Judith Estrada-Larino

Hindi na nagulat ang paggigiit ng Pangulong Rodrigo Duterte na maipatupad na ang 2016 arbitral ruling kaugnay sa claim ng Pilipinas sa West Philippine Sea.

Ayon ito sa political analyst na si Professor Ramon Casiple, dahil mapapahiya ang Pilipinas kung hindi igigiit na maipatupad ang nasabing desisyon lalo na’t maraming bansa na ang sumusuporta sa claim ng Pilipinas sa West Philippine Sea.

Subalit sinabi sa DWIZ ni Casiple na mayroong kinalaman sa eleksyon sa Amerika ang pagbanggit ng pangulo sa nasabing isyu  kung saan pangunahing sumusuporta sa bansa ang Estados Unidos.

Mapapahiya tayo, e. Tayo ang nanalo,ang US ang nag-invoke. Ang tagal na n’yan, e, pero hindi masyadong tinutulak ng Pilipinas. Hindi lang Amerika [ang nag-invoke], pati sa Europe, ilang bansa din ‘yon na nagsalita na rin kaya lumalaki ngayon ‘yung issue na ‘yan, at ang posibilidad na makuha natin ang suporta ng mundo,” ani Casiple. —sa panayam ng Balitang Todong Lakas

Umalma ang ilang electric scooter owners sa planong pagregulate sa kanila ng Land Transportation Office (LTO).

Ayon sa ilang may-ari ng electric scooters, hindi pa napapanahong maghigpit sa kanila dahil sa nararanasang pandemya lalo na’t malaking tulong ang electric scooter bilang transportasyon.

Hindi anila sila susugal sa mga pampublikong transportasyon kung saan malaki ang tyansang magkahawahan ng coronavirus disease 2019 (COVID-19).

Una nang inihayag ni LTO Chief Edgar Galvante na may binubuo silang administrative order kaugnay sa paggamit ng e-scooters at ito aniya ay naisumite na nila kay Transportation Secretary Arthur Tugade.

Nakasaad sa plano ang pagpaparehistro sa mga scooter at pagkakaroon ng lisensya ng mga gumagamit nito.

Batay sa datos ng Electric Kick Scooter Philippines, tumaas ng 110% ang bumili ng e-scooter sa bansa mula noong Mayo hanggang Hulyo kumpara noong nakalipas na taon.

Nagpatupad ng shutdown ang Facebook management sa maraming pekeng accounts at pages sa Pilipinas.

Ang mga pekeng accounts at pages, ayon kay Facebook head of security policy Nathaniel Gleicher, ay na-trace sa ilang indibidwal mula sa Fujian Province of China.

Kabilang sa binura ang mga hindi tunay na accounts at pages na sumusuporta sa Pangulong Rodrigo Duterte at sa posibleng presidential bid ng anak na si Davao City Mayor Sara Duterte-Carpio.

Sinabi ni Gleicher na nagpopost ng mga impormasyon sa mga pekeng Facebook pages at accounts sa wikang Chinese, Filipino at English.

Binasag na ni Congressman Lord Allan Velasco ang katahimikan nito sa isyu ng term sharing sa house leadership.

Ayon kay Velasco, pinili na niyang manahimik simula pa lamang nang mabuo ang gentleman’s agreement nila ni House Speaker Alan Peter Cayetano bilang respeto na rin dito.

Subalit, nilinaw ni Velasco na ang pananahimik niya sa usapin ay hindi nangangahulugang hindi na siya interesado o tinalikuran na niya ang term sharing agreement nila ni Cayetano.

Bilang paggalang din sa kanilang kasunduan, sinabi ni Velasco na hindi niya hinangad na makipagkumpetensya kay Cayetano dahil naniniwala siyang may tamang panahon na nakalaan para sa kanya.

Hindi naman aniya tamang gawing sukatan sa kanyang leadership style ang tahimik na pagta trabaho at pagsuporta sa administrasyon pati na rin ang pagsasakatuparan sa legislative agenda ng Pangulong Rodrigo Duterte.

Hindi pa hinog para sa modified general community quarantine (MGCQ) ang Metro Manila.

Ayon ito kay Dr. Antonio Dans, convenor ng Healthcare Professionals Alliance Against COVID-19, dahil hindi sapat na dahilan ang pagbubukas ng ekonomiya para luwagan ang quarantine restrictions sa kalakhang Maynila.

Tila sumuko na aniya ang gobyerno sa laban kontra coronavirus disease 2019 (COVID-19) kung ikakatuwiran na hindi na kaya ng ekonomiya dahil aanhin pa ng kabuhayan kung wala na ang buhay.

Sinabi ni Dans na hindi ekonomiya ang kuwestyon sa usapin kundi ang kapasidad ng gobyerno na tugunan ang pandemya.

Inihayag pa ni Dans na malaking factor sa paglaban sa pandemya ang internet connection dahil malaking bagay ang mga pinakahuling data na dapat malaman kung saan halos tatlong linggo ang inabot bago makumpleto ang bilang ng mga nasawi dahil manual ang data transmission.

Una nang inihayag ni Trade and Industry Secretary Ramon Lopez na maaari nang isailalim sa MGCQ ang Metro Manila matapos ang ika-30 ng Setyembre para makapagbukas na ang mas maraming sektor ng ekonomiya.

Pinatitigil muna ni Ombudsman Samuel Martires ang pagsasagawa ng lifestyle check sa mga nasa gobyerno.

Ito, ayon kay Martires, ay dahil marami ang nabibiktima ng Republic Act 6713 o ang code of conduct and ethical standards of public official and employees at nasasalang sa iba’t ibang interpretasyon.

Sinabi ni Martires na maraming kailangang baguhin sa naturang batas kayat hinihiling niya sa kongreso na maamiyendahan ito.

Binigyang diin ni Martires na walang sinuman ang may karapatang husgahan ang isang empleyado ng gobyerno dahil may kani-kaniyang priority ang bawat isa.

Mayroon aniyang nagtatrabaho sa gobyerno na mas pinipiling mamuhay na mas mataas sa kaniyang kinikita na hindi naman dapat pakialaman.

Paliwanag pa ni Martires, mayroong mas inuuna ang ibang bagay tulad ng mamahaling sasakyan at iba pang materyal na bagay at isinasantabi ang iba samantalang ang iba ay nangungutang para sa kanilang mga gustong bilhin.

Hindi na muna bibigyan ng periodic exam ang mga estudyante sa mga pampublikong paaralan.

Ayon ito kay Education Undersecretary Diosdado San Antonio kaya’t ang mga written outputs at performance tasks na lamang ang gagamitin para i-assess ang kaalaman ng mga estudyante.

Maaari rin naman aniyang magsulat ang mga bata ng mga natutunan sa leksyon o makapagrecord ng isang talumpati na nagpapaliwanag ng kanilang pang-unawa sa pinag-aralan.

Sinabi pa ni San Antonio na posible ring malimitahan ang distance cheating kung tatanggapin ang periodic exams lalo pa’t may ilang magulang o guardian ang sumasagot sa mga activity sheet ng mga mag-aaral.

Subalit nilinaw ni San Antonio na hindi naman obligado ang private schools na gawin o sumunod sa naturang polisiya.

Magugunitang nitong Marso ay hindi na itinuloy ng Department of Eduction ang final exam para sa fourth quarter ng nakalipas na academic year matapos magsara ang mga paaralan bunsod ng coronavirus disease 2019 (COVID-19) pandemic.

Handang bumaba sa puwesto si House Speaker Alan Peter Cayetano.

Ito, ayon kay Cayetano, ay kung ayaw na sa kanya ng mga kapwa kongresista niya.

Sinabi ni Cayetano na hindi niya kailangang ipilit ang kaniyang sarili para pamunuan ang kamara.

Subalit hindi naman aniya uubrang susunod ang mababang kapulungan sa panggugulo ng isa o dalawang kongresista lamang.

Ayaw pa ring paawat ng mga tao para masilayan ang artificial white sand sa Manila Bay.

Ngayong araw na ito ay pinagbigyan ng mga otoridad ang publiko na makaakyat sa footbridge at makakuha ng larawan ng white sand.

Subalit saglit lamang at hindi pupuwedeng sabay-sabay ang pananatili sa footbridge.

Inatasan din ang mga dumarating na pumila muna at hintayin ang kanilang pagkakataon para maka-akyat sila sa footbridge.

Ang bahagi ng Manila Bay kung saan makikita ang puting buhangin ay isinara muna matapos magkagulo at dagsain ng tao nitong nakalipas na weekend, dahilan kaya’t bigong maipatupad ang physical distancing.

Tinukoy na ng Department of Science and Technology (DOST) ang 13 ospital na pasok sa solidarity trial ng World Health Organziation (WHO) para sa coronavirus disease 2019 (COVID-19) vaccines.

Sinabi ni DOST Secretary Fortunato Dela Peña na inaprubahan na ng Inter-Agency Task Force (IATF) ang mga inirekomendang ospital na mangangasiwa sa walong trial zones na pagdarausan ng solidarity trial.

Kabilang sa mga natukoy na ospital sa National Capital Region (NCR) ang Philippine General Hospital, Manila Doctors Hospital, San Lazaro Hospital, Lung Center of the Philippines, St. Luke’s Medical Center-Quezon City, Research Institute for Tropical Medicine, Makati Medical Center, The Medical City at St. Luke’s Medical Center-BGC.

Samantala, ilan sa mga ospital ay nasa mga lalawigan tulad ng Vicente Sotto Memorial Medical Center at Chong Hua Hospital sa Cebu City, Dela Salle Health Sciences Institute sa Cavite at Southern Philippines Medical Center sa Davao City.

Ang WHO solidarity trial ay magsisimula sa susunod na buwan at inaasahang makukumpleto sa second quarter ng 2021.