Judith Estrada-Larino

Gagawing vaccine stations ang mga himpilan ng pulisya.

Ayon ito sa Pangulong Rodrigo Duterte, kapag naging available na sa merkado ang bakuna kontra coronavirus disease 2019 (COVID-19).

Sinabi ng pangulo na madaling puntahan ang mga police station kung saan maaari lamang pumila ang mga tao para magpaturok ng bakuna.

Pabiro namang inihayag ng pangulo na sa tainga tuturukan ng bakuna ang mga drug addict samantalang ang mga rebelde na nais magpabakuna ay dapat magtungo sa mga kampo ng militar para dumiretso na sa stockade.

Pinangangambahang madiskaril ang pag-apruba sa panukalang 2021 budget dahil sa power struggle sa kamara at bangayan ng ilang kongresista sa infrastructure funds para sa legislative district sa ilalim ng panukalang budget ng Department of Public Works and Highways.

Sinabi ni Senate Minority Floor Leader Franklin Drilon na posibleng makaapekto sa kanilang timeline o kalendaryo para sa pagpapasa ng pambansang budget sa susunod na taon ang iringan sa mababang kapulungan.

Subalit, sana aniya ay hindi ito mangyari dahil nahaharap pa sa pandemya ang bansa at maraming mga Pilipino ang nawalan ng trabaho.

Iginiit ni Drilon na mahalagang maipasa ang panukalang budget bago matapos ang taong ito dahil nagbibigay ito ng spending authority sa gobyerno.

Kung hindi magiging reenacted ang budget sa pagpasok ng 2021, nangangahulugan itong hindi mapopondohan ang mga bagong programa hanggat hindi naipapasa ang pambansang budget sa susunod na taon.

Ayon pa kay Drilon, malaki ang posibilidad na may koneksyon sa 2022 elections ang bangayan ng mga kongresista sa budget. —ulat mula kay Cely Ortega-Bueno

Pinayagan na ng Pangulong Rodrigo Duterte ang deployment ng mas maraming healthcare professionals sa ibang bansa.

Sinabi ni Presidential Spokesman Harry Roque na uubra nang makaalis ng bansa ang mga healthcare workers na mayroong kontra hanggang ika-31 ng Agosto at mabebenepisyuhan dito ang mahigit 1,500 nurses at iba pang health workers.

Magugunitang tanging ang mga healthcare employees lamang na mayroong government issued overseas employment certificates at verified work contracts hanggang nitong ika-8 ng Marso ang exempted sa temporary deployment ban sa medial at allied health workers.

Exempted din sa bansa ang mga nagbabakasyong health workers na mayroon pang kontrata sa ibang bansa.

Positibo sa coronavirus disease 2019 (COVID-19) si Bureau of Corrections (BuCor) Director Gerald Bantag.

Una nang nagpa-swab test si Bantag matapos magpositibo sa virus ang dalawa sa close in personnel nito ang kaniyang driver at kaniyang security aide.

Sinabi ni Bantag na nag-chill siya at mataas ang kaniyang temperatura bukod pa sa nakaranas siya ng bahagyang pananakit ng ulo at pag-ubo ng dalawang gabi bago niya makuha ang resulta ng kaniyang COVID-19 test.

Wala naman na aniya siyang sintomas sa ikalawang gabi, bagamat kinukumpleto niya ang quarantine sa kanilang opisina sa BuCor.

Una nang nagpositibo sa COVID-19 ang spokesman ng BuCor na si Gabriel Chaclag. —ulat mula kay Bert Mozo

Maagang inabisuhan ni Manila Police District Director Brigadier General Rolando Miranda si Ermita Police Station Commander Lt. Col. Ariel Caramoan kaugnay sa dapat i-deploy na mga otoridad sa inaasahang pagdagsa ng tao sa artificial white sand area ng Manila Bay nitong nakalipas na weekend.

Sinabi sa DWIZ ni Miranda na sumunod naman si Caramoan subalit hindi sapat ang mga ipinadala nitong puwersa ng kapulisan para magsilbing crowd control sa area.

Ayon pa kay Miranda, hindi nagpakita si Caramoan sa lugar nang sumugod siya doon matapos ipaabot sa kanyang nagkakagulo na ang mga taong nais masilayan ang white sand area ng Manila Bay.

Siya na aniya ang nakiusap sa mga tao para umayos lalo na ‘yung mga nasa footbridge na talagang nagsiksikan makakuha lang ng larawan ng white sand area.

Ako na mismo ‘yung nag-manage, nakikipagtalo na ako doon sa mga tao na mag-social distancing, then I supervised the DENR, ‘yung mga taong nandodoon na sibilyan. ‘Yung mga tao sa bridge pinababa ko lahat ‘yan. So, I was waiting for him to come over, wala naman din sya. Ang dumating lang doon ay si Col. Salvador na aking Deputy for Operation to help me out. Nagbigay naman sya ng instruction sa mga tao nya kaya I decided to administratively relieved him for a while,” ani Miranda. —sa panayam ng Santos at Lima sa 882

Hinimok ni Labor Secretary Silvestre Bello III ang Department of Health (DOH) na igiit ang pagtataas sa sahod ng mga nurse at doktor sa pribadong sektor.

Kasunod na rin ito nang pagsusulong ng Department of Labor and Employment (DOLE) na maitaas ang suweldo ng health care workers para piliin ng mga itong manatili na lamang sa Pilipinas kaysa mangibang bansa.

Sinabi ni Bello na ang malaking pagkakaiba sa sahod ng healthcare workers sa public at private sectors ang isa sa mga nakikita nilang dahilan kaya’t maraming nurse at doktor ang mas ginugustong ipagpatuloy ang kaniyang propesyon sa ibayong dagat.

Ang mga nurse sa private hospital ay nagta trabaho ng 10 hanggang 12 oras kada araw sa suweldong P18,000 kada buwan na mas mababa sa natatanggap ng mga nasa pampublikong ospital.

Ayon pa kay Bello, may pagkakataon ding kailangan pang magbayad ng training fee ng mga nurse sa mga pribadong ospital kapalit ng dalawang taong experience na kailangan para makapag trabaho sa ibang bansa.

Inihayag ni Bello na matagal na nilang binabantayan ang kalagayan ng nurses sa pribadong sektor subalit hindi sila makakilos dahil kakaunti lamang ang nagrereklamo.