Nakatakdang muling humarap sa publiko bukas ang Pangulong Rodrigo Duterte.
Ayon ito kay Presidential Spokesman Harry Roque matapos bumalik ng davao ang pangulo nitong weekend.
Ang pangulo ay inaasahang magbibigay ng update sa coronavirus disease 2019 (COVID-19) response ng gobyerno sa kaniyang lingguhang talumpati.
Ang pangulo ay pabalik balik na lamang sa Davao at Maynila para sa trabaho at makapiling din ang kaniyang pamilya.
Iginigiit ng ilang senador ang pagtatakda ng minimum standard para sa internet speed sa iba’t ibang bahagi ng bansa.
Ito, ayon sa mga senador, ay para matiyak ang maayos na connectivity sa gitna na rin ng coronavirus disease 2019 (COVID-19) pandemic.
Nakasaad sa Senate Bill 1831 o panukalang better internet act ang minimum download speed na dapat mai-provide ng telecommunications company at internet service providers sa kanilang subscribers.
Batay sa panukala nina Senador Ralph Recto, Senadora Grace Poe at Senador Manny Pacquiao, nasa 10Mbps ang fixed broadband at 5MBps ang mobile broadband sa mga highly urbanized cities, 5Mbps para sa fixed broadband at 3MBps sa mobile broadband services sa lahat ng iba pang lungsod at 3MBps para sa fixed broadband at 2MBps sa mobile broadband services sa rural areas.
Inatasan ang mga internet provider na sumunod sa mga nasabing itinakdang speed sa loob ng tatlong taon mula sa pagiging epektibo ng panukala.
Para maprotektahan naman ang mga consumer, pinagbawalan ang mga telco at providers sa pag-aadvertise ng internet service speeds na hindi naman nito maibibigay
Hindi bababa sa P200,000 hanggang P2-milyon ang itinakdang multa sa kada bilang nang paglabag ng internet provider.
Nangangamba ang isang grupo na maaaring maging sunod na “Province of China” ang Sangley Point sa Cavite.
Ito ayon sa Pinoy Aksyon for Governance and the Environment (Pinoy Aksyon) ay dahil Chinese company ang contractor sa Sangley International Airport Project.
Sinabi ng grupo na nakapagtataka at imposible ang pahayag ni Executive Secretary Salvador Medialdea na hindi nito batid na ang nasabing Chinese company ay nakablacklist sa Amerika matapos masangkot sa reclamation sa West Philippine Sea.
Ipinabatid ni Pinoy Aksyon Convenor Bencyrus Ellorin na mismong si Foreign Affairs Secretary Teodoro Locsin, Jr. ang nagbabala laban sa pagkakasangkot ng China Communications and Construction Company Limited sa Sangley Point International Airport Project.
Kasabay nito, sinuportahan ng Pinoy Aksyon ang panawagan ng Philippine Navy at ilang mambabatas na panatilihin sa Sangley Point ang naval stations.
Naglatag ng tinaguriang 7 commandments ang isang grupo ng medical experts para mapanatiling ligtas kontra COVID-19 ang mga sasakyan ng pampublikong transportasyon.
Ayon sa grupong pinangungunahan ni dating Health Secretary Manuel Dayrit para matiyak ang kaligtasan kontra virus ng mga pasahero sa public transportation dapat magsuot ng anti-virus masks, face shield, huwag magsasalita, huwag kumain, tiyakin ang sapat na ventilation o hangin.
Bukod pa ito sa madalas na pag-disinfect, walang symptomatic passengers at maging vigilant sa tamang physical distancing na maaaring mas mababa sa isang metro.
Kabilang sa grupo ni Dayrit sina UP Manila College of Public Health Dean Dr. Vicente Belizario, Jr. Dating Undersecretary at Government Adviser Dr. Teodoro Herbosa, UP Manila Environmental and Occupational Health Department Chair Dr. Michael Hernandez.
Pasok din sa grupo ni Dayrit sina Philippine College of Surgeons Cancer Commission Director Dr. Manuel Francisco Roxas, dating Health Secretary Dr. Esperanza Cabral, Founder at CEO ng EY Bank Foundation of the Philippines Dr. Maria Dominga Padilla at Infectious Disease Specialist Dr. Rontgene Solante.
Pinangangambahang pumalo sa record high na 2 milyon ang mga sanggol na ipapanganak sa susunod na taon.
Ito ayon kay Undersecretary Juan Antonio Perez III, executive director ng Commission on Population and Development (POPCOM) ay dahil sa COVID-19 lockdown.
Sinabi ni Perez na posibleng malampasan ng bilang ng live births sa 2021 ang record na 1.7 million noong 2012 bago maipasa ang Reproductive Health Law.
Hindi kumbinsido si Senador Panfilo Lacson sa naging pahayag ni DICT secretary Gregorio Gringo Honasan na “not that bad” o hindi naman daw ganun kasama ang internet speed sa bansa.
Sinabi ni Lacson na iginagalang niya ang nasabing pahayag ni Honasan subalit medyo masama ang dating nito na katumbas ng ‘not so good’ o hindi ganun kaganda.
Iginiit ni Lacson na sa gitna nang nararanasang pandemya kung saan mahalaga ang virtual communication ang dapat na marinig sa kalihim ng DICT ay ‘good enough, very good’ o mas maganda kung excellent ang sitwasyon ng internet speed sa banca.
Ayon naman kay Senate President Vicente Tito Sotto III na naging konserbatibo lamang si Honasan sa kanyang pagsasalarawan sa estado ng internet speed sa bansa at hindi nito talaga masabing maganda subalit hindi rin naman ganun kasama.
Subalit binigyang diin ni Sotto na malinaw na mayroong pangangailangan para paghusayin ang internet speed at internet connection sa bansa.
Nilinaw ng third telco na babayaran nito ng cash ang AFP para sa pag-lease ng mga space sa loob ng mga kampo ng militar para sa pagtatayo ng towers at equipment nito.
Ayon kay Atty. Adel Tamano, Chief Administrative Officer ng Dito Telecommunity Corporation nakasaad sa memorandum of agreement kung magkano ang ibabayad nila sa AFP bilang renta sa mga espasyo sa military camps at hindi ito libre.
Sinabi naman ni Dito Chief Technology Officer Rodolfo Santiago na ang kumpanya ang unang telco na pinagbabayad ng cash ng AFP at ito aniya ang dahilan kaya’t mismong si AFP Chief of Staff Gilbert Gapay ang nais na magrepaso sa mga kasunduan sa telcos.
Sumirit na sa 276,298 ang kabuuang kumpirmadong kaso ng COVID-19 sa bansa.
Ito ayon sa Department of Health (DOH) ay kasunod ng 3, 375 na bagong infections at siyang ika-10 araw na mahigit na 3,000 bagong kaso ang naiulat.
Nangunguna pa rin ang Metro Manila sa nakapagtala ng pinakamataas na bagong kaso ng COVID-19 sa 963, sumunod ang Bulacan -448, Cavite – 274, Negros Occidental – 153 at Batangas – 119.
Samantala pumapalo na sa 208,096 ang total recoveries matapos maitala ang 317 na mga bagong gumaling mula sa nasabing virus.
Umakyat na rin sa 4,785 ang death toll kung saan nadagdag ang 53 bagong nasawi sa COVID-19.
Nasa 63, 408 ang active cases kung saan 87.5% ang mild, 8.7% ang asymptomatic, 1.1% ang severe at 2.7% ang critical condition.
Timbog ang umano’y hitman ng isang kidnap-for-ransom group na nag-ooperate sa Metro Manila, Central Luzon at Calabarzon.
Kinilala ng mga otoridad ang suspek na si Diosito Sagrada, dating miyembro ng Philippine Army at umano’y hitman ng pangilinan kidnap-for-ransom group na nauugnay din sa kidnapping activities sa tatlong rehiyon.
Isinilbi ng mga pulis ang arrest warrant laban kay Sagrada sa bahay nito sa Barangay 186 sa kasong kidnapping with homicide.
Nagtatago na ang mga miyembro ng grupo lalo na ang pinuno nitong si Mel Pangilinan.
Dinala na sa AKG Headquarters sa Camp Crame para sa kaukulang interogasyon.
Dalawang option ang inilatag ng Pangulong Rodrigo Duterte kaugnay sa kapalaran ng PhilHealth.
Sa kanilang pakikipagpulong sa pangulo kagabi, ipinabatid ni Senate President Vicente Sotto III na nais ng pangulo na buwagin na lamang o kaya naman ay isapribado ang PhilHealth.
Subalit sinabi ni Sotto na iminungkahi niya sa pangulo na bigyan muna ng ilang buwan ang bagong pinuno ng PhilHealth para linisin at ayusin ang pamamalakad sa ahensya na sinang ayunan naman aniya ng punong ehekutibo.
Ayon kay Sotto, nabanggit niya sa pangulo ang panukala niyang gawing chairman of the board ng PhilHealth ang Finance secretary sa halip na Health secretary dahil ang ahensya ay isang insurance corporation at hindi health entity o tanggapang may kinalaman sa kalusugan.
Hindi naman aniya nabanggit ng pangulo ang rekomendasyon ng senado na sibakin at kasuhan si Health Secretary Francisco Duque III bagamat nais niya itong talakayin din sana sa nasabing pulong. —ulat mula kay Cely Ortega-Bueno