Judith Estrada-Larino

Obligado nang magpa-quarantine sa mga pasilidad na aprubado ng gobyerno ang mga positibo sa Corona Virus Disease 2019 (COVID-19) na asymptomatic at mayroong mild symptoms.

Ayon kay Presidential Spokesman Harry Roque nakasaad sa resolusyon ng IATF na mandatory sa asymptomatic at mild cases ang facility vase quarantine maliban sa mga pasyenteng itinuturing na vulnerable o may comorbidities o maaaring  may kumplikasyon.

Sinabi ni Roque na may exception din kung ang mga ligtas COVID -19 center sa isang rehiyon ay okupado na at walang sapat na isolation facilities ang Local Government Unit (LGU).

Nakatakdang magsagawa ng systems upgrade at maintenance activities ang Land Bank of the Philippines (LBP), simula bukas ng alas-11 ng gabi.

Ayon sa abiso ng LBP, hanggang alas-11 ng umaga ng Sabado hindi magagamit ang kanilang mga serbisyo tulad ng automated teller machine (ATM), cash deposit machines, iAccess, mobile banking app, Land Bank phone access, Link.BizPortal, electronic tax payment system, electronic modified disbursement system, Digital Onboarding System.

Bukod pa ito sa Digital Corner and Website, Digital Onboarding System Ofbank, Land Bank Remittance System, Land Bank card transactions via Bancnet and Visa at Landbank card transactions via Point-Of-Sale.

Magkakaroon ng 5 araw na emergency maintenance ang PLDT.

Batay sa abiso ng kumpanya sisimulan ng operator ng International Trans Pacific Submarine Cable System na Asia America gateway ang maintenance sa kanilang submarine cables alas-8 ng umaga bukas, ika-25 Setyembre hanggang ala-5 ng hapon sa Miyerkules, ika-30 ng Setyembre

Sinabi ng PLDT na magkakaroon ng minimize impact sa kanilang subscribers ang nasabing maintenance activities ng Asia America gateway.

Tiniyak naman ng PLDT na tuloy ang kanilang serbisyo sa lahat ng kanilang subscribers gayundin ng Smart subscribers.

Nakasilip ng peligro ang PHILVOLCS sa mismong area kung saan itatayo ang Bulacan International Airport.

Ayon kay PHIVOLCS Director Renato Solidum ,malambot ang lupa at madalas binabaha ang Barangay Taliptip sa bayan ng Bulakan kung saan itatayo ang P736 bilyong airport project.

Sa kanyang pagharap sa pagdinig ng senado kaugnay sa airport franchise sinabi ni solidum na ang pagtatayuan ng airport ay pangunahing nababalot ng buhangin at napakababaw ng water table.

Ang river environment aniyang ito ay nangangailangan ng special engineering interventions upang maging matatag ang mga gusali at imprastruktura sa mga panganib na dulot ng lindol o malakas na pag ulan.

Binigyang diin ni Solidum na para matuloy ang proyketo,kailangan nito ng Disaster Risk Reduction at business continuity protocols kasama ng konstruksyon nang angkop na drainage system.

Gayunman nilinaw ni Solidum na ang nasabing airport project ay wala naman sa loob ng valley fault system na dumadaloy sa malaking bahagi ng Luzon landmass.

Samantala, tiniyak naman ng San Miguel Corporation na siyang nangangasiwa sa nasabing airport project na sinosolusyunan na nila ang mga concerns ng PHIVOLCS.

Sa katunayan, ipinabatid ni Melissa Encanto-Tagarda, pinuno ng government relations unit ng SMC ay mayroon silang foreign partners na expert sa airport construction at safety designs.

Makikipagtulungan ang Armed Forces of the Philippines (AFP) sa Facebook para labanan ang pagsasamantala ng mga terorista sa internet at maging kampanya laban sa insurgency.

Tiniyak ito ni AFP Chief of Staff General Gilbert Gapay matapos makipagpulong online kay Clare Amador, head of public policy ng Facebook sa Pilipinas.

Ayon kay Gapay, natutuwa ang AFP sa ginagawang self-regulation ng grupo para mapigilan ang pagkalat ng terrorist propaganda kabilang ang mga larawan at video ng karahasan.

Mayroon aniyang mga dokumentadong kaso kung saan nagagamit ng mga terorista ang social media sa kanilang recruitment activities.

Sinabi ni Gapay na nais ng AFP na magkaroon ng aktibong partnership sa social media sites para mapigilan ang paglaganap ng violent extremism na hindi nalalabag ang kalayaan at karapatan ng social media users.

Siniguro rin ng AFP at maging ng PNP na paiigtingin nila ang kanilang kampanya laban sa npa at mga terorista sa pamamagitan ng pag monitor sa Facebook at iba pang social media platform kaugnay sa recruitment na ginagawa ng mga naturang teroristang grupo.

Lehitimo ang isang page na kabilang sa mahigit 150 umano’y pekeng pages at groups na isinara ng Facebook.

Ayon kay Armed Forces of the Philippines (AFP) Chief of Staff Lt. Gen. Gilbert Gapay, ang Hands off Our Children page ay binuo ng isang grupo ng mga magulang  para proteksyunan ang mga kabataan laban sa recruitment ng mga komunista.

Sinabi ni Gapay na maituturing na urgent ang mga panawagan sa nasabing Facebook page sa gitna na rin nang patuloy na recruitment machinery ng New People’s Army (NPA) na bumibiktima sa mga estudyante.

Mahalaga aniya ang nasabing Facebook page para maitaas ang awareness sa pagiging lantad ng mga kabataan sa communist front organizations.

Isinusulong ni U.S. Congresswoman Susan Wild ang house resolution 8313 o Philippine human rights act.

Tinawag ni Wild ang Duterte administration bilang ‘brutal regime’ na ang tina-target ay labor organizers, mga manggagawa at kalaban sa pulitika.

Nakasaad din sa inihaing resolusyon ni wild ang pagtigil sa pagpopondo ng Amerika hanggat hindi napapatunayang natapos na o natigil na ang mga pag-atake ng gobyernong Duterte.

Binigyang diin ni Wild na hindi dapat payagang magamit ang pondo ng Amerika sa paglabag ng karapatang pantao at dignidad ng mga tao.

Katuwang ni Wild sa paggigiit ng naturang resolusyon ang 23 pang kapwa kongresista.

Lusot na sa ikatlo at huling pagbasa ng kamara ang bagong broadcasting franchise ng University of the Philippines System.

Matapos makakuha ng 211 votes, aprubado na ang House Bill 7616 na nagre-renew ng prangkisa ng UP System sa ilalim ng Republic Act 816 sa susunod na 24-taon.

Sa ilalim ng panukala, pinapayagan ang UP na magtayo at mag-operate ng radio at TV broadcasting stations for educational purposes sa loob ng unibersidad at iba pang lugar na sakop ng operasyon nito.

Nakasaad din sa panukala ang pag-ayuda ng UP System broadcasting stations sa gobyerno sa aspeto ng public information at education.