Entrepreneurship Joey Concepcion III laban sa rekomendasyon ng isang grupo ng mga doktor na huwag gumamit ng coronavirus disease 2019 (COVID-19) rapid test kits para sa mga OFW’s.

Ayon kay PMA President Jose Santiago, Jr. uncalled for o hindi makatuwiran ang nasabing pahayag ni concepcion laban sa mga doktor na nagtatrabaho para makatulong na magamot ang mga tinamaan ng sakit.

Iniimbitahan aniya nila si Concepcion para sa isang guided tour ng medical facilities lalo na sa COVID-19 referral hospitals para makita ang mga ginagawa ng mga doktor at iba pang medical frontliners.

Binigyang diin ni Santiago na naninindigan ang PMA na hindi sila naglalabas ng anumang pahayag ng walang pag-aaral o pagsasaliksik at anumang rekomendasyon ay ginagawa ng mga experts sa kanilang larangan.

Una nang humingi ng paumanhin si Concepcion at nagsabing ang kaniyang naging pahayag ay hindi laban sa lahat ng mga doktor.