Judith Estrada-Larino

Inamin ni Health Undersecretary at Food and Drug Administration (FDA) Director General Eric Domingo na ikinagulat nya ang babala ng ahensya laban sa sikat na produktong Reno liver spread.

Sa katunayan, ipinabatid sa DWIZ ni Domingo na makailang beses pa niyang ipina-verify ang estado ng nasabing brand na talagang nabigong maiparehistro sa FDA.

Ayon pa kay Domingo, maaaring hindi na rin napansin noon ng kanilang mga tauhan na hindi naka rehistro ang naturang brand ng liver spread dahil nasa merkado na ito bago pa man mabuo ang FDA at ilipat dito ang product registration.

Bukod pa aniya ito sa unang nakikita ng inspection team ng FDA ay mga kahina-hinalang produkto at hindi inakalang hindi pa rehistrado ang Reno liver spread na kilalang produkto sa halos ilang dekada na.

Sa ngayon bibigyan sila ng pagkakataon na mag-explain at magpakita ng mga dokumento, kung wala talaga, it would have to be recalled and pulled out in the market,” ani Domingo. —sa panayam ng Santos at Lima sa 882

Sinuspinde ni Transportation Secretary Arthur Tugade ang ipinatutupad simula noong Lunes na 0.75-meter physical distance ng mga pasahero sa mga pampublikong sasakyan.

Ipinabatid ito ni Presidential Spokesman Harry Roque kaya’t balik sa 1-meter ang distansya ng mga pasahero sa public transportation.

Sinabi ni Roque na tanging ang Pangulong Rodrigo Duterte lamang ang makakapagpasya kung pananatilihin sa standard na 1-meter o babawasan ang physical distance ng mga sumasakay sa public utility vehicles.

Ayon pa kay Roque, posibleng sa Lunes na magpalabas ng desisyon ang Pangulong Duterte sa nasabing usapin sa kaniyang lingguhang ulat sa bayan dahil ngayong araw pa lamang isusumite ng Inter-Agency Task Force (IATF) ang report hinggil dito.

Naglunsad ng Facebook page ang Land Transportation Franchising and Regulatory Board (LTFRB) para tumugon sa mga katanungan hinggil sa Public Utility Vehicles Modernization Program (PUVMP).

Ayon sa LTFRB, sasagutin ng Facebook page na LTFRB PUVMP Project Management Office ang lahat ng tanong mula sa mga PUV drivers at operators.

Sinabi ng LTFRB na layon ng hakbangin nilang malimitahan ang pagtungo ng drivers at operators sa kanilang tanggapan para maiwasan ang maraming tao at maasunod na rin ang physical distancing measures.

Kaugnay nito, nagtalagan ng staff ang PUVMP para patuloy na i-monitor ang mga e-mails at mensahe para kaagad makatugon.

Pinayuhan ng LTFRB ang publiko na isulat ang pangalan ng transport service entity/operator, pangalan ng authorized representative, contact number, ruta at number of authorized units at number of operational units para sa existing operators.

Nagbabala ang Food and Drug Administration (FDA) kaugnay sa pagbili ng ilang brand ng Chinese medicine.

Sinabi ng FDA na hindi rehistrado sa ahensya ang Jinling Fast Act Cold Capsules at Wong Tai Chiu Medicine Ser Lee Tan, batay sa kanilang isinagawang post marketing surveillance.

Nangangahulugan itong hindi tiyak na ligtas at mabisa ang mga nasabing gamot kayat maaaring maging mapanganib ito sa kalusugan ng publiko.

Hindi isyu sa Clean Air Philippines Movement, Inc. (CAPMI) ang pagbabawas ng physical distance ng mga pasahero sa mga pampublikong sasakyan.

Ayon ito kay Dr. Leo Olarte, pangulo ng naturang grupo, sa gitna na rin nang pagtatalo sa usaping nang pagbabawas ng distansya ng mga pasahero sa public transportation.

Sinabi sa DWIZ ni Olarte na pinakamahalaga sa paglaban sa coronavirus disease 2019 (COVID-19) ang regular na paghuhugas ng kamay, pagsusuot ng face mask at face shield at huwag magsasalita, kakain at hindi gagamit ng cellphone, base na rin sa naging pag-aaral ng isang unibersidad sa Amerika.

‘Yung analysis, ‘yung findings ng Duke University sa North Carolina, America; ang sinasabi doon ng mga siyentipiko, mga doktor, nadiskubre nila na pagka gumamit ka ng face mask at face shield at hindi mo binubuksan ang bibig mo —no talking, no eating, no drinking, no cellphone, inside a public transportation, ang COVID risk —walang transmission, umaabot ng 99%. Kasi ang pagkalat ng virus is galing sa bibig at sa ilong,” ani Olarte. —sa panayam ng Balitang Todong Lakas

Iiyak sa budget hearing ang mga ahensya ng gobyerno na hindi sumusuporta sa report at rekomendasyon ng senado kaugnay sa mga dapat managot sa mga katiwalian sa PhilHealth.

Tiniyak ito ni Senate President Vicente Sotto III matapos madismaya at magulat sa report ng Task Force PhilHealth kung saan hindi kasama sa mga pinakakasuhan sina Health Secretary Francisco Duque III at dating Senior Vice President for Legal Sector Rodolfo Del Rosario.

Subalit nilinaw ni Sotto na hindi naman nila iipitin ang budget ng mga ahensyang hindi susuporta sa kanilang report pero dadaan aniya ito sa matinding pagbusis ng senado.

Sinabi ni Sotto na sana ay mayroon pang dagdag na irerekomendang kasuhan tulad ng naging pahayag ng Department of Justice (DOJ) at sana ay kabilang na rito sina Duque at Del Rosario.

Iginiit ni Sotto na hindi katanggap-tanggap ang mga palusot kung bakit hindi nakasama sina Duque at Del Rosario sa mga pinakakasuhan tulad ng mga may kinakaharap na pandemya kaya’t hindi natutukan, hindi pumirma at hindi alam ng kalihim ang ipinatupad na kuwestyonableng interim reimbursement mechanism.

Ito, ayon kay Sotto, ay dahil kasama si Duque sa mga Zoom meeting ng PhilHealth officials kung saan nagkaroon pa ng bull session o sigawan. —ulat mula kay Cely Ortega-Bueno

Nararapat lamang na ma-promote si National Capital Region Police Office (NCRPO) Chief Police Major General Debold Sinas.

Ayon ito kay Philippine National Police (PNP) Chief Police General Camilo Cascolan bagamat kailangan pa ring ma-evaluate ang performance ni Sinas.

Sinabi ni Cascolan na mananatiling hepe ng NCRPO si Sinas na marami rin namang nagawang mabubuting bagay.

Posible aniyang mapunta sa directorial staff si Sinas o isang posisyon na kuwalipikado ito lalo na’t expert ito sa pagsasanay sa mga personnel at recruits.

Samantala, inamin ni Cascolan na ikinukunsidera bilang NCRPO Chief si Calabarzon Police Chief Police Brigadier General Vicente Danao na posibleng maitalaga rin bilang Criminal Investigation and Detection Group chief.