Judith Estrada-Larino

Naibigay na ng Department of Health  (DOH) ang tulong pinansyal sa pamilya ng ilan sa mga nasawing health care worker na tinamaan ng coronavirus disease 2019 (COVID-19).

Ipinabatid ni Health Undersecretary Maria Rosario Vergeire na naiabot na ang unang death benefit check sa mga naulila ng isa sa mga health care workers.

Mayruon din aniyang dalawa pang tseke na naibigay na sa pamilya ng dalawang naulila ng nasawing health care workers sa Region 11.

Sampu pa aniyang pamilya ang makakatanggap na rin ng tulong pinansyal matapos maipadala ang tseke sa regional offices ng DOH.

Una nang inako ni Health Secretary Francisco Duque III ang responsibilidad sa nabinbing pagbibigay ng tulong pinansyal sa mga health workers na naapektuhan ng COVID-19.

Ito ayon kay Duque ay bagamat dismayado siya sa nasabing usapin.

Tiniyak ni Duque na susundin ng ahensya ang isinasaad sa ilalim ng Bayanihan to Heal as One Act at ipagkakaloob ang karampatang benepisyo sa pamilya ng mga nasawing health care worker gayundin ang iba pang naapektuhan ng COVID-19.

Nagkasa na ng fixed schedule nang bus augmentation program ng Department of Transportation (DOTr) sa MRT 3.

Ayon sa DOTr aalis ang bus ng kada limang minuto, puno man o hindi ng pasahero.

Gagamitin ng mga bus ang dedicated median lanes sa kahabaan ng EDSA para matiyak ang mas mabilis na biyahe ng mga pasahero.

Sa kasalukuyan ay mayruong loading stations ang bus augmentation ng DOTr sa MRT 3 North Avenue station at Quezon Avenue station samantalang ang unloading naman o babaan ay sa Ayala station at Taft station.

Para sa northbound ang loading stations ay sa MRT 3 Taft station at Ayala station at ang unloading o babaab ay sa Ayala station, Quezon Avenue station at north avenue station.

Sa ilalim ng MRT 3 bus augmentation program ang unang bus ay aalis ng 5:30 a.m. ng umaga habang ang huling bus ay lalarga ng 8:00 p.m. ng gabi.

Inaasahan na ng Department of Labor and Employment (DOLE) ang pagtaas ng unemployment rate sa bansa sa gitna na rin ng coronavirus disease 2019 (COVID-19) pandemic.

Kasunod na rin ito ng report ng Philippine Statistics Authority (PSA) sa maituturing na record high unemployment rate na 17. 7% o katumbas ng 7.3-M  mga Pilipinong walang trabaho.

Ayon kay Labor Secretary Silvestre Bello III nagdulot talaga ng krisis sa ekonomiya ang COVID-19 pandemic kung saan dahil sa pagpapairal ng community quarantine ay napakaraming establishment ang napilitang magsara pansamantala o kaya’y magpatupad ng flexible work arrangements.

Milyun-milyon aniyang manggagawa sa formal at informal sectors ang naapektuhan ng global health crisis.

Subalit tiwala si Bello na makaka recover na rin ang labor market dahil unti-unti nang nakapagbubukas ang mga kumpanya.